XOOK 20
KʼAAY 67 Kʼaʼayt u Tʼaan Dios
Kʼaʼaytajnakoʼon yoʼolal yaabilaj
«Yáaxeʼ unaj u tsikbaltaʼal tiʼ tuláakal le kaajoʼob le baʼaloʼob maʼalobtak ken u beet Diosoʼ» (MAR. 13:10).
BAʼAX KEN K-KANE
Teʼ xookaʼ yaan k-ilik bix u péeksikoʼon le yaabilaj utiaʼal k-kʼaʼaytaj yéetel kiʼimak óolaloʼ.
1. ¿Baʼaxoʼob aʼalaʼab teʼ reunión anual 2023?
JACH jatsʼutschaj le reunión anual 2023. a Teʼ reuniónaʼ jel tsolaʼab jujunpʼéel kaʼansajoʼob yéetel tsʼaʼab jujunpʼéel anuncioʼob yaan yil yéetel le kʼaʼaytajoʼ. Por ejemploeʼ tsoʼoleʼ maʼ xaaneʼ yaan u yantal jujuntúul máaxoʼob yaan u tsʼáaikubaʼob tu tséel Jéeoba kéen tsʼoʼokok u xuʼulsaʼal tiʼ le Nojoch Babiloniaoʼ. Aʼalaʼab xaneʼ desde noviembre tiʼ 2023, le publicadoroʼoboʼ maʼ ken u informartoʼob le bukaʼaj ku beetkoʼob teʼ kʼaʼaytajoʼ. ¿U kʼáat wa túun u yaʼal maʼ jach importante le kʼaʼaytajoʼ yéetel maʼ unaj k-beetik tu séebaʼaniliʼ? Maʼ, maʼ letiʼe baʼax u kʼáat u yaʼaloʼ.
2. ¿Baʼaxten cada kʼiin ku máaneʼ maas kʼaʼabéet k-kʼaʼaytaj? (Marcos 13:10).
2 Cada kʼiin ku máaneʼ maas kʼaʼabéet u yúuchul kʼaʼaytaj. ¿Baʼaxten? Tumen chéen junpʼíit kʼiin pʼaatal. Koʼoneʼex tuukul tiʼ le baʼax tu yaʼalaj Jesús yoʼolal le kʼaʼaytaj teʼ tu tsʼook kʼiinoʼobaʼ (xok Marcos 13:10). Tu Evangelioil Mateoeʼ Jesúseʼ tu yaʼaleʼ le baʼaloʼob maʼalobtak ken u beet le Reinooʼ yaan u kʼaʼaytaʼal tiʼ tuláakal yóokʼol kaab antes tiʼ u «taal u xuul» (Mat. 24:14). Le tekstoaʼ táan u tʼaan tiʼ le kéen xuʼulsaʼak le kʼasaʼan yóokʼol kaabaʼ. Jéeobaeʼ tsʼoʼok u chʼaʼtuklik ‹u kʼiinil yéetel u yorail› kéen úuchuk (Mat. 24:36; 25:13; Hech. 1:7). Cada kʼiin ku máaneʼ maas naatsʼ yanil (Rom. 13:11). Mientras maʼ kʼuchuk le xuʼulsajiloʼ kʼaʼabéet u seguer k-kʼaʼaytaj.
3. ¿Baʼaxten k-kʼaʼaytaj?
3 Maʼalob ka tuukulnakoʼon tiʼ le kʼáatchiʼaʼ: ¿Baʼaxten k-kʼaʼaytik le baʼaloʼob maʼalobtak ken u beet le Reinooʼ? K-beetik yoʼolal yaabilaj. Le kéen kʼaʼaytajnakoʼoneʼ k-eʼesik k-yaabiltmaj le baʼaxoʼob maʼalobtak ken u beet le Reinooʼ, k-yaabiltmaj le máakoʼoboʼ yéetel k-yaabiltmaj Jéeoba bey xan u kʼaabaʼ. Koʼoneʼex tʼaan tiʼ jujunpʼéel tiʼ le baʼaloʼobaʼ.
K-KʼAʼAYTAJ TUMEN K-YAABILTMAJ LE BAʼAXOʼOB KEN U BEET LE REINOOʼ
4. ¿Baʼax suuk u beetik máak kéen tsʼaʼabaktiʼ junpʼéel maʼalob noticia?
4 Jáan kʼaʼajs le kʼiin ka tsʼaʼabtech junpʼéel maʼalob noticiaoʼ. Por ejemploeʼ, ¿bix ta wuʼuyilaba le ka aʼalaʼabtech tsʼoʼok u yantal u chaambal juntúul a láakʼtsil wa tsʼaʼabtiʼ junpʼéel meyaj úuch joʼopʼok u kaxtik? Maʼ xaaneʼ jach kiʼimakchaj a wóol, le oʼolal taakchaj a tsikbaltik tiʼ a láakʼtsiloʼob wa tiʼ a amigoʼob. ¿Bey wa xan ta wuʼuyilaba le ka ta wojéeltaj le baʼaloʼob maʼalobtak ken u beet u Reino Diosoʼ? ¿Máasaʼ leloʼ jach tu jaajil junpʼéel maʼalob noticia?
5. ¿Bix ta wuʼuyilaba le ka káaj a xokik le Bibliaoʼ? (Ilawil xan le fotoʼoboʼ).
5 Kʼaʼajs bix ta wuʼuyilaba le ka káaj u tsʼaʼabaltech xook yéetel le Bibliaoʼ, jeʼex le ka ta kanaj u yaabiltmech Jéeoba yéetel u kʼáat ka yanakech ichil le máaxoʼob adorarkoʼ. Bey xan le ka ta kanaj yaan u xuʼulsik tiʼ le muʼyajiloʼ yéetel teʼ túumben luʼumoʼ yaan u kaʼa kuxkíintik le máaxoʼob a yaabiltmoʼ (Mar. 10:29, 30; Juan 5:28, 29; Rom. 8:38, 39; Apo. 21:3, 4). Tuláakal le baʼax ta kanaʼ kʼuch ta puksiʼikʼal (Luc. 24:32). Le oʼolal ta yaabiltaj le kaʼansajoʼobaʼ yéetel taakchaj a tsikbaltik tiʼ tuláakal máak (ket yéetel Jeremías 20:9).
Como jach kiʼimakchaj k-óol ka t-kanaj u jaajil teʼ Bibliaoʼ taakchaj k-tsikbaltik tiʼ tuláakal máak (Ilawil párrafo 5)
6. ¿Baʼax ku kaʼansiktech u experiencia Ernest yéetel Rose?
6 Koʼoneʼex ilik baʼax úuch tiʼ Ernest, b letiʼeʼ ku yaʼalikeʼ kex diez años yaantiʼ ka kíim u papá. Ku yaʼalik: «Kaʼacheʼ kin tuklik: ‹¿Tuʼux wal yaan in papáeʼ? ¿Teʼ kaʼanoʼ wa chéen xuʼulul tu beetaj u kuxtal?›. Ku yaatal in wóol ken in wil uláakʼ paalaloʼob kuxaʼan u papáʼob». Ernesteʼ sáamsamal kaʼach ku bin cementerio, ku xoltal teʼ tuʼux mukaʼan u papáoʼ yéetel ku yaʼalik: «Kiʼichkelem Yuum, jach taak in wojéeltik tuʼux yaan in papá». Le yaan kex 27 años tiʼoʼ aʼalaʼabtiʼ wa jeʼel u yóotik ka tsʼaʼabak xook tiʼ yéetel le Bibliaoʼ, letiʼeʼ tu yóotaj. Jach kiʼimakchaj u yóol le ka tu yojéeltaj le kimenoʼoboʼ maʼ u yojloʼob mix baʼaliʼ, bey jach tʼuubul u weenloʼobeʼ, yéetel le Bibliaoʼ ku yaʼalikeʼ yaan u kaʼa kuxkíintaʼaloʼob tumen Dios (Ecl. 9:5, 10; Hech. 24:15). ¡Hasta ka tu kaxtaj u núukil le kʼáatchiʼob úuch taakchajak u yojéeltikoʼ! Jach kiʼimak u yóol yoʼolal le baʼaxoʼob táan u bin u kanikoʼ. Rose, u yataneʼ, káaj xan u tsʼaʼabal xook tiʼ yéetel le Bibliaoʼ, letiʼ xaneʼ jach jatsʼuts tu yilil le baʼaxoʼob táan u kanikoʼ. Tu kaʼatúuliloʼob okjaʼanajoʼob tu añoil 1978. Tumen jach kiʼimak u yóoloʼobeʼ tu tsikbaltoʼob le baʼax táan u kankoʼob tiʼ u láakʼtsiloʼob, tiʼ u amigoʼob bey xan tiʼ u maasil máakoʼoboʼ. Ernest yéetel Roseeʼ tsʼoʼok u yáantkoʼob maas tiʼ 70 máakoʼob u beetubaʼob u testigoʼob Jéeoba.
7. ¿Baʼax ken k-beet wa jach tu jaajil k-yaabiltmaj le baʼaxoʼob ku kaʼansik le Bibliaoʼ? (Lucas 6:45).
7 Wa jach tu jaajil k-yaabiltmaj le baʼaxoʼob ku kaʼansik le Bibliaoʼ yaan u taaktal k-tsikbaltik tiʼ u maasil (xok Lucas 6:45). K-uʼuyikba jeʼex le discípuloʼob ka tu yaʼaloʼob: «Maʼ tu páajtal u xuʼulul k-tʼaan tiʼ le baʼaxoʼob tsʼoʼok k-ilik yéetel tsʼoʼok k-uʼuyikoʼ» (Hech. 4:20). Como jach k-yaabiltmaj le baʼaxoʼob ku kaʼansik le Bibliaoʼ ku taaktal k-tsikbaltik tiʼ le bukaʼaj máakoʼob ku páajtaleʼ.
K-KʼAʼAYTAJ TUMEN K-YAABILTMAJ LE MÁAKOʼOBOʼ
8. ¿Baʼax péeksikoʼon k-tsikbalt le baʼaloʼob maʼalobtak ken u beet le Reinooʼ? (Ilawil le cuadro « Eʼes yaabilaj: Kaʼans u maasil»; ilawil xan le fotooʼ).
8 Jeʼex Jéeoba yéetel Jesúseʼ toʼon xaneʼ k-yaabiltmaj le máakoʼoboʼ (Pro. 8:31; Juan 3:16). K-chʼaʼik óotsilil tiʼ le minaʼantiʼob esperanzaoʼ yéetel ‹minaʼan u Diosoʼoboʼ› (Efe. 2:12). Yoʼolal le sen problemas yaantiʼoboʼ ku yuʼubikoʼob bey tiaʼanoʼob tiʼ junpʼéel taamkach chʼeʼeneʼ. Pero toʼoneʼ yaantoʼon junpʼéel suum jeʼel u yáantkoʼob utiaʼal u jóokʼloʼobeʼ. Le suumaʼ letiʼe baʼaloʼob maʼalobtak ken u beet u Reino Diosoʼ. Tumen k-yaabiltmoʼob yéetel k-chʼaʼik óotsilil tiʼobeʼ k-beetik tuláakal le ku páajtal utiaʼal k-tsikbaltiktiʼob le baʼax ku kaʼansik le Bibliaoʼ. Lelaʼ ku tsʼáaiktiʼob esperanza, kiʼimak óolal yéetel yaan u tsʼáaiktiʼob u páajtalil u kʼamkoʼob «le kuxtal jach tu jaajil kuxtal» teʼ túumben luʼumoʼ (1 Tim. 6:19).
Le yaabilaj yéetel le chʼaʼa óotsililoʼ ku péeksikoʼon k-tsikbalt tiʼ tuláakal súutukil le baʼaxoʼob ku yaʼalik le Bibliaoʼ (Ilawil párrafo 8)
9. ¿Baʼax k-aʼalik tiʼ le máakoʼoboʼ yéetel baʼaxten? (Ezequiel 33:7, 8).
9 Le yaabilajoʼ ku péeksikoʼon k-aʼal tiʼ le máakoʼob taʼaytak u xuʼulsaʼal tiʼ le kʼasaʼan yóokʼol kaabaʼ (xok Ezequiel 33:7, 8). Jach ku yaatal k-óol k-ilik bix k-láakʼtsiloʼob yéetel le máakoʼob kajaʼanoʼob teʼ territoriooʼ maʼ tu tsʼáaikoʼob cuenta le baʼax kun úuchul maʼ tun xáantaloʼ. Mateo 24:21, ku yaʼalik: «Yaan u sen muʼyaj máak jeʼex mix juntéen ilaʼak desde ka káaj yóokʼol kaab tak bejlaʼeʼ yéetel mix bikʼin kun kaʼa ilbil». Teʼ kʼiinoʼob jeʼelaʼ yáaxeʼ yaan u xuʼulsaʼal tiʼ le religiónoʼob maʼ jaajtakoʼoboʼ, yéetel teʼ Armagedónoʼ tiʼ kun xuʼulsbil tiʼ le kʼasaʼan yóokʼol kaabaʼ (Apo. 16:14, 16; 17:16, 17; 19:11, 19, 20). K-kʼáat óoltik tiʼ Jéeoba ka u yáant le máakoʼob ka u yuʼuboʼob le baʼax k-kʼaʼaytikoʼ yéetel ka u yóotoʼob u múul meyajtoʼob Jéeoba t-éetel. Chéen baʼaleʼ, ¿baʼax kun úuchul yéetel le máakoʼob maʼ ken u yóot u yuʼuboʼob le baʼax k-tsikbaltikoʼ? Ichiloʼobeʼ táakaʼan k-láakʼtsiloʼobiʼ.
10. ¿Baʼaxten jach kʼaʼabéet k-aʼalik tiʼ le máakoʼob le baʼax ku taal u kʼiin u yúuchloʼ?
10 Jeʼex t-ilaj teʼ xook máanikoʼ maʼ xaaneʼ Jéeobaeʼ jeʼel u chʼaʼtuklik u salvartik le máaxoʼob ku chʼaʼtuklik u kʼexik u tuukuloʼob le kéen u yiloʼob u xuʼulsaʼal tiʼ le Nojoch Babiloniaoʼ. Lelaʼ ku yáantkoʼon k-il jach kʼaʼanaʼan ka k-aʼal tiʼ le máakoʼob le baʼax ku taal u kʼiin u yúuchloʼ. Tuukulnakoʼon tiʼ lelaʼ: le baʼax k-aʼalik tiʼ le máakoʼob beoraaʼ maʼ xaaneʼ letiʼe baʼax ken u kʼaʼajsoʼoboʼ (ket yéetel Ezequiel 33:33). Maʼ xaaneʼ le baʼax k-kʼaʼaytikoʼ yaan u kʼaʼajsikoʼob yéetel lelaʼ yaan u yáantkoʼob utiaʼal u meyajtikoʼob Jéeoba antes tiʼ u taal le xuʼulsajiloʼ. Por ejemploeʼ tu kaajil Filiposeʼ ‹tu sen tíituba le luʼumoʼ›, yoʼolal leloʼ juntúul carceleroeʼ tu kʼamaj u jaajil. Maʼ xaaneʼ le máakoʼob maʼ tu yóotkoʼob u kʼamoʼob u jaajil teʼ kʼiinoʼobaʼ jeʼel u yóotkoʼob u kʼamoʼob le kéen u yiloʼob tsʼoʼok u xuʼulsaʼal tiʼ le Nojoch Babiloniaoʼ. Lelaʼ bey jeʼex ka u tíituba le luʼumoʼ (Hech. 16:25-34).
K-KʼAʼAYTAJ TUMEN K-YAABILTMAJ JÉEOBA BEY XAN U KʼAABAʼ
11. ¿Bix jeʼel k-tsʼáaik nojbeʼenil, tsiikil bey xan páajtalil tiʼ Jéeobaeʼ? (Apocalipsis 4:11; ilawil xan le fotooʼ).
11 Toʼoneʼ yaʼab baʼax oʼolal k-kʼaʼaytaj, pero maases k-beetik tumen k-yaabiltmaj Jéeoba bey xan u kʼaabaʼ. Cada ken kʼaʼaytajnakoʼoneʼ táan k-alabartik Jéeoba, yéetel k-eʼesik de acuerdoʼon yéetel le baʼax ku yaʼalik le Bibliaaʼ: «Ka náajmatik a kʼamik nojbeʼenil, tsiikil bey xan páajtalil» (xok Apocalipsis 4:11, U Suttʼaanil Túumben Luʼum). ¿Bix túun jeʼel k-tsʼáaik nojbeʼenil wa k-alabarkeʼ? ¿Bix jeʼel k-eʼesik tsiikil wa respeto tiʼeʼ? Letiʼe kéen k-tsol tiʼ le máakoʼob Jéeoba beetmil tuláakal baʼaloʼ yéetel letiʼ tsʼaamiltoʼon le kuxtaloʼ. ¿Bix túun jeʼel k-tsʼáaik páajtalil wa poder tiʼeʼ? Letiʼe kéen meyajnaktoʼon k-tiempo, k-muukʼ yéetel le baʼaxoʼob yaantoʼon utiaʼal k-kʼaʼaytajoʼ (Mat. 6:33; Luc. 13:24; Col. 3:23). Toʼoneʼ uts t-tʼaan k-tsikbaltik tiʼ u maasil yoʼolal Jéeoba, le Dios jach k-yaabiltmoʼ. Chéen baʼaleʼ, ¿baʼaxten k-kʼáat k-kaʼans tiʼ u maasil bix u kʼaabaʼ Dios yéetel baʼax u kʼáat u yaʼale?
K-tsʼáaik tiʼ Jéeoba k-poder, le kéen meyajnaktoʼon k-muukʼ, k-tiempo yéetel le baʼaxoʼob yaantoʼon teʼ kʼaʼaytajoʼ (Ilawil párrafo 11)
12. ¿Bix k-santificartik u kʼaabaʼ Jéeoba kéen kʼaʼaytajnakoʼon?
12 Tumen k-yaabiltmaj Jéeobaeʼ k-kʼáat k-santificart u kʼaabaʼ (Mat. 6:9). Lelaʼ u kʼáat u yaʼaleʼ taak k-aʼalik tiʼ tuláakal máak maʼ jaaj le baʼax ku yaʼalik Satanás tu contra Diosoʼ (Gén. 3:1-5; Job 2:4; Juan 8:44). Le oʼolal jach k-tsʼáaik k-óol kʼaʼaytaj tumen taak k-defendertik u kʼaabaʼ Jéeoba yéetel taak k-aʼalik u jaajil tu yoʼolal letiʼ tiʼ tuláakal máak. K-kʼáat ka ojéeltaʼak tumen tuláakal máakeʼ Jéeobaeʼ jach ku yeʼesik yaabilaj, maʼalob u gobernar yéetel maʼ kun xáantaleʼ u Reinoeʼ yaan u xuʼulsik tiʼ tuláakal baʼax beetik k-muʼyaj, yaan u taasik jeetsʼelil yéetel kiʼimak óolal tiʼ tuláakal máak (Sal. 37:10, 11, 29; 1 Juan 4:8). Le kéen k-tsikbalt tiʼ tuláakal máak le baʼaloʼobaʼ táan k-santificartik u kʼaabaʼ Jéeoba. Tsʼoʼoleʼ k-ojleʼ le kéen kʼaʼaytajnakoʼoneʼ táan k-eʼesik jach tu jaajil u Testigoʼon. ¿Baʼaxten k-aʼalik lelaʼ?
13. ¿Baʼaxten junpʼéel nojoch privilegio u yaʼalaʼaltoʼon u testigoʼon Jéeoba? (Isaías 43:10-12).
13 Jéeobaeʼ tsʼoʼok u yéeyikoʼon bey ‹u testigoʼoneʼ› (xok Isaías 43:10-12). Walajki wa jaypʼéel añosaʼ tiʼ junpʼéel cartaeʼ le Cuerpo Gobernanteoʼ tu yaʼalaj: «Junpʼéel nojoch privilegio u yaʼalaʼaltoʼon u testigoʼon Jéeoba». c Koʼoneʼex tuukul tiʼ lelaʼ: koʼoneʼex aʼalikeʼ táan k-juzgartaʼal tumen t-beetaj bin junpʼéel baʼal maʼ maʼalobiʼ. Le oʼolal kʼaʼabéettoʼon juntúul máak ka tʼaanak t-favor. ¿Máasaʼ yaan k-yéeyik juntúul máak k-kʼaj óol, k-confiar tiʼ yéetel maʼalob u tʼaan u maasil tu yoʼolal? Jach beyoʼ. Jéeoba xaneʼ tsʼoʼok u yéeyikoʼon utiaʼal ka tʼaanakoʼon tu favor. Leloʼ ku yeʼesikeʼ u kʼaj óoloʼon tubeel yéetel ku confiar tiʼ toʼon. Junpʼéel nojoch privilegio k-ilik k-beetikba u testigoʼon. Le oʼolal k-aprovechartik tuláakal súutukil utiaʼal k-tsʼáaik kʼaj óoltbil u kʼaabaʼ yéetel utiaʼal k-eʼesik maʼ jaaj le tuusoʼob aʼalaʼan tu contraoʼ. Beyoʼ k-eʼesik jach tu jaajil u testigoʼon Jéeoba (Sal. 83:18; Rom. 10:13-15).
YAAN U SEGUER K-KʼAʼAYTAJ TAK TU XUUL
14. ¿Baʼax beetik u kiʼimaktal k-óol?
14 Jach kiʼimak k-óol k-ojéeltikeʼ antes tiʼ le nojoch muʼyajiloʼ yaʼab máakoʼob ken u kʼamoʼob u jaajil. Jach ku kiʼimaktal k-óol k-ojéeltik xaneʼ tu kʼiiniloʼob le nojoch muʼyajiloʼ yaan u yantal máakoʼob kun ookloʼob ichil u kaajal Jéeoba utiaʼal u adorarkoʼob (Hech. 13:48).
15, 16. ¿Baʼax kun seguer k-beetik yéetel baʼax kʼiin kun xuʼulul k-beetik?
15 Mientras maʼ kʼuchuk le kʼiin jeʼeloʼ jach yaʼab baʼax yaan beetbil. Yaantoʼon u jatsʼuts privilegioil k-táakpajal utiaʼal u kʼaʼaytaʼal le baʼaloʼob maʼalobtak ken u beet u Reino Dios way Luʼumeʼ. Tsʼoʼoleʼ kʼubéentaʼantoʼon xan ka k-aʼal tiʼ le máakoʼob jach taʼaytak u xuʼulsaʼal le kʼasaʼan yóokʼol kaabaʼ. Le kéen kʼuchuk u kʼiinil le nojoch muʼyajiloʼ le máakoʼoboʼ yaan u tsʼáaikoʼob cuentaeʼ le baʼax k-kʼaʼaytikoʼ tiʼ Jéeoba u taal (Eze. 38:23).
16 Beoraaʼ ¿baʼax túun ken k-beete? Wa jach k-yaabiltmaj Jéeoba, u kʼaabaʼ, le máakoʼob yéetel le baʼaloʼob maʼalobtak ken u beet le Reinooʼ yaan u seguer k-tsʼáaik k-óol k-kʼaʼaytaj hasta ken u yaʼal Jéeoba: «¡Way ku náakleʼ!».
KʼAAY 54 Xeen teʼ bejaʼ
a Le reunión anualaʼ beetaʼab 7 tiʼ octubre tiʼ 2023, tu kaajil Newburgh (Nueva York), teʼ tuʼux ku beetik u asambleaʼob u testigoʼob Jéeobaoʼ. Lelaʼ máansaʼab JW Broadcasting®. Le yáax jaatsoʼ máansaʼab noviembre tiʼ 2023 yéetel le u kaʼajaatsoʼ enero tiʼ 2024.
b Ilawil le xook «Kʼeʼex u kuxtaloʼob tumen le Bibliaoʼ: Séeb tin wilil jaaj baʼax ku yaʼalik le Bibliaoʼ», jóokʼ tiʼ U Pʼíich Tulumil Kanan, 1 tiʼ febrero tiʼ 2015.
