1, 2. ¿Baʼaxten maʼalob úuchik u beetikoʼon Jéeoba yéetel u páajtalil u maas kiʼimaktal k-óol kéen k-síi wa baʼax?

 JÉEOBAEʼ tu beetoʼon utiaʼal u maas kiʼimaktal k-óol le kéen k-síi wa baʼax, ke le kéen k-kʼam wa baʼax (Hech. 20:35). U jaajileʼ ku kiʼimaktal k-óol le kéen siʼibiktoʼon wa baʼax, chéen baʼaleʼ maas jach ku kiʼimaktal k-óol le kéen k-beet wa baʼax yo’olal u maasil. ¿Baʼaxten maʼalob úuchik u beetikoʼon Jéeoba beyoʼ?

² Le bix u beetmiloʼon Jéeobaoʼ ku yeʼesikeʼ tiʼ toʼon ku depender ka maas kiʼimakchajak k-óol. Lelaʼ ku yeʼesikeʼ wa k-kʼáat ka maas kiʼimakchajak k-óoleʼ kʼaʼabéet k-kaxtik bix jeʼel k-áantik u maasileʼ. ¿Máasaʼ jach jatsʼuts bix beetaʼaniloʼon? (Sal. 139:14).

3. ¿Baʼaxten ku yaʼalik le Bibliaoʼ Jéeobaeʼ ‹letiʼe Dios kiʼimak u yóoloʼ›?

³ Le Bibliaoʼ ku yaʼalikeʼ le máaxoʼob beetik baʼaloʼob maʼalobtak yóolal u maasiloʼ kiʼimak u yóoloʼob, le oʼolal Jéeobaeʼ letiʼe «Dios kiʼimak u yóoloʼ» (1 Tim. 1:11). U jaajileʼ mix máak jeʼel u páajtal u tsʼáaiktoʼon le baʼaxoʼob ku tsʼáaik Jéeobaoʼ. Le oʼolal Apóstol Pabloeʼ tu yaʼalaj: «Tu yoʼolal letiʼeʼ kuxaʼanoʼon, k-péek yéetel way yanoʼoneʼ» (Hech. 17:28). Tsʼoʼoleʼ «tuláakal le baʼaloʼob maʼalobtak yéetel chúukaʼantak ku siʼibiltoʼonoʼ» tiʼ Jéeoba u taal (Sant. 1:17).

4. ¿Baʼax kun áantkoʼon utiaʼal u maas kiʼimaktal k-óol?

⁴ ¿Baʼax unaj k-beetik utiaʼal u maas kiʼimaktal k-óol? Teʼ xookaʼ yaan ilik bix jeʼel k-eʼesik k-utsil jeʼex u beetik Jéeobaeʼ  (Efe. 5:1). Yaan xan k-ilik baʼax jeʼel u páajtal k-beetik wa k-uʼuyik bey maʼ tu agradecertik u maasil le baʼaxoʼob k-beetik tu yoʼolaloʼoboʼ. Tuláakal lelaʼ yaan u yáantkoʼon utiaʼal u seguer u kiʼimaktal k-óol le kéen k-síi wa baʼax bey xan utiaʼal u maas kiʼimaktal k-óol.

UNAJ K-EʼESIK K-UTSIL JEʼEX U BEETIK JÉEOBAEʼ

5. ¿Baʼaxoʼob ku tsʼáaiktoʼon Jéeoba?

⁵ Koʼoneʼex ilik jujunpʼéel bix u yeʼesik u yutsil Jéeoba. Por ejemploeʼ letiʼeʼ ku tsʼáaiktoʼon le baʼaxoʼob kʼaʼabéettoʼonoʼ. Maʼ xaaneʼ minaʼantoʼon koʼokoj baʼaloʼob, pero Jéeobaeʼ mantatsʼ ku yilik ka yanaktoʼon janal, nookʼ bey xan tuʼux k-kajtal (Sal. 4:8; Mat. 6:​31-33; 1 Tim. 6:​6-8). Tsʼoʼoleʼ maʼatech u beetik chéen yoʼolal obligación. ¿Baʼaxten túun ku tsʼáaiktoʼon?

6. ¿Baʼax ku kaʼansiktoʼon Mateo 6:​25, 26?

⁶ Jéeobaeʼ ku tsʼáaik baʼax kʼaʼabéettoʼon tumen u yaabiltmoʼon. Koʼoneʼex ilik bix úuchik u yaʼalik Jesús teʼ Mateo 6:​25, 26 (xoke). Teʼelaʼ Jesúseʼ tu yaʼalaj baʼax ku beetik Jéeoba yoʼolal le chʼíichʼoʼoboʼ, ku yaʼalik: «Letiʼobeʼ maʼ tu paakʼaloʼob, maʼ tu joochoʼob mix tu líiʼskoʼob u yich u paakʼaloʼob tiʼ chʼiiloʼob». Tu yaʼalaj xan: «Ku tséentaʼaloʼob tumen Dios, le u Taataʼob yaan teʼ kaʼanoʼ». Tsʼoʼoleʼ tu kʼáataj: «¿Maʼ wa maas koʼoj a tojoleʼex tiʼ letiʼobiʼ?». Yéetel le ejemploaʼ Jesúseʼ táan ka’ach u kaʼansik tiʼ le máaxoʼob meyajtik Jéeobaoʼ letiʼobeʼ maas koʼoj u tojoloʼob ke le chʼíichʼoʼoboʼ. Le oʼolaleʼ wa Jéeoba ku tsʼáaik baʼax kʼaʼabéet tiʼ le mejen baʼalcheʼoboʼ u kʼáat u yaʼaleʼ maas yaan u tsʼáaiktoʼon le baʼaxoʼob kʼaʼabéettoʼonoʼ, tumen letiʼeʼ k-Taata yéetel jach u yaabiltmoʼon (Sal. 145:16; Mat. 6:32).

7. ¿Bix jeʼel k-eʼesik utsil jeʼex u beetik Jéeobaeʼ? (Ilawil xan le fotoʼoboʼ).

⁷ Jeʼex Jéeobaeʼ toʼon xaneʼ k-yaabiltmaj u maasil, le oʼolal k-tsʼáaiktiʼob le baʼaxoʼob yaantoʼonoʼ. Maʼ xaaneʼ techeʼ a kʼaj óol juntúul sukuʼun kʼaʼabéet janal tiʼ bey xan nookʼ. Jéeobaeʼ jeʼel u péeksikech utiaʼal a tsʼáaiktiʼ le baʼaxoʼob kʼaʼabéettiʼoʼ. Le máaxoʼob meyajtik Jéeobaoʼ jach kʼaj óolaʼanoʼob tumen ku yeʼesik u yutsiloʼob kéen úuchuk junpʼéel nojoch loob. Koʼoneʼex tuukul tiʼ le baʼaxoʼob úuch tu kʼiiniloʼob le COVID-19. Yaʼab sukuʼunoʼobeʼ tu síijoʼob janal, nookʼ bey xan uláakʼ baʼaloʼob tiʼ le máaxoʼob kʼaʼabéettiʼoboʼ. Tsʼoʼoleʼ yaʼab tiʼ letiʼobeʼ tu síijoʼob taakʼin tiʼ u kaajal Jéeoba utiaʼal u yilaʼal u yáantaʼal u maasil sukuʼunoʼob tiʼ tuláakal yóokʼol kaaboʼ. Le sukuʼunoʼobaʼ tu  beetoʼob le baʼax ku yaʼalik Hebreos 13:16: «Maʼ u tuʼubulteʼex a beetkeʼex uts bey xan a wáantkeʼex uláakʼ máakoʼob yéetel le baʼaxoʼob yaanteʼexoʼ, tumen le baʼaloʼobaʼ bey junpʼéel sacrificio ku kʼuʼubul tiʼ Dioseʼ yéetel letiʼeʼ jach ku kiʼimaktal u yóol le kéen beetaʼak lelaʼ».

8. ¿Baʼax jeʼel u páajtal k-beetik yoʼolal le muukʼ ku tsʼáaiktoʼon Jéeobaoʼ? (Filipenses 2:13).

⁸ Jéeobaeʼ ku tsʼáaiktoʼon muukʼ. Letiʼeʼ jach nojoch u poder le oʼolal yéetel kiʼimak óolal ku tsʼáaiktoʼon muukʼ (xok Filipenses 2:13). ¿Yaan wa kʼiin tsʼoʼok a kʼáatik tiʼ Jéeoba ka u tsʼáatech u muukʼil utiaʼal a aguantartik junpʼéel nojoch prueba wa uláakʼ baʼaloʼob ichil a kuxtal? Maʼ xaaneʼ le ka tu núukajtech Jéeoba a oracióneʼ ta wuʼuyaba jeʼex apóstol Pabloeʼ. Letiʼeʼ ku yaʼalik: «Yaanten u muukʼil utiaʼal in beetik tuláakal baʼal, tu yoʼolal le máax tsʼáaikten u páajtalil in beetkoʼ» (Fili. 4:13).

9. ¿Bix jeʼel u páajtal k-eʼesik utsil jeʼex u beetik Jéeobaeʼ? (Ilawil xan le fotooʼ).

⁹ Tiʼ toʼoneʼ minaʼan poder utiaʼal k-tsʼáaik muukʼ tiʼ u maasil jeʼex u beetik Jéeobaeʼ. Kex beyoʼ jeʼel u páajtal k-eʼesik utsil jeʼex u beetik letiʼeʼ. Jeʼel u páajtal u meyajtoʼon k-muukʼ utiaʼal k-áantik u maasileʼ. Por ejemploeʼ wa k-kʼaj óol juntúul sukuʼun nojoch u jaʼabil bey xan wa kʼojaʼaneʼ jeʼel u páajtal k-ofrecertikba utiaʼal k-bin man le baʼaxoʼob kʼaʼabéettiʼoʼ, wa jeʼel u páajtal k-áantik yéetel le meyajoʼob kʼaʼabéet u beetaʼal tu yotochoʼ. Wa ku páajtal xaneʼ maʼalob ka táakpajkoʼon tiʼ le limpieza yéetel tiʼ le mantenimiento ku beetaʼal teʼ lugar tuʼux k-muchʼikbaoʼ. Le kéen k-beet tuláakal lelaʼ ku meyajtoʼon k-muukʼ utiaʼal k-áantik le sukuʼunoʼoboʼ.

10. ¿Bix jeʼel u meyajtoʼon le baʼaxoʼob k-aʼalik utiaʼal k-tsʼáaik muukʼ tiʼ u maasiloʼ?

¹⁰ Maʼ u tuʼubultoʼoneʼ le baʼaxoʼob k-aʼalikoʼ jeʼel u meyaj utiaʼal k-tsʼáaik muukʼ tiʼ u maasileʼ. Maʼ xaaneʼ a kʼaj óol wa máax jeʼel u yuʼubikuba maʼalobil wa ka felicitartik bey xan wa ka líiʼsik u yóoleʼ. Wa beyoʼ jach maʼalob ka xiʼikech a xíimbalte wa ka a tʼan tiʼ teléfono bey xan wa ka a túuxt junpʼéel tarjeta wa junpʼéel mensaje tiʼ. U jaajileʼ maʼ unaj a sen tuklik le baʼaxoʼob ken a waʼaltiʼoʼ, u maas kʼaʼanaʼanileʼ ka jóokʼok ta puksiʼikʼal. Le baʼaxoʼob ken a waʼaltiʼ yéetel u jaajil a wóoloʼ maʼ xaaneʼ jach letiʼe baʼax kʼaʼabéet tiʼ le sukuʼun wa kiik utiaʼal u chúukpajal u yóol teʼ kʼiin jeʼeloʼ wa utiaʼal ka líikʼik u yóoloʼ (Pro. 12:25; Efe. 4:29).

11. ¿Baʼax ku beetik Jéeoba yéetel le naʼat yaantiʼoʼ?

¹¹ Jéeobaeʼ ku tsʼáaiktoʼon naʼat. Le discípulo Santiagooʼ tu yaʼalaj: «Wa yaan tiʼ teʼex ku bineltik naʼat tiʼeʼ seguernak u kʼáatik tiʼ Dios», tu yaʼalaj xan: «Tumen Dioseʼ uts tu tʼaan u síik baʼaloʼob tiʼ tuláakal máak yéetel maʼatech u  chʼinik tu yich máak» (Sant. 1:5). Jeʼex u yeʼesik le versículoaʼ Jéeobaeʼ maʼ tsʼuʼut yéetel le naʼat yaantiʼoʼ, baʼaxeʼ ku síik tiʼ toʼon yéetel kiʼimak óolal. Tsʼoʼoleʼ le kéen u beeteʼ «maʼatech u chʼinik tu yich máak». Lelaʼ u kʼáat u yaʼaleʼ maʼatech u taaskoʼon menosil ikil k-kʼáatik u nuʼuktaj, baʼaxeʼ ku yaʼalik ka seguernak k-kʼáatiktiʼ (Pro. 2:​1-6).

12. ¿Tiʼ máaxoʼob jeʼel u páajtal k-kaʼansik le baʼaxoʼob k-ojloʼ?

¹² ¿Kux túun toʼon? ¿Jeʼel wa u páajtal k-kaʼansik tiʼ u maasil le baʼaxoʼob k-ojel jeʼex u beetik Jéeobaeʼ? (Sal. 32:8). Por ejemploeʼ jeʼel u páajtal k-kaʼansik le túumbenoʼob kʼaʼaytajoʼ. Le ancianoʼob xanoʼ jeʼel u páajtal u yáantkoʼob le siervo ministerialoʼob bey xan uláakʼ sukuʼunoʼob okjaʼanajaʼanoʼob utiaʼal ka u beetoʼob le meyajoʼob ku kʼubéentaʼaltiʼob teʼ múuchʼuliloʼ. Yaʼab sukuʼunoʼob yéetel kiikoʼob yaʼab baʼax u yojloʼob tiʼ construcción yéetel mantenimientoeʼ ku kaʼanskoʼob u maasil utiaʼal u meyajoʼob teʼ lugaroʼob tuʼux ku adorartaʼal Diosoʼ.

13. ¿Bix jeʼel u páajtal k-beetik jeʼex Jéeoba le kéen k-kaʼans u maasileʼ?

¹³ Le kéen k-kaʼans u maasileʼ unaj k-beetik jeʼex u beetik Jéeobaeʼ. Jeʼex tsʼoʼok k-ilkoʼ letiʼeʼ maʼ tsʼuʼut yéetel le naʼat yaantiʼoʼ. Toʼon xaneʼ unaj k-kaʼansik tiʼ u maasil le baʼaxoʼob k-ojloʼ. Maʼ unaj k-sajaktal ka k-tukult lelaʼ: «Maʼ ken in kaʼanse tumen kux túun wa ku luʼsikten le puesto yaantenoʼ». Maʼ unaj k-tuukul xan beyaʼ: «U kan tu juunal, teneʼ mix máak kaʼansen in beete». U jaajileʼ le máaxoʼob meyajtik Jéeobaoʼ junpuliʼ maʼ unaj u tuukuloʼob beyaʼ tumen maʼ chéen unaj k-kaʼansik tiʼ u maasil yéetel kiʼimak óolal le baʼaxoʼob k-ojloʼ, baʼaxeʼ unaj k-beetik yéetel yaabilaj (1 Tes. 2:8). Beyoʼ letiʼobeʼ «yaan u noʼojaʼantaloʼob utiaʼal ka u kaʼansoʼob tiʼ uláakʼ máakoʼob» le baʼax u yojloʼoboʼ (2 Tim. 2:​1, 2). Le kéen k-eʼes utsil tiʼ u maasileʼ táan k-áantaj utiaʼal ka yanak kiʼimak óolal tiʼ tuláakal.

WA K-UʼUYIK BEY MAʼ TU VALORARTAʼAL LE BAʼAX K-BEETKOʼ

14. ¿Baʼax suuk u beetik u maasil le kéen k-beet wa baʼax tu yoʼolaloʼob?

¹⁴ U suukileʼ kéen k-beet wa baʼax yoʼolal wa máaxeʼ, maases yoʼolal le sukuʼunoʼoboʼ, ku agradecertaʼaltoʼon. Maʼ xaaneʼ ku túuxtikoʼobtoʼon junpʼéel mensaje wa ku beetkoʼob uláakʼ wa baʼax utiaʼal u agradecerkoʼob le baʼax t-beetoʼ (Col. 3:15). Le baʼaxoʼob ku beetkoʼoboʼ ku beetik u kiʼimaktal k-óol.

15. ¿Baʼax unaj u kʼaʼajaltoʼon wa yaan máax maʼ tu agradecertik le baʼax t-beetaj tu yoʼolaloʼ?

¹⁵ Maʼalob xan ka k-tsʼáa t-tuukuleʼ maʼ tuláakal máak ken u agradecertoʼon le baʼax k-beetik tu yoʼolaloʼoboʼ. Maʼ xaaneʼ jeʼel k-xupik k-tiempo, k-muukʼ wa le baʼaxoʼob yaantoʼon utiaʼal k-áantik wa máaxoʼ. Pero le kéen tsʼoʼokkeʼ k-ilkeʼ bey maʼatech u valorartik le baʼax t-beetajoʼ. Le kéen úuchuk beyoʼ, ¿baʼax jeʼel u yáantkoʼon utiaʼal u seguer u kiʼimaktal k-óoleʼ? Unaj k-kʼaʼajsik baʼax ku yaʼalik u tekstoil le xookaʼ Hechos 20:35. Wa k-beetik beyoʼ yaan u kʼaʼajaltoʼoneʼ le kiʼimak óolal k-uʼuyik le kéen k-síi wa baʼaxoʼ maʼ tu depender tiʼ wa yaan u tsʼaʼabaltoʼon u graciasil wa maʼ. Jeʼex túun k-ilkoʼ tiaʼan t-kʼab u seguer u kiʼimaktal k-óol kex wa k-uʼuyik maʼatech u valorartaʼal le baʼax k-beetkoʼ. Koʼoneʼex ilik jujunpʼéel baʼaxoʼob jeʼel u yáantkoʼon utiaʼal u seguer u kiʼimaktal k-óoleʼ.

16. ¿Baʼax maʼalob ka kʼaʼajaktoʼon?

¹⁶ Kʼaʼajaktecheʼ le kéen a weʼes a wutsil tiʼ u maasileʼ táan a beetik jeʼex Jéeobaeʼ. Letiʼeʼ ku síik baʼaloʼob maʼalobtak tiʼ máak kex wa ku agradecertaʼaltiʼ bey xan wa maʼ (Mat. 5:​43-48). Jéeobaeʼ ku yaʼalik tiʼ toʼon xaneʼ wa k-síik wa baʼax sin ke k-páaʼtik u suʼutultoʼon u  jeeleʼ jach «nojoch le boʼol» ken k-kʼamoʼ (Luc. 6:35). Le oʼolaleʼ maʼ u lúubul a wóol wa maʼ tu agradecertaʼaltech le baʼax ka beetik tu yoʼolal u maasiloʼ. Kʼaʼajaktecheʼ Jéeobaeʼ yaan u bendecirkech yoʼolal le baʼaloʼob maʼalobtak ka beetik yoʼolal u maasiloʼ yéetel tumen ka «síik wa baʼax yéetel kiʼimak óolal» (2 Cor. 9:7; Pro. 19:17).

17. ¿Baʼax jeʼel u yáantkoʼon k-seguert u ejemplo Jéeobaeʼ? (Lucas 14:​12-14).

¹⁷ Uláakʼ baʼax jeʼel u yáantkoʼon k-seguert u ejemplo Jéeobaeʼ letiʼe baʼax ku yaʼalik Lucas 14:​12-14 (xoke). U jaajileʼ maʼ jelaʼan ka k-kʼam t-otoch wa ka k-eʼes k-utsil tiʼ le máaxoʼob jeʼel u páajtal u sutkoʼobtoʼon le favor k-beetik tu yoʼolaloʼoboʼ. Chéen baʼaleʼ, ¿kux túun wa k-tsʼáaik cuenta táan k-eʼesik utsil chéen tumen yaan u suʼutultoʼon u jeel le favor t-beetoʼ? Wa beyoʼ maʼalob ka tuukulnakoʼon tiʼ le consejo tu tsʼáaj Jesús teʼ tekstooʼ: ka k-eʼes k-utsil tiʼ le máaxoʼob k-ojel maʼ tu páajtal u sutiktoʼon u jeel le favor k-beetik tu yoʼolaloʼoboʼ. Le kéen k-beet beyoʼ jach yaan u kiʼimaktal k-óol tumen táan k-beetik jeʼex u beetik Jéeobaeʼ. Tsʼoʼoleʼ wa k-beetik junpʼéel favor sin ke k-páaʼtik u suʼutultoʼon u jeeleʼ mantatsʼ ken k-beet yéetel kiʼimak óolal kex tak maʼ u tsʼaʼabaltoʼon u graciasileʼ.

18. ¿Baʼax kun áantkoʼon utiaʼal maʼ k-tuukul kʼaas tiʼ u maasil?

¹⁸ Maʼ a tuukul kʼaas tiʼ u maasil (1 Cor. 13:7). Wa k-ilik maʼ tu tsʼaʼabaltoʼon u graciasil tumen u maasileʼ maʼ xaaneʼ jeʼel k-tuklik lelaʼ: «¿Jach wa tu jaajil maʼ tu valorarkoʼob le baʼax tin beetaj tu yoʼolaloʼoboʼ wa chéen tuʼubtiʼob u tsʼáaikoʼobten u graciasil?». Maʼ xaaneʼ yaan baʼax oʼolal maʼ tu agradecertoʼobiʼ. Maʼ xaaneʼ yaan tiʼ letiʼobeʼ jach ku valorarkoʼob le baʼax ta beetaj tu yoʼolaloʼoboʼ, chéen baʼaleʼ jach ku difíciltaltiʼob u agradecerkoʼob. Yaan uláakʼoʼob xaneʼ suʼlak u yilik u yáantaʼaloʼob tumen kaʼacheʼ letiʼob áantik u maasil, chéen baʼaleʼ beoraaʼ maʼ tu páajtal u beetkoʼob. Jeʼel bixakeʼ le yaabilaj k-uʼuyik tu yoʼolal le sukuʼunoʼoboʼ letiʼe baʼax péeksikoʼon utiaʼal u seguer k-áantkoʼob yéetel kiʼimak óolaloʼ (Efe. 4:2).

19, 20. ¿Baʼaxten maʼalob ka yanaktoʼon paciencia? (Ilawil xan le fotoʼoboʼ).

 ¹⁹ Yanaktech paciencia. Rey Salomóneʼ tu yaʼalaj junpʼéel baʼax jach jaaj: «Pul a woʼoch waaj ich jaʼ, tumen kéen máanak kʼiinoʼobeʼ yaan a kaʼa ilik» (Ecl. 11:1). Le baʼax tu yaʼalaʼ ku kaʼansiktoʼoneʼ yaan máakoʼobeʼ le «kéen máanak kʼiin[eʼ]» jeʼel u agradecerkoʼob le baʼax t-beetaj tu yoʼolaloʼoboʼ. Koʼoneʼex ilik junpʼéel ejemplo.

²⁰ Juntéenjeakeʼ u yatan juntúul superintendente tiʼ circuitoeʼ tu tsʼíibtaj junpʼéel carta tiʼ juntúul kiik táant u tsʼoʼokol u yokjaʼeʼ, lelaʼ tu beetaj utiaʼal u líiʼsik u yóol le kiikoʼ bey xan utiaʼal ka chúukpajak u yóol. Ka máan ocho añoseʼ le kiikoʼ tu núukaj le carta túuxtaʼab tiʼoʼ, tu yaʼalaj: «Kin tsʼíibtiktech le cartaaʼ tumen in kʼáat ka a wojéelteʼ techeʼ jach tsʼoʼok a wáantken ich yaʼab años». Ku yaʼalik xan: «Le baʼax ta tsʼíibtajtenoʼ jach táaj jatsʼuts. Pero le baʼax maas áanten yéetel jach kʼuch tin puksiʼikʼaloʼ letiʼe teksto ta tsʼíibtoʼ, junpuliʼ maʼ tin tuʼubsik». a Le ka tsʼoʼok u tsikbaltiktiʼ jujunpʼéel tiʼ le problemas yanchajtiʼoʼ, tu tsʼíibtaj: «Yaan kʼiineʼ ku taaktal kaʼach in pʼatik tuláakal. Hasta kʼuchen in tukult in pʼatik in meyajtik Jéeoba, pero le teksto ta tsʼíibtoʼ maʼ lukʼ tin tuukuliʼ le áanten utiaʼal u seguer in tsʼáaik in wóol in meyajtik. Tiʼ le ocho años tsʼoʼok u máanoʼ jach tu yáanten le tekstoaʼ ». ¡Máans ta tuukul bukaʼaj kiʼimakchajik u yóol u yatan le superintendente tiʼ circuito le ka tu xokaj le cartaaʼ! Wa teech tsʼoʼok a wáantik wa máaxeʼ maʼ xaaneʼ «kéen máanak kʼiin[eʼ]» jeʼel u tsʼaʼabaltech u graciasil le baʼax ta beetoʼ.

21. ¿Baʼaxten ku valer u penail k-eʼesik k-utsil jeʼex u beetik Jéeobaeʼ?

²¹ Jeʼex tsʼoʼok k-ilkoʼ Jéeobaeʼ tu beetoʼon utiaʼal u maas kiʼimaktal k-óol le kéen k-tsʼáa wa baʼax ke le kéen k-kʼam wa baʼax. Le beetkeʼ jach maʼalob k-uʼuyikba le kéen k-áant le sukuʼunoʼoboʼ yéetel uts t-tʼaan xan u tsʼaʼabaltoʼon u graciasil. Chéen baʼaleʼ kex wa ku tsʼaʼabaltoʼon u graciasil wa maʼeʼ kʼaʼabéet u kiʼimaktal k-óol tumen k-ojel maʼalob le baʼax t-beetoʼ. Mantatsʼ kʼaʼabéet u kʼaʼajaltoʼon le baʼax ku yaʼalik 2 Crónicas 25:9: «Tiʼ Jéeobaeʼ yaan u páajtalil u tsʼáaiktech maas» tiʼ le ka tsʼáaikoʼ. ¡Maʼ u tuʼubultoʼoneʼ Jéeobaeʼ maas jach ku páajtal u yáantik máak! Le oʼolal jach ku kiʼimaktal k-óol u yáantkoʼon yéetel u bendecirkoʼon. Jach ku valer u penail k-eʼesik utsil jeʼex u beetik letiʼoʼ.