1, 2. ¿Baʼax meyajiloʼob ku beetik juntúul anciano?

 WA TSʼOʼOK u máan kʼiin káajak a beetik a siervo ministerialileʼ maʼ xaaneʼ beoraaʼ taak a beetik a ancianoil. ¿Jeʼel wa u páajtal a beetik le maʼalob meyajaʼ? (1 Tim. 3:1).

² ¿Baʼax meyajiloʼob ku beetik juntúul anciano? Ku tsʼáaik u yóol kʼaʼaytaj, ku kanáantik yéetel ku kaʼansik le múuchʼuliloʼ, tsʼoʼoleʼ ku líiʼsik u yóol u maasil yéetel le baʼaxoʼob ku yaʼalikoʼ bey xan yéetel le baʼaxoʼob ku beetkoʼ. Le oʼolal le Bibliaoʼ ku yaʼalikeʼ le ancianoʼoboʼ beyoʼob «junpʼéel regaloeʼ» (Efe. 4:8).

3. ¿Baʼax requisitosil unaj u chupik juntúul sukuʼun utiaʼal ka u beet u ancianoil? (1 Timoteo 3:​1-7; Tito 1:​5-9).

³ ¿Baʼax requisitosil unaj u chupik juntúul sukuʼun utiaʼal ka u beet u ancianoil? Le requisitosaʼ maʼ igual yéetel le ku kʼáataʼal le kéen k-kaxt meyajoʼ. U suukileʼ utiaʼal u tsʼaʼabal meyaj tiʼ máakeʼ ku yilaʼal le baʼax u yojel u beetoʼ, pero le máaxoʼob taak u beetik u ancianoiloʼoboʼ maʼ chéen kʼaʼabéet u yojloʼob kʼaʼaytaj yéetel kaʼansajiʼ. Letiʼobeʼ kʼaʼabéet xan u chupikoʼob le requisitoʼob ku yaʼalik 1 Timoteo 3:​1-7 yéetel Tito 1:​5-9 (xoke). Teʼ xookaʼ yaan k-ilik óoxpʼéel baʼaloʼob ku kʼáataʼal tiʼ le sukuʼunoʼob taak u beetik u ancianoiloʼoboʼ. Kʼaʼabéet u yúuchul tʼaan maʼalob tu yoʼolaloʼob teʼ múuchʼuliloʼ bey xan tumen le máaxoʼob maʼ tu meyajtikoʼob Jéeobaoʼ. Kʼaʼabéet u nuʼuktikoʼob tubeel u familiaʼob yéetel u kanáantkoʼob le múuchʼuliloʼ.

MAʼALOB U TʼAAN MÁAK TU YOʼOLAL

4. ¿Baʼax u kʼáat u yaʼal maʼ u yantal «baʼax oʼolal u kʼeʼeyel» máak?

⁴ Le máax taak u beetik u ancianoiloʼ «minaʼan baʼax oʼolal u kʼeʼeyel». Lelaʼ u kʼáat u yaʼaleʼ como maʼalob baʼax ku beetkeʼ maʼ  tu yúuchul tʼaan kʼaas tu yoʼolal teʼ múuchʼuliloʼ. Tsʼoʼoleʼ «tak le máaxoʼob minaʼanoʼob ichil le múuchʼuliloʼ kʼaʼabéet maʼalob u tʼaanoʼob tu yoʼolal». Maʼ xaaneʼ jeʼel u yaʼalikoʼob baʼal yoʼolal le baʼaxoʼob k-creerkoʼ, pero wa maʼalob baʼax ku beetik le sukuʼunoʼ maʼ tun aʼalbil mix baʼal kʼaas tu yoʼolal (Dan. 6:​4, 5). Tukle: «¿Baʼax ku yaʼalaʼal tin woʼolal teʼ múuchʼuliloʼ bey xan tumen le máaxoʼob maʼ tu meyajtikoʼob Diosoʼ?».

5. ¿Bix jeʼel a weʼesik a yaabiltmaj baʼax utseʼ?

⁵ Wa ‹a yaabiltmaj baʼax utseʼ› yaan a wilik le baʼaxoʼob maʼalobtak ku beetik u maasiloʼ yéetel yaan a felicitarkoʼob. Maʼ xaaneʼ le kéen a wáant u maasileʼ ka beetik maas tiʼ le ku páaʼtaʼaloʼ (1 Tes. 2:8). Le ancianoʼoboʼ, ¿baʼaxten kʼaʼabéet u yeʼeskoʼob le jatsʼuts modosaʼ? Tumen letiʼobeʼ ku máanskoʼob yaʼab tiempo táan u kanáantkoʼob le múuchʼuliloʼ yéetel ku beetkoʼob xan uláakʼ meyajoʼob (1 Ped. 5:​1-3). Kex jach yaʼab baʼax ku beetkoʼobeʼ kiʼimak u yóoloʼob ikil u yáantkoʼob u maasil (Hech. 20:35).

6. ¿Bix jeʼel a weʼesik ka kʼamik maʼalob a wuʼulaboʼobeʼ? (Hebreos 13:​2, 16; ilawil xan le fotooʼ).

⁶ Ka weʼesik ka ‹utsul kʼamik a wuʼulaboʼob› le kéen a beet baʼaloʼob maʼalobtak tu yoʼolaloʼob. Maʼ chéen tiʼ a amigoʼob unaj a weʼesik a wutsiliʼ, baʼaxeʼ tak tiʼ le máaxoʼob maʼ a jach kʼaj óoloʼoboʼ (1 Ped. 4:9). Junpʼéel libroeʼ ku yaʼalik bix juntúul máak maʼalob u kʼamik u yuʼulaboʼob. Ku yaʼalik: «U joonajiloʼob u yotoch bey xan u puksiʼikʼaleʼ jeʼekʼab utiaʼal le máaxoʼob maʼ u jach kʼaj óoloʼoboʼ». Tukle: «¿Baʼax ku yaʼalik u maasil yoʼolal bix in kʼamik in wuʼulaboʼob?» (xok Hebreos 13:​2, 16). Le máax ku kʼamik maʼalob u yuʼulaboʼobeʼ ku yeʼesik u yutsil tiʼ le máaxoʼob óotsiloʼoboʼ, tiʼ le sukuʼunoʼob ku binoʼob discursaroʼ bey xan tiʼ le sukuʼunoʼob ku líiʼskoʼob u yóol u maasil jeʼex le superintendenteʼob tiʼ circuitooʼ (Gén. 18:​2-8; Pro. 3:27; Luc. 14:​13, 14; Hech. 16:15; Rom. 12:13).

7. ¿Bix u yeʼesik juntúul anciano maʼ «jach uts tu yich taakʼiniʼ»?

⁷ «Maʼ juntúul máak jach uts tu yich taakʼiniʼ». Leloʼ u kʼáat u yaʼaleʼ maʼ chʼiikil u kaxt ayikʼaliloʼobiʼ. Kex óotsilech wa ayikʼalecheʼ tiʼ tuláakal baʼax ka beetkeʼ eʼes ka tsʼáaik táanil u Reino Dios ichil a kuxtal (Mat. 6:33). Meyajnaktech a tiempo, a muukʼ bey  xan le baʼaxoʼob yaantech utiaʼal a adorartik Jéeoba, utiaʼal a kanáantik a familia yéetel le múuchʼuliloʼ (Mat. 6:24; 1 Juan 2:​15-17). Tukle: «¿Bix in wilik le taakʼinoʼ? ¿Kiʼimak wa in wóol yéetel le baʼaxoʼob yaantenoʼ? ¿Wa chʼiikilen in kaxt taakʼin yéetel ayikʼaliloʼob?» (1 Tim. 6:​6, 17-19).

8. ¿Bix jeʼel a weʼesik ka ‹tsʼáaik u pʼiis tuláakal baʼax ka beetkeʼ›?

⁸ «Ku tsʼáaik u pʼiis tuláakal baʼax ku beetik» yéetel «u yojel u controlartuba». Lelaʼ u kʼáat u yaʼaleʼ ku tsʼáaik u pʼiis u janal, le baʼax ku yukʼikoʼ, ku yilik u pʼáatal limpioil, ku kanáantik bix u vestirkuba, ku kanáantik tiʼ baʼax ken u náays u yóol yéetel maʼ tu bin tu paach le baʼaxoʼob ku beetik u máakiloʼob le yóokʼol kaabaʼ (Luc. 21:34; Sant. 4:4). Ku controlarkuba tak kéen tsʼaʼabak a pruebail. «Maʼ juntúul j-káaltal máakiʼ», kʼaj óolaʼan maʼatech u píitmáan u yukʼik. Tukle: «Le bix in kuxtaloʼ, ¿ku yeʼesik wa kin tsʼáaik u pʼiis tuláakal baʼax kin beetik?».

9. ¿Bix u yeʼesik máak «maʼalob u tuukul» yéetel «maʼ xaʼaxakʼaʼan u kuxtaliʼ»?

⁹ Juntúul máak ‹maʼalob u tuukuleʼ› antes u beetik junpʼéel baʼaleʼ ku chʼaʼik en cuenta baʼax ku yaʼalik le Bibliaoʼ. U tuukul tiʼ le principioʼoboʼ ku beetik u yantal u naʼat. Maʼ tu jáan creertik tuláakal baʼal, tu lugar leloʼ ku chʼaʼik en cuenta tuláakal le baʼax uchaʼanoʼ (Pro. 18:13). Le decisiónoʼob ku chʼaʼikoʼ ku yeʼesik ku chʼaʼik en cuenta baʼax ku tuklik Jéeoba. Letiʼeʼ «maʼ xaʼaxakʼaʼan u kuxtaliʼ» ku beetik tuláakal baʼal tu nuʼuk yéetel ku kʼuchul tu yorail. Ku páajtal u confiar máak tiʼ letiʼ yéetel ku beetik le baʼax ku yaʼalaʼaltiʼoʼ. Le jatsʼuts modosoʼobaʼ ku beetik u yúuchul tʼaan maʼalob tu yoʼolal. Beoraaʼ koʼoneʼex ilik le jatsʼuts modos unaj u yeʼesik juntúul sukuʼun tsʼokaʼan u beel taak u beetik u ancianoiloʼ.

KU TSʼÁAIK JUNPʼÉEL MAʼALOB EJEMPLO TIʼ U FAMILIA

10. ¿Bix u yeʼesik juntúul sukuʼun «jach maʼalob bix u nuʼuktik u yotoch»?

¹⁰ Wa tsʼokaʼan a beel yéetel taak a beetik a ancianoileʼ yaan u chʼaʼabal en cuenta baʼax ku beetik a familia utiaʼal u yilaʼal wa ka chupik u requisitosil. Le oʼolal kʼaʼabéet a wilik wa ‹jach maʼalob bix táan a nuʼuktik a wotoch›. Kʼaʼabéet kʼaj óoltaʼanech bey juntúul íichamtsil ku yeʼesik yaabilaj yéetel ku kanáantik tubeel u familiaeʼ. Leloʼ u kʼáat u yaʼaleʼ kʼaʼabéet a wáantkoʼob utiaʼal u tsʼáaik u yóoloʼob u meyajtoʼob Jéeoba. ¿Baʼaxten jach importante ka a beet beyoʼ? Apóstol Pabloeʼ tu yaʼalaj: «Wa juntúul máak mix u yotoch u yojel u nuʼukteʼ, ¿bix túun ken u kanáantil u múuchʼulil Dios?» (1 Tim. 3:5).

11, 12. Le baʼax ku beetik u paalal juntúul sukuʼunoʼ, ¿bix u afectar wa taak u beetik u ancianoiloʼ? (Ilawil xan le fotooʼ).

¹¹ Wa yaan a paalaleʼ ‹unaj u yuʼubikoʼob a tʼaan yéetel unaj u beetkoʼob baʼax maʼalob›, utiaʼal leloʼ kʼaʼabéet a kaʼanskoʼob yéetel yaabilaj. Tuláakal le mejen paalaloʼoboʼ uts tu tʼaan u máan u báaxaloʼob yéetel u cheʼejoʼob, chéen baʼaleʼ wa ka kaʼanskoʼob tubeeleʼ yaan u yuʼubikoʼob tʼaan, yaan u respetarkoʼob máak yéetel yaan u portarkubaʼob maʼalob. Kʼaʼabéet a kaʼansik a paalal u bisubaʼob yéetel Jéeoba, u tsʼáaik ichil u kuxtaloʼob le baʼax ku kankoʼoboʼ. Wa ka beetik beyoʼ yaan u progresaroʼob yéetel yaan u yokjaʼob.

¹² «U paalaleʼ ku meyajtikoʼob Dios, ojéelaʼan maʼatech u beetkoʼob chéen jeʼel baʼalak u kʼáatoʼobeʼ yéetel maʼ tercoʼobiʼ». Wa u hijo juntúul sukuʼun ku lúubul tiʼ junpʼéel nojoch kʼebaneʼ, ¿bix u afectar wa taak u beetik u ancianoil u papá? Wa ku yilaʼal maʼ tu tsʼáaj u yóol u kaʼans u hijoeʼ maʼ xaaneʼ le sukuʼunoʼ maʼ tu calificar utiaʼal ka u beet u ancianoil  (ilawil La Atalaya 15 tiʼ octubre tiʼ 1996, página 21 párrafo 6, 7).

KU KANÁANTIK LE MÚUCHʼULILOʼ

13. ¿Bix jeʼel a weʼesik ‹uts a puksiʼikʼaleʼ› yéetel ‹maʼatech a chʼíikil a beet chéen baʼax a kʼáat›?

¹³ Le sukuʼunoʼob ku yeʼeskoʼob jatsʼuts modosoʼ jach ku yáantkoʼob le múuchʼuliloʼ. Le máax ‹uts u puksiʼikʼaloʼ› ku yáantaj utiaʼal ka yanak jeetsʼelil. Wa a kʼáat ka kʼaj óoltaʼakech bey juntúul máak uts u puksiʼikʼaleʼ chʼenxikint u maasil yéetel chʼaʼ en cuenta baʼax ku tuklikoʼob. Koʼox aʼalikeʼ tiʼ junpʼéel u reunión le ancianoʼoboʼ u maas yaʼabil tiʼ letiʼobeʼ ku chʼaʼtuklikoʼob u beetkoʼob junpʼéel baʼal maʼ tu bin tu contra baʼax ku yaʼalik le Bibliaoʼ, kex maʼ jach de acuerdoʼecheʼ, ¿yaan wa a apoyartik le baʼax tu chʼaʼtukloʼoboʼ? Wa beyoʼ yaan a weʼesikeʼ techeʼ ‹maʼatech a chʼíikil a beet chéen baʼax a kʼáat› yéetel ka chʼaʼik en cuenta le baʼax ku yaʼalik u maasiloʼ (Gén. 13:​8, 9; Pro. 15:22). Ka weʼesik xan ‹maʼ j-kaxan baʼatelechiʼ› yéetel ‹maʼ séeb a kʼuuxiliʼ›, baʼaxeʼ ka respetartik u maasil yéetel utsech. Ka weʼesik ka kaxtik jeetsʼelil tak teʼ súutukiloʼob yaan problemasoʼ (Sant. 3:​17, 18). Tsʼoʼoleʼ como ku meyajtech utsul tʼaanoʼobeʼ ka beetik u xuʼulul u kʼuuxil le máaxoʼob pʼekmiloʼonoʼ (Jue. 8:​1-3; Pro. 20:3; 25:15; Mat. 5:​23, 24).

14. ¿Baʼax u kʼáat u yaʼal «maʼ juntúul túumben discípulo» máakiʼ yéetel «maʼatech u pʼatik u leyoʼob Dios»?

¹⁴ Utiaʼal ka tsʼaʼabak u beet u ancianoil juntúul sukuʼuneʼ kʼaʼabéet «maʼ juntúul túumben discípuloiʼ». Kex maʼ kʼaʼabéet yaʼab años okjaʼanakeʼ kʼaʼabéet yiijchajaʼan u tuukul. Antes u tsʼaʼabal a beet a ancianoileʼ kʼaʼabéet a weʼesik kabal a wóol jeʼex Jesúseʼ yéetel ka kʼamik jeʼel baʼaxak asignaciónil ka tsʼaʼabaktecheʼ (Mat. 20:23; Fili. 2:​5-8). Eʼes techeʼ ‹maʼatech a pʼatik u leyoʼob Dios›. Lelaʼ ka beetik wa ka pʼáatal tu yiknal Jéeoba, ka kuxtal jeʼex u kʼáateʼ yéetel ka beetik le baʼax ku yaʼalik u kaajaloʼ (1 Tim. 4:15).

15. ¿Kʼaʼabéet wa jach u yojel discursar juntúul anciano? Tsole.

 ¹⁵ Le Bibliaoʼ ku yaʼalikeʼ le ancianoʼoboʼ kʼaʼabéet ‹noʼojaʼanoʼob utiaʼal kaʼansaj›. ¿U kʼáat wa túun u yaʼaleʼ kʼaʼabéet jach u yojloʼob discursar? Maʼatech. Yaʼab ancianoʼobeʼ kex maʼ jach maʼalob bix u discursaroʼobeʼ jach u yojloʼob kʼaʼaytaj yéetel jach maʼalob bix u beetkoʼob visita de pastoreo (1 Corintios 12:​28, 29 ket yéetel Efesios 4:11). Pero kex beyoʼ kʼaʼabéet u maas maʼalobkíintkoʼob bix u kaʼansajoʼob. ¿Bix jeʼel u beetkoʼobeʼ?

16. ¿Bix jeʼel a maas maʼalobkíintik bix a kaʼansajeʼ? (Ilawil xan le fotooʼ).

¹⁶ «Maʼatech u kʼéechel tiʼ baʼax ku yaʼalik u tʼaan Dios» kéen kaʼansajnak. Utiaʼal a maas maʼalobkíintik bix a kaʼansajeʼ kʼaʼabéet a jóoʼsik teʼ Biblia le baʼax ken a kaʼansoʼ bey xan le kéen a tsʼáa consejo tiʼ wa máaxoʼ. Utiaʼal leloʼ kʼaʼabéet a xakʼalxoktik le Bibliaoʼ bey xan le publicaciónoʼoboʼ (Pro. 15:28; 16:23). Ilawil bix u tsolik le publicaciónoʼob le tekstoʼoboʼ, beyoʼ kéen meyajnaktecheʼ yaan u páajtal a tsolik tubeel. Kéen kaʼansajnakecheʼ ilawil a kʼuchul tu puksiʼikʼal le máaxoʼob uʼuyikechoʼ. Uláakʼ baʼax jeʼel u yáantkecheʼ letiʼe a kʼáatik áantaj tiʼ le sukuʼunoʼob úuch joʼopʼok u beetik u ancianoiloʼoboʼ (1 Tim. 5:17). Le ancianoʼoboʼ yéetel yaabilaj unaj ‹u líiʼskoʼob u yóol u maasil› yéetel wa ku kʼaʼabéettaleʼ unaj ‹u yaʼaliktiʼob u nuʼuk›. Wa ka weʼesik utsil, yaabilaj yéetel ka chʼaʼik teʼ Biblia le baʼax ka kaʼansikoʼ yaan a maas maʼalobkíintik bix a kaʼansaj tumen táan a beetik jeʼex Jesús, le Maʼalob j-Kaʼansajoʼ (Mat. 11:​28-30; 2 Tim. 2:24).

SEGUERNAK A TSʼÁAIK A WÓOLIʼ

17. 1) ¿Baʼax jeʼel u yáantik le siervo ministerialoʼob taak u beetik u ancianoiloʼoboʼ? 2) ¿Baʼax unaj u chʼaʼabal en cuenta kéen ilaʼak wa juntúul sukuʼuneʼ jeʼel u páajtal u beetik u ancianoileʼ? (Ilawil xan le cuadro « Baʼaxoʼob unaj u chʼaʼabal en cuenta»).

¹⁷ Maʼ xaaneʼ beora tsʼoʼok k-ilik le requisitos kʼaʼabéet u chupik le siervo ministerialoʼob utiaʼal u beetik u ancianoiloʼoboʼ, yanoʼobeʼ  jeʼel u tuklikoʼobeʼ mix bikʼin kun tsaʼayloʼob. Pero kʼaʼajaktecheʼ mix Jéeoba mix u kaajal ku páaʼtik ka a beet tuláakal baʼal jach perfectoil (1 Ped. 2:21). Maʼ u tuʼubultecheʼ u espíritu santo Jéeobaeʼ jeʼel u yáantkech utiaʼal a chupik le requisitoʼoboʼ (Fili. 2:13). ¿Yaan wa junpʼéel jatsʼuts modos a kʼáat a maas eʼese? Kʼáat u yáantaj Jéeoba, investigart teʼ publicaciónoʼob baʼax ku yaʼalik tu yoʼolaloʼ yéetel kʼáat u yáantaj xan le ancianoʼoboʼ.

18. ¿Baʼax maʼalob ka u beet le siervo ministerialoʼoboʼ?

¹⁸ Tuláakloʼon tak le ancianoʼoboʼ kʼaʼabéet k-ilik u seguer k-eʼesik le jatsʼuts modos tsʼoʼok k-xakʼaltik teʼ xookaʼ (Fili. 3:16). Wa siervo ministerialecheʼ tsʼáa a wóol utiaʼal a beetik a ancianoil. Kʼáat tiʼ Jéeoba ka u yáantech utiaʼal a maas meyajtik yéetel utiaʼal a maas áantaj teʼ múuchʼuliloʼ (Isa. 64:8). Jéeobaeʼ yaan u bendecirtik tuláakal le baʼaxoʼob ka beetik utiaʼal a chupik u requisitosil utiaʼal a beetik a ancianoiloʼ.