1. ¿Baʼaxten yaʼab baʼaloʼob jeʼel k-kanik tiʼ le máaxoʼob yaan u jaʼabiloʼoboʼ?

 TULÁAKLOʼON kʼaʼabéet k-nuʼuktaʼal utiaʼal ka k-chʼaʼ maʼalob decisiónoʼob. Le ancianoʼob yéetel le máaxoʼob yiijchajaʼan u tuukuloʼoboʼ jeʼel u páajtal u tsʼáaiktoʼon maʼalob consejoʼobeʼ. Maʼ tumen wa yaan u jaʼabiloʼobeʼ maʼ maʼalob le consejoʼob ku tsʼáaikoʼoboʼ. Jéeobaeʼ u kʼáat ka kaanbalnakoʼon tiʼ letiʼob. Tumen letiʼobeʼ maas yaantiʼob experiencia, maas yaan u naʼatoʼob yéetel ku naʼatkoʼob bix u yuʼubikuba máak (Job 12:12).

2. ¿Baʼax ken k-il teʼ xookaʼ?

² Úuchjeakileʼ tiʼ Jéeobaeʼ meyajnaj le máaxoʼob yaan u jaʼabiloʼob utiaʼal u líiʼsik u yóol yéetel utiaʼal u nuʼuktik u kaajaloʼ. Ichiloʼobeʼ tiaʼan Moisés, David yéetel apóstol Juaniʼ. Kex kuxlajoʼob tiʼ jejeláas épocaʼob yéetel jejeláas baʼax tu aktáantoʼobeʼ letiʼobeʼ le maʼ yaʼab u bin u kíimloʼobeʼ tu tsʼáajoʼob maʼalob consejoʼob tiʼ le táankelmoʼoboʼ. Le consejoʼob tu tsʼáajoʼoboʼ tu yeʼesoʼob u kʼaʼanaʼanil u yuʼubik máak u tʼaan Dios. Jéeobaeʼ tu beetaj u tsʼíibtaʼal le baʼax tu yaʼaloʼoboʼ tumen u yojel yaan u yáantkoʼon, kex táankelmoʼon wa chʼijaʼanoʼoneʼ jeʼel k-jóoʼsik u yutsil le consejoʼob tu tsʼáajoʼoboʼ (Rom. 15:4; 2 Tim. 3:16). Teʼ xookaʼ yaan k-ilik le baʼaxoʼob tu tsʼok aʼalaj le óoxtúul máakoʼob yaan u jaʼabiloʼobaʼ yéetel yaan xan k-ilik baʼax jeʼel u páajtal k-kanik tiʼ le baʼax tu yaʼaloʼoboʼ.

«YAAN A KUXTALEʼEX YAʼAB TIEMPO»

3. ¿Baʼax meyajiloʼob tu beetaj Moisés?

³ Moiséseʼ jach tu tsʼáaj u yóol u meyajt Jéeoba. Letiʼeʼ tu beetaj u profetail, u juezil, u comandanteil yéetel tu tsʼíibtaj jujunpʼéel libroʼob. Letiʼeʼ jach yaʼab baʼax tu yilaj ichil u kuxtal. Tu  jóoʼsaj u kaajil Israel le esclavizartaʼan Egiptooʼ yéetel tu yilaj xan yaʼab tiʼ le milagroʼob tu beetaj Jéeobaoʼ. Jéeobaeʼ tu beetaj u tsʼíibtik le yáax cinco libroʼob yaan teʼ Bibliaoʼ, le Salmo 90, yéetel maʼ xaaneʼ le Salmo 91. Maʼ xaan xaneʼ letiʼ tsʼíibt u libroil Job.

4. ¿Máaxoʼob tu líiʼsaj u yóol Moisés yéetel baʼaxten?

⁴ Le maʼ yaʼab u bin u kíimil Moisésoʼ, le yaan 120 años tiʼoʼ, tu muchʼkíintaj le israelitaʼob utiaʼal u kʼaʼajsiktiʼob le baʼaxoʼob tsʼoʼok u yilkoʼoboʼ yéetel bix tsʼoʼok u yáantaʼaloʼob tumen Jéeoba. Jujuntúul tiʼ le máaxoʼob yanoʼob teʼeloʼ tu táankelmiloʼobeʼ tu yiloʼob le milagroʼob tu beetaj Jéeobaoʼ bey xan le juicioʼob tu taasaj yóokʼol Egiptooʼ (Éxo. 7:​3, 4). Letiʼob xaneʼ xíimbalnajoʼob teʼ Mar Rojooʼ yéetel tu yiloʼob xan u xuʼulsaʼal u soldadoʼob Faraón (Éxo. 14:​29-31). Teʼ desiertooʼ tu yiloʼob xan bix úuchik u kanáantaʼaloʼob tumen Jéeoba (Deu. 8:​3, 4). Moiséseʼ u yojel jach taʼaytak u yokol le israelitaʼob teʼ Luʼum Aʼalaʼan u Tsʼaʼabaltiʼoboʼ yéetel letiʼeʼ taʼaytak u kíimil, le oʼolal tu yilaj u líiʼsik u yóol le kaajoʼ. a

5. ¿Bix tu líiʼsil u yóol le israelitaʼob le baʼaxoʼob tu yaʼalaj Moisés ku chíikpajal tiʼ Deuteronomio 30:​19, 20?

⁵ ¿Baʼax tu yaʼalaj Moisés? (Xok Deuteronomio 30:​19, 20). Tu yaʼaleʼ Israeleʼ jach jatsʼuts le baʼax ku páaʼtikoʼ. Yéetel u bendición Jéeobaeʼ le israelitaʼoboʼ jeʼel u páajtal u kuxtaloʼob kaʼach yaʼab tiempo teʼ Luʼum Aʼalaʼan u Tsʼaʼabaltiʼoboʼ. Moiséseʼ tu yaʼalaj bix le luʼumoʼ: ‹Kaajoʼob nuuktak yéetel maʼalobtak maʼ teʼex beetiʼ, najoʼob chuupoʼob yéetel u clasesil baʼaloʼob maʼ teʼex meyajtiʼ, cisternaʼob maʼ teʼex páaniʼ, uvaʼob yéetel olivoʼob maʼ teʼex pakʼiʼ› (Deu. 6:​10, 11).

6. ¿Baʼaxten Jéeobaeʼ tu chaʼaj u chʼaʼabal u luʼumil Israel tumen uláakʼ kaajoʼob?

⁶ Moiséseʼ tu yaʼalaj tiʼ le israelitaʼoboʼ wa u kʼáat ka seguernak u kuxtaloʼob teʼ Luʼum Aʼalaʼan u Tsʼaʼabaltiʼoboʼ kʼaʼabéet u yuʼubikoʼob u tʼaan Jéeoba. Tu yaʼalajtiʼobeʼ wa ku yuʼubikoʼob u tʼaan Jéeoba yéetel ku pʼáatloʼob naatsʼ tiʼ letiʼeʼ yaan u kuxtaloʼob mantatsʼiʼ. Chéen baʼaleʼ le israelitaʼoboʼ maʼ tu yuʼuboʼob u tʼaan Jéeobaiʼ, le oʼolal Jéeobaeʼ tu chaʼaj u chʼaʼabal u kaajil Israel tumen le asirioʼoboʼ yéetel ka máan kʼiineʼ tu chaʼaj u bisaʼaloʼob bey esclavoʼob tu luʼumil Babiloniaeʼ (2 Rey. 17:​6-8, 13, 14; 2 Cró. 36:​15-17, 20).

7. ¿Baʼax ku kaʼansiktoʼon le baʼaxoʼob tu yaʼalaj Moisésoʼ? (Ilawil xan le dibujooʼ).

⁷ ¿Baʼax ku kaʼansiktoʼon? Le uʼuyaj tʼaanoʼ ku bisik máak tiʼ kuxtal. Jeʼex le israelitaʼob jach taʼaytak kaʼach u yookloʼob teʼ Luʼum Aʼalaʼan u Tsʼaʼabaltiʼoboʼ toʼon xaneʼ jach taʼaytak k-okol teʼ túumben luʼum u prometermaj Diosoʼ. Teʼeloʼ tiʼ ken k-il u suut paraísoil le Luʼumaʼ (Isa. 35:1; Luc. 23:43). Satanás yéetel u demonioʼobeʼ maʼ kun antaloʼobiʼ (Apo. 20:​2, 3). Le religión maʼ tu kaʼansik u jaajiloʼ maʼ ken u náachkunt máak tiʼ Jéeoba (Apo. 17:16). U gobierno wíinik xaneʼ maʼ ken u beet u muʼyaj máak (Apo. 19:​19, 20). Teʼ Paraísooʼ maʼ kun antal máakoʼob kʼasaʼanoʼob yéetel maʼ tu yuʼubikoʼob tʼaaniʼ (Sal. 37:​10, 11). Tuláakal máakeʼ yaan u beetik baʼax ku yaʼalik u Ley Jéeoba, le oʼolal yaan u yantal jeetsʼeliliʼ. Yaan u paklan yaabiltikubaʼob yéetel yaan u confiaroʼob tu baatsiloʼob (Isa. 11:9). ¡Jach yaan u jatsʼutstal le kuxtaloʼ! Wa k-uʼuyik u tʼaan Jéeobaeʼ maʼ chéen wa jaypʼéel años ken kuxlakoʼon teʼ Paraísooʼ, baʼaxeʼ utiaʼal mantatsʼ (Sal. 37:29; Juan 3:16).

8. ¿Bix úuchik u yáantaʼal juntúul misionero tumen u promesaʼob Jéeoba? (Judas 20, 21).

 ⁸ K-tuukul tiʼ u promesaʼob Jéeobaeʼ ku yáantkoʼon utiaʼal u chúukpajal k-óol tiʼ letiʼ kex jeʼel baʼaxak ka k-aktáanteʼ (xok Judas 20, 21). Le promesaʼob xanaʼ ku yáantkoʼon utiaʼal ka baʼatelnakoʼon tu contra k-kʼaakʼas tsʼíibolaloʼob. Juntúul sukuʼun úuch káajak u beetik u misioneroil tu luʼumil Áfricaeʼ ku yaʼalikeʼ yaan horaeʼ ku taaktal u beetik baʼax maʼ maʼalobiʼ, ku yaʼalik: «Tin tsʼáaj cuentaeʼ wa kin beetik baʼax kʼaaseʼ maʼ tin kuxtal teʼ Paraísooʼ. Le oʼolal tin chʼaʼtuklaj in baʼateʼel tu contra in kʼaakʼas tsʼíibolaloʼob. Orarnajen xan tiʼ Jéeoba utiaʼal u yáantken, yéetel u yáantajeʼ páajchaj u chúukpajal in wóol».

«YAAN U BINTECH MAʼALOBIL»

9. ¿Baʼaxoʼob tu aktáantaj David ichil u kuxtal?

⁹ Davideʼ juntúul maʼalob rey kaʼachi. Letiʼ kaʼacheʼ ku paax, ku tsʼíibtik poemaʼob, ku baʼateʼel yéetel tu beetaj xan u profetail. Jach yaʼab baʼaloʼob xan tu muʼyajtaj ichil u kuxtal. Ichil jujunpʼéel añoseʼ letiʼeʼ púutsʼ utiaʼal maʼ u kíimsaʼal tumen Saúl. Ka tsʼaʼab u beet u reyileʼ anchaj u púutsʼul tu kaʼatéen tumen Absalón, u hijoeʼ, taakchaj u beetik u reyil. Kex yaʼab baʼaloʼob tu muʼyajteʼ Davideʼ chúukpaj u yóol tiʼ Jéeoba tak tu tsʼook kʼiiniloʼob u kuxtal. Le oʼolal Jéeobaeʼ tu yaʼalaj tu yoʼolal: «Letiʼeʼ jach ku lúubulten utsil». Le beetkeʼ jach maʼalob ka k-chʼaʼ en cuenta le baʼaxoʼob tu yaʼalaj Davidoʼ (Hech. 13:22; 1 Rey. 15:5).

10. ¿Baʼaxten Davideʼ tu aconsejartaj Salomón?

¹⁰ Koʼoneʼex ilik le consejo tu tsʼáaj David tiʼ Salomón, u hijo, le máax ken u beet u reyiloʼ. Salomóneʼ letiʼe máax yéeyaʼab tumen Jéeoba utiaʼal ka u beet le templooʼ bey xan utiaʼal ka u yáant le kaaj u adorart chéen Jéeobaoʼ (1 Cró. 22:5). Chéen baʼaleʼ maʼ chéen chʼaʼabil le meyaj kʼubéentaʼabtiʼoʼ kʼaʼabéet kaʼach u yáantaʼal tumen Jéeoba. ¿Baʼax aʼalaʼabtiʼ tumen David? Koʼoneʼex ilik.

11. Jeʼex u yaʼalik 1 Reyes 2:​2, 3, ¿baʼax aʼalaʼab tiʼ Salomón tumen David, yéetel bix béeychajik le baʼax aʼalaʼabtiʼoʼ? (Ilawil xan le dibujooʼ).

¹¹ ¿Baʼax tu yaʼalaj David? (Xok 1 Reyes 2:​2, 3). Davideʼ tu yaʼalaj tiʼ Salomóneʼ wa ku yuʼubik u tʼaan Jéeobaeʼ yaan u bin maʼalobil tiʼ. Ich yaʼab añoseʼ Salomóneʼ jach bendecirtaʼabi (1 Cró. 29:​23-25). Tu beetaj junpʼéel templo jach jatsʼuts, tu tsʼíibtaj jujunpʼéel u libroiloʼob le Bibliaoʼ yéetel áantajnaj utiaʼal u tsʼíibtaʼal uláakʼ u libroiloʼob. Letiʼeʼ jach kʼaj óoltaʼabi tumen jach yanchaj u naʼat yéetel tumen jach ayikʼalchaji (1 Rey. 4:34). Chéen baʼaleʼ jeʼex tu yaʼalil Davideʼ, Salomóneʼ chéen yaan u bin maʼalobil tiʼ wa ku yuʼubik u tʼaan Dios. Pero ka máan kʼiineʼ letiʼeʼ káaj u adorartik uláakʼ diosoʼob. Jéeoba túuneʼ xuʼul u bendecirtik, le oʼolal xuʼul u yantal u naʼat utiaʼal u  gobernartik maʼalob le kaajoʼ (1 Rey. 11:​9, 10; 12:4).

12. ¿Baʼax ku kaʼansiktoʼon le baʼaxoʼob tu yaʼalaj Davidoʼ?

¹² ¿Baʼax ku kaʼansiktoʼon? Le uʼuyaj tʼaanoʼ ku beetik u bin maʼalobil tiʼ máak (Sal. 1:​1-3). U jaajileʼ Jéeobaeʼ maʼ tu yaʼaliktoʼon wa yaan u tsʼáaiktoʼon le ayikʼaliloʼob yanchaj tiʼ Salomónoʼ. Pero ku yaʼaliktoʼoneʼ wa k-uʼuyik u tʼaaneʼ yaan u tsʼáaiktoʼon naʼat utiaʼal k-chʼaʼik maʼalob decisiónoʼob (Pro. 2:​6, 7; Sant. 1:5). Le baʼax ku yaʼalik le Bibliaoʼ ku yáantkoʼon utiaʼal ka k-chʼaʼtukult baʼax meyajil ken k-beete, wa yaan u kaʼantal k-xook, baʼax yéetel kéen k-náays k-óol bey xan tiʼ baʼax ken k-xup k-taakʼin. Le naʼatil ku tsʼáaik Jéeobaoʼ ku kanáantkoʼon tiʼ baʼaloʼob jeʼel u beetik k-muʼyajeʼ (Pro. 2:​10, 11). Ku yáantkoʼon xan utiaʼal ka yanaktoʼon maʼalob amigoʼob yéetel utiaʼal ka yanaktoʼon kiʼimak óolal ichil k-familia.

13. ¿Baʼax áant Carmen utiaʼal u chʼaʼik maʼalob decisiónoʼob?

¹³ Carmen, kajaʼan Mozambiqueeʼ, ku tuklik kaʼacheʼ utiaʼal u bin maʼalobil tiʼeʼ kʼaʼabéet u kaʼantal u xook. Letiʼeʼ káaj u xokik arquitectura tiʼ junpʼéel universidad. Ku yaʼalik: «Jach uts tin tʼaan kaʼach le baʼax táan in kanikoʼ». Tu yaʼalaj xan: «Chéen baʼaleʼ jach kin kaʼanal yéetel jach yaʼab tiempo ku luʼsikten. Ku káajal kaʼach in xook láas siete y media de la mañana yéetel ku tsʼoʼokol láas seis de la tarde. Le oʼolal maʼ chéen chʼaʼabil in bin reunióniʼ, tin wuʼuyaj táan kaʼach in náachtal tiʼ Jéeoba. Tin tsʼáaj cuentaeʼ táan kaʼach in meyajtik kaʼatúul tsʼuuloʼob» (Mat. 6:24). Carmeneʼ orarnaji yéetel investigarnaj teʼ publicaciónoʼob utiaʼal u yilik baʼax ken u beetoʼ. Ku yaʼalik: «In maama yéetel le ancianoʼoboʼ tu tsʼáajtenoʼob maʼalob consejoʼob. Ka tsʼoʼok túuneʼ teneʼ tin chʼaʼtuklaj u xuʼulul in xook teʼ universidad utiaʼal in maas meyajtik Jéeobaoʼ. Le consejoʼob tsʼaʼabtenoʼ tu yáanten utiaʼal ka in chʼaʼ le maas maʼalob decisiónoʼ, junpuliʼ maʼ tin arrepentir».

14. ¿Baʼax tu yaʼalaj Moisés yéetel David unaj k-beetik?

¹⁴ Moisés yéetel Davideʼ jach u yaabiltmoʼob kaʼach Jéeoba yéetel tu yaʼaloʼob jach kʼaʼabéet k-uʼuyik u tʼaan. Tiʼ le u tsʼook baʼaloʼob tu yaʼaloʼoboʼ tu líiʼsoʼob u yóol u maasil utiaʼal u pʼáatloʼob naatsʼ tiʼ Jéeoba jeʼex tu beetil letiʼoboʼ. Tu yaʼaloʼobeʼ le máaxoʼob ku náachtaloʼob tiʼ Diosoʼ yaan u xuʼulul u yáantaʼaloʼob yéetel  maʼ ken u yiloʼob u béeytal u promesaʼob. Le consejoʼob tu tsʼáajoʼoboʼ láayliʼ kʼaʼanaʼanoʼob teʼ kʼiinoʼobaʼ. Ka máan yaʼab añoseʼ uláakʼ máax meyajt Jéeobaeʼ tu yaʼalaj jach importante ka chúukpajak k-óol tiʼ Dios.

«MINAʼAN ULÁAKʼ BAʼAL BEETIK U JACH KIʼIMAKTAL IN WÓOL»

15. ¿Baʼaxoʼob tu sen ilaj apóstol Juan?

¹⁵ Juaneʼ jach yaabiltaʼab tumen Jesús (Mat. 10:2; Juan 19:26). Letiʼeʼ tu láakʼintaj Jesús le táan u kʼaʼaytajoʼ, tu yilaj xan le milagroʼob tu beetoʼ yéetel pʼáat tu yiknal tak teʼ súutukiloʼob táan u sufriroʼ. Tu yilaj xan bix kíimsaʼabik Jesús yéetel le ka kaʼa kuxkíintaʼaboʼ. Juaneʼ tu yilaj bix u bin u maas yaʼabtal le máaxoʼob meyajt Dios teʼ yáax siglooʼ. Kʼuch u yaʼaleʼ le maʼalob noticiaʼoboʼ «tsʼoʼok u máan tsikbaltbil tiʼ tuláakal yóokʼol kaab» (Col. 1:23).

16. ¿Máaxoʼob tsʼoʼok u jóoʼskoʼob u yutsil le cartaʼob tu tsʼíibtaj Juanoʼ?

¹⁶ Le tsʼoʼok u sen chʼíijil Juanoʼ anchajtiʼ u privilegioil u tsʼíibtik u libroil Apocalipsis (Apo. 1:1). Letiʼeʼ tu tsʼíibtaj u Evangelioil Juan bey xan óoxpʼéel cartaʼob. Le u tsʼook óoxpʼéeloʼ tu túuxtaj tiʼ juntúul sukuʼun ku kʼaabaʼtik Gayo, Juaneʼ ku yilik le sukuʼunaʼ bey juntúul u hijoeʼ (3 Juan 1). Teʼ kʼiinoʼob jeʼeloʼ Juaneʼ yaʼab máakoʼob tu yilaj bey u paalaloʼobeʼ. Le baʼax tu tsʼíibtaj Juanoʼ ku líiʼsik u yóol u discípuloʼob Jesús tak teʼ kʼiinoʼobaʼ.

17. Jeʼex u yaʼalik 3 Juan 4, ¿baʼax taasik kiʼimak óolal tiʼ máak?

¹⁷ ¿Baʼax tu tsʼíibtaj Juan? (Xok 3 Juan 4). Juaneʼ tu tsʼíibtaj le kiʼimak óolal ku taasik u yuʼubaʼal u tʼaan Diosoʼ. Le ka tu tsʼíibtaj Juan le u yóoxpʼéel cartaoʼ yaan máakoʼob táan kaʼach u kaʼanskoʼob baʼaloʼob maʼ jaajtakiʼ yéetel táan u jatskoʼob le múuchʼuliloʼ. Pero yanchaj sukuʼunoʼob seguernaj «u xíimbaloʼob tu bejil le jaajoʼ». Letiʼobeʼ tu yuʼuboʼob u tʼaan Jéeoba (2 Juan 4, 6). Le baʼax tu beetaj le sukuʼunoʼob chúukpaj u yóoloʼoboʼ tu beetaj u kiʼimaktal u yóol Juan bey xan Jéeoba (Pro. 27:11).

18. ¿Baʼax ku kaʼansiktoʼon le baʼax tu yaʼalaj Juanoʼ?

¹⁸ ¿Baʼax ku kaʼansiktoʼon? Le chúukaʼan óolaloʼ ku beetik u kiʼimaktal u yóol máak (1 Juan 5:3). Por ejemploeʼ ku kiʼimaktal k-óol k-ojéeltik táan k-kiʼimakkúuntik u yóol Jéeoba. Letiʼeʼ ku kiʼimaktal u yóol le kéen u yil táan k-rechazartik le baʼaxoʼob ku tsʼáaik le yóokʼol kaab utiaʼal k-beetik baʼax u kʼáat (Pro. 23:15). Le ángeloʼob xanoʼ ku kiʼimaktal u yóoloʼob (Luc. 15:10). Tsʼoʼoleʼ toʼon xaneʼ ku  kiʼimaktal k-óol le kéen k-il le sukuʼunoʼob yéetel le kiikoʼoboʼ ku chúukpajal u yóoloʼob kéen chʼaʼpachtaʼakoʼob wa le kéen tsʼaʼabakoʼob a pruebail (2 Tes. 1:4). Le kéen xuʼulsaʼak tiʼ le yóokʼol kaabaʼ yaan u kiʼimaktal k-óol tumen chúukpaj k-óol tiʼ Jéeoba.

19. ¿Bix u yuʼubikuba Rachel ikil u kaʼansik u jaajil tiʼ u maasil? (Ilawil xan le fotooʼ).

¹⁹ Jach ku kiʼimaktal k-óol le kéen k-kaʼans u jaajil tiʼ u maasil. Rachel, juntúul kiik kajaʼan República Dominicanaeʼ, ku yilik bey junpʼéel privilegio u kaʼansik u maasil yoʼolal Dioseʼ. Le kéen tuukulnak tiʼ le máaxoʼob tsʼoʼok u kaʼansikoʼ, ku yaʼalik: «Maʼ tin kaxtik bix jeʼel in tsolik le kiʼimak óolal kin wuʼuyik le kéen in wil le máaxoʼob kin kaʼansikoʼ ku kʼuchul u yaabiltoʼob Jéeoba, ku confiaroʼob tiʼ letiʼ yéetel ku beetkoʼob kʼeexoʼob ichil u kuxtal utiaʼal u kiʼimakkúuntkoʼob u yóol Diosoʼ. Le kiʼimak óolal kin wuʼuyikoʼ mix baʼal tu tséel le sacrificioʼob tin beetaj utiaʼal in kaʼanskoʼoboʼ».

JÓOʼS U YUTSIL LE BAʼAXOʼOB TU YAʼALOʼOBOʼ

20. ¿Tiʼ baʼaxoʼob chíikaʼanoʼon tiʼ Moisés, David yéetel Juan?

²⁰ Moisés, David yéetel Juaneʼ kuxlajoʼob tiʼ yaanal épocaʼob yéetel u kuxtaloʼobeʼ maʼ igual tiʼ le bix kuxlikoʼon teʼ kʼiinoʼobaʼ. Kex beyoʼ yaan tiʼ baʼaxoʼob chíikaʼanoʼon tiʼ letiʼob. Jeʼex letiʼobeʼ toʼon xaneʼ k-adorartik Jéeoba, k-orar tiʼ, k-confiar tiʼ letiʼ yéetel k-kaxtik u nuʼuktaj. Tsʼoʼoleʼ k-creertik de ke Jéeobaeʼ yaan u bendecirtik le máaxoʼob ku yuʼubikoʼob u tʼaanoʼ.

21. ¿Baʼax bendicióniloʼob ku páaʼtik le máaxoʼob ku yuʼubikoʼob le consejoʼob tu tsʼáaj Moisés, David, yéetel Juanoʼ?

²¹ Jeʼex tsʼoʼok k-ilkoʼ kʼaʼabéet k-beetik le baʼax tu yaʼalaj le máaxoʼob chúukpaj u yóoloʼoboʼ, kʼaʼabéet k-uʼuyik u tʼaan Jéeoba. Wa k-beetkeʼ yaan u bintoʼon utsil tiʼ tuláakal baʼax k-beetik. ‹Yaan k-kuxtaleʼex yaʼab tiempo›, utiaʼal kʼiinoʼob minaʼan u xuul (Deu. 30:20). Yaan u yantaltoʼon u kiʼimak óolalil k-lúubul utsil tiʼ Jéeoba. Kʼaʼajaktoʼoneʼ letiʼeʼ «jeʼel u páajtal u píitmáan u beetik tuláakal le baʼaxoʼob k-kʼáatkoʼ wa tuláakal le baʼaxoʼob ku taal t-tuukuloʼ» (Efe. 3:20).