Baʼax jeʼel u yáantkech utiaʼal ka xakʼalxooknakech cada semanaeʼ
¿KU DIFICILTALTECH wa a xakʼalxook cada semana? ¿Nak óol wa a wilik? Yaan kʼiineʼ yaʼab tiʼ toʼoneʼ bey u yúuchultiʼoʼ. Chéen baʼaleʼ yaan baʼaloʼobeʼ kex ku bisik tiempo yéetel maʼ chéen chʼaʼabileʼ suuk k-beetkoʼob sáamsamal. Por ejemploeʼ u yichkíil máakeʼ ku bisik tiempo, pero kéen tsʼoʼokkeʼ maʼalob u yuʼubikuba máak. Le kéen k-xok le Bibliaoʼ k-uʼuyikba maʼalobil bey táan u ‹limpiokíinkuba máak yéetel u tʼaan Dioseʼ› (Efe. 5:26). Koʼox ilik jujunpʼéel tiʼ le baʼaxoʼob jeʼel u yáantkoʼoneʼ:
Beet junpʼéel maʼalob programa. Le xakʼalxookoʼ junpʼéel tiʼ «le baʼaloʼob maas kʼaʼanaʼantak» kʼaʼabéet u beetik le máaxoʼob meyajtik Diosoʼ (Fili. 1:10). Utiaʼal maʼ u tuʼubultech a xakʼalxookeʼ maʼalob ka a tsʼáa le programa tuʼux chíikaʼan a wilkoʼ, jeʼex tu joonajil le refrigeradoroʼ. Maʼ xaaneʼ jeʼel u páajtal a tsʼáaik junpʼéel alarma ta teléfono utiaʼal u kʼaʼajsiktech taʼaytak u yooratal a xook.
Ilawil bukaʼaj tiempo kan xook. Yanoʼobeʼ ku páajtal u xookoʼob yaʼab tiempo, pero yanoʼobeʼ maʼatech. Le oʼolaleʼ le kéen a beet a programaeʼ maʼalob ka a chʼaʼ en cuenta bukaʼaj tiempo jeʼel u páajtal a xookeʼ. Wa le kéen horachajak a xook ka wuʼuyik maʼ taak a xookeʼ ilawil a beetik kex chéen diez minutos. U jaajileʼ maʼ yaʼab tiempoiʼ, pero maas maʼalob ke ka pʼáatak maʼ a xook. Hasta maʼ xaaneʼ jeʼel u taaktal a xook maas yaʼab tiempoeʼ (Fili. 2:13).
Chʼaʼtukult antes baʼax ken a xakʼalxokte. Wa hasta u yooratal a xook ka chʼaʼtuklik baʼax kéen a xokeʼ maʼ táan u meyajtech «tubeel le tiempooʼ» (Efe. 5:16). Le oʼolaleʼ maas maʼalob ka a beet u listail le xookoʼob a kʼáat a xakʼalxoktoʼ. Wa yaan uláakʼ baʼaxoʼob ku taaktal a wojéeltikeʼ tsʼíibte. Tsʼoʼoleʼ wa le táan a xook ku taal ta pool uláakʼ baʼaxoʼob taak a xakʼalxoktikoʼ jeʼel u páajtal a tsʼáaikoʼob teʼ listaoʼ.
Kʼex jujunpʼéel baʼaloʼob. Ilawil a xook cada semana. Le oʼolaleʼ wa ku kʼaʼabéettaleʼ kʼex u díail, u yorail, le bukaʼaj ken a xokoʼ wa le baʼax ken a xokoʼ.
A xakʼalxook cada semanaeʼ yaan u taasiktech yaʼab utsiloʼob: yaan a maas náatsʼal yiknal Jéeoba, yaan a chʼaʼik maʼalob decisiónoʼob yéetel yaan a wuʼuyikaba maʼalobil (Jos. 1:8).
