Síijen tu añoil 1934. In papáʼobeʼ síijoʼob tu luʼumil Suiza, pero binoʼob kajtal Timmins, junpʼéel kaaj yaan Ontario (Canadá). Kex tu añoil 1939, in maamaeʼ káaj u xokik le revista Le Máax ku Kananoʼ yéetel káaj u muchʼkuba yéetel u testigoʼob Jéeoba. Kéen xiʼik muchʼtáambaleʼ ku bisken teen bey xan le uláakʼ in seis sukuʼunoʼoboʼ. Maʼ xáanchajeʼ in maamaeʼ okjaʼanaji.

Le ka tu beetuba Testigo in maamaeʼ in papáeʼ maʼ utschaj tu tʼaaniʼ, kex beyoʼ in maamaeʼ maʼ xuʼul u meyajtik Jéeobaiʼ. Chúukpaj u yóol tak teʼ kʼiinoʼob prohibirtaʼan u meyajtaʼal Jéeoba tu luʼumil Canadá tu káajbal u añoil 1940. In maamaeʼ kex jach ku yaʼalaʼal baʼal tiʼ tumen in papáeʼ mantatsʼ tu yeʼesaj respeto yéetel yaabilaj tiʼ. Le jatsʼuts modos tu yeʼesoʼ tu yáanten teen bey xan in sukuʼunoʼob utiaʼal k-chʼaʼtuklik k-meyajtik Jéeoba. U maʼalobileʼ ka máan kʼiineʼ in papáeʼ kʼexpaji ka joʼopʼ u yeʼesiktoʼon maas yaabilaj.

Tu añoil 1950, binen Nueva York teʼ asamblea tu kʼaabaʼtaj «Aumento de la Teocracia». Teʼeloʼ tin kʼaj óoltaj sukuʼunoʼob jejeláas tuʼux u taaloʼob yéetel tin wuʼuyaj u jatsʼuts experienciaʼob le sukuʼunoʼob bijaʼanoʼob tu xookil Galaadoʼ. Le baʼax tin wuʼuyoʼ tu líiʼsaj in wóol utiaʼal in maas meyajtik Jéeoba. Antes in bin teʼ asambleaoʼ tsʼokaʼaniliʼ in chʼaʼtuklik in beetik in precursorileʼ, pero yoʼolal le baʼaxoʼob tin wuʼuyoʼ taakchaj in maas beetik. Le ka suunajen tin wotocheʼ tin túuxtaj in solicitud utiaʼal in beetik in precursoril. U najil Betel yaan Canadáeʼ tu yaʼalajteneʼ táanileʼ kʼaʼabéet in wokjaʼ. Le oʼolal okjaʼanajen 1 tiʼ octubre tiʼ 1950. Ka máan junpʼéel meseʼ káaj in beetik in precursor regularil, ka túun túuxtaʼaben áantaj tiʼ junpʼéel chan kaaj náach yanil tiʼ in wotoch, u kʼaabaʼeʼ Kapuskasing.

Tu añoil 1951, u najil Beteleʼ táan kaʼach u kaxtik sukuʼunoʼob tʼanik francés utiaʼal u binoʼob áantaj Quebec, teʼeloʼ ku tʼaʼanal kaʼach francésiʼ yéetel  maʼ yaʼab sukuʼunoʼob yanoʼobiʼ. Teneʼ kin tʼanik francés yéetel inglés, le oʼolal tin waʼalaj jeʼel in bineʼ, ka túun túuxtaʼaben Rouyn. Teʼeloʼ maʼ in kʼaj óol kaʼach mix máakiʼ chéen tsʼaʼabten junpʼéel dirección, pero kex beyoʼ gracias tiʼ Jéeobaeʼ maʼalob binikten. Teen yéetel Marceleʼ jach maʼalob úuchik k-bisikba, cuatro años áantajnajen Quebec, ka máan kʼiineʼ káaj in beetik in precursor especialil.

Le tiaʼanen kaʼach Quebecoʼ invitartaʼaben utiaʼal ka xiʼiken teʼ xook 26 tiʼ u Escuelail Galaadoʼ, le xookoʼ beetaʼab South Lansing (Nueva York). ¡Jach táaj kiʼimakchaj in wóol! Tin graduartinba 12 tiʼ febrero tiʼ 1956, ka túuxtaʼaben tiʼ le luʼum ku kʼaabaʼtik bejlaʼaʼ Ghanaoʼ, b (África Occidental). Chéen baʼaleʼ mientras in páaʼtik u listotal in juʼunoʼobeʼ anchaj in suut Canadá. Tin tuklaj yaan u xáantal wa jaypʼéel semanaʼobeʼ.

Chéen baʼaleʼ siete meses pʼáaten Toronto mientras tin páaʼtik u jóokʼol le juʼunoʼob kʼaʼabéetten utiaʼal in viajaroʼ. Teʼ kʼiinoʼob jeʼeloʼ pʼáaten tu yotoch le familia Crippsoʼ. Letiʼobeʼ yaan kaʼach juntúul u hijaʼob ku kʼaabaʼtik Sheila, jach utschaj tin wich, ka káaj k-bisikba. Pero le jach taʼaytak in kʼáatik u kʼaboʼ kʼuch le juʼunoʼob táan in páaʼtikoʼ (visa). Teen yéetel Sheilaeʼ orarnajoʼon tiʼ Jéeoba. T-chʼaʼtuklaj maas maʼalob ka xiʼiken Ghana, pero yaan u seguer k-tsikbal tiʼ cartaʼob utiaʼal k-ilik wa jeʼel u páajtal u tsʼoʼokol k-beel kéen máanak kʼiineʼ. Maʼ chéen chʼaʼabil t-beetil le baʼax t-chʼaʼtukloʼ, pero ka máan kʼiineʼ t-tsʼáaj cuentaeʼ maʼalob le decisión t-chʼaʼajoʼ.

Junpʼéel mes táan in viajar tiʼ tren, tiʼ barco yéetel tiʼ avión hasta ka kʼuchen Accra, u noj kaajil Ghana. Teʼeloʼ káaj in beetik in superintendenteil tiʼ distrito, le oʼolal kʼaʼabéet kaʼach in viajar tiʼ tuláakal u luʼumil Ghana, Costa de Marfil yéetel Togolandia (bejlaʼeʼ Togo). U najil Beteleʼ tu tsʼáajten junpʼéel camioneta utiaʼal u páajtal in beetik le visitaʼoboʼ. Kex chéen tin juunal kin bin kaʼacheʼ jach tin disfrutartaj le meyaj tsʼaʼabtenoʼ.

 Tu jóokʼbal semanaeʼ kin wáantaj kaʼach teʼ asambleaʼob tiʼ circuitooʼ. Kaʼacheʼ minaʼan u Najiloʼob Asamblea, le oʼolal le sukuʼunoʼoboʼ ku pakʼikoʼob cheʼ yéetel tu yóokʼoleʼ ku tsʼáaikoʼob xaʼan utiaʼal u yantal boʼoy teʼ tuʼux kun beetbil le asambleaoʼ. Tsʼoʼoleʼ como minaʼan refrigeradoreʼ tiʼ ku kíimskoʼob le mejen baʼalcheʼob utiaʼal u beetkoʼob le janaloʼ.

Yaʼab baʼaloʼob úuchtoʼon teʼ asambleaʼoboʼ. Juntéenjeakeʼ le táan u discursar juntúul misionero ku kʼaabaʼtik Herb Jenningseʼ, c juntúul wakaxeʼ kʼáatmáan u yáalkab aktáan tiʼ le plataformaoʼ. Le wakaxoʼ sajak kaʼachi yéetel le sukuʼunoʼ hasta maʼ tu kaxtik baʼax u yaʼale. Kantúul sukuʼunoʼob muʼukʼaʼanoʼobeʼ tu cháachoʼob le wakaxoʼ ka tu bisoʼob u kʼaxoʼob. Le máaxoʼob tiaʼanoʼob kaʼach teʼ asambleaoʼ joʼopʼ u papaxkʼaboʼob.

Yáam semanaeʼ kin bin kaʼach teʼ kaajoʼob utiaʼal in tsʼáaik u chaʼant le máakoʼob le película ku kʼaabaʼtik La Sociedad del Nuevo Mundo en acción. Utiaʼal in proyectartik le películaoʼ kin tʼinik junpʼéel sak nookʼ chúumuk tiʼ kaʼapʼéel cheʼob. Jach ku yutstal tu yichoʼob tumen yaʼab tiʼ letiʼobeʼ yáax u chaʼantikoʼob junpʼéel películaoʼ. Jach kʼaʼam u papaxkʼaboʼob le kéen chíikpajak máakoʼob táan u yokjaʼob. Le películaoʼ tu yáantaj yaʼab máakoʼob u yiloʼobeʼ tiʼ tuláakal yóokʼol kaabeʼ yaan máaxoʼob meyajtik Jéeoba.

Tu añoil 1958, le tsʼoʼok dos años yanaken Áfricaoʼ, viajarnajen Nueva York utiaʼal junpʼéel asamblea internacional. ¡Jach kiʼimakchaj in wóol ka tin kaʼa ilaj Sheila! Letiʼeʼ táan kaʼach u beetik u precursora especialil Quebec yéetel bin xan Nueva York utiaʼal le asambleaoʼ. Teneʼ maʼ xuʼul in túuxtiktiʼ cartasiʼ yéetel letiʼeʼ ku núukikten. Le oʼolal le ka tin kaʼa ileʼ tin kʼáatajtiʼ wa jeʼel u tsʼoʼokol u beel tin wéeteleʼ, letiʼeʼ tu yaʼalajten jeʼeleʼ. Le oʼolal tin tsʼíibtaj junpʼéel carta tiʼ sukuʼun Knorr d utiaʼal in kʼáatiktiʼ wa jeʼel u páajtal u bin Sheila tu Escuelail Galaadeʼ, tsʼoʼoleʼ ka túuxtaʼak África. Le sukuʼunoʼ tu yaʼaleʼ jeʼel u páajtaleʼ. Le ka tsʼoʼok u graduarkuba Sheilaeʼ túuxtaʼab tu luʼumil Ghana, tsʼoʼok k-beel 3 tiʼ octubre tiʼ 1959 tu kaajil Accra. Jéeobaeʼ jach tu bendecirtoʼon tumen t-tsʼáaj táanil ichil k-kuxtal k-meyajtik.

Tu añoil 1961, túuxtaʼaboʼon Camerún. Teʼeloʼ kʼáataʼabtoʼon wa jeʼel u páajtal k-áantaj utiaʼal ka  yanak junpʼéel túumben sucursal teʼ luʼumiloʼ. U jaajileʼ yaʼab meyaj yaanten kaʼachi, tumen táan kaʼach u káajal in beetik in siervo de sucursalil, le oʼolal yaʼab baʼaloʼob túumbentak kʼaʼabéet in kanik kaʼachi. Tu añoil 1965, Sheilaeʼ pʼáat embarazadail, u jaajileʼ tu káajbaleʼ chan difícilchaj k-creertik yaan u yantal juntúul k-chan hijo, pero jeʼex u máan le tiempooʼ káaj k-maas yaabiltik. Le oʼolal t-chʼaʼtuklaj k-suut Canadá, pero le jach nukaʼajoʼon suutoʼ úuch junpʼéel baʼax jach tu beetaj u yaatal k-óol.

Sheilaeʼ abortarnaji. Le doctoroʼ tu yaʼalajtoʼoneʼ le chaambaloʼ chan xiʼipal kaʼachi. Kex tsʼoʼok u máan 50 añoseʼ láayliʼ ku yaatal k-óol kéen k-kʼaʼajs le baʼax úuchoʼ. Kex jach yaachajaʼan k-óoleʼ t-chʼaʼtuklaj k-pʼáatal teʼ asignaciónoʼ.

Le sukuʼunoʼob kajaʼanoʼob Camerúnoʼ jach chʼaʼpachtaʼaboʼob tumen maʼ tu yóotoʼob táakpajal tiʼ políticaiʼ, maases bey u yúuchultiʼob le kéen kʼuchuk u kʼiinil le votaciónoʼoboʼ. Tu kʼiinil 13 tiʼ mayo tiʼ 1970, úuch junpʼéel baʼax jach maʼ táan k-páaʼtikiʼ: le gobiernooʼ tu prohibirtaj le meyaj ku beetik u testigoʼob Jéeoba teʼ luʼumiloʼ. Tu chʼaʼajoʼob le jatsʼuts sucursal yaantoʼon kaʼachoʼ, tsʼoʼoleʼ chéen 5 meses káajak u meyaj. Chéen ichil junpʼéel semanaeʼ tu láaj jóoʼsoʼob le misioneroʼob yanoʼob kaʼach teʼ luʼumiloʼ. Jach maʼ chéen chʼaʼabil úuchik k-pʼatik le sukuʼunoʼoboʼ tumen k-yaabiltmoʼob, yéetel preocupadoʼon kaʼach tu yoʼolaloʼob.

Seis meses pʼáatoʼon tu Betelil Francia, desde teʼeloʼ t-ilaj k-áantik le sukuʼunoʼob yanoʼob Camerúnoʼ. Tu mesil diciembreeʼ túuxtaʼaboʼon tu sucursalil Nigeria, teʼeloʼ tiʼ káaj u nuʼuktaʼal le meyaj ku beetaʼal Camerúnoʼ. Le sukuʼunoʼob kajaʼanoʼob Nigeriaoʼ jach maʼalob úuchik u kʼamkoʼonoʼob le oʼolal jach t-disfrutartaj le tiempo yanchajoʼon teʼeloʼ.

Tu añoil 1973, t-chʼaʼaj junpʼéel decisión. Sheilaeʼ tsʼoʼok u chan máan kʼiin káajak u kʼojaʼantal kaʼachi. Le tiaʼanoʼon tiʼ junpʼéel asamblea beetaʼab Nueva Yorkeʼ, Sheilaeʼ táan u yokʼol ka tu yaʼalajten: «Jach tsʼoʼok in kaʼanal. Mantatsʼ kʼojaʼanen». Tsʼoʼok kaʼach maas tiʼ 14 años káajak k-áantaj África Occidental. Jach kiʼimak in wóol kaʼach in múul meyaj tu yéetel, pero kʼaʼabéet kaʼach k-beetik jujunpʼéel kʼeexoʼob. Le ka tsʼoʼok k-tsikbaltik yéetel k-sen orareʼ t-chʼaʼtuklaj k-suut Canadá utiaʼal u atendertaʼal. Jach yaachaj k-óol ka t-pʼataj k-asignación, letiʼe decisión maas difícil tsʼoʼok k-chʼaʼikoʼ.

Le ka kʼuchoʼon Canadáeʼ káaj in meyaj yéetel juntúul in amigo, letiʼeʼ ku konik kaʼach cocheʼob tu xamanil Toronto. T-rentartaj junpʼéel chan cuarto yéetel t-manaj jujunpʼéel baʼaloʼob de medio uso, beyoʼ maʼ t-pʼaxajbaiʼ. Toʼoneʼ k-kʼáat kuxtal chéen yéetel junpʼíit baʼaloʼob tumen k-metaeʼ letiʼe k-kaʼa meyajtik Jéeoba jeʼex k-beetik kaʼachoʼ. Jach kiʼimakchaj k-óol tumen maʼ xáanchaj ka páajchaj k-beetik leloʼ.

Káaj in bin cada sábado tu construcciónil junpʼéel u Najil Asamblea ku beetaʼal kaʼach tu kaajil Norval (Ontario). Ka máan kʼiineʼ kʼáataʼabten  wa jeʼel u páajtal in beetik in superintendenteil tiʼ le túumben Najil Asambleaoʼ. Como tsʼoʼok u chan maʼalobtal Sheilaeʼ t-kʼamaj le asignaciónoʼ. Le oʼolaleʼ tu mesil junio tiʼ 1974, binoʼon kajtal teʼ Najil Asambleaoʼ. Jach kiʼimakchaj k-óol yoʼolal le túumben asignaciónoʼ.

Sheilaeʼ joʼopʼ u maas maʼalobtal. Le oʼolal ka máan dos añoseʼ le ka kʼáataʼabten wa jeʼel u páajtal in beetik in superintendenteil tiʼ circuitoeʼ, t-aʼalaj jeʼel k-beetkeʼ. T-xíimbaltaj le múuchʼuliloʼob yanoʼob Manitobaoʼ. Teʼ lugaraʼ jach ku beetik keʼel, pero le sukuʼunoʼoboʼ bey ku kʼíinkuntkoʼob máak yéetel le yaabilaj ku yeʼeskoʼoboʼ. Le baʼax úuchtoʼonoʼ tu kaʼansajtoʼoneʼ le baʼax maas importanteoʼ maʼ letiʼe tuʼux k-meyajtik Jéeobaoʼ, baʼaxeʼ letiʼe ka k-tsʼáa u maas maʼalobil tiʼ letiʼ kex jeʼel tuʼuxak ka yanakoʼoneʼ.

Tu añoil 1978, le tsʼoʼok u máan yaʼab años táan in beetik in superintendenteil tiʼ circuitoeʼ invitartaʼaboʼon meyaj tu Betelil Canadá. Maʼ sen úuch kʼuchkoʼon Beteleʼ tin kanaj junpʼéel baʼal jach kʼaʼanaʼan, chéen baʼaleʼ chan yaj úuchik in kanik. Aʼalaʼabten ka in máans junpʼéel discurso ich francés tiʼ junpʼéel reunión especial beetaʼab tu kaajil Montreal, hora y media xáanchaji. Chéen baʼaleʼ jach maʼ maʼalob bix úuchik in beetkiʼ, hasta tin beetaj u wenel le sukuʼunoʼoboʼ. Le oʼolal le ka tsʼoʼok le reuniónoʼ juntúul sukuʼun ku meyaj tu Departamentoil Servicioeʼ tʼaanaj tin wéetel. Teʼ súutuk jeʼeloʼ teneʼ maʼ in tsʼáaj cuenta kaʼach de ke maʼ maʼalob bix in discursariʼ. Le oʼolal jach tu beetaj in kʼuuxil le baʼax tu yaʼalajten le sukuʼunoʼ. Tin wuʼuyaj jach táan u exagerar yéetel maʼ táan u yaʼalikten mix baʼal jatsʼuts yoʼolal le discursooʼ. Maʼ tin kʼamaj le consejooʼ tumen chʼíiken tuukul tiʼ le máax tsʼáaiktenoʼ yéetel bix úuchik u tsʼáaikten.

Ka máan wa jaypʼéel kʼiinoʼobeʼ tʼaanaj tin wéetel juntúul sukuʼun ku meyaj teʼ Comité tiʼ Sucursaloʼ. Tin waʼalajtiʼ ka u saʼasten tumen jach maʼ maʼalob úuchik in reaccionariʼ. Ka tsʼoʼok in tʼaan yéetel le sukuʼunoʼ binen in kʼáat perdón tiʼ le sukuʼun tsʼáaten le consejooʼ, letiʼeʼ yéetel kiʼimak óolal tu perdonarten. Jach maʼ tin tuʼubsik le baʼax úuchoʼ tumen tu kaʼansajten in weʼes kabal óolal (Pro. 16:18). Yaʼab u téenel tsʼoʼok in orar tiʼ Jéeoba yoʼolal le baʼax maʼ maʼalob tin beetoʼ, yéetel tsʼoʼok xan in chʼaʼtuklik maʼ u kaʼa úuchulten leloʼ.

Tsʼoʼok maas tiʼ 40 años káajak in meyaj tu Betelil Canadá, yéetel desde tu añoil 1985, kin meyaj teʼ Comité tiʼ Sucursaloʼ. Sheilaeʼ kíim febrero tiʼ 2021 u jaajileʼ jach kin extrañartik. Teʼ kʼiinoʼobaʼ teneʼ tsʼoʼok in maas kʼojaʼantal. Chéen baʼaleʼ como jach in tsʼaamaj in wóol in meyajt Jéeobaeʼ mix cuenta kin tsʼáaik u máan le kʼiinoʼoboʼ (Ecl. 5:​20, nota). Kex yaʼab baʼaloʼob tsʼoʼok in aktáantik ichil in kuxtaleʼ maas yaʼab le bendiciónoʼob tsʼoʼok u tsʼáaikten Jéeobaoʼ. Jach tsʼoʼok in disfrutartik in meyajtik Jéeoba ichil le 70 años tsʼoʼok u máanoʼ. Teneʼ jach kin orar yoʼolal le táankelmoʼob utiaʼal ka u tsʼáa táanil ichil u kuxtaloʼob u meyajtikoʼob Jéeobaoʼ, tumen wa ku beetkoʼob beyoʼ jeʼel u yantaltiʼob kiʼimak óolal ichil u kuxtaloʼobeʼ.