Le pórticooʼ tiaʼan kaʼach tu entradail le templooʼ le oʼolal kʼaʼabéet kaʼach u kʼáatmáansik máak utiaʼal u yokol teʼ cuarto santooʼ. ¿Bukaʼaj ku medirtik kaʼachi? Antes tiʼ 2023, le Biblia Túumben Luʼum ich inglésoʼ ku yaʼalik teʼ 2 Crónicas 3:4: «U táan le torreoʼ 8 metros yéetel 90 centímetros u chowakil, igual yéetel u kóochil le najoʼ, u kaʼanlileʼ 120». Uláakʼ bibliaʼobeʼ ku yaʼalikoʼob xaneʼ «120 codos» u kaʼanlil. ¡Leloʼ u kʼáat u yaʼaleʼ junpʼéel nuxiʼ torre de 53 metros u kaʼanlil!

Chéen baʼaleʼ tu añoil 2023, le Biblia Túumben Luʼum ich inglésoʼ tu kʼexaj bix u traducirtik le versículoaʼ. Beoraaʼ ku yaʼalik: «U kaʼanlileʼ 20 codos» wa óoliʼ 9 metros. a Koʼoneʼex ilik baʼaxten tu beetaj le kʼeexaʼ.

U tekstoil 1 Reyes 6:​3, maʼ tu yaʼalik bukaʼaj u kaʼanlil le pórticooʼ. Teʼ tekstoaʼ Jeremíaseʼ ku yaʼalik bukaʼaj u kóochil yéetel u chowakil le pórticooʼ, pero maʼ tu yaʼalaj bukaʼaj u kaʼanliliʼ. Teʼ tuláakʼ capítulooʼ ku tʼaan tiʼ uláakʼ baʼaloʼob jach kʼaʼanaʼantak yaan teʼ templooʼ. Jeʼex le nuxiʼ pilaoʼ, le 10 carretillaʼoboʼ bey xan kaʼapʼéel nukuch columnaʼob de cobre yanoʼob kaʼach aktáan tiʼ le pórticooʼ (1 Rey. 7:​15-37). Wa maas tiʼ 50 metros u kaʼanlil le pórticooʼ, ¿máasaʼ maʼ xaaneʼ jeʼel kaʼach u yaʼalik Jeremíaseʼ? Ka máan wa jaypʼéel sigloʼobeʼ le historiadoroʼob judíoʼoboʼ maʼ tu yaʼaloʼob wa le pórticooʼ maas kaʼanal tiʼ le templo tu beetaj Salomónoʼ.

Jujuntúul máakoʼob jach kaʼanchajaʼan u xookoʼobeʼ maʼ tu creerkoʼob wa u pakʼiloʼob le templo tu beetaj Salomónoʼ jeʼel u aguantartik u aalil junpʼéel pórtico de 120 codos u kaʼanlileʼ. Kaʼacheʼ le edificioʼob ku beetaʼaloʼob de tuunich yéetel ladrillooʼ, jeʼex u entradailoʼob le temploʼob yanoʼob Egiptooʼ, kabaleʼ jach kóoch, pero jeʼex u bin u kaʼantaleʼ ku bin u bekʼechtal. Chéen baʼaleʼ u templo Salomóneʼ maʼ bey úuchik u beetaʼaloʼ. Jujuntúul máakoʼob jach kaʼanchajaʼan u xookoʼobeʼ ku yaʼalikoʼobeʼ u pakʼiloʼobeʼ kex 2 metros yéetel 70 centímetros u kóochiloʼob (6 codos). Theodor Busink, juntúul máak ku xakʼaltik bix beetaʼabik le úuchben najoʼoboʼ, ku yaʼalik: «Wa k-chʼaʼik en cuenta bukaʼaj u piimil le pakʼoʼoboʼ k-ilkeʼ u kaʼanlil le pórticooʼ maʼ tu páajtal u medirtik 120 codos».

Maʼ xaaneʼ yanchaj junpʼéel error ka copiartaʼab 2 Crónicas 3:4. Jujunpʼéel úuchben tsʼíiboʼobeʼ teʼ 2 Crónicas 3:​4, ku yaʼalikoʼob «120» chéen baʼaleʼ yaan uláakʼ úuchben tsʼíiboʼobeʼ ku yaʼalikoʼob «20 codos», jeʼex le Códice alejandrino (siglo 5) yéetel le Códice ambrosianooʼ (siglo 6). ¿Maʼ xaaneʼ baʼaxten yanchaj le erroroʼ? Tumen ich hebreoeʼ le tʼaan cien yéetel codoseʼ jach chíikaʼanoʼob. Le oʼolal maʼ xaaneʼ le máax copiartoʼ tu lugar u tsʼíibtik «veinte codoseʼ» tu tsʼíibtaj «ciento veinte».

U jaajileʼ jach maʼalob ka k-naʼat tubeel bix le templo tu beetaj Salomónoʼ, chéen baʼaleʼ le baʼax maas importanteoʼ letiʼe ka k-naʼat tubeel le baʼax tu chíikbesoʼ: le templo espiritualoʼ. ¡Jach k-tsʼáaik u graciasil tiʼ Jéeoba úuchik u invitarkoʼon utiaʼal k-adorartik tu templo! (Heb. 9:​11-14; Apo. 3:12; 7:​9-17).