1. ¿Baʼax kaʼansaʼab tiʼ Abrahán tumen Jéeoba?

 ABRAHÁNEʼ mix bikʼin ken u tuʼubs le baʼax aʼalaʼabtiʼoʼ. Jéeobaeʼ tu túuxtaj juntúul ángel utiaʼal u yaʼaliktiʼ yaan u xuʼulsik u kaajil Sodoma yéetel Gomorra. Kex Abrahán jach yaan u fejeʼ istikyaj tu naʼatil le baʼax ken u beet Jéeobaoʼ, le oʼolal tu kʼáatajtiʼ: «¿Tu jaajil wa yaan a xuʼulsik tiʼ le utsoʼob paʼteʼ yéetel le kʼasaʼan máakoʼoboʼ? [ . . . ] U Juezil tuláakal yóokʼol kaabeʼ, ¿maʼ wa ken u beet baʼax maʼalob?». Jéeoba túuneʼ jach tu yeʼesaj pacienciaeʼ ka tu kaʼansaj tiʼ Abrahán junpʼéel baʼax jach kʼaʼanaʼan: letiʼeʼ mix bikʼin ken u xuʼuls le máaxoʼob utsoʼoboʼ. ¿Máasaʼ jach ku kiʼimaktal k-óol k-ojéeltik lelaʼ? (Gén. 18:​23-33).

2. ¿Baʼaxten k-aʼalikeʼ le kéen juzgarnak Jéeobaeʼ ku chʼaʼik óotsilil, tsʼoʼoleʼ ku beetik yéetel justicia?

² ¿Baʼaxten k-aʼalikeʼ le kéen juzgarnak Jéeobaeʼ ku chʼaʼik óotsilil, tsʼoʼoleʼ ku beetik yéetel justicia? Tumen letiʼeʼ «ku yilik le baʼax yaan ichil le puksiʼikʼaloʼ» (1 Sam. 16:7). Le Bibliaoʼ ku yaʼalikeʼ chéen Jéeoba u yojel «baʼax yaan tu puksiʼikʼal cada juntúul máak» (1 Rey. 8:39; 1 Cró. 28:9). Lelaʼ jach ku beetik u jaʼakʼal k-óol. Jéeobaeʼ jach táaj yaan u naʼat, le oʼolal maʼ tu páajtal k-jach naʼatik tubeel bix u juzgar. Yoʼolal leloʼ apóstol Pabloeʼ tu yaʼalaj: «Maʼ tu páajtal u chʼaʼnuʼuktaʼal le baʼaxoʼob ku tuklik u beetkoʼ» (Rom. 11:33).

3, 4. 1) Maʼ xaaneʼ, ¿baʼax jeʼel u taaktal k-ojéeltikeʼ? 2) ¿Baʼax ken k-il teʼ xookaʼ? (Juan 5:​28, 29).

³ Maʼ xaaneʼ jeʼex Abraháneʼ jeʼel u taaktal k-ojéeltik u núukil le preguntaʼobaʼ: «¿Yaan wa ta tʼaan u kaʼa kuxkíintaʼal jujuntúul tiʼ le máaxoʼob xuʼulsaʼaboʼob tu kaajil Sodoma yéetel Gomorraoʼ? ¿Jeʼel wa ta tʼaan u kaʼa kuxkíintaʼaloʼob le kéen kʼuchuk  u kʼiinil ‹u kaʼa kuxkíintaʼal› le kʼasaʼanoʼoboʼ?» (Hech. 24:15).

⁴ Koʼoneʼex kaʼa xakʼaltik bix kun kaʼa kuxkíintbil le kimenoʼoboʼ. Maʼ sen úucheʼ jel tsoʼol baʼax u kʼáat u yaʼal u kaʼa kuxtal le máaxoʼob tu beetoʼob baʼaloʼob maʼalobtakoʼ bey xan baʼax u kʼáat u yaʼal u kaʼa kuxtal le máaxoʼob tu beetoʼob baʼaloʼob kʼaastakoʼ (xok Juan 5:​28, 29). a Chéen baʼaleʼ ilaʼabeʼ yaan uláakʼ baʼaloʼob unaj u kʼeʼexel bix u naʼataʼal. Yáaxeʼ yaan k-ilik le baʼaxoʼob maʼ k-ojel yoʼolal bix u juzgar Jéeobaoʼ, kéen tsʼoʼokkeʼ yaan k-ilik le baʼax k-ojloʼ.

LE BAʼAX MAʼ K-OJLOʼ

5. ¿Baʼax suuk u yaʼalaʼal kaʼach yoʼolal le máaxoʼob xuʼulsaʼaboʼob Sodoma yéetel Gomorraoʼ?

⁵ ¿Baʼax kun úuchul yéetel le máaxoʼob xuʼulsaʼaboʼob tumen Jéeoba jeʼex le yanoʼob kaʼach tu kaajil Sodoma yéetel Gomorraoʼ? Kaʼacheʼ suuk k-aʼalikeʼ maʼ kun kaʼa kuxkíintbiloʼob. Chéen baʼaleʼ le esclavo chúukaʼan u yóoloʼ ka tsʼoʼok u sen xakʼalxook yéetel u orareʼ tu tsʼáaj cuentaeʼ maʼ tu páajtal u yaʼalik jach baʼax kun úuchul yéetel le máakoʼobaʼ. Koʼoneʼex ilik baʼaxten.

6. Aʼal jujunpʼéel ejemploʼob eʼesik Jéeobaeʼ tu xuʼulsaj tiʼ le kʼasaʼan máakoʼoboʼ, yéetel aʼal baʼax maʼ tu jach aʼalik le Bibliaoʼ.

⁶ Teʼ Bibliaoʼ yaʼab u yúuchul tʼaan tiʼ bix úuchik u juzgartaʼal le kʼasaʼan máakoʼob tumen Jéeobaoʼ. Jeʼex teʼ Búulkabaloʼ kíim tuláakal le máakoʼob yanoʼob way Luʼumeʼ, jach chéen Noé yéetel u familia tu salvartubaʼob. Ka máan kʼiineʼ Jéeoba xaneʼ tu yaʼalaj tiʼ le israelitaʼoboʼ ka u xuʼulsoʼob tiʼ le siete naciónoʼob yanoʼob kaʼach teʼ luʼum u yaʼalmaj u tsʼáaiktiʼoboʼ. Jéeobaeʼ tu túuxtaj xan juntúul ángel utiaʼal u kíimsik 185,000 soldadoʼob asirioʼob chéen tiʼ junpʼéel áakʼab (Gén. 7:23; Deu. 7:​1-3; Isa. 37:​36, 37). U jaajileʼ le Bibliaoʼ maʼ tu jach aʼalik wa Jéeobaeʼ tu xuʼulsaj utiaʼal mantatsʼ le máakoʼobaʼ yéetel maʼ xan tu jach aʼalik wa maʼ kun kaʼa kuxkíintbiloʼob. Koʼoneʼex maas xakʼaltikeʼex baʼax u kʼáat u yaʼal lelaʼ.

7. ¿Baʼax maʼ k-ojel yoʼolal le máakoʼob kíimoʼob teʼ Búulkabaloʼ wa le kíimoʼob tu luʼumil Canaánoʼ? (Ilawil le dibujooʼ).

⁷ Toʼoneʼ maʼ k-ojel bix ken u juzgartil Jéeoba cada juntúul máakiʼ. Tsʼoʼoleʼ maʼ k-ojel wa le máaxoʼob xuʼulsaʼaboʼoboʼ yanchajtiʼob u oportunidadil u kʼaj óoltikoʼob Jéeoba yéetel u arrepentiroʼob. Le Bibliaoʼ ku yaʼalikeʼ tu kʼiiniloʼob le Búulkabaloʼ Noéeʼ «tu tsʼáaj ojéeltbil unaj u bisik máak junpʼéel toj kuxtal» (2 Ped. 2:5). Chéen baʼaleʼ maʼ tu yaʼalikeʼ wa le táan u beetik le arcaoʼ tu yilaj u kʼaʼaytaj tiʼ cada juntúul tiʼ le máaxoʼob yanoʼob way Luʼumeʼ. Tsʼoʼoleʼ maʼ k-ojel xaneʼ wa tuláakal le máaxoʼob kajaʼanoʼob kaʼach Canaánoʼ páajchaj u kaanbaloʼob yoʼolal Jéeoba utiaʼal u kʼexik u kuxtaloʼob.

8. ¿Baʼax maʼ k-ojel yoʼolal u kajnáaliloʼob Sodoma yéetel Gomorraiʼ?

⁸ ¿Baʼax k-ojel kaʼach yoʼolal le máaxoʼob kajaʼanoʼob Sodoma yéetel Gomorraoʼ? Toʼoneʼ k-ojel tiʼ kajaʼan kaʼach Lot, juntúul máak toj u kuxtaliʼ. Chéen baʼaleʼ maʼ k-ojel wa kʼaʼaytajnaj tiʼ tuláakal le máaxoʼob kajaʼanoʼob teʼeloʼ. U jaajileʼ le máakoʼob kajaʼanoʼob kaʼach Sodomaoʼ jach táaj kʼasaʼanoʼob. Pero ¿ku páajtal wa kaʼach u kʼaj óoltikoʼob baʼax uts yéetel baʼax kʼaas? Maʼatech. Tumen le Bibliaoʼ ku yaʼalikeʼ yaʼab xiiboʼob kajaʼanoʼob kaʼach tu kaajil Sodomaeʼ «desde u maas táankelmil tak u maas chʼijaʼanileʼ» taakchaj u violarkoʼob le máaxoʼob tu invitartaj Lot tu yotochoʼ (Gén. 19:4; 2 Ped. 2:7). Jéeobaeʼ juntúul Dios jach ku chʼaʼik óotsilil, ¿jeʼel wa túun u páajtal k-asegurarkeʼ letiʼeʼ maʼ ken u kaʼa kuxkíint mix juntúul  tiʼ le máakoʼobaʼ? Kʼaʼajaktoʼoneʼ Jéeobaeʼ tu yaʼalaj tiʼ Abraháneʼ teʼ kaajoʼ minaʼan mix diez máakoʼob utsoʼobiʼ (Gén. 18:32). Le oʼolaleʼ Jéeobaeʼ tu beetaj justicia le ka tu xuʼulsoʼoboʼ. Chéen baʼaleʼ, ¿jeʼel wa túun u páajtal k-asegurarkeʼ Jéeobaeʼ maʼ ken u kaʼa kuxkíint mix juntúul tiʼ letiʼob le kéen u kaʼa kuxkíint le kʼasaʼan máakoʼoboʼ? U jaajileʼ maʼ tu páajtal k-asegurartik.

9. ¿Baʼax maʼ k-ojel yoʼolal Salomóniʼ?

⁹ Le Bibliaoʼ ku tʼaan xan tiʼ máakoʼob tu káajbaleʼ tu beetoʼob baʼaloʼob maʼalobtak, chéen baʼaleʼ ka tsʼoʼokeʼ tu beetoʼob baʼaloʼob kʼaastak, jeʼex rey Salomóneʼ. Letiʼeʼ jach u kʼaj óol kaʼach Jéeoba yéetel u yojel bix unaj u adorartaʼal, tsʼoʼoleʼ tu kʼamaj yaʼab bendiciónoʼob. Chéen baʼaleʼ ka máan kʼiineʼ káaj u adorartik maʼ jaajil diosoʼobiʼ. Leloʼ tu beetaj u jach pʼuʼujul Jéeoba, tsʼoʼoleʼ jach sufrirnaj xan le kaaj yoʼolal le baʼaloʼob kʼaastak tu beetoʼ. Le Bibliaoʼ ku yaʼalikeʼ le ka kíim Salomóneʼ «jeʼel yéetel u yúuchben láakʼtsiloʼob» ichiloʼobeʼ tiaʼan rey Davidiʼ (1 Rey. 11:​5-9, 43, nota; 2 Rey. 23:13). Le tʼaanoʼobaʼ, ¿ku yeʼesik wa yaan u kaʼa kuxkíintaʼal Salomón? Yaan máakoʼobeʼ jeʼel u tuklikoʼobeʼ yaan u kaʼa kuxkíintaʼal yoʼolal le baʼax ku yaʼalik Romanos 6:7: «Le máax tsʼoʼok u kíimiloʼ tsʼoʼok xan u jáalkʼabtaʼal tiʼ u kʼeban». Letiʼobeʼ ku tuklikoʼobeʼ desde ken kíimik máakeʼ yaan tiʼ u derechoil u kaʼa kuxkíintaʼal. Pero lelaʼ maʼ letiʼe baʼax ku yaʼalik le tekstooʼ, maʼ tuláakal le máaxoʼob tsʼoʼok u kíimloʼob yaan u kaʼa kuxkíintaʼaloʼoboʼ. Le kaʼa kuxtaloʼ junpʼéel siibal ku taal tiʼ Jéeoba, letiʼeʼ yaan u kaʼa kuxkíintik le máaxoʼob u yaabiltmoʼ utiaʼal ka yanak u oportunidadil u adorarkoʼob utiaʼal mantatsʼ (Job 14:​13, 14; Juan 6:44). ¿Tiaʼan wa Salomón ichil le máakoʼobaʼ? Maʼ k-ojliʼ, chéen Jéeoba u yojel. Pero seguroʼoneʼ letiʼeʼ yaan u beetik baʼax toj.

BAʼAX K-OJEL

10. ¿Bix u yuʼubikuba Jéeoba kéen u xuʼuls tiʼ le kʼasaʼan máakoʼoboʼ? (Ezequiel 33:11; ilawil xan le dibujooʼ).

¹⁰ (Xok Ezequiel 33:11). Jéeobaeʼ ku yaʼalik bix u yuʼubikuba le kéen u xuʼuls le kʼasaʼan máakoʼoboʼ. Le baʼax tu tsʼíibtaj apóstol Pedrooʼ chíikaʼan tiʼ le baʼax tu yaʼalaj le profeta Ezequieloʼ. Pedroeʼ tu tsʼíibtaj: «Jéeobaeʼ [ . . . ] maʼ u kʼáat ka xuʼulsaʼak tiʼ mix máakiʼ» (2 Ped. 3:9). Le baʼax tu tsʼíibtaj Pedrooʼ ku asegurartiktoʼoneʼ Jéeobaeʼ maʼ tu xuʼulsik tiʼ máak wa minaʼan baʼax oʼolal u beetik. ¿Baʼaxten? Tumen letiʼeʼ jach ku chʼaʼik óotsilil yéetel mantatsʼ ku yeʼesik le jatsʼuts modosaʼ.

11. ¿Máaxoʼob maʼ kun kaʼa kuxkíintbiloʼob yéetel bix k-ojéeltik leloʼ?

¹¹ ¿Máaxoʼob k-ojel maʼ kun kaʼa kuxkíintbiloʼob? Le Bibliaoʼ ku tʼaan chéen tiʼ jujuntúuliʼ. b Por ejemploeʼ Jesúseʼ tu yaʼaleʼ Judas Iscarioteeʼ maʼ kun kaʼa kuxkíintbil (Mar. 14:21; Juan 17:​12, U Suttʼaanil Túumben Luʼum). c Judaseʼ u yojel kaʼach baʼax ku beetik, kex beyoʼ tu tsʼáajuba tu contra Jéeoba yéetel Jesús (Mar. 3:29). d Jesús xaneʼ tu yaʼaleʼ jujuntúul tiʼ u nuuktakil le religiónoʼob tu tsʼáajubaʼob tu contraoʼ maʼ kun kaʼa kuxkíintbiloʼob (Mat. 23:33). Apóstol Pablo xaneʼ tu yaʼaleʼ le apóstataʼob maʼ tu arrepentiroʼoboʼ maʼ kun kaʼa kuxkíintbiloʼob (Heb. 6:​4-8; 10:29).

12. ¿Baʼax péeks Jéeoba u chʼaʼa óotsilil tiʼ le máaxoʼob lúuboʼob tiʼ nukuch kʼebanoʼoboʼ? Aʼal junpʼéel ejemplo.

¹² Jeʼex tsʼoʼok k-ilkoʼ Jéeobaeʼ jach ku chʼaʼik óotsilil, le oʼolal «maʼ u kʼáat ka xuʼulsaʼak tiʼ mix máakiʼ». ¿Bix úuchik u chʼaʼik óotsilil  tiʼ le máaxoʼob lúuboʼob tiʼ nukuch kʼebanoʼoboʼ? Rey Davideʼ jach tu beetaj baʼaloʼob kʼaastak, núupkʼebanchaji yéetel tu kíimsaj juntúul máak, chéen baʼaleʼ como arrepentirnajeʼ Jéeobaeʼ tu chʼaʼaj óotsilil tiʼ yéetel tu perdonartaj (2 Sam. 12:​1-13). Rey Manasés xaneʼ tu beetaj baʼaloʼob jach táaj kʼaastak. Kex beyoʼ Jéeobaeʼ tu perdonartaj tumen tu yeʼesaj arrepentirnaj tu jaajil u yóol (2 Cró. 33:​9-16). Le ejemploʼobaʼ ku yeʼesiktoʼoneʼ Jéeobaeʼ ku chʼaʼik óotsilil tiʼ le máaxoʼob ku arrepentiroʼob tu jaajil u yóoloʼoboʼ. Jéeobaeʼ yaan u kaʼa kuxkíintik David yéetel Manasés tumen letiʼobeʼ tu tsʼáajoʼob cuenta maʼ maʼalob le baʼax tu beetoʼoboʼ yéetel arrepentirnajoʼob.

13. 1) ¿Baʼaxten Jéeobaeʼ tu chʼaʼaj óotsilil tiʼ u kajnáaliloʼob Nínive? 2) ¿Baʼax tu yaʼalaj Jesús tu yoʼolal u kajnáaliloʼob Nínive?

¹³ K-ojleʼ Jéeobaeʼ tu chʼaʼaj óotsilil xan tiʼ u kajnáaliloʼob Nínive. Letiʼeʼ tu yaʼalaj tiʼ Jonás: «Tsʼoʼok in wilik le baʼaloʼob kʼaastak ku beetkoʼoboʼ». Pero como tu yilaj arrepentirnajoʼobeʼ tu perdonartoʼob, jeʼex k-ilkoʼ Jéeobaeʼ maas tu chʼaʼaj óotsilil tiʼob ke Jonás. Le ka sen pʼuʼuj Jonáseʼ tu yaʼalajtiʼeʼ le máakoʼobaʼ «maʼ u yojloʼob baʼax uts yéetel baʼax kʼaasiʼ» (Juan 1:​1, 2; 3:10; 4:​9-11). Ka máan kʼiineʼ Jesúseʼ tu chʼaʼchiʼitaj le baʼax úuch tiʼ le ninivitaʼob utiaʼal u yeʼesik bix u chʼaʼik óotsilil Jéeoba yéetel bix u yeʼesik justicia. Tu yaʼaleʼ u kajnáaliloʼob Níniveeʼ yaan u líiʼsaʼaloʼob «tu Kʼiinil le Juiciooʼ» (Mat. 12:41).

14. ¿Baʼax kun úuchul yéetel le ninivitaʼob «tu Kʼiinil le Juiciooʼ»?

¹⁴ ¿Baʼax le u «Kʼiinil le Juicio» tuʼux kun líiʼsbil le ninivitaʼoboʼ? Jesúseʼ tu yaʼaleʼ yaan máaxoʼob kun líiʼsbiloʼob utiaʼal ka juzgartaʼakoʼob (Juan 5:29). Lelaʼ yaan u béeytal tu yáamil le Mil Años kun reinaroʼ, tiʼ kun kaʼa kuxkíintbil «le utsoʼoboʼ bey xan le kʼasaʼanoʼoboʼ» (Hech. 24:15). Le máaxoʼob kʼasaʼanoʼoboʼ yaan u kaʼa kuxkíintaʼaloʼob utiaʼal u juzgartaʼaloʼob. Lelaʼ u kʼáat u yaʼaleʼ todavía yaan u yilaʼal tumen Jéeoba yéetel Jesús wa yaan u yuʼubikoʼob táan bey xan wa yaan u tsʼáaikoʼob ichil u kuxtaloʼob le baʼax táan u kankoʼoboʼ. Por ejemploeʼ wa juntúul ninivita tsʼoʼok u kaʼa kuxkíintaʼal, pero maʼ tu yóotik u adorart Jéeobaeʼ yaan u xuʼulsaʼal utiaʼal mantatsʼ (Isa. 65:20). Chéen baʼaleʼ wa ku chʼaʼtuklik u meyajtik Jéeobaeʼ yaan u páajtal u kuxtal utiaʼal mantatsʼ (Dan. 12:2).

15. 1) ¿Jeʼel wa u páajtal u asegurartaʼal mix juntúul tiʼ u kajnáaliloʼob Sodoma yéetel Gomorra kun kaʼa kuxkíintbileʼ? 2) ¿Baʼax u kʼáat u yaʼal le tʼaanoʼob ku chíikpajal tiʼ Judas 7? (Ilawil le cuadro « ¿Baʼax tu yóotaj u yaʼal Judas?»).

 ¹⁵ Jesúseʼ tu yaʼaleʼ «tu Kʼiinil le Juiciooʼ maas jeʼel u chʼaʼabal óotsilil tiʼ u kaajil Sodoma yéetel tiʼ Gomorra» ke tiʼ le máaxoʼob maʼ tu kʼamoʼob Jesús mix le baʼaloʼob tu kaʼansajoʼ (Mat. 10:​14, 15; 11:​23, 24; Luc. 10:12). Teʼelaʼ Jesúseʼ, ¿chéen wa táan u ketik le máaxoʼob kuxaʼanoʼob tu kʼiiniloʼob utiaʼal u yeʼesik maas kʼasaʼanoʼob tiʼ le máaxoʼob kajaʼanoʼob kaʼach Sodoma yéetel Gomorraoʼ? Maʼ beyiʼ. Kʼaʼajaktoʼoneʼ Jesúseʼ tu yaʼaleʼ u kajnáaliloʼob Níniveeʼ yaan u kaʼa líiʼsaʼaloʼob «tu Kʼiinil le Juiciooʼ». Lelaʼ maʼ chéen junpʼéel kettʼaaniʼ, jach tu jaajil yaan u yúuchul. U Kʼiinil le Juicio tu chʼaʼchiʼitaj Jesús le ka tʼaanaj tiʼ u kajnáaliloʼob Sodoma yéetel Gomorraoʼ junpʼéeliliʼ yéetel le u kʼiinil le juicio tu chʼaʼchiʼitaj le ka tʼaanaj tiʼ u kajnáaliloʼob Níniveoʼ. Kʼaʼajaktoʼoneʼ le ninivitaʼob yéetel u kajnáaliloʼob Sodoma yéetel Gomorraoʼ tu beetoʼob baʼaloʼob jach kʼaastak. Chéen baʼaleʼ le ninivitaʼoboʼ yanchaj u oportunidadil u arrepentiroʼob. Maʼ unaj u tuʼubultoʼoneʼ Jesúseʼ tu yaʼaleʼ «le máaxoʼob tu beetoʼob baʼaloʼob kʼaastakeʼ yaan u líikʼloʼob utiaʼal ka juzgartaʼakoʼob» (Juan 5:29). Le oʼolal jeʼel u páajtal k-aʼalikeʼ maʼ xaaneʼ yaan esperanza tiʼ u kajnáaliloʼob Sodoma yéetel Gomorra. Maʼ xaaneʼ jujuntúul tiʼ letiʼobeʼ yaan u kaʼa kuxkíintaʼaloʼob utiaʼal ka áantaʼakoʼob u kʼaj óoltoʼob Jéeoba yéetel Jesús.

16. ¿Baʼax ku chʼaʼik en cuenta Jéeoba le kéen u chʼaʼtukult máaxoʼob ken u kaʼa kuxkíinte? (Jeremías 17:10).

¹⁶ (Xok Jeremías 17:10). Le tekstoaʼ jach maʼalob u tsolik le baʼax k-ojloʼ: Jéeobaeʼ ku «xíixtik le puksiʼikʼaloʼ» yéetel ku «jach ilik baʼax yaan tu tuukul máak». Letiʼeʼ ku chʼaʼik en cuenta baʼaxoʼob u beetmaj máak utiaʼal u yilik wa yaan u kaʼa kuxkíintik. Le Bibliaoʼ ku yaʼalikeʼ yaan «u boʼotik tiʼ cada juntúul baʼax ku beetik». Maʼ unaj u tuʼubultoʼoneʼ Jéeobaeʼ mantatsʼ ken u chʼaʼ óotsilil tiʼ máak, pero wa ku kʼaʼabéettal u castigartik máakeʼ yaan u beetik. Wa le Biblia maʼ tu yaʼalikoʼ mix juntéen unaj k-asegurartik wa maʼ kun kaʼa kuxkíintbil wa máax.

 «U JUEZIL TULÁAKAL YÓOKʼOL KAABEʼ» MANTATSʼ «KEN U BEET BAʼAX MAʼALOB»

17. ¿Baʼax kun úuchul yéetel tuláakal le máaxoʼob tsʼoʼok u kíimloʼoboʼ?

¹⁷ Desde ka tu tsʼáajuba Adán yéetel Eva tu contra Dioseʼ tsʼoʼok u kíimil u millonesil máakoʼob. K-enemigo le kíimiloʼ tsʼoʼok u kíimsik jach táaj yaʼab máakoʼob (1 Cor. 15:26). ¿Baʼax kun úuchul yéetel tuláakal le máaxoʼob tsʼoʼok u kíimloʼoboʼ? Le Bibliaoʼ ku yaʼalikeʼ 144,000 máakoʼob kun kaʼa kuxtaloʼob teʼ kaʼanoʼ yéetel maʼ kun kaʼa kíimloʼob (Apo. 14:1). Yaʼab xiiboʼob yéetel koʼoleloʼob jach u yaabiltmoʼob xan Jéeobaeʼ yaan u kaʼa kuxkíintaʼaloʼob way Luʼum le kéen kaʼa kuxkíintaʼak «le utsoʼoboʼ». Wa ku chúukpajal u yóol u meyajtoʼob Jéeoba tu yáamil le Mil Años kun gobernar Jesús bey xan tiʼ le u tsʼook pruebaoʼ, yaan u kuxtaloʼob utiaʼal mantatsʼ (Dan. 12:13; Heb. 12:1). Tu yáamil xan le Mil Añosoʼ yaan u kaʼa kuxkíintaʼal «le kʼasaʼanoʼoboʼ», ichiloʼobeʼ tiaʼan le máaxoʼob maʼ tu meyajtoʼob Jéeobaoʼ wa «le máaxoʼob tu beetoʼob baʼaloʼob kʼaastak[oʼ]». Tiʼ letiʼobeʼ yaan u tsʼaʼabal u oportunidadil u kʼexik u kuxtaloʼob yéetel u adorarkoʼob Dios (Luc. 23:​42, 43). Chéen baʼaleʼ le máaxoʼob jach táaj kʼasaʼanoʼob u yóoliliʼ u tsʼáaikubaʼob tu contra Jéeobaeʼ, maʼ kun kaʼa kuxkíintbiloʼob (Luc. 12:​4, 5).

18, 19. 1) ¿Baʼaxten jeʼel u páajtal k-confiar tiʼ le baʼax ken u chʼaʼtukult Jéeoba yoʼolal le máaxoʼob kimenoʼoboʼ? (Isaías 55:​8, 9). 2) ¿Baʼax ken k-il teʼ tuláakʼ xookoʼ?

¹⁸ Le kéen juzgarnak Jéeobaeʼ, ¿mantatsʼ wa ku beetik baʼax maʼalob? Jach beyoʼ. Jeʼex Abraháneʼ toʼoneʼ k-ojel Jéeoba «u Juezil tuláakal yóokʼol kaabeʼ» perfecto, ku chʼaʼik óotsilil yéetel jach yaan u naʼat. Tsʼoʼoleʼ letiʼeʼ tsʼoʼok u kʼubéentik tiʼ u Hijo ka u juzgart tuláakal máak yéetel tu kaʼansaj xan tiʼ bix ken u beetil (Juan 5:22). Kʼaʼajaktoʼoneʼ Jéeoba yéetel Jesúseʼ ku páajtal u yilkoʼob baʼax yaan ichil u puksiʼikʼal máak (Mat. 9:4). Le oʼolal k-ojel mantatsʼ ken u beetoʼob baʼax maʼalob.

¹⁹ Confiarnakoʼon mantatsʼ tiʼ Jéeoba bey xan tiʼ le baʼaxoʼob ku chʼaʼtuklikoʼ, tumen letiʼeʼ jach maʼalob bix u juzgar (xok Isaías 55:​8, 9). Jéeoba yéetel Jesúseʼ jach maʼalob u juzgaroʼob, le beetik k-confiar tiʼ tuláakal baʼax ku beetkoʼob. K-ojel Jesúseʼ bey jeʼex Jéeoba le kéen u beet justicia bey xan le kéen u chʼaʼ óotsililoʼ (Isa. 11:​3, 4). Teʼ xook ku segueroʼ yaan k-tʼaan tiʼ le baʼax k-ojel yéetel tiʼ le baʼax maʼ k-ojel yoʼolal bix kun juzgarbil le máakoʼob tumen Jesús tu kʼiiniloʼob le nojoch muʼyajiloʼ.