1. ¿Bix úuchik u yáantik Jéeoba le máaxoʼob meyajt úuchjeakiloʼ?

 LE Bibliaoʼ ku yaʼalikeʼ le máaxoʼob chúukaʼan u yóoloʼob tiʼ Diosoʼ junpuliʼ maʼ saajkoʼobiʼ. Pero maʼ mantatsʼ bey tu yuʼubilubaʼoboʼ. Por ejemploeʼ juntéeneʼ Davideʼ tu yuʼubaj jach yaan u muukʼ bey jeʼex «junpʼéel montañaeʼ», pero yaan kʼiin xaneʼ tu yuʼubaj minaʼan u muukʼ yéetel tu chʼaʼaj saajkil (Sal. 30:7). Le Bibliaoʼ ku yaʼalik xaneʼ u espíritu santo Dioseʼ tu tsʼáaj muukʼ tiʼ Sansón, pero letiʼeʼ tu reconocerteʼ wa maʼ yoʼolal u yáantaj Dioseʼ jeʼel u pʼáatal «jeʼex u maasil máakoʼobeʼ», jeʼel u pʼáatal minaʼan u muukʼeʼ (Jue. 14:​5, 6; 16:17). Le máakoʼobaʼ yanchaj u muukʼoʼob tumen tsʼaʼab poder tiʼob tumen Jéeoba.

2. ¿Baʼaxten tu yaʼalaj apóstol Pablo kéen u yuʼub minaʼan u muukʼeʼ maas muʼukʼaʼan u yuʼubikuba? (2 Corintios 12:​9, 10).

² Apóstol Pablo xaneʼ tu reconocertaj kʼaʼabéet u yáantaʼal tumen Jéeoba (xok 2 Corintios 12:​9, 10). Jeʼex toʼoneʼ letiʼ xaneʼ kʼojaʼanchaji (Gál. 4:​13, 14). Tsʼoʼoleʼ maʼ chéen chʼaʼabil tu yilil u beetik baʼax maʼalobiʼ (Rom. 7:​18, 19). Yaan kʼiin xaneʼ jach chiʼichnakchaji yéetel sajakchaj u kíimsaʼal (2 Cor. 1:​8, 9). Kex beyoʼ tu yaʼalaj: «Kéen pʼáatak minaʼan in muukʼeʼ maas muʼukʼaʼan in wuʼuyikinba». ¿Baʼaxten tu yaʼalaj leloʼ? Tumen kéen pʼáatak minaʼan u muukʼeʼ Jéeoba tsʼáaik muukʼ tiʼ.

3. ¿Baʼax kʼáatchiʼiloʼob ken k-núuk teʼ xookaʼ?

³ Jéeobaeʼ jeʼel xan u tsʼáaiktoʼon muukʼeʼ (1 Ped. 5:10). Pero maʼ chéen unaj k-kutal k-páaʼt u tsʼáaiktoʼon muukʼiʼ. Koʼox aʼalikeʼ yaantech junpʼéel plato kiʼikiʼ janal, chéen baʼaleʼ maʼ ta naʼajtal chéen ikil a paktik. Utiaʼal a jóoʼsik u yutsil le janaloʼ kʼaʼabéet a bisik ta chiʼ. Jeʼex le janal ku tsʼáaiktoʼon  muukʼoʼ Jéeoba xaneʼ jeʼel u tsʼáaiktoʼon muukʼeʼ, pero yaan baʼax kʼaʼabéet k-beetik utiaʼal u yáantkoʼon. ¿Baʼax ku beetik Jéeoba utiaʼal u tsʼáaiktoʼon muukʼ? ¿Bix jeʼel k-jóoʼsik u yutsil le áantaj ku tsʼáaikoʼ? Utiaʼal k-ojéeltikeʼ koʼox ilik bix úuchik u yáantik profeta Jonás, María u maama Jesús, yéetel apóstol Pablo. Yaan xan k-ilik bix u yáantik le máaxoʼob meyajtik teʼ kʼiinoʼobaʼ.

4. ¿Baʼax jeʼel u páajtal k-beetik utiaʼal u tsʼáaiktoʼon muukʼ Jéeobaeʼ?

⁴ Junpʼéel tiʼ le baʼaxoʼob jeʼel u páajtal k-beetik utiaʼal u tsʼáaiktoʼon muukʼ Jéeobaeʼ letiʼe k-oraroʼ. Letiʼeʼ ku núukik k-oración le kéen u tsʼáatoʼon «le páajtalil ku píitmáan tiʼ u muukʼ wíinikoʼ» (2 Cor. 4:7). Maʼalob xan ka k-xok le Bibliaoʼ yéetel ka tuukulnakoʼon tiʼ baʼax ku yaʼalik (Sal. 86:11). Le baʼax ku yaʼalik Jéeobaoʼ jach «yaan u páajtalil» (Heb. 4:12). Le beetkeʼ wa ka orar tiʼ Jéeoba yéetel ka xokik le Bibliaoʼ letiʼeʼ yaan u tsʼáaiktech le muukʼ kʼaʼabéettech utiaʼal a meyajtik yéetel kiʼimak óolal bey xan utiaʼal a tsʼoʼokbesik junpʼéel meyaj maʼ chéen chʼaʼabil u beetaʼaliʼ. Koʼox ilik bix úuchik u yáantik profeta Jonás.

5. ¿Baʼaxten kʼaʼabéetchaj u yáantaʼal Jonás?

⁵ Profeta Jonáseʼ kʼaʼabéetchaj maʼ u chʼaʼik saajkil utiaʼal u tsʼoʼokbesik le meyaj kʼubéentaʼabtiʼ tumen Jéeobaoʼ. Chéen baʼaleʼ letiʼeʼ sajakchaji, naʼak tiʼ junpʼéel barco utiaʼal u bin yaanal tuʼux. Yoʼolal le baʼax tu beetoʼ letiʼ yéetel u maasil máakoʼob yanoʼob teʼ barcooʼ óolak kíimkoʼob le ka taal junpʼéel kʼaʼamkach cháakoʼ. Chéen baʼaleʼ le máaxoʼob yanoʼob teʼ barcooʼ tu puloʼob Jonás teʼ kʼáaʼnáaboʼ ka luʼukʼ tumen juntúul nuxiʼ kay. ¿Bix tu yuʼubiluba Jonás? ¿Tu tuklaj wa tsʼoʼoktiʼ beyoʼ? ¿Tu tuklaj wa ta tʼaan tsʼoʼok u xúumpʼattaʼal tumen Jéeoba? U jaajileʼ maʼ k-ojliʼ, pero sen chiʼichnakchaj waleʼ.

6. ¿Baʼax áant Jonás utiaʼal maʼ u sajaktal le tiaʼan tu nakʼ le nuxiʼ kayoʼ? (Jonás 2:​1, 2, 7).

⁶ ¿Baʼax tu beetaj Jonás utiaʼal maʼ u sajaktal le tiaʼan ichil u nakʼ le nuxiʼ kayoʼ? Letiʼeʼ orarnaj tiʼ Jéeoba (xok Jonás 2:​1, 2, 7). Kex maʼ tu yuʼubaj tʼaaneʼ Jonáseʼ u yojel yaan u yuʼubal u oración tumen Jéeoba tumen arrepentirnaji. Tsʼoʼoleʼ tuukulnaj tiʼ le baʼax ku yaʼalik u Tʼaan Diosoʼ. ¿Bix k-ojéeltik? Tumen teʼ oración ku yaʼalik Jonás capítulo 2, tu chʼaʼchiʼitaj yaʼab tiʼ le baʼaxoʼob ku yaʼalik u libroil Salmosoʼ (por ejemploeʼ ket Jonás 2:​2, 5 yéetel Salmo 69:1; 86:7). Jach chíikaʼan u yilaʼal Jonáseʼ u yojel baʼax ku yaʼalik le tekstoʼoboʼ yéetel tuukulnajaʼan tiʼ baʼax ku yaʼalik, le oʼolal le ka muʼyajnajoʼ confiarnaj yaan u yáantaʼal tumen Jéeoba. Ka tsʼoʼokeʼ tu yaʼalaj tiʼ Jéeoba yaan u tsʼoʼokbesik le meyaj kʼubéentaʼabtiʼoʼ (Jon. 2:10–3:4).

7, 8. ¿Baʼax áant juntúul sukuʼun utiaʼal u chúukpajal u yóol?

⁷ U ejemplo Jonáseʼ jach jeʼel u yáantkoʼon kéen muʼyajnakoʼoneʼ. Koʼox ilik baʼax úuch tiʼ Zhiming, b juntúul sukuʼun kajaʼan Taiwán. Letiʼeʼ jach kʼojaʼan yéetel jach ku pʼektaʼal tumen u láakʼtsiloʼob ikil u meyajtik Jéeoba. ¿Baʼax áantik utiaʼal maʼ u lúubul u yóol? Letiʼe u orar yéetel u xakʼalxookoʼ. Letiʼeʼ ku yaʼalik: «Yaan kʼiin le kéen yanakten problemaseʼ jach kin chiʼichnaktal, kin wuʼuyik maʼ tu páajtal in xakʼalxook». Pero letiʼeʼ maʼ tu pʼatkuba. Ku yaʼalik: «Le yáax baʼax kin beetkoʼ in orar tiʼ Jéeoba, kéen tsʼoʼokkeʼ kin tsʼáaik in audífonos utiaʼal in wuʼuyik cánticos. Yaan kʼiineʼ kin kʼaay chaambelil hasta in tranquilizarkinbaeʼ. Kéen tsʼoʼokok túuneʼ ku káajal in xakʼalxook».

⁸ Le baʼax tu kanaj Zhiming le táan u  xakʼalxookoʼ le áant utiaʼal u chúukpajal u yóol tiʼ Jéeoba. Juntéenjeak le táant u tsʼoʼokol u operartaʼaloʼ, juntúul enfermeraeʼ tu yaʼalajtiʼ kʼaʼabéet u tsʼaʼabal kʼiʼikʼ tiʼ tumen jach junpʼíit u glóbulos rojos. Chéen baʼaleʼ le áakʼab antes u operartaʼaloʼ tu xokaj u experiencia juntúul kiik beetaʼab le mismo operación tiʼoʼ. U glóbulos rojos le kiikoʼ maas junpʼíit tiʼ le u tiaʼaloʼ, pero kex beyoʼ le kiikoʼ maʼ tu kʼamaj ka tsʼaʼabak kʼiʼikʼ tiʼiʼ yéetel tu recuperartuba. Le experienciaaʼ le áant Zhiming utiaʼal u chúukpajal u yóol.

9. ¿Baʼax jeʼel a beetik wa jach chiʼichnakech tumen táan a muʼyajeʼ? (Ilawil xan le dibujoʼoboʼ).

⁹ Wa jach chiʼichnakech tumen táan a muʼyajeʼ maʼ xaaneʼ jeʼel a wuʼuyik istikyaj a orar yéetel a xakʼalxookeʼ. Pero kʼaʼajaktecheʼ Jéeobaeʼ u yojel baʼax táan u yúuchultech yéetel ku naʼatik bix a wuʼuyikaba. Le oʼolaleʼ kex maʼ u xáantal le oración ka beetiktiʼoʼ letiʼeʼ yaan u tsʼáaiktech le áantaj kʼaʼabéettechoʼ (Efe. 3:20). Wa yoʼolal le baʼaxoʼob ka aktáantik ka wuʼuyik maʼ tu páajtal a xakʼalxookeʼ maʼ xaaneʼ jeʼel u páajtal a wuʼuyik u grabaciónil le Biblia wa uláakʼ publicaciónoʼoboʼ. Uláakʼ baʼax jeʼel u yáantkecheʼ letiʼe a wuʼuyik le kʼaayoʼob wa le videoʼob yaan teʼ jw.org. Kéen orarnakech tiʼ Jéeoba yéetel kéen a kaxt u núukil a oraciónoʼob teʼ áantaj ku tsʼáaikoʼ bey ka a waʼaltiʼeʼ: «Jéeoba, tsʼáaten muukʼ».

10. ¿Bix u yáantkoʼon le sukuʼunoʼoboʼ?

¹⁰ Jéeobaeʼ ku líiʼsik k-óol yéetel u yáantaj le sukuʼunoʼoboʼ. Le kéen muʼyajnakoʼon bey xan wa táan k-ilik beetik junpʼéel meyaj maʼ chéen chʼaʼabileʼ letiʼobeʼ jach ‹ku líiʼskoʼob k-óol› (Col. 4:​10, 11). Teʼ kʼiinoʼob táan k-muʼyajoʼ maas kʼaʼabéettoʼon u yáantaj k-amigoʼob (Pro. 17:17). Le kéen lúubuk k-óoleʼ le sukuʼunoʼoboʼ jeʼel u tsʼáaikoʼobtoʼon le baʼaxoʼob kʼaʼabéettoʼonoʼ, jeʼel u líiʼskoʼob k-óoleʼ yéetel jeʼel u yáantkoʼonoʼob utiaʼal maʼ k-náachtal tiʼ Jéeobaeʼ. Koʼox ilik bix úuchik u yáantaʼal María, u maama Jesús.

11. ¿Baʼaxten kʼaʼabéet kaʼach u yáantaʼal María?

¹¹ Maríaeʼ kʼaʼabéet kaʼach u yáantaʼal tumen jach maʼ chéen chʼaʼabil le baʼax kʼubéentaʼabtiʼ tumen Jéeobaoʼ. Letiʼeʼ jach jaʼakʼ u yóol le ka aʼalaʼabtiʼ tumen le ángel Gabriel yaan u yantal  juntúul u chaambaloʼ tumen letiʼeʼ maʼ tsʼokaʼan u beeliʼ. Tsʼoʼoleʼ mix juntéen u líiʼs juntúul paal, pero beoraaʼ yaan u líiʼsik le Mesíasoʼ. Maríaeʼ mix juntéen yanak relaciones sexuales tiʼ, kʼaʼajaktoʼoneʼ letiʼeʼ maʼ tsʼoʼokok u beel kaʼach yéetel Joséiʼ, pero beoraaʼ yaan u tsoliktiʼ embarazada (Luc. 1:​26-33).

12. Jeʼex u yaʼalik Lucas 1:​39-45, ¿bix úuchik u líiʼsaʼal u yóol María?

¹² ¿Baʼax áant María utiaʼal u tsʼoʼokbesik le nojoch meyaj kʼubéentaʼabtiʼoʼ? Tu kʼáataj u yáantaj u maasil. Por ejemploeʼ tu kʼáataj tiʼ ángel Gabriel ka u maas tsoltiʼ baʼax ku páaʼtaʼal ka u beete (Luc. 1:34). Ka tsʼoʼokeʼ Maríaeʼ bin u xíimbalt Elisabet, juntúul u láakʼtsilil kajaʼan tiʼ junpʼéel «u kaajil Judá yaan naatsʼ tiʼ le montañaʼoboʼ». Maríaeʼ jach líiʼsaʼab u yóol tumen Elisabet, felicitartaʼabi tsʼoʼoleʼ yéetel u yáantaj u espíritu santo Dioseʼ Elisabeteʼ tu yaʼalaj junpʼéel profecía yoʼolal le chaambal ken u síijs Maríaoʼ (xok Lucas 1:​39-45). María túuneʼ tu yaʼaleʼ Jéeobaeʼ «yéetel le poder yaan tu kʼaboʼ tsʼoʼok u beetik nukuch baʼaloʼob» (Luc. 1:​46-51). Jeʼex k-ilkoʼ yéetel u yáantaj le ángel Gabriel yéetel Elisabetoʼ Jéeobaeʼ tu líiʼsaj u yóol María.

13. ¿Baʼax úuch le ka tu yaʼalaj Dasurí tiʼ le sukuʼunoʼob le baʼax ku yúuchultiʼoʼ?

¹³ Jeʼex úuchik tiʼ Maríaeʼ toʼon xaneʼ jeʼel k-áantaʼal tumen le sukuʼunoʼoboʼ. Koʼox ilik baʼax úuch tiʼ Dasurí, juntúul kiik kajaʼan Bolivia. U papáeʼ tsaʼay junpʼéel kʼojaʼanil minaʼan tsʼaakil tiʼ ka ingresartaʼab hospital. Le kiikoʼ taak u beetik tuláakal le ku páajtal utiaʼal u yáantik u papáoʼ (1 Tim. 5:4). Chéen baʼaleʼ, ¿chéen chʼaʼabil wa úuchik u beetik? Letiʼeʼ ku yaʼalik: «Yaʼab u téenel tin wuʼuyaj tsʼoʼok u píitmáan in kaʼanal, maʼ tu páajtal in seguer». Pero tu káajbaleʼ maʼ tu kʼáataj ka áantaʼakiʼ, ¿baʼaxten? Dasuríeʼ ku yaʼalik: «Maʼ in kʼáat kaʼach in tsʼáa u kuuch le sukuʼunoʼoboʼ. Kin tuklik: ‹Jéeoba kun áantken›. Pero tin tsʼáaj cuentaeʼ chéen tin juunal taak in wutskíintik le problemas yaantenoʼ tumen maʼ tin chaʼik u yáantken le sukuʼunoʼoboʼ» (Pro. 18:1). Dasuríeʼ tu chʼaʼtuklaj u yaʼalik tiʼ u amigoʼob le baʼax ku aktáantikoʼ. Ku yaʼalik: «Le sukuʼunoʼoboʼ jach tu yáantenoʼob yéetel tu líiʼsoʼob in wóol. Letiʼobeʼ ku biskoʼobten janal teʼ hospitaloʼ yéetel ku xokikoʼob tekstoʼob in wuʼuye. Ku kiʼimakkúuntik in wóol in wilik maʼ tin juunal yaneniʼ. In wojel tiaʼanen ichil u familia Jéeobaeʼ, junpʼéel nojoch familia ku yáantkoʼon kéen kʼaʼabéetchajak, ku yokʼoloʼob t-éetel yéetel maʼ tu pʼatkoʼob máak».

14. ¿Baʼaxten unaj a kʼamik le áantaj ku tsʼáaik le ancianoʼoboʼ?

¹⁴ Tiʼ Jéeoba xaneʼ ku meyaj le ancianoʼob utiaʼal u yáantkoʼonoʼ. Letiʼobeʼ jach ku líiʼskoʼob u yóol máak (Isa. 32:​1, 2). Le oʼolaleʼ wa yaan baʼax chiʼichnakkúuntikecheʼ tsikbalnen tu yéeteloʼob. Kʼam le áantaj ku tsʼáaikoʼobtechoʼ tumen tiʼ Jéeobaeʼ ku meyaj le ancianoʼob utiaʼal u tsʼáaiktech muukʼoʼ.

15. ¿Baʼax jatsʼuts esperanzail yaan tiʼ le máaxoʼob meyajtik Diosoʼ?

¹⁵ Le esperanza ku tsʼáaik le Bibliaoʼ ku tsʼáaiktoʼon muukʼ (Rom. 4:​3, 18-20). Tuláakal le máaxoʼob meyajtik Diosoʼ táan u páaʼtkoʼob u kuxtaloʼob mantatsʼ, yanoʼobeʼ kaʼan uláakʼoʼobeʼ way Luʼumeʼ. Yoʼolal le jatsʼuts baʼax táan k-páaʼtikoʼ ku páajtal k-aktáantik le baʼaxoʼob ku yúuchultoʼonoʼ, ku yáantkoʼon kʼaʼaytaj bey xan k-tsʼoʼokbesik le meyaj ku kʼubéentaʼaltoʼon teʼ múuchʼuliloʼ (1 Tes. 1:3). Koʼox ilik bix áantaʼabik apóstol Pablo tumen le esperanzaoʼ.

16. ¿Baʼaxten kʼaʼabéetchaj muukʼ tiʼ le apóstol Pablooʼ?

 ¹⁶ Apóstol Pabloeʼ kʼaʼabéetchaj muukʼ tiʼ utiaʼal u aktáantik le baʼaxoʼob úuchtiʼoʼ. Tiʼ le carta tu tsʼíibtaj tiʼ le corintoiloʼoboʼ tu yaʼaleʼ ku yuʼubikuba bey junpʼéel nuʼukul de kʼat séeb u paʼapajleʼ. Letiʼeʼ tu yaʼaleʼ peʼechʼi, chʼaʼpachtaʼabiʼ yéetel yaan horaeʼ maʼ tu kaxtaj baʼax u beetiʼ. Tu yaʼalaj xaneʼ yaʼab u téenel óolak kíimsaʼak (2 Cor. 4:​8-10). Le baʼaxoʼob úuch tiʼ Pabloaʼ tu tsʼíibtaj teʼ tu yóoxpʼéel viaje tu beetaj utiaʼal u kʼaʼaytajoʼ. Maʼ xaaneʼ teʼ súutukoʼ maʼ u yojel wa yaan u aktáantik uláakʼ baʼaloʼobiʼ. Ka máan kʼiineʼ láayliʼ teʼ tu yóoxpʼéel viajeoʼ atacartaʼab tumen le máakoʼoboʼ, maʼach tumen le autoridadoʼoboʼ, óolak búuluk yéetel kʼaʼal cárcel.

17. Jeʼex u yaʼalik 2 Corintios 4:​16-18, ¿baʼax áant Pablo utiaʼal u chúukpajal u yóol?

¹⁷ ¿Baʼax áant apóstol Pablo utiaʼal u chúukpajal u yóol? Letiʼe u tuukul tiʼ le jatsʼuts esperanza yaantiʼoʼ (xok 2 Corintios 4:​16-18). Letiʼeʼ tu yaʼalaj tiʼ le sukuʼunoʼob yanoʼob Corintooʼ kex u «wíinklil táan u bin u xuʼupuleʼ», maʼ lubaʼan u yóoliʼ. Pabloeʼ tuukulnaj tiʼ le kuxtal minaʼan u xuul kun tsʼaabiltiʼ tumen Dios teʼ kaʼanoʼ, utiaʼal letiʼeʼ le kuxtalaʼ ku taasiktiʼ «utsiloʼob maas nuuktak». Letiʼeʼ jeʼel u aktáantik jeʼel baʼaxak ka úuchuktiʼ utiaʼal u kʼamik le kuxtal teʼ kaʼanoʼ. Úuchik u tuukul tiʼ le jatsʼuts esperanzaaʼ Pabloeʼ tu yuʼubeʼ «sáamsamal táan u bin u túumbenchajal» ichil u puksiʼikʼal.

18. ¿Bix u yáantaʼal Tihomir yéetel u familia tumen le esperanza u tsʼaamaj Jéeobaoʼ?

¹⁸ Le esperanza ku tsʼáaik Jéeobaoʼ letiʼe baʼax áantik Tihomir, juntúul sukuʼun kajaʼan Bulgaria. Walajki wa jaypʼéel añosaʼ Zdravko, u yíitsʼineʼ kíim tiʼ junpʼéel accidente. Yoʼolal leloʼ Tihomireʼ jach lúub u yóol. ¿Baʼax áantkoʼob utiaʼal maʼ u jach lúubul u yóoloʼob? Letiʼe u tuukuloʼob tiʼ bix kun kaʼa kuxkíintbil Zdravkooʼ. Tihomireʼ ku yaʼalik: «K-tsikbaltik tuʼux ken k-kʼam Zdravko, baʼax jaanlil ken k-prepararttiʼ, máax ken k-invitart utiaʼal k-kʼamik yéetel baʼax ken k-tsikbalttiʼ yoʼolal le baʼaxoʼob úuch tu tsʼook kʼiinoʼoboʼ». Tihomireʼ ku  yaʼalikeʼ le u tuukuloʼob tiʼ le jatsʼuts esperanza u tsʼaamaj Jéeobaoʼ ku yáantik u familia utiaʼal u chúukpajal u yóoloʼob yéetel u páaʼtkoʼob le kʼiin kéen kaʼa kuxkíintaʼak u yíitsʼinoʼ.

19. ¿Baʼax jeʼel a beetik utiaʼal a maas creertik u promesaʼob Jéeobaeʼ? (Ilawil xan le dibujooʼ).

¹⁹ ¿Baʼax jeʼel a beetik utiaʼal a maas creertik yaan u béeytal le promesaʼob u beetmaj Jéeobaoʼ? Wa yaantech u esperanzail a kuxtal way Luʼum utiaʼal mantatsʼeʼ xok le baʼaxoʼob ku yaʼalik le Biblia yoʼolal le Paraísooʼ yéetel tukult tiaʼanechiʼ (Isa. 25:8; 32:​16-18). Tukult bix le kuxtal kun antal teʼ Paraísooʼ: ¿Ka wilkaba waiʼ? ¿Máax uláakʼ ka wilkiʼ? ¿Baʼaxoʼob ka sen uʼuyikiʼ? ¿Bix a wuʼuyikabaiʼ? Le dibujoʼob tiʼ le paraíso ku taasik le publicaciónoʼoboʼ jeʼel u yáantkech a wil bix kun kuxtal máak teʼeloʼ. Jeʼel xan u páajtal a chaʼantik le videoʼob yaan u paaxiloʼoboʼ jeʼex, Junpʼéel jatsʼuts kuxtal, Jach naatsʼ yanil u kʼiinil yéetel Kin wilik le túumben kuxtaloʼ. Wa ku suuktal k-tuukul tiʼ bix ken k-kuxtal teʼ túumben luʼumoʼ yaan k-ilik séeb u máan le baʼaxoʼob k-muʼyajtikoʼ (2 Cor. 4:17). Le esperanza ku tsʼáaik Jéeobaoʼ yaan u muʼukʼaʼankúuntik a fe.

20. Le kéen k-uʼuy minaʼan k-muukʼeʼ, ¿máax kun tsʼáaiktoʼon muukʼ?

²⁰ Le kéen k-uʼuy minaʼan k-muukʼeʼ «Dios kun tsʼáaiktoʼon muukʼ» (Sal. 108:13). Jéeobaeʼ jach tsʼoʼok u tsʼáaiktoʼon tuláakal baʼax kʼaʼabéet utiaʼal u yáantkoʼon. Le oʼolaleʼ wa difícil a tsʼoʼokbesik junpʼéel meyaj kʼubéentaʼantech, u chúukpajal a wóol a aktáant junpʼéel problema wa u seguer a meyajtik Jéeoba yéetel kiʼimak óolaleʼ, orarnen yéetel xakʼalxokt le Biblia utiaʼal a kaxtik u nuʼuktaj Jéeobaoʼ. Tsʼoʼoleʼ kʼam u yáantaj le sukuʼunoʼoboʼ yéetel tuukulnen tiʼ le jatsʼuts esperanza yaantoʼonoʼ. Beyoʼ «ka muʼukʼaʼankúuntaʼakeʼex yéetel tuláakal páajtalil tu yoʼolal u nojoch muukʼ Dios, utiaʼal ka chúukpajak a wóoleʼex a muʼyajteʼex tuláakal baʼal yéetel ka yanakteʼex paciencia bey xan kiʼimak óolal» (Col. 1:11).