1, 2. ¿Baʼax jeʼel k-tuklik yaan horaeʼ?

 MAʼ XAANEʼ yaan horaeʼ jeʼel u tuklik máak lelaʼ: «¿Táan wa u núukik Jéeoba in oraciónoʼob?». Wa bey u yúuchultechoʼ maʼ a tuklik, yaʼab sukuʼunoʼobeʼ láayliʼ bey u tuukuloʼoboʼ, maases kéen u máansoʼob problemas. Maʼ xaaneʼ tak tiʼ toʼon jeʼel u yúuchul beyoʼ, wa táan k-muʼyajeʼ maʼ t-jáan tsʼáaik cuenta bix u núukik Jéeoba k-oraciónoʼob.

² Teʼ xookaʼ yaan k-ilik baʼaxten jeʼel u páajtal k-confiar de ke Jéeobaeʼ ku núukik u oración le máaxoʼob meyajtikoʼ (1 Juan 5:15). Tsʼoʼoleʼ yaan k-ilik baʼaxten yaan horaeʼ jeʼel k-tuklik maʼ tu núukaʼal k-oraciónoʼobeʼ. Yaan xan k-ilik le jejeláas formaʼob bix u núukik Jéeoba le oraciónoʼoboʼ.

3. ¿Baʼaxten u kʼáat Jéeoba ka orarnakoʼon tiʼ?

³ Le Bibliaoʼ ku yaʼalikeʼ Jéeobaeʼ jach u yaabiltmoʼon yéetel jach koʼoj k-tojol tu táan (Ageo 2:7; 1 Juan 4:10). Letiʼeʼ u kʼáat ka orarnakoʼon tiʼ utiaʼal k-kʼáatik u yáantaj (1 Ped. 5:6, 7). U kʼáat xan ka pʼáatkoʼon naatsʼ tiʼ letiʼ utiaʼal u chúukpajal k-óol kéen yanaktoʼon problemas.

4. ¿Baʼaxten k-aʼalikeʼ Jéeobaeʼ ku núukik k-oraciónoʼob? (Ilawil xan le dibujooʼ).

⁴ Le Bibliaoʼ ku yeʼesik bix tu núukil Jéeoba u oraciónoʼob le máaxoʼob meyajt úuchjeakiloʼ. Maʼ xaaneʼ ku taal ta tuukul u ejemplo rey David, letiʼeʼ yaʼab u enemigoʼob anchaji  pero suuk u orar kaʼach tiʼ Jéeoba utiaʼal u kʼáatik u yáantaj. Juntéeneʼ tu yaʼalaj tiʼ Jéeoba: «Jéeoba Dios, uʼuy in oración. Chʼenxikint bix in sen kʼáatiktech áantaj. Núuk in oración, techeʼ chúukaʼan a wóol yéetel ka beetik baʼax toj» (Sal. 143:1). Jéeobaeʼ tu núukaj u oraciónoʼob yéetel tu yáantaj (1 Sam. 19:10, 18-20; 2 Sam. 5:17-25). Le oʼolal Davideʼ tu yaʼalaj: «Jéeobaeʼ tiaʼan naatsʼ tiʼ tuláakal le máaxoʼob chʼaʼchiʼitik u kʼaabaʼoʼ». Toʼon xaaneʼ k-confiar de ke Jéeobaeʼ yaan u núukik k-oraciónoʼob (Sal. 145:18).

5. Aʼal junpʼéel ejemplo eʼesik bix tu núukil Jéeoba u oración le máaxoʼob meyajt úuchjeakiloʼ (ilawil xan le dibujooʼ).

⁵ Maʼ xaaneʼ Jéeobaeʼ maʼ ken u núuk k-oración jach jeʼex k-páaʼtikoʼ. Lelaʼ bey úuchik tiʼ apóstol Pablooʼ. Letiʼeʼ tu yaʼaleʼ yaan kaʼach junpʼéel kʼiʼix chʼiikil tu bakʼel, maʼ xaaneʼ lelaʼ junpʼéel baʼax táan kaʼach u muʼyajtik. Letiʼ túuneʼ óoxtéen tu kʼáataj tiʼ Jéeoba ka luʼsaʼaktiʼ. ¿Núukaʼab wa u oración? Núukaʼabi, pero maʼ bey jeʼex u páaʼtik kaʼachoʼ. Tu lugar u luʼsaʼal le problema tiʼoʼ, Jéeobaeʼ tu tsʼáaj u muukʼil tiʼ utiaʼal ka chúukpajak u yóol u meyajte (2 Cor. 12:7-10).

6. ¿Baʼaxten yaan horaeʼ jeʼel u tuklik máak maʼ tu núukaʼal u oración tumen Jéeobaeʼ?

⁶ Maʼ xaaneʼ toʼon xaneʼ maʼ tun núukbil k-oración jach jeʼex k-páaʼtikoʼ. Pero jeʼel u páajtal k-confiar de ke Jéeobaeʼ mantatsʼ yaan u kaxtik k-utsil. Letiʼeʼ jeʼel tak «u píitmáan u beetik tuláakal le baʼaxoʼob k-kʼáatkoʼ wa tuláakal le baʼaxoʼob ku taal t-tuukuloʼ» (Efe. 3:20). Maʼ xaaneʼ jeʼel u núukik k-oración teʼ súutuk maʼ táan k-páaʼtikoʼ wa junpʼéel bix maʼ máan t-tuukuliʼ.

7. ¿Baʼaxten yaan horaeʼ yaan u kʼaʼabéettal k-kʼexik le baʼaxoʼob k-kʼáatik tiʼ Jéeobaoʼ? Aʼal junpʼéel ejemplo.

⁷ Yaan horaeʼ kéen k-naʼat baʼax u kʼáat Jéeoba ka k-beeteʼ jeʼel u kʼaʼabéettal k-kʼexik le baʼaxoʼob k-kʼáatik ich oraciónoʼ. Koʼox ilik baʼax úuch tiʼ sukuʼun Martin Poetzinger. Maʼ sen úuch tsʼoʼokok u beeleʼ le naziʼoboʼ tu túuxtoʼob tiʼ junpʼéel campo de concentración. Tu káajbaleʼ ku sen kʼáatik tiʼ Jéeoba ka chaʼabak utiaʼal u yantal yéetel u yatan bey xan utiaʼal u seguer u kʼaʼaytaj. Chéen baʼaleʼ ka máan dos semanaseʼ tu tsʼáaj cuentaeʼ Jéeobaeʼ maʼ ten u beet u séeb jáalkʼabtaʼal. Le oʼolal le sukuʼunoʼ tu yaʼalajtiʼ: «Áanten in wil baʼax a kʼáat ka in beete». Ka tsʼoʼokeʼ káaj u máansik tu tuukul bix u yuʼubikuba le u  maasil sukuʼunoʼob kʼalaʼanoʼob teʼ campo de concentraciónoʼ. Yaʼab tiʼ letiʼobeʼ jach táan u tuklikoʼob u yatanoʼob yéetel u paalaloʼob. Le oʼolal le sukuʼun Poetzingeroʼ tu yaʼalaj tiʼ Jéeoba: «Jach kin tsʼáaiktech u graciasil yoʼolal le túumben meyaj tsʼoʼok a tsʼáaiktenaʼ. Áanten utiaʼal in líiʼsik u yóol le sukuʼunoʼoboʼ». Le sukuʼunoʼ jach bey tu beetiloʼ, tu líiʼsaj u yóol le sukuʼunoʼob tu yáamil le nueve años kʼalaʼanoʼ.

8. ¿Baʼax unaj k-kʼaʼajsik mantatsʼ?

⁸ Kʼaʼajaktoʼoneʼ Jéeobaeʼ yaan u béeykuntik tuláakal le baʼax u prometermaj jach teʼ kʼiin u tukultmoʼ. Yáanal u Reinoeʼ yaan u xuʼulsik tiʼ tuláakal le baʼaxoʼob beetik u muʼyaj wíinikoʼ, jeʼex le nukuch loobiloʼoboʼ, le kʼojaʼaniloʼoboʼ yéetel le kíimiloʼ (Dan. 2:44; Apo. 21:3, 4). Pero mientras u beetkeʼ táan u chaʼik tiʼ Satanás ka u gobernart le yóokʼol kaabaʼ (Juan 12:31; Apo. 12:9). b Jéeobaeʼ maʼ u luʼs tuláakal le baʼax ku muʼyajtik wíinikoʼ tumen wa ka u beeteʼ yaan u tuklaʼaleʼ jach maʼalob bix u gobernar Satanás. Yoʼolal leloʼ yaan u kʼaʼabéettal k-páaʼtik u béeytal le baʼaxoʼob u prometermaj Jéeobaoʼ, pero leloʼ maʼ u kʼáat u yaʼal wa maʼ ken u yáantoʼon teʼ kʼiinoʼobaʼ. Koʼox ilik jujunpʼéel baʼaloʼob ku beetik utiaʼal u yáantkoʼon.

9. ¿Bix u yáantkoʼon Jéeoba kéen k-chʼaʼ nukuch decisiónoʼob? Aʼal junpʼéel ejemplo.

⁹ Ku tsʼáaiktoʼon naʼat. Jéeobaeʼ ku tsʼáaiktoʼon naʼat le kéen k-chʼaʼ nukuch decisiónoʼob. Por ejemploeʼ ku yaʼalikeʼ jeʼel u yáantkoʼon kéen kʼaʼabéetchajak k-chʼaʼtuklik wa yaan u tsʼoʼokol k-beeleʼ (Sant. 1:5). Koʼox ilik baʼax úuch tiʼ juntúul kiik maʼ tsʼokaʼan u beel ku kʼaabaʼtik María. c Letiʼeʼ táan kaʼach u beetik u precursora regularil le ka tu kʼaj óoltaj juntúul sukuʼunoʼ. Letiʼeʼ ku yaʼalik: «Jach maʼalob bix k-bisikba, ka máan kʼiineʼ káaj k-enamorar. In wojel kʼaʼabéet kaʼach in chʼaʼtuklik baʼax ken in beete. Le oʼolal sen orarnajen tiʼ Jéeoba utiaʼal u yáantken, beyoʼ yaan in chʼaʼik junpʼéel maʼalob decisión». Maríaeʼ tu tsʼáaj cuentaeʼ áantaʼab tumen Jéeoba. ¿Bix áantaʼabik? Letiʼe ka tu kaxtaj teʼ publicaciónoʼob xookoʼob áant u yil baʼax ken u beetoʼ. Tsʼoʼoleʼ como u maama u testigo Jéeobaeʼ tu tsʼáaj maʼalob consejoʼob tiʼ. Tu tsʼoʼokeʼ Maríaeʼ tu chʼaʼaj junpʼéel maʼalob decisión.

10. Jeʼex u yaʼalik Filipenses 4:13, ¿bix u yáantik Jéeoba le máaxoʼob meyajtikoʼ? Aʼal junpʼéel ejemplo (ilawil xan le fotooʼ).

¹⁰ Ku yáantkoʼon utiaʼal u chúukpajal k-óol. Jéeobaeʼ jeʼel u yáantkoʼon utiaʼal u chúukpajal k-óol, jeʼex tu yáantil apóstol Pabloeʼ (xok Filipenses 4:13). Koʼox ilik bix tu  yáantil sukuʼun Benjamin. Le sukuʼunoʼ desde tu táankelmil kajlaj yéetel u familia teʼ campos de refugiados yaan Áfricaoʼ. Letiʼeʼ ku yaʼalik: «Mantatsʼ kin orar kaʼach tiʼ Jéeoba, kin kʼáatiktiʼ ka u yáanten in beet baʼax uts tu tʼaan. Letiʼeʼ tu núukaj in oraciónoʼob tumen tu yáanten utiaʼal maʼ in sen chiʼichnaktal, utiaʼal u seguer in kʼaʼaytaj yéetel tu tsʼáajten publicaciónoʼob utiaʼal u muʼukʼaʼantal in fe». Ku yaʼalik xan: «Úuchik in xokik bix áantaʼabik tumen Jéeoba uláakʼ sukuʼunoʼob utiaʼal u chúukpajal u yóoloʼobeʼ tu yáanten utiaʼal maʼ u lúubul in wóol yéetel u chúukpajal in wóol in meyajte».

11, 12. ¿Bix jeʼel u meyaj tiʼ Jéeoba le sukuʼunoʼob utiaʼal u núukik k-oraciónoʼoboʼ? (Ilawil xan le fotooʼ).

¹¹ Jeʼel u beetik u líiʼsaʼal k-óol tumen le sukuʼunoʼoboʼ. Le áakʼab antes tiʼ u kíimsaʼaloʼ Jesúseʼ sen orarnaj tiʼ Jéeoba. Tu yaʼalajtiʼ: «In Yuum, wa a kʼáateʼ luʼsten le copaaʼ. Chéen baʼaleʼ maʼ u beetaʼal baʼax in kʼáat, baʼaxeʼ beetaʼak baʼax a kʼáat». Jéeoba túuneʼ tu túuxtaj juntúul ángel utiaʼal u líiʼsik u yóol Jesús (Luc. 22:42, 43). Teʼ kʼiinoʼobaʼ Jéeobaeʼ jeʼel xan u péeksik le sukuʼunoʼob utiaʼal u líiʼskoʼob k-óoloʼ. Maʼ xaaneʼ jeʼel u péeksikoʼob utiaʼal u tʼankoʼonoʼob tiʼ teléfono wa u binoʼob u xíimbaltoʼonoʼob t-otoch. Kʼaʼajaktoʼoneʼ tuláakloʼon jeʼel u páajtal k-líiʼsik u yóol u maasil yéetel «junpʼéel jatsʼuts tʼaaneʼ» (Pro. 12:25).

¹² Koʼox ilik baʼax úuch tiʼ juntúul kiik ku kʼaabaʼtik Míriam. Como maʼ sen úuch kíimik u yíichameʼ letiʼeʼ jach yaachaj u yóol yéetel deprimirnaji. Chéen sen okʼol ku beetik kaʼachi yéetel ku yuʼubik kʼaʼabéet u tsikbaltik tiʼ wa máax bix u yuʼubikuba. Letiʼeʼ ku yaʼalik: «Tin wuʼuyaj minaʼan in wóol utiaʼal in tʼanik mix máak, le oʼolal orarnajen tiʼ Jéeoba. Jach teʼ súutukoʼ tʼaʼanen tumen juntúul anciano jach maʼalob k-bisikba tu yéetel». Le sukuʼun yéetel u yatanoʼ jach tu líiʼsoʼob u yóol. Míriameʼ tu tsʼáaj cuentaeʼ Jéeoba beet u tʼaʼanal tumen le sukuʼunoʼ.

13. ¿Bix u meyaj tiʼ Jéeoba le máaxoʼob maʼ testigoʼob utiaʼal u yáantik u kaajaloʼ? Aʼal junpʼéel ejemplo.

¹³ Jeʼel u beetik k-áantaʼal tumen le máaxoʼob maʼ Testigoʼoboʼ (Pro. 21:1). Yaan kʼiineʼ  Jéeobaeʼ jeʼel u péeksik le máaxoʼob maʼ Testigoʼob utiaʼal u yáantik u kaajaloʼ. Por ejemploeʼ, tu péeksaj rey Artajerjes utiaʼal u chaʼik u suut Nehemías u jel líiʼs Jerusalén (Neh. 2:3-6). Teʼ kʼiinoʼobaʼ Jéeoba xaneʼ jeʼel u péeksik le máaxoʼob maʼ Testigoʼob utiaʼal u yáantkoʼonoʼob kéen kʼaʼabéetchajkoʼ.

14. ¿Bix u líiʼsik a wóol u experiencia le kiik Soo Hingoʼ? (Ilawil xan le fotooʼ).

¹⁴ Juntúul kiik ku kʼaabaʼtik Soo Hingeʼ tu yilaj bix péeksaʼabik juntúul doctor tumen Jéeoba utiaʼal u yáantaʼal. U hijoeʼ desde tu chichnil ilaʼab yaan jejeláasil kʼojaʼaniloʼob tu tuukul. Tsʼoʼoleʼ ka máan kʼiineʼ le xiʼipaloʼ accidentarnaji. Yoʼolal leloʼ le kiik yéetel u yíichamoʼ anchaj u pʼatik u meyajoʼob utiaʼal u kanáantkoʼob, chéen baʼaleʼ pʼáat minaʼan taakʼin tiʼob. Como jach difícil le baʼax úuchtiʼoboʼ le kiikoʼ tu yuʼubaj minaʼan tuʼux u chʼaʼik u yiikʼ. Letiʼeʼ tu kʼáataj u yáantaj Jéeoba yéetel tu yaʼalajtiʼ jach bix u yuʼubikuba. Jéeoba túuneʼ tu péeksaj le doctor utiaʼal u yáantik le kiik yéetel u familiaoʼ. Yoʼolal leloʼ tsʼaʼabtiʼob áantaj tumen le gobiernooʼ yéetel tu kaxtoʼob junpʼéel lugar maʼ sen koʼoj utiaʼal u kajtaloʼobiʼ. Le kiikoʼ tu yaʼalaj: «T-tsʼáaj cuentaeʼ Jéeoba áantoʼon, letiʼeʼ jach tu jaajil ku yuʼubik le oraciónoʼoboʼ» (Sal. 65:2).

15. ¿Baʼax áant juntúul kiik utiaʼal u yilik wa táan u núukaʼal u oraciónoʼob?

¹⁵ U suukileʼ Jéeobaeʼ maʼ tu beetik nojoch milagroʼob utiaʼal u núukik k-oraciónoʼob. Pero le kéen u núukeʼ mantatsʼ ku tsʼáaiktoʼon le baʼax kʼaʼabéettoʼon utiaʼal u chúukpajal k-óoloʼ. Le oʼolaleʼ kʼaʼabéet k-jach ilik bix u núukik le baʼaxoʼob k-kʼáatiktiʼoʼ. Juntúul kiik ku kʼaabaʼtik Yokoeʼ tu yilaj bey maʼ táan u núukaʼal u oraciónoʼob tumen Jéeobaeʼ, le oʼolal káaj u tsʼíibtik tuláakal le baʼaxoʼob ku kʼáatiktiʼoʼ. Ka máan kʼiineʼ tu xokaj le baʼaxoʼob u tsʼíibtmoʼ ka tu tsʼáaj cuentaeʼ Jéeobaeʼ tu núukaj u maas yaʼabil u oraciónoʼob, tak le mix kʼajaʼantiʼ wa u tsʼíibtmoʼ. Toʼon xaneʼ cada wa baʼax kʼiineʼ maʼalob ka k-jóoʼs tiempo utiaʼal k-ilik bix táan u núukik Jéeoba le baʼaxoʼob k-kʼáatiktiʼoʼ (Sal. 66:19, 20).

16. ¿Baʼax kʼaʼabéet k-beetik kéen núukaʼak k-oraciónoʼob tumen Jéeoba? (Hebreos 11:6).

¹⁶ Kʼaʼabéet k-creertik yaan u núukaʼal  k-oraciónoʼob tumen Jéeoba, chéen baʼaleʼ kʼaʼabéet xan k-kʼamik le bix ken u núukiltoʼonoʼ (xok Hebreos 11:6). Koʼox ilik baʼax úuch tiʼ Mike yéetel Chrissy, u yatan. Letiʼobeʼ jach taak kaʼach u binoʼob Betel. Mikeeʼ ku yaʼalik: «Yaʼab u téenel t-túuxtaj k-solicitud yéetel t-aʼalaj tiʼ Jéeoba taak k-bin áantaj Betel, pero maʼ invitartaʼaboʼoniʼ». Chéen baʼaleʼ le sukuʼunoʼobaʼ confiarnajoʼob de ke Jéeobaeʼ yaan u tsʼáaikoʼob meyaj tuʼux maas kʼaʼabéet. Letiʼobeʼ seguernaj u tsʼáaik u yóoloʼob: binoʼob áantaj tuʼux maas kʼaʼabéet yéetel meyajnajoʼob tiʼ construcción. Bejlaʼeʼ le sukuʼunoʼ táan u beetik u superintendenteil tiʼ circuito. Mikeeʼ ku yaʼalik: «Jéeobaeʼ maʼ mantatsʼ tu núukaj k-oraciónoʼob jeʼex k-páaʼtikoʼ, pero tu núukajoʼob. Hasta maas maʼalob le baʼaxoʼob tsʼoʼok u tsʼáaiktoʼonoʼ».

17, 18. Jeʼex u yaʼalik Salmo 86:6 yéetel 7, ¿baʼax ken u beet Jéeoba?

¹⁷ (Xok Salmo 86:6, 7). Davideʼ jach ku creertik kaʼach ku yuʼubaʼal yéetel ku núukaʼal u oraciónoʼob tumen Jéeoba. Toʼon xaneʼ jeʼel u páajtal k-confiar bey u beetik t-éeteloʼ. Le baʼaxoʼob tsʼoʼok k-ilik teʼ xookaʼ ku yeʼesikeʼ Jéeobaeʼ jeʼel u tsʼáaiktoʼon naʼateʼ yéetel jeʼel u yáantkoʼon xan utiaʼal u chúukpajal k-óoleʼ. Tsʼoʼok k-ilik xaneʼ Jéeobaeʼ jeʼel u beetik u líiʼsaʼal k-óol tumen le sukuʼunoʼoboʼ wa jeʼel xan u péeksik le máaxoʼob maʼ Testigoʼob utiaʼal u yáantkoʼonoʼoboʼ.

¹⁸ Maʼ xaaneʼ Jéeobaeʼ maʼ mantatsʼ ken u núuk k-oraciónoʼob jach jeʼex k-páaʼtikoʼ, pero yaan u núukik. Letiʼeʼ yaan u tsʼáaiktoʼon le baʼaxoʼob kʼaʼabéettoʼon jach teʼ súutukil ku tuklik maas maʼaloboʼ. Le beetkeʼ maʼ unaj u xuʼulul k-orariʼ, unaj k-confiar de ke Jéeobaeʼ yaan u kanáantkoʼon teʼ kʼiinoʼobaʼ yéetel teʼ túumben luʼumoʼ yaan u «tsʼáaik baʼax ku tsʼíiboltik tuláakal baʼal kuxaʼan» (Sal. 145:16).