1, 2. 1) ¿Baʼaxoʼob ku yúuchul kaʼach Judea le ka tu túuxtaj Pablo le carta tiʼ le hebreoʼoboʼ? 2) ¿Baʼaxten le cartaoʼ kʼuch jach teʼ súutukil kʼaʼabéetoʼ?

 LE KA tsʼoʼok u kíimil Jesúseʼ le sukuʼunoʼob hebreoʼoboʼ tu aktáantoʼob yaʼab problemas. Le maʼ sen úuch formartaʼak le múuchʼulil tu kaajil Jerusalénoʼ káaj u sen chʼaʼpachtaʼaloʼob (Hech. 8:1). Le ka máan 20 añoseʼ, le sukuʼunoʼob kajaʼanoʼob Judeaoʼ tu muʼyajtoʼob óotsilil, maʼ xaaneʼ yoʼolal le nojoch wiʼijil yanchaj teʼ luʼumiloʼ (Hech. 11:​27-30). Kex teʼ año 61, jeʼel u páajtal u yaʼalaʼal chan anchaj jeetsʼelil teʼ tuʼux kajaʼan le sukuʼunoʼoboʼ. Chéen baʼaleʼ lelaʼ maʼ kun xáantal kaʼachi, tumen yaan junpʼéel baʼal maas yaj kun taal tu yóokʼoloʼob. Teʼ kʼiinoʼob jeʼeloʼ túuxtaʼabtiʼob junpʼéel carta tumen apóstol Pablo. Le cartaaʼ jach yaan u yáantkoʼob tiʼ le baʼaxoʼob ken u aktáantoʼoboʼ.

² Le cartaaʼ jach kʼuch teʼ súutukil kʼaʼabéetoʼ, tumen taʼaytak kaʼach u xuʼulul le jeetsʼelil yaan tiʼ le sukuʼunoʼob hebreoʼoboʼ. Le consejoʼob tu tsʼáaj Pablooʼ jach maʼalob utiaʼal le sukuʼunoʼoboʼ tumen yaan u yáantkoʼob utiaʼal u chúukpajal u yóoloʼob tiʼ le baʼaxoʼob ku taal tu yóokʼoloʼoboʼ. Jach natsʼaʼan u kʼiinil kaʼach u xuʼulsaʼal tiʼ Jerusalén jeʼex tu yaʼalil Jesúsoʼ (Luc. 21:20). U jaajileʼ mix Pablo mix le sukuʼunoʼob kajaʼanoʼob Judea u yojloʼob jach baʼax kʼiin kéen úuchuk leloʼ. Chéen baʼaleʼ jeʼel u páajtal u aprovecharkoʼob le tiempo utiaʼal u muʼukʼaʼankúuntik u fejoʼob yéetel utiaʼal u yilkoʼob bix jeʼel u chúukpajal u yóoloʼobeʼ, beyoʼ yaan u pʼáatloʼob preparadoil (Heb. 10:25; 12:​1, 2).

3. ¿Baʼaxten maʼalob xan ka k-xakʼalt le carta túuxtaʼab tiʼ le hebreoʼoboʼ?

³ Toʼoneʼ jach taʼaytak xan k-aktáantik junpʼéel nojoch muʼyajil maas nojoch ke le tu aktáantaj le sukuʼunoʼob hebreoʼoboʼ  (Mat. 24:21; Apo. 16:​14, 16). Le consejoʼob tsʼaʼabtiʼob tumen Jéeobaoʼ jach jeʼel u yáantkoʼon xan teʼ kʼiinoʼobaʼ. Le oʼolal teʼ xookaʼ yaan k-ilik jujunpʼéeloʼobiʼ.

«YIIJCHAJAK K-TUUKUL»

4. ¿Baʼaxoʼob tu aktáantaj le judíoʼob tu beetubaʼob cristianoiloʼ? (Ilawil xan le dibujooʼ).

⁴ Le máaxoʼob tiʼ tsʼíibnaj apóstol Pablooʼ tu pʼatoʼob u religión le judíoʼoboʼ ka joʼopʼ u seguerkoʼob u kaʼansaj Cristo. Lelaʼ tu taasaj yaʼab problemas tiʼob. Kʼaʼajaktoʼoneʼ le judíoʼoboʼ letiʼob kaʼach le kaaj yéeyaʼanoʼob tumen Jéeobaoʼ. U kaajil Jerusaléneʼ ich yaʼab tiempoeʼ letiʼe kaaj maas importante yanoʼ, tiʼ ku gobernar le rey tsʼaʼan tumen Jéeobaoʼ yéetel tiaʼan xan le templooʼ. Le judíoʼob chúukaʼan u yóoloʼoboʼ ku beetkoʼob kaʼach baʼax ku yaʼalik u Ley Moisés yéetel ku nuʼuktikubaʼob yéetel baʼax ku yaʼalik u nuuktakil le religiónoʼ. Tsʼaʼan kaʼach leyoʼob tiʼob yoʼolal baʼaxoʼob jeʼel u páajtal u jaantikoʼobeʼ, yoʼolal le circuncisiónoʼ bey xan yoʼolal bix unaj u tratarkoʼob le j-táanxel luʼumiloʼoboʼ. Chéen baʼaleʼ desde ka kíim Cristoeʼ Jéeobaeʼ pʼáat maʼ tu kʼamik le sacrificioʼob ku beetaʼal teʼ templooʼ. U jaajileʼ tuláakal le kʼeexoʼob yanchajoʼ maʼ chéen chʼaʼabil tu yilil le judíoʼob tu beetubaʼob cristianoiloʼ, tumen suuk kaʼach u nuʼuktikubaʼob yéetel baʼax ku yaʼalik le Leyoʼ (Heb. 10:​1, 4, 10). Tak máaxoʼob yiijchajaʼan u tuukuloʼob jeʼex apóstol Pedroeʼ chan difícilchajtiʼob (Hech. 10:​9-14; Gál. 2:​11-14). U tsʼookeʼ u nuuktakil u religión le judíoʼoboʼ káaj u chʼaʼpachtikoʼob le sukuʼunoʼob yoʼolal le túumben baʼaxoʼob ku creerkoʼoboʼ.

5. ¿Tiʼ máaxoʼob unaj u kanáantkubaʼob le sukuʼunoʼob yanoʼob Judeaoʼ?

⁵ Kaʼajaats máakoʼob líikʼoʼob tu contra le sukuʼunoʼob yanoʼob Judeaoʼ. Junjaatseʼ letiʼe u nuuktakil le judíoʼoboʼ tumen ku yilkoʼob kaʼach le sukuʼunoʼob bey apóstataʼobeʼ. Uláakʼ junjaatseʼ jujuntúul sukuʼunoʼob ku beetkoʼob baʼax ku yaʼalik Cristo, chéen baʼaleʼ ku yaʼalikoʼob xan ka beetaʼak baʼax ku yaʼalik u Ley Moisés, maʼ xaaneʼ tumen maʼ u kʼáatoʼob ka chʼaʼpachtaʼakoʼobiʼ (Gál. 6:12). ¿Baʼax kun  áantik kaʼach le sukuʼunoʼob utiaʼal ka chúukpajak u yóoloʼoboʼ?

6. ¿Baʼax tu yaʼalaj apóstol Pablo tiʼ le sukuʼunoʼob hebreoʼob ka u beetoʼoboʼ? (Hebreos 5:14–6:1).

⁶ Teʼ carta túuxtaʼabtiʼob tumen apóstol Pablooʼ líiʼsaʼab u yóoloʼob utiaʼal ka u xakʼalxoktoʼob u Tʼaan Dios (xok Hebreos 5:14–6:1). Utiaʼal leloʼ meyajnaj tiʼ Pablo le Tsʼíiboʼob ich Hebreo utiaʼal u tsoliktiʼob maas maʼalob le bix u adorar le sukuʼunoʼob ku beetkoʼob baʼax ku yaʼalik Cristooʼ ke le bix u adorar le judíoʼoboʼ. a Pabloeʼ u yojel kʼaʼabéet u xakʼalxoktikoʼob u Tʼaan Dios utiaʼal maʼ u tuʼusloʼob yéetel le kaʼansajoʼob maʼ maʼalobtakoʼoboʼ, beyoʼ yaan u pʼáatloʼob naatsʼ tiʼ Dios.

7. ¿Baʼax k-aktáantik teʼ kʼiinoʼobaʼ?

⁷ Teʼ kʼiinoʼob xanaʼ yaʼab máakoʼobeʼ ku kʼiʼitbeskoʼob tsikbaloʼob tu contra u Ley Dios yéetel ku pʼektikoʼonoʼob. Letiʼobeʼ ku yaʼalikoʼobeʼ jach k-píitmáan ikil k-beetik baʼax ku yaʼalik le Bibliaoʼ yéetel ku yaʼalikoʼob xaneʼ kʼasaʼanoʼon. Le baʼax ku beetik yéetel le bix u tuukul u kajnáaliloʼob le yóokʼol kaabaʼ jach jelaʼan tiʼ bix u tuukul Jéeobaoʼ (Pro. 17:15). Le oʼolaleʼ kʼaʼabéet k-preparartikba utiaʼal k-rechazartik le baʼax ku yaʼalik wa ku beetik jujuntúul tiʼ le máaxoʼob taak u kʼaskúuntikoʼob k-tuukul yéetel taak u náachkuntkoʼon tiʼ u jaajiloʼ (Heb. 13:9).

8. ¿Baʼax jeʼel u yáantkoʼon utiaʼal ka yiijchajak k-tuukuleʼ?

⁸ Pabloeʼ tu yaʼalaj tiʼ le sukuʼunoʼob yanoʼob Judeaoʼ unaj u seguer u kaanbaloʼob utiaʼal ka yiijchajak u tuukuloʼob, toʼon xaneʼ bey unaj k-beetkoʼ. Utiaʼal leloʼ unaj k-ilik k-maas kʼaj óoltik u jaajil yéetel k-ilik k-tuukul jeʼex u tuukul Jéeobaeʼ. Lelaʼ bey unaj k-beetik tak kéen tsʼoʼokok k-kʼubik k-kuxtal yéetel k-okjaʼoʼ. Tuláakloʼon unaj k-xokik le Biblia sáamsamaloʼ kex wa úuch ookkoʼon ichil u kaajal Jéeoba bey xan wa maʼ (Sal. 1:2). Apóstol Pabloeʼ ichil le carta tu tsʼíibtoʼ yaʼab u téenel tu yaʼalaj kʼaʼabéet u yantal u fe máak. Utiaʼal k-muʼukʼaʼankúuntik k-fejeʼ kʼaʼabéet k-xokik le Biblia sáamsamaloʼ (Heb. 11:​1, 6).

‹MÁAXOʼOB YAAN U FEJOʼOBEʼ KU SALVARTIK U KUXTALOʼOB›

9. ¿Baʼaxten muʼukʼaʼan kaʼach u fe le sukuʼunoʼoboʼ?

⁹ Le sukuʼunoʼoboʼ kʼaʼabéet kaʼach muʼukʼaʼan u fejoʼob utiaʼal u salvarkubaʼob tiʼ le baʼax ku taal u kʼiin u yúuchul Judeaoʼ (Heb. 10:​37-39). Jesúseʼ tu yaʼalajtiʼobeʼ le kéen u yiloʼob baʼpachtaʼan Jerusalén tumen le soldadoʼoboʼ letiʼobeʼ unaj u púutsʼloʼob utiaʼal ka xiʼikoʼob teʼ montañaʼoboʼ. Lelaʼ unaj u beetaʼal kaʼach tumen tuláakal le máaxoʼob meyajtik Diosoʼ, kex wa kajaʼanoʼob Jerusalén wa paachil tiʼ le kaajoʼ (Luc. 21:​20-24). U suukileʼ kéen taalak le soldadoʼob baʼateloʼ le máakoʼoboʼ unaj u yookloʼob tiʼ junpʼéel kaaj yaan u baʼpakʼiloʼob jeʼex u kaajil Jerusaléneʼ. Chéen baʼaleʼ tiʼ letiʼobeʼ aʼalaʼabtiʼob ka xiʼikoʼob teʼ montañaʼoboʼ. Leloʼ chan jelaʼan yéetel kʼaʼabéetchajtiʼob fe utiaʼal u beetkoʼob.

10. ¿Baʼax jeʼel u beetik le sukuʼunoʼob jach muʼukʼaʼan u fejoʼoboʼ? (Hebreos 13:17).

¹⁰ Le sukuʼunoʼob kajaʼanoʼob Judeaoʼ unaj u confiaroʼob tiʼ le sukuʼunoʼob tsʼaʼanoʼob tumen Jesús utiaʼal u nuʼuktikoʼob le múuchʼuliloʼ. Le sukuʼunoʼobaʼ yaan u yaʼalikoʼob kaʼach baʼax kʼiin unaj u púutsʼloʼob yéetel bix unaj u beetkoʼob (xok Hebreos 13:17). Teʼ Hebreos 13:​17, ku yaʼalik: «Uʼuyeʼex u tʼaan le máaxoʼob nuʼuktik a beeleʼex[oʼ]». Le tʼaan ich griego meyajnaj teʼ tekstoaʼ ku tsʼáaik naʼatbileʼ  máakeʼ ku beetik le baʼaxoʼob ku yaʼalaʼaltiʼoʼ tumen ku confiar tiʼ le máax aʼaliktiʼoʼ, maʼ chéen tumen yaan autoridad tiʼiʼ. Le sukuʼunoʼob yanoʼob Judeaoʼ unaj u confiaroʼob kaʼach tiʼ le sukuʼunoʼob antes tiʼ u kʼuchul le nojoch muʼyajiloʼ. Wa ku beetkoʼob baʼaxoʼob ku yaʼalaʼaltiʼob tu kʼiiniloʼob yaan jeetsʼelileʼ maas chéen chʼaʼabil ken u yuʼubiloʼob tʼaan teʼ kʼiinoʼob yaan baʼaxoʼob ku muʼyajtikoʼoboʼ.

11. ¿Baʼaxten kʼaʼabéet muʼukʼaʼan k-fe?

¹¹ Teʼ kʼiinoʼobaʼ toʼon xaneʼ kʼaʼabéet k-muʼukʼaʼankúuntik k-fe jeʼex tu beetil le sukuʼunoʼob túuxtaʼabtiʼob le carta tumen apóstol Pablooʼ. Bejlaʼeʼ u maas yaʼabil le máakoʼoboʼ maʼ tu creerkoʼob wa naatsʼ yanil u kʼiinil u xuʼulsaʼal tiʼ le yóokʼol kaabaʼ. Hasta ku burlarkubaʼob tiʼ toʼon tumen k-creertik leloʼ (2 Ped. 3:​3, 4). Tsʼoʼoleʼ kex le Biblia ku yaʼalik jujunpʼéel tiʼ le baʼaxoʼob kun úuchul le táan le nojoch muʼyajiloʼ yaʼab baʼaxoʼob xan maʼ k-ojliʼ. Le oʼolaleʼ kʼaʼabéet muʼukʼaʼan k-fe utiaʼal k-creertik de ke le xuʼulsajiloʼ yaan u taal jach teʼ kʼiin u chʼaʼtukultmaj Jéeobaoʼ, yéetel k-creertik letiʼeʼ yaan u kanáantkoʼon (Hab. 2:3).

12. ¿Baʼax kun áantkoʼon utiaʼal k-salvartikba tu kʼiinil le nojoch muʼyajiloʼ?

¹² Toʼon xaneʼ kʼaʼabéet muʼukʼaʼan k-fe utiaʼal k-creertik tiʼ Jéeobaeʼ táan u meyaj «le esclavo chúukaʼan u yóol yéetel yaan u naʼat» utiaʼal u nuʼuktikoʼon teʼ kʼiinoʼobaʼ (Mat. 24:45). Le sukuʼunoʼob hebreoʼoboʼ maʼ xaaneʼ aʼalaʼabtiʼob baʼax kʼaʼabéet u beetkoʼob le ka kʼuch le romanoʼoboʼ. Maʼ xaaneʼ tiʼ toʼoneʼ yaan xan u yaʼalaʼaltoʼon baʼax kʼaʼabéet k-beetik utiaʼal k-salvartikba le kéen káajak le nojoch muʼyajiloʼ. Teʼ kʼiinoʼobaʼ jach kʼaʼabéet k-confiar tiʼ le máaxoʼob nuʼuktik u kaajal Jéeobaoʼ. Wa maʼ t-uʼuyik u tʼaanoʼob yéetel maʼ t-confiar tiʼ letiʼobeʼ yaan u maas difíciltaltoʼon k-beetik baʼax ken u yaʼaloʼob teʼ kʼiinoʼob táan le nojoch muʼyajiloʼ.

13. ¿Baʼaxten jach maʼalob le consejo tu tsʼáaj Pablo teʼ Hebreos 13:5?

¹³ Le sukuʼunoʼob kajaʼanoʼob kach Judeaoʼ le táan u páaʼtkoʼob u kʼiinil u púutsʼloʼoboʼ, kʼaʼabéetchaj u kuxtaloʼob chéen yéetel baʼaxoʼob yaantiʼoboʼ yéetel maʼ u ‹yaabiltikoʼob le taakʼinoʼ› (xok Hebreos 13:5). Yaan tiʼ letiʼobeʼ tu muʼyajtoʼob le óotsilil yéetel le nojoch wiʼijil anchajoʼ (Heb. 10:​32-34). Tiʼ junpʼéel tiempoeʼ chúukpajal u yóoloʼob tumen tuukulnajoʼob tiʼ le baʼaloʼob maʼalobtak prometertaʼabtiʼob tumen Diosoʼ. Pero ka tsʼoʼokeʼ yaan tiʼ letiʼobeʼ maʼ xaaneʼ joʼopʼ u binoʼob tu paach taakʼin, tu tukloʼobeʼ beyoʼ táan u kanáantkubaʼob yéetel maʼ ken u máansoʼob óotsilil. Chéen baʼaleʼ kex ka yanak jach yaʼab taakʼin tiʼobeʼ leloʼ maʼ kun meyajtiʼob utiaʼal u salvarkubaʼob le kéen xuʼulsaʼak tiʼ Jerusalén (Sant. 5:3). Le máaxoʼob u yaabiltmoʼob kaʼach le taakʼinoʼ jach yaan u difíciltaltiʼob u púutsʼloʼob tumen yaan u kʼaʼabéettal u pʼatik u yotochoʼob bey xan le baʼaloʼob yaantiʼoboʼ.

14. Wa muʼukʼaʼan k-fejeʼ, ¿baʼaxoʼob kʼaʼabéet k-chʼaʼtuklik k-beetik?

¹⁴ Wa k-creertik jach taʼaytak u xuʼulsaʼal tiʼ le kʼasaʼan yóokʼol kaabaʼ maʼ ken k-bin tu paach taakʼin. Tu kʼiiniloʼob le nojoch muʼyajiloʼ le taakʼinoʼ yaan u pʼáatal mix baʼal u biilal. Le Bibliaoʼ ku yaʼalikeʼ le máakoʼoboʼ «yaan u píikchʼintkoʼob teʼ bejoʼob» le plata yaantiʼoboʼ, tumen yaan u tsʼáaikoʼob cuentaeʼ «mix le plata mix le oro kun salvarkoʼob tu kʼiinil u pʼujaʼanil Jéeobaoʼ» (Eze. 7:19). Le oʼolaleʼ tu lugar k-chʼíikil k-sen kaxt taakʼineʼ maas maʼalob ka kuxlakoʼon yéetel le baʼaxoʼob yaantoʼonoʼ. Leloʼ u kʼáat u yaʼaleʼ kʼaʼabéet k-kanáantikba utiaʼal maʼ k-pʼaʼapʼaxikba yéetel maʼ k-chʼíikil k-atendert chéen le baʼaxoʼob  yaantoʼonoʼ. Unaj k-kanáantikba tumen wa maʼeʼ jeʼel u pʼáatal minaʼantoʼon tiempo utiaʼal k-beetik uláakʼ baʼaloʼobeʼ. Unaj xan k-kanáantik maʼ k-sen yaabiltik le baʼaxoʼob yaantoʼonoʼ (Mat. 6:​19, 24). Jeʼex u bin u náatsʼal u kʼiinil le xuʼulsajiloʼ maʼ xaaneʼ yaan u kʼaʼabéettal k-eʼesik tiʼ máax k-confiar: tiʼ Jéeoba wa tiʼ le baʼaxoʼob yaantoʼonoʼ.

«KʼAʼABÉET U CHÚUKPAJAL A WÓOLEʼEX»

15. ¿Baʼaxten kʼaʼabéet kaʼach u chúukpajal u yóol le sukuʼunoʼob ku beetkoʼob baʼax ku yaʼalik Cristooʼ?

¹⁵ Jeʼex u bin u maas difíciltal le kuxtal tu luʼumil Judeaoʼ, le sukuʼunoʼoboʼ kʼaʼabéetchaj u chúukpajal u yóol u yeʼesoʼob yaan u fejoʼob (Heb. 10:36). Yaʼab tiʼ letiʼobeʼ chúukpaj u yóoloʼob le ka chʼaʼpachtaʼaboʼoboʼ, chéen baʼaleʼ yaʼab tiʼ letiʼobeʼ joʼopʼ u meyajtikoʼob Jéeoba tu kʼiiniloʼob yaan jeetsʼeelil. Apóstol Pabloeʼ tu yaʼaleʼ yaan u bin u maas yaatal bix u chʼaʼpachtaʼaloʼob. Le oʼolal kʼaʼabéet u prepararkubaʼob utiaʼal u chúukpajal u yóoloʼob jeʼex tu beetil Jesús tak teʼ súutuk táan u kíimsaʼaloʼ (Heb. 12:4). Yaʼab tiʼ le judíoʼob ku nuʼuktikubaʼob yéetel u Ley Moiséseʼ jach pʼuʼujoʼob ka tu yiloʼob yaʼab máakoʼob táan u beetkoʼob baʼax ku yaʼalik Cristo. Antes tiʼ u tsʼíibtik Pablo le carta tiʼ le hebreoʼoboʼ líikʼ yaʼab máakoʼob tu contra. Maas tiʼ 40 judíoʼobeʼ tu yaʼaloʼobeʼ «ka lúubuk kʼaas tu yóokʼoloʼob» wa ku janaloʼob bey xan wa ku yukʼuloʼob táanil tiʼ u kíimskoʼob Pablo (Hech. 22:22; 23:​12-14). Kex kuxlajoʼob chúumuk tiʼ máakoʼob pʼekmiloʼobeʼ le sukuʼunoʼob tu beetoʼob baʼax ku yaʼalik Cristooʼ, seguernaj u muchʼkubaʼob, u kʼaʼaytajoʼob bey xan u muʼukʼaʼankúuntik u fejoʼob.

16. Jeʼex u yaʼalik le carta tsʼíibtaʼab tiʼ le hebreoʼoboʼ, ¿bix unaj k-ilik le chʼaʼpachtajiloʼ? (Hebreos 12:7).

¹⁶ ¿Baʼax kun áantkoʼob utiaʼal ka chúukpajak u yóoloʼob? Letiʼe ka u yiloʼob le baʼaloʼob ku aktáantkoʼob bey táakaʼanoʼob tiʼ le kaʼansaj ku tsʼaʼabaltiʼoboʼ. Apóstol Pabloeʼ u yojel le jeʼeloʼ, le oʼolal tu tsolajtiʼobeʼ Dioseʼ ku chaʼik u muʼyaj le máaxoʼob meyajtikoʼ tumen le kun  áantkoʼob utiaʼal ka maas muʼukʼaʼanchajak u fejoʼob (xok Hebreos 12:7). Letiʼobeʼ unaj u yilkoʼobeʼ le pruebaʼoboʼ yaan u yáantkoʼob utiaʼal ka yanaktiʼob yéetel utiaʼal ka u maas jatsʼutskíintoʼob u modosoʼob. Le kéen u aktáantoʼob pruebaʼobeʼ maas chéen chʼaʼabil jeʼel u chúukpajal u yóoloʼob wa ku tuukuloʼob tiʼ le utsil ken u taastiʼoboʼ (Heb. 12:11).

17. ¿Baʼax u yojel kaʼach Pablo unaj u beetik máak utiaʼal ka chúukpajak u yóol?

¹⁷ Pabloeʼ tu yaʼalaj tiʼ le sukuʼunoʼob jach kʼaʼabéet u chúukpajal u yóoloʼoboʼ. Le baʼax tu yaʼaloʼ jach jaaj. ¿Baʼaxten? Tumen letiʼeʼ ku chʼaʼpachtik kaʼach le cristianoʼoboʼ, le oʼolal u yojel le baʼax ku taal u kʼiinil u aktáantkoʼoboʼ. Tsʼoʼoleʼ letiʼeʼ yaʼab u téenel xan chʼaʼpachtaʼabi. Le ka joʼopʼ u beetik le baʼax ku yaʼalik Cristooʼ yaʼab máakoʼob líikʼ tu contra (2 Cor. 11:​23-25). Pabloeʼ jach u yojel baʼax kʼaʼabéet u beetik máak utiaʼal ka chúukpajak u yóol. Le oʼolal tu kʼaʼajsaj tiʼ le sukuʼunoʼoboʼ maʼ u confiaroʼob chéen tiʼ letiʼob, baʼaxeʼ ka confiarnakoʼob tiʼ Jéeoba. Pabloeʼ tu yaʼalaj: «Maʼ kin sajaktal, Jéeoba áantken» (Heb. 13:6).

18. ¿Baʼax maʼ unaj u tuʼubultoʼoniʼ yéetel baʼax unaj k-beetik tuláakloʼon?

¹⁸ Teʼ kʼiinoʼobaʼ yaan tiʼ k-sukuʼunoʼobeʼ táan u sen chʼaʼpachtaʼaloʼob. Jeʼel u páajtal k-eʼesik k-yaabiltmoʼobeʼ yéetel jeʼel u páajtal k-orar tu yoʼolaloʼobeʼ. Yaan kʼiin xaneʼ jeʼel u páajtal k-beetik wa baʼax utiaʼal k-áantkoʼobeʼ (Heb. 10:33). Maʼ unaj u tuʼubultoʼoneʼ le Bibliaoʼ ku yaʼalikeʼ ‹tuláakal le máaxoʼob u kʼáat u tsʼáaʼob ichil u kuxtaloʼob baʼax tu kaʼansaj Cristo yéetel u adorarkoʼob Dioseʼ yaan xan u chʼaʼpachtaʼaloʼob› (2 Tim. 3:12). Lelaʼ u kʼáat u yaʼaleʼ tuláakloʼon unaj k-preparartikba utiaʼal ka chúukpajak k-óol le kéen k-aktáant pruebaʼob. Unaj k-confiar tiʼ Jéeoba yéetel unaj k-creertik yaan u yáantkoʼon utiaʼal ka chúukpajak k-óol kex jeʼel baʼaxak ka u kʼatuba t-beeleʼ. Jéeobaeʼ yaan u kʼuchul u kʼiinil u beetik u xuʼulul k-muʼyaj (2 Tes. 1:​7, 8).

19. ¿Baʼaxoʼob jeʼel u páajtal k-beetik utiaʼal k-preparartikba utiaʼal le nojoch muʼyajiloʼ? (Ilawil xan le dibujooʼ).

¹⁹ Le carta tu tsʼíibtaj Pablo tiʼ le hebreoʼoboʼ seguro jach tu yáantoʼob utiaʼal ka u preparartubaʼob utiaʼal le baʼax ku taal u kʼiiniloʼ. Pabloeʼ tu yaʼalajtiʼobeʼ unaj u xakʼalxoktikoʼob u Tʼaan Dios. Beyoʼ yaan u pʼáatloʼob preparadoil utiaʼal u rechazarkoʼob le kaʼansajoʼob jeʼel u beetik u débiltal u fejoʼoboʼ. Tu yaʼalaj xan tiʼob ka u muʼukʼaʼankúunt u fejoʼob utiaʼal ka u beetoʼob tuláakal le baʼaxoʼob ku yaʼalik Jesúsoʼ bey xan le baʼaxoʼob ku yaʼalik le máaxoʼob nuʼuktik le múuchʼuliloʼ. Tu yáantoʼob u yiloʼobeʼ le pruebaʼoboʼ junpʼéel oportunidad utiaʼal u chaʼik u kaʼansaʼaloʼob tumen Dios. Leloʼ tu yáantaj le sukuʼunoʼob utiaʼal u chúukpajal u yóoloʼoboʼ. Wa k-chʼaʼik en cuenta tuláakal le consejoʼob tu tsʼáaj Pablooʼ yaan u chúukpajal k-óol tak tu xuul (Heb. 3:14).