¿A kʼáat a maas jóoʼs u yutsil le xakʼalxook ka beetkoʼ? Utiaʼal a maas concentrarkabaeʼ jeʼel u páajtal a beetik le baʼaloʼobaʼ:

• Yéey junpʼéel maʼalob lugar. Yéey junpʼéel lugar limpio yéetel sáasil. Jeʼel u páajtal a kutal xook yiknal junpʼéel mesaeʼ wa jeʼel u páajtal a jóokʼol xook yáanal le cheʼoboʼ, le tuʼux ka wilik maas maʼalobeʼ.

• Kaxt junpʼéel tuʼux a wantal ta juunal. Jesúseʼ «líikʼ jach jaʼatskab» ka tsʼoʼokeʼ «bin tiʼ junpʼéel lugar tuʼux mix máak yaniʼ, teʼ túunoʼ káaj u orariʼ» (Mar. 1:35). Wa maʼ tu páajtal a pʼáatal ta juunaleʼ aʼal tiʼ a láakʼtsiloʼob wa tiʼ le máaxoʼob kajaʼanoʼob ta wotoch baʼax kʼiin a kʼáat xookoʼ yéetel aʼaltiʼob maʼ u tʼankechoʼob teʼ súutukoʼ.

• Ilawil maʼ u náayal a wóol. Wa tiʼ teléfono wa tiʼ tableta kan xookeʼ éems u volumenil utiaʼal maʼ u juum, beyoʼ maʼ kun náayal a wóol. Wa le táan a xook ku kʼaʼajaltech yaan baʼax unaj a beetkoʼ tsʼíibteʼ, beyoʼ jeʼel u béeytal a beetik kéen tsʼoʼokok a xookeʼ. Tsʼoʼoleʼ wa ka wuʼuyik maʼ tu páajtal a concentrarkabaeʼ jáan líiʼkʼen xíimbal wa saʼasatsʼ a wíinklil.