1. Le maʼ yaʼab u bin u kíimil apóstol Pedrooʼ, ¿baʼax meyajil tsʼaʼabtiʼ tumen Jéeoba?

 APÓSTOL Pedroeʼ jach chúukpaj u yóol u meyajt Jéeoba. Letiʼeʼ tu láakʼintaj Jesús le ka kʼaʼaytajnajoʼ yéetel kʼaʼaytajnaj xan tiʼ le máaxoʼob maʼ judíoʼoboʼ. Ka máan kʼiineʼ táakpaj ichil le cuerpo gobernanteoʼ. Tsʼoʼoleʼ le maʼ yaʼab u bin u kíimiloʼ tsʼaʼabtiʼ uláakʼ meyaj tumen Jéeoba. Teʼ año 62 yéetel 64, Jéeobaeʼ tu beetaj u tsʼíibtik kaʼapʼéel cartaʼob: U Yáax tsʼíib Pedro yéetel U Kaʼapʼéel tsʼíib Pedro. Le apóstoloʼ tu tsʼíibtaj le kaʼapʼéel cartaʼobaʼ tumen jach u kʼáat u seguer u yáant le sukuʼunoʼob kex ka kíimkoʼ (2 Ped. 1:​12-15).

2. ¿Baʼaxten jach áantaʼab le sukuʼunoʼob tumen le kaʼapʼéel cartaʼob tu tsʼíibtaj Pedrooʼ?

² Le ka tu tsʼíibtaj Pedro le cartaʼobaʼ le sukuʼunoʼoboʼ táan kaʼach u muʼyajoʼob «tu yoʼolal jejeláas baʼaloʼob» (1 Ped. 1:6). Yaan kaʼach máakoʼob ku kaʼanskoʼob baʼaloʼob maʼ jaajtak tiʼ le sukuʼunoʼob utiaʼal u kʼaskúuntikoʼob le múuchʼuliloʼ (2 Ped. 2:​1, 2, 14). Tsʼoʼoleʼ le sukuʼunoʼob kajaʼanoʼob Jerusalénoʼ jach taʼaytak kaʼach u yilkoʼob «u xuul tuláakal baʼal» wa u xuʼulsaʼal Jerusalén yéetel le templo tumen le romanoʼoboʼ (1 Ped. 4:7). Le cartaʼob tu tsʼíibtaj apóstol Pedrooʼ tu yáantaj le sukuʼunoʼob utiaʼal u aktáantkoʼob le baʼaloʼobaʼ bey xan le baʼaloʼob ku taal u kʼiinil u yúuchloʼ. b

3. ¿Baʼaxten kʼaʼabéet k-xakʼaltik le cartaʼob tu tsʼíibtaj Pedrooʼ?

³ Kex le cartaʼob tu tsʼíibtaj Pedro utiaʼal le sukuʼunoʼob teʼ  yáax siglooʼ Jéeobaeʼ tu beetaj u táakbesaʼal ichil le Biblia utiaʼal k-jóoʼsik u yutsiloʼ (Rom. 15:4). Bejlaʼeʼ le yóokʼol kaabaʼ ku túulchʼintik máak utiaʼal u lúubul tiʼ núupkʼeban. Leloʼ jeʼel u beetik u maas difíciltal k-meyajtik Jéeobaeʼ. Tsʼoʼoleʼ jach taʼaytak le nojoch muʼyajiloʼ, teʼ kʼiinoʼoboʼ yaan u maas yaatal le kuxtal ke le kʼiinoʼob ka xuʼulsaʼab Jerusalén yéetel u templooʼ. Le oʼolaleʼ le kaʼapʼéel cartaʼob tu tsʼíibtaj Pedrooʼ jach yaʼab baʼax ku kaʼansiktoʼon tumen ku yáantkoʼon utiaʼal maʼ u náayal k-óol, maʼ k-sajaktal tiʼ wíinik bey xan utiaʼal k-yaabiltik le sukuʼunoʼoboʼ. Tsʼoʼoleʼ jeʼel xan u yáantik le ancianoʼob utiaʼal u kanáantkoʼob tubeel u tamanoʼob Jéeobaoʼ.

4. ¿Baʼax jeʼel u beetik u lúubul k-óoleʼ? (2 Pedro 3:​3, 4).

⁴ U maas yaʼabil le máakoʼoboʼ maʼ tu creerkoʼob le baʼax ku yaʼalik le Biblia kun úuchloʼ. Como úuch joʼopʼok k-aʼalik taʼaytak u xuʼulsaʼal le yóokʼol kaabaʼ yaan máakoʼobeʼ ku burlarkoʼonoʼob, hasta ku yaʼalikoʼob mix bikʼin kun úuchul le baʼax k-aʼalikoʼ (xok 2 Pedro 3:​3, 4). Tsʼoʼoleʼ maʼ xaaneʼ le máakoʼob tuʼux k-kʼaʼaytajoʼ, k-éet meyajoʼob wa k-láakʼtsiloʼobeʼ bey xan u tuukuloʼoboʼ. Leloʼ jeʼel u beetik u lúubul k-óoleʼ. ¿Baʼax jeʼel u yáantkoʼoneʼ? Koʼox ilik baʼax tu yaʼalaj apóstol Pedro.

5. ¿Baʼax jeʼel u yáantkoʼon k-páaʼt yéetel paciencia u kʼiinil le xuʼulsajiloʼ? (2 Pedro 3:​8, 9).

⁵ Maʼ xaaneʼ yaan máax jeʼel u tuklikeʼ Jéeobaeʼ jach tsʼoʼok u xáantal maʼ u xuʼuls le kʼasaʼan yóokʼol kaabaʼ. Pero kʼaʼabéet k-chʼaʼik en cuenta le baʼax tu yaʼalaj Pedrooʼ. Letiʼeʼ tu yaʼaleʼ Jéeobaeʼ maʼ tu yilik le tiempo jeʼex toʼonoʼ (xok 2 Pedro 3:​8, 9). Utiaʼal letiʼeʼ junpʼéel kʼiineʼ bey mil añoseʼ. Jéeobaeʼ jach yaan u paciencia tumen maʼ u kʼáat ka xuʼulsaʼak mix máakiʼ, pero k-ojel yaan u kʼuchul u kʼiinil u xuʼulsik tiʼ le yóokʼol kaabaʼ. ¿Máasaʼ jach kʼaʼabéet k-aprovechartik le tiempo pʼaatal utiaʼal k-kaʼansik le máakoʼoboʼ?

6. ¿Bix jeʼel k-tsʼáaik t-tuukul yaan u kʼuchul u kʼiinil Jéeobaeʼ? (2 Pedro 3:​11, 12).

⁶ Apóstol Pedroeʼ tu yaʼaleʼ unaj k-tsʼáaik t-tuukul yaan u kʼuchul u kʼiinil Jéeoba (xok 2 Pedro 3:​11, 12). ¿Bix túun jeʼel k-beetkeʼ? Letiʼe kéen tuukulnakoʼon tiʼ le kuxtal kun antaltoʼon teʼ Paraísooʼ. Por ejemploeʼ máans ta tuukul táan a jaantik kiʼikiʼ janaloʼob, minaʼan contaminación yéetel táan a kʼamik a láakʼtsiloʼob tsʼoʼok u kaʼa kuxtaloʼoboʼ. Tsʼoʼoleʼ máans ta tuukul xaneʼ táan a tsikbaltik bix béeychajik le profecíaʼob tiʼ le máaxoʼob kuxlajoʼob úuchjeakiloʼ. K-tuukul tiʼ le baʼaloʼobaʼ yaan u yáantkoʼon k-kʼaʼajseʼ kuxaʼanoʼon tu tsʼook kʼiinoʼob yéetel maʼ yaʼab u bin utiaʼal u kʼuchul u kʼiinil Jéeobaiʼ. Como k-ojel baʼaxoʼob ku taal u kʼiinil u yúuchleʼ maʼ ken k-chaʼa k-tuʼusul tumen le kʼasaʼan máakoʼoboʼ (2 Ped. 3:17).

7. ¿Baʼax jeʼel u yúuchul wa k-sajaktal tiʼ u maasileʼ?

⁷ K-ojel jach taʼaytak u taal le xuʼulsajiloʼ, le oʼolal taak k-tsikbaltik tiʼ le máakoʼob le baʼaloʼob maʼalobtak ken u beet u Reino Diosoʼ. Pero yaan horaeʼ maʼ t-beetik tumen saajkoʼon tiʼ u maasil. Leloʼ jach bey úuchik tiʼ Pedro le áakʼab ka juzgartaʼab Jesúsoʼ, letiʼeʼ tu yaʼalaj maʼ u kʼaj óoliʼ (Mat. 26:​69-75). Pero ka máan kʼiineʼ xuʼul u sajaktal, le oʼolal tu yaʼalaj: «Maʼ a sajaktaleʼex tiʼ le baʼax ku sajaktal le uláakʼ máakoʼoboʼ mix u péek a wóoleʼex» (1 Ped. 3:14). Le baʼax tu yaʼalaj Pedrooʼ ku yeʼesikeʼ jeʼel u xuʼulul k-sajaktal tiʼ wíinikeʼ.

8. ¿Baʼax jeʼel u yáantkoʼon utiaʼal maʼ k-sajaktal tiʼ u maasileʼ? (1 Pedro 3:15).

⁸ ¿Baʼax jeʼel u yáantkoʼon utiaʼal u xuʼulul k-sajaktal tiʼ wíinikeʼ? Pedroeʼ tu yaʼalaj: «Unaj [ . . . ] a kʼamkeʼex Cristo ta puksiʼikʼaleʼex bey  Yuumtsileʼ» (xok 1 Pedro 3:15). ¿Bix túun jeʼel k-beetik le baʼax tu yaʼaloʼ? Letiʼe kéen tuukulnakoʼon tiʼ le nojoch autoridad tsʼaʼan tiʼ Jesúsoʼ. Wa ka sajaktal bey xan wa ka nerviosotal kéen kʼaʼaytajnakecheʼ jeʼel u páajtal a beetik lelaʼ: Máans ta tuukul táan u gobernar Jesús teʼ kaʼanoʼ yéetel tiaʼan u millonesil ángeloʼob tu yiknaleʼ. Kʼaʼajaktecheʼ tiʼ letiʼeʼ tsʼoʼok u tsʼaʼabal «tuláakal páajtalil teʼ kaʼanoʼ bey xan way luʼumeʼ», yéetel tiaʼan xan t-éetel «tak teʼ kʼiinoʼob táan u tsʼoʼokol tiʼ le yóokʼol kaabaʼ» (Mat. 28:​18-20). Apóstol Pedroeʼ tu yaʼaleʼ mantatsʼ unaj k-líiʼsikba utiaʼal k-defendertik baʼax k-creertik. Wa a kʼáat kʼaʼaytaj tuʼux ka meyaj, teʼ escuelaoʼ wa uláakʼ tuʼuxoʼ tukult baʼax ken a waʼale yéetel baʼax súutukil ken a waʼale. Kʼáat tiʼ Jéeoba ka u yáantech utiaʼal maʼ a sajaktal, letiʼeʼ jach yaan u yáantkech (Hech. 4:29).

9. ¿Tiʼ baʼax súutukil maʼ tu yeʼesaj yaabilaj Pedroiʼ? (Ilawil xan le dibujooʼ).

⁹ Pedroeʼ tu kanaj u yeʼes yaabilaj. Letiʼeʼ tiaʼan le ka tu yaʼalaj Jesús lelaʼ: «Kin tsʼáaikteʼex junpʼéel túumben mandamiento: ka a paklan yaabiltabaʼex. Jeʼel bix tsʼoʼok in yaabiltikeʼexoʼ teʼex xaneʼ bey unaj a paklan yaabiltikabaʼexoʼ» (Juan 13:34). Ka máan kʼiineʼ Pedroeʼ kaʼa sajakchaj tiʼ u maasil, le beetik xuʼul u janal yéetel le máaxoʼob maʼ judíoʼoboʼ. Apóstol Pablo túuneʼ tu yaʼalajtiʼ junpuliʼ maʼ  maʼalob le baʼax ku beetkoʼ (Gál. 2:​11-14). Pedroeʼ tu kʼamaj le consejo tsʼaʼabtiʼoʼ, le oʼolal teʼ kaʼapʼéel cartaʼob tu tsʼíibtoʼ tu yaʼalaj maʼ chéen kʼaʼabéet k-aʼalik k-yaabiltmaj le sukuʼunoʼoboʼ, baʼaxeʼ kʼaʼabéet k-eʼesik.

10. ¿Baʼax jeʼel u yáantkoʼon k-eʼes «yaabilaj jeʼex le ku yantal ichil sukuʼuntsiloʼoboʼ»? (1 Pedro 1:22).

¹⁰ Apóstol Pedroeʼ tu yaʼaleʼ le máaxoʼob yanoʼob ichil u kaajal Jéeobaoʼ kʼaʼabéet u yeʼeskoʼob «junpʼéel yaabilaj jeʼex le ku yantal ichil sukuʼuntsiloʼoboʼ» (xok 1 Pedro 1:22). Le clase yaabilajaʼ k-eʼesik tumen tsʼoʼok k-kanikeʼ Jéeobaeʼ «mix máak jelaʼan u paktik», le oʼolal toʼoneʼ k-kʼáat k-beet jeʼex letiʼeʼ (Hech. 10:​34, 35). Pero wa k-eʼesik yaabilaj chéen tiʼ jujuntúul sukuʼunoʼobeʼ maʼ táan k-beetik le baʼax tu yaʼalaj Jesúsoʼ. U jaajileʼ yaan horaeʼ maas k-bisikba yéetel jujuntúul sukuʼunoʼob, leloʼ maʼ kʼaasiʼ tumen tak Jesúseʼ tu maas bisuba yéetel jujuntúul u discípuloʼob (Juan 13:23; 20:2). Pero le baʼax tu yaʼalaj Pedrooʼ ku kʼaʼajsiktoʼoneʼ kʼaʼabéet k-yaabiltik tuláakal le sukuʼunoʼoboʼ jeʼex u yaabiltikuba le máaxoʼob yanoʼob ichil junpʼéel familiaeʼ (1 Ped. 2:17).

11. ¿Baʼax u kʼáat u yaʼal k-yaabiltik u maasil yéetel u jaajil u yóol k-puksiʼikʼal?

¹¹ Apóstol Pedroeʼ tu yaʼalaj: «Yaabiltabaʼex […] yéetel u jaajil u yóol a puksiʼikʼaleʼex». Le baʼax ku yaʼalik le tekstoaʼ u kʼáat u yaʼaleʼ kʼaʼabéet k-yaabiltik tak le máaxoʼob maʼ chéen chʼaʼabil k-yaabiltikoʼoboʼ. Utiaʼal k-naʼatikeʼ koʼox ketik beyaʼ: Koʼox aʼalikeʼ ka ofendertaʼal tumen wa máax, ¿máasaʼ maʼ tu taaktal a weʼesik yaabilaj tiʼ le máax ofendertechoʼ? U suukileʼ hasta ku taaktal a sutiktiʼ u jeel le baʼax tu beetajtechoʼ. Pero kʼaʼajaktoʼoneʼ maʼ letiʼe baʼax tu kaʼansaj Jesús tiʼ Pedrooʼ (Juan 18:​10, 11). Le oʼolal ka máan kʼiineʼ Pedroeʼ tu yaʼalaj: «Maʼ a sutkeʼex le kʼaas ku beetaʼalteʼexoʼ, maʼ a pochʼkeʼex le máax pochʼkeʼexoʼ, baʼaxeʼ tʼaneʼex maʼalob a wéet máakileʼex» (1 Ped. 3:9). Le beetkeʼ wa ka yaabiltik u maasil yéetel u jaajil u yóol a puksiʼikʼaleʼ yaan a tratartik maʼalob tak le máax ofendertechoʼ.

12. 1) ¿Baʼax ken k-beet wa k-yaabiltmaj le sukuʼunoʼoboʼ? 2) ¿Baʼax ku péeksikech a beet le video Maʼ u xuʼulul k-bisikba yéetel le sukuʼunoʼoboʼ?

¹² Teʼ yáax carta tu tsʼíibtaj apóstol Pedrooʼ tu yaʼaleʼ jach kʼaʼabéet k-yaabiltikba t-baatsil tumen le máax beetik beyaʼ «mantatsʼ ku perdonartik u maasil» (1 Ped. 4:8). Maʼ xaaneʼ Pedroeʼ le ka tu tsʼíibtaj le tʼaanoʼobaʼ táan kaʼach u kʼaʼajsik le ka kaʼansaʼabtiʼ tumen Jesús bix unaj u perdonaroʼ. Kʼaʼajaktoʼoneʼ letiʼeʼ tu yaʼaleʼ jeʼel u perdonar tak siete u téeneleʼ, maʼ xaaneʼ tu tukleʼ beyoʼ jach táan u yeʼesik yaabilaj. Pero Jesúseʼ tu yaʼalajtiʼeʼ kʼaʼabéet u perdonar «tak 77 u téenel», lelaʼ u kʼáat u yaʼaleʼ unaj u perdonar mantatsʼ (Mat. 18:​21, 22). Toʼoneʼ bey unaj k-beetik xanoʼ. Wa difícil a wilik a beetik le baʼax tu yaʼalaj Jesúsoʼ, maʼ u lúubul a wóol tiʼ tuláakloʼon bey u yúuchloʼ. Wa yaan máax tu beetaj u yaatal a wóoleʼ ilawil a perdonartik yéetel utskíint le baʼax úuchoʼ. c

13. ¿Baʼaxten maʼ chéen chʼaʼabil u kanáantaʼal le mejen tamanoʼob tumen le ancianoʼoboʼ?

¹³ Pedroeʼ mix juntéen tu tuʼubsaj le baʼax aʼalaʼabtiʼ tumen Jesúsaʼ: «Kanáant in mejen alakʼ tamanoʼob» (Juan 21:16). Wa ancianoecheʼ jach tak wal a beetik le baʼax tu yaʼalaj Jesúsoʼ. Pero u jaajileʼ yaan horaeʼ maʼ chéen chʼaʼabil u jóoʼsik tiempo máak utiaʼal u beetkiʼ. Yáaxeʼ tumen le ancianoʼoboʼ kʼaʼabéet u tsʼáaikoʼob baʼax kʼaʼabéet tiʼ u familiaʼob yéetel kʼaʼabéet xan u yáantkoʼob utiaʼal maʼ u náachtaloʼob tiʼ Jéeoba. Tsʼoʼoleʼ kʼaʼabéet u jóokʼloʼob kʼaʼaytaj, u prepararkubaʼob  maʼalob utiaʼal u kaʼansajoʼob teʼ reuniónoʼoboʼ yéetel utiaʼal u máanskoʼob discursoʼob teʼ asambleaʼoboʼ. Yaan ancianoʼob xaneʼ ku yáantajoʼob teʼ Comitéʼob tiʼ Enlace yéetel le Hospitaloʼoboʼ wa teʼ Departamento Local tiʼ Diseño yéetel Construcciónoʼ. Jeʼex k-ilkoʼ le ancianoʼoboʼ jach yaʼab meyaj ku beetkoʼob.

14. ¿Baʼax jeʼel u yáantik le ancianoʼob u tsʼoʼokbesoʼob le meyaj kʼubéentaʼantiʼoboʼ? (1 Pedro 5:​1-4).

¹⁴ Teʼ yáax siglooʼ Pedroeʼ tu yaʼalaj tiʼ le ancianoʼoboʼ: «Kanáanteʼex le u tamanoʼob Dios u kʼubéentmajteʼexoʼ» (xok 1 Pedro 5:​1-4). K-ojel le ancianoʼoboʼ jach u yaabiltmoʼob le sukuʼunoʼoboʼ yéetel jach taak u kanáantkoʼob. Pero yaan kʼiineʼ yoʼolal tuláakal baʼax ku beetkoʼobeʼ jeʼel u yuʼubikoʼob maʼ tu páajtal u beetkoʼob le meyajaʼ, wa jach kaʼanaʼanoʼob. Wa bey u yúuchultechoʼ, ¿baʼax jeʼel u páajtal a beetkeʼ? Tsikbalt tiʼ Jéeoba bix a wuʼuyikaba. Apóstol Pedroeʼ tu yaʼalaj: «Wa yaan máax ku meyajtik u maasileʼ u beet yéetel le bukaʼaj muukʼ ku tsʼáaik Diosoʼ» (1 Ped. 4:11). Kʼaʼajaktecheʼ yaan tiʼ le baʼaxoʼob táan u aktáantik le sukuʼunoʼoboʼ chéen teʼ Paraíso kun utstaloʼoboʼ. Maʼ u tuʼubultech xaneʼ le sukuʼunoʼoboʼ maʼ chéen tu juunal yanoʼobiʼ táan xan u kanáantaʼaloʼob tumen le maas nojoch j-Kanan Tamanoʼ, Jesucristo. Letiʼeʼ táan u kanáantkoʼob teʼ kʼiinoʼobaʼ yéetel yaan xan u kanáantkoʼob teʼ túumben luʼumoʼ. Le baʼax ku páaʼtik Jéeoba tiʼ le ancianoʼoboʼ letiʼe ka u yeʼesoʼob le «maʼalob bej tiʼ le tamanoʼoboʼ» yéetel ka u yaabiltoʼob.

15. ¿Baʼax ku beetik juntúul anciano utiaʼal u kanáantik u tamanoʼob Jéeoba? (Ilawil xan le fotooʼ).

¹⁵ William, juntúul sukuʼun úuch joʼopʼok u beetik u ancianoileʼ jach kʼaʼanaʼan u yilik u kanáantik le sukuʼunoʼoboʼ. Le ka káaj u pandemiail le COVID-19, letiʼ yéetel le u maasil ancianoʼob teʼ múuchʼuliloʼ tu chʼaʼtukloʼob u tʼankoʼob cada semana le sukuʼunoʼob yanoʼob tu grupoʼoboʼ. ¿Baʼaxten tu beetoʼob beyoʼ? Letiʼeʼ ku yaʼalik: «Yaʼab tiʼ le sukuʼunoʼoboʼ chéen tu juunal kajaʼanoʼob, minaʼan máax yéetel u tsikbaloʼob. Leloʼ jeʼel u beetik u káajal u tuklikoʼob baʼaloʼob maʼ maʼalobtakeʼ». Williameʼ le kéen tsikbalnak yéetel máax táan u aktáantik junpʼéel problemaeʼ jach suuk u chʼenxikintik, beyoʼ ku yojéeltik baʼax chiʼichnakkúuntik yéetel bix jeʼel u yáantikeʼ. Kéen tsʼoʼokok u tsikbal tu yéeteleʼ ku kaxtik teʼ sitio junpʼéel video jeʼel u yáantik le  sukuʼunoʼ. Williameʼ ku yaʼalik: «Teʼ kʼiinoʼobaʼ jach kʼaʼabéet k-kanáantik le tamanoʼoboʼ. Wa k-tsʼáaik k-óol k-kaʼans le máakoʼob yoʼolal u Reino Diosoʼ, kʼaʼabéet xan k-tsʼáaik k-óol k-kanáant le sukuʼunoʼoboʼ, tumen letiʼobeʼ u mejen tamanoʼob Dios».

16. ¿Bix jeʼel k-tsʼáaik ichil k-kuxtal le baʼaxoʼob t-kanaj teʼ kaʼapʼéel cartaʼob tu tsʼíibtaj Pedrooʼ?

¹⁶ Teʼ xookaʼ tsʼoʼok k-kanik jujunpʼéel tiʼ le baʼaloʼob ku kaʼansik le kaʼapʼéel cartaʼob tu tsʼíibtaj apóstol Pedrooʼ. Maʼ xaaneʼ ta tsʼáaj cuentaeʼ yaan baʼaloʼob kʼaʼabéet a wutskíintik, por ejemploeʼ ta wilaj kʼaʼabéet a maas jóoʼsik tiempo utiaʼal a tuukul tiʼ le kuxtal kun antal teʼ Paraísooʼ, a kʼaʼaytaj teʼ tuʼux ka meyajoʼ, teʼ escuelaoʼ wa tiʼ uláakʼ tuʼux. Maʼ xaaneʼ ta wilaj xan bix jeʼel a weʼesik a yaabiltmaj le sukuʼunoʼoboʼ. Wa ancianoecheʼ, ¿tsʼoʼok wa a chʼaʼtuklik a maas tsʼáaik a wóol a kanáant u tamanoʼob Jéeoba? Wa maʼ táan a beetik jujunpʼéel tiʼ le baʼaloʼobaʼ maʼ u lúubul a wóol, kʼaʼajaktecheʼ «Yuumtsileʼ jach uts», le oʼolal mantatsʼ ken u yáantech (1 Ped. 2:3). Pedroeʼ tu yaʼalaj: «Dios […] kun kaʼanskeʼex yéetel letiʼ kun beetik a noʼojaʼantaleʼex tubeel. Dioseʼ yaan u beetik a muʼukʼaʼantaleʼex, yaan u tsʼáaik a muukʼeʼex yéetel yaan u beetik a waʼataleʼex tubeel» (1 Ped. 5:10).

17. ¿Baʼax jeʼel a kʼamik wa ku chúukpajal a wóol tiʼ Jéeobaeʼ?

¹⁷ Juntéenjeakeʼ Pedroeʼ tu yuʼubaj maʼ u náajaltmaj u yantal tu yiknal Jesúsiʼ (Luc. 5:8). Pero yéetel u yáantaj Jéeoba yéetel Jesúseʼ páajchaj u chúukpajal u yóol, yoʼolal leloʼ tsʼaʼab u jatsʼuts páajtalil tiʼ u yokol «teʼ Reino minaʼan xuʼulul tiʼoʼ. Lelaʼ u Reino k-Yuumtsil yéetel k-Salvador Jesucristo» (2 Ped. 1:11). ¿Máasaʼ jach jatsʼuts le siibal tsʼaʼabtiʼoʼ? Wa ka chaʼik u kaʼansikech Jéeoba yéetel ku chúukpajal a wóol tiʼ letiʼeʼ, yaan u páajtal a salvarkaba yoʼolal le fe yaantechoʼ yéetel yaan a kʼamik kuxtal minaʼan u xuul. (1 Ped. 1:9).