1. ¿Baʼax ken u beet Jesús maʼ kun xáantal?

 BEJLAʼEʼ kuxaʼanoʼon tu tsʼook kʼiinoʼob. Maʼ kun xáantaleʼ Jesúseʼ yaan u juzgartik tuláakal le máakoʼob kajaʼanoʼob way Luʼumeʼ. ¿Baʼaxten k-aʼalik jach taʼaytak u yúuchul leloʼ? Tumen Jesúseʼ tu yaʼalaj tiʼ u discípuloʼob jujunpʼéel baʼaloʼob «kun eʼesik [ . . . ] táan u tsʼoʼokol tiʼ le yóokʼol kaabaʼ» (Mat. 24:3). Le baʼax tu yaʼalaj Jesúsoʼ jeʼel u páajtal k-ilik tiʼ Mateo capítulo 24 yéetel 25, tiʼ Marcos capítulo 13 bey xan tiʼ Lucas capítulo 21.

2. ¿Baʼax ken k-il teʼ xookaʼ yéetel baʼaxten?

² Utiaʼal k-preparartikba tiʼ le baʼax ku taal u kʼiinoʼ Jesúseʼ tu tsikbaltaj óoxpʼéel baʼaloʼob jach jeʼel u yáantkoʼoneʼ: tʼaanaj tiʼ u tsikbalil le tamanoʼob yéetel le chivoʼoboʼ, tiʼ u tsikbalil le diez x-chʼúupalaloʼoboʼ bey xan tiʼ u tsikbalil u bolsasil le taakʼinoʼ. Cada junpʼéel tiʼ le baʼaloʼobaʼ yaan u yáantkoʼon k-naʼat jujunpʼéel baʼaxoʼob ken u chʼaʼ en cuenta Jesús utiaʼal u juzgartik le máakoʼoboʼ. Teʼ xookaʼ yaan k-ilik baʼax ku kaʼansiktoʼon le tsikbaloʼobaʼ. Táanileʼ koʼoneʼex tʼaan tiʼ u tsikbalil le tamanoʼob yéetel le chivoʼoboʼ.

LE TAMANOʼOB YÉETEL LE CHIVOʼOBOʼ

3. ¿Baʼax kʼiin kéen juzgartaʼak le máakoʼoboʼ?

³ Jesúseʼ tu kaʼanseʼ kéen kʼuchuk u kʼiinil u juzgartik le máakoʼoboʼ yaan u chʼaʼik en cuenta wa tu kʼamoʼob le maʼalob noticiaʼoboʼ bey xan wa tu apoyartoʼob le sukuʼunoʼob yéeyaʼanoʼoboʼ (Mat. 25:​31-46). ¿Baʼax kʼiin túun ken u jats Jesús le tamanoʼob tiʼ le chivoʼoboʼ? Yaan u beetik le táan le «nojoch muʼyajil[oʼ]», antes u káajal Armagedón (Mat. 24:​21, nota). Jeʼex juntúul kanan taman ku jatsik le tamanoʼob tiʼ le chivoʼoboʼ, Jesús xaneʼ yaan u jatsik le máaxoʼob ku apoyarkoʼob le sukuʼunoʼob yéeyaʼanoʼob tiʼ le máaxoʼob maʼatech u beetkoʼoboʼ.

4. Jeʼex u yeʼesik Isaías 11:​3, 4, ¿baʼaxten seguroʼon de ke Jesúseʼ yaan u juzgartik yéetel justicia le máakoʼoboʼ? (Ilawil xan le fotoʼoboʼ).

 ⁴ Jéeobaeʼ tsʼoʼok u tsʼáaik Jesús utiaʼal u beetik u juezil. Le Bibliaoʼ ku yaʼalikeʼ le kéen juzgarnak Jesúseʼ yaan u beetik yéetel justicia (xok Isaías 11:​3, 4). Jesúseʼ ku chʼaʼik en cuenta baʼax ku beetik, baʼax ku yaʼalik yéetel baʼax ku tuklik máak, ku chʼaʼik en cuenta xan bix u tratartaʼal u sukuʼunoʼob wa le máaxoʼob yéeyaʼanoʼoboʼ (Mat. 12:​36, 37; 25:40). Letiʼeʼ u yojel máaxoʼob táan u apoyarkoʼob le sukuʼunoʼob yéeyaʼanoʼoboʼ bey xan le meyaj ku beetkoʼoboʼ. a Junpʼéel bix jeʼel k-apoyartik le sukuʼunoʼob yéeyaʼanoʼoboʼ letiʼe kéen k-tsʼáa k-óol teʼ kʼaʼaytajoʼ. Le máaxoʼob apoyarkoʼoboʼ yaan u yaʼalaʼaltiʼob «utsul máakoʼob» yéetel yaan u tsʼaʼabal u oportunidadil u kuxtaloʼob utiaʼal mantatsʼ way Luʼumeʼ (Mat. 25:46; Apo. 7:​16, 17). ¡Jach jatsʼuts le baʼax ku páaʼtkoʼoboʼ! Wa ku chúukpajal u yóoloʼob teʼ nojoch muʼyajiloʼ bey xan kéen tsʼoʼokkeʼ yaan u pʼáatal «u kʼaabaʼob tu libroil le kuxtaloʼ» (Apo. 20:15).

5. ¿Baʼax k-kanik tiʼ u tsikbalil le tamanoʼob yéetel le chivoʼoboʼ, yéetel máaxoʼob unaj u chʼaʼikoʼob en cuenta baʼax ku yaʼalik?

⁵ Eʼes chúukaʼan óolal. U tsikbalil le tamanoʼob yéetel le chivoʼoboʼ maases ku meyaj utiaʼal u yúuchul tʼaan tiʼ le máaxoʼob kun pʼáatloʼob kuxtal way Luʼum utiaʼal mantatsʼeʼ. Letiʼobeʼ ku yeʼeskoʼob chúukaʼan u yóoloʼob le kéen táakpajkoʼob tiʼ le kʼaʼaytaj ku beetik le sukuʼunoʼob yéeyaʼanoʼoboʼ bey xan le kéen u chaʼaj u nuʼuktaʼaloʼob tumen le esclavo chúukaʼan u yóol yéetel yaan u naʼat tsʼaʼan tumen Jesúsoʼ (Mat. 24:45). Chéen baʼaleʼ le sukuʼunoʼob yéeyaʼanoʼob utiaʼal u binoʼob kaʼanoʼ kʼaʼabéet xan u chʼaʼikoʼob en cuenta le baʼax tu yaʼalaj Jesús teʼ tsikbalilaʼ. ¿Baʼaxten? Tumen Jesúseʼ táan xan u yilik baʼax ku beetkoʼob, baʼax ku tuklikoʼob yéetel baʼax ku yaʼalikoʼob. Le oʼolal tak letiʼobeʼ unaj u yeʼeskoʼob chúukaʼan óolal. Beoraaʼ koʼoneʼex tʼaan tiʼ le uláakʼ kaʼapʼéel tsikbaloʼoboʼ. Lelaʼ ku chíikpajloʼob tiʼ Mateo capítulo 25. Le tsikbaliloʼobaʼ láayliʼ yaan baʼax ku kaʼansik tiʼ le yéeyaʼanoʼoboʼ. Yáaxeʼ koʼoneʼex xakʼaltik u tsikbalil le diez x-chʼúupalaloʼoboʼ.

LE DIEZ X-CHʼÚUPALALOʼOBOʼ

6. Cinco u túulal tiʼ le x-chʼúupalaloʼoboʼ, ¿bix tu yeʼesiloʼob yaan u naʼatoʼob? (Mateo 25:​6-10).

⁶ Teʼ tsikbalilaʼ Jesúseʼ tʼaanaj tiʼ diez x-chʼúupalaloʼob jóokʼ u chʼaʼob u beel juntúul noviotsil (Mat. 25:​1-4). Tuláakal le x-chʼúupalaloʼobaʼ taak kaʼach u yookloʼob tu yéetel tu fiestail le tsʼoʼokol beeloʼ. Chéen baʼaleʼ Jesúseʼ tu yaʼaleʼ cinco tiʼ le x-chʼúupalaloʼobaʼ yanchaj «u naʼatoʼob» yéetel cinco u túulaleʼ «minaʼan u naʼatoʼob». Le yaan u naʼatoʼoboʼ tu líiʼsubaʼob tubeel yéetel tu chʼaʼtukloʼob u páaʼtkoʼob le noviotsil jeʼel baʼalak hora ka kʼuchkeʼ. Letiʼobeʼ tu bisoʼob u lámparaʼob bey xan nuʼukuloʼob chuup yéetel aceite, le oʼolal maʼ tuʼup u lámparaʼobiʼ (xok Mateo 25:​6-10). Le x-chʼúupalaloʼob yanchaj u naʼatoʼoboʼ páajchaj u yookloʼob yéetel le noviotsil tu festejoil le tsʼoʼokol beeloʼ. Bey xan kun úuchul yéetel le sukuʼunoʼob yéeyaʼanoʼoboʼ. Le máaxoʼob kun chúukpajal u yóoloʼob tak kéen taalak Jesús, le noviotsiloʼ, yaan u páajtal u yookloʼob tu yéetel teʼ Reino yaan kaʼanoʼ (Apo. 7:​1-3). b ¿Baʼax túun úuch yéetel le x-chʼúupalaloʼob minaʼan u naʼatoʼoboʼ?

7. ¿Baʼax úuch tiʼ le cinco x-chʼúupalaloʼob minaʼan u naʼatoʼoboʼ, yéetel baʼaxten?

⁷ Le cinco x-chʼúupalaloʼob minaʼan u  naʼatoʼoboʼ maʼ tu líiʼsubaʼob tubeeliʼ, le oʼolal maʼ tu yiloʼob u taal le noviotsiloʼ. Le ka tu yojéeltoʼob jach taʼaytak u kʼuchul le noviotsiloʼ tu tsʼáajoʼob cuentaeʼ u lámparaʼobeʼ jach taʼaytak u tuʼupul yéetel maʼ u bismoʼob u maasil aceiteiʼ, le oʼolal bin u manoʼob uláakʼ. Le ka túun kʼuch le noviotsiloʼ letiʼobeʼ maʼ tu yiloʼob u taaliʼ. Chéen baʼaleʼ «le x-chʼúupalaloʼob túun u listokíintmaj u lámparaʼoboʼ ookoʼob tu yéetel tu festejoil le tsʼoʼokol beeloʼ, ka túun kʼaʼal le joonajoʼ» (Mat. 25:10). Le ka suunaj le x-chʼúupalaloʼob minaʼan u naʼatoʼoboʼ taakchaj u yokloʼob teʼ festejooʼ, pero le noviotsiloʼ tu yaʼalajtiʼob: «U jaajileʼ maʼ in kʼaj óoleʼexiʼ» (Mat. 25:​11, 12). Letiʼobeʼ maʼ tu líiʼsubaʼob utiaʼal u páaʼtkoʼob u taal le noviotsil jeʼel baʼalak hora ka kʼuchkoʼ. ¿Baʼax ku kaʼansik tiʼ le yéeyaʼanoʼob le tsikbalaʼ?

8, 9. ¿Baʼax ku kaʼansik tiʼ le yéeyaʼanoʼob u tsikbalil le diez x-chʼúupalaloʼoboʼ? (Ilawil xan le fotoʼoboʼ).

⁸ Eʼes a líiʼsmaba yéetel maʼ náayal a wóoliʼ. Jesúseʼ maʼ tu yóotaj u yaʼal wa yaan kaʼapʼéel grupo máakoʼob yéeyaʼanoʼob utiaʼal u binoʼob kaʼaniʼ. Maʼ táan kaʼach u yaʼalik wa junpʼéel grupoeʼ yaan u líiʼskuba tubeel yéetel le uláakʼoʼ maʼ. Baʼaxeʼ chéen taak kaʼach u kaʼansik tiʼ le yéeyaʼanoʼoboʼ wa maʼ tu chúukpajal u yóoloʼob tak tu xuuleʼ maʼ ken u kʼamoʼob le esperanza yaantiʼoboʼ (Juan 14:​3, 4). ¡Le baʼax tu yaʼalaj Jesúsoʼ maʼ junpʼéel báaxaliʼ! Kex táan k-páaʼtik k-bin teʼ kaʼanoʼ wa k-pʼáatal kajtal way Luʼumeʼ tuláakloʼon yaan baʼax jeʼel u páajtal k-kanik tiʼ u tsikbalil le diez x-chʼúupalaloʼoboʼ. K-kanikeʼ kʼaʼabéet k-kanáantik maʼ u náayal k-óol yéetel k-líiʼsikba tubeel utiaʼal u chúukpajal k-óol tak tu xuul (Mat. 24:13).

⁹ Jeʼex tsʼoʼok k-ilkoʼ tu tsikbalil le diez x-chʼúupaloʼoboʼ Jesúseʼ tu yeʼesaj u kʼaʼanaʼanil maʼ u náayal k-óol yéetel k-líiʼsikba tubeel. Le ka tsʼoʼokeʼ Jesúseʼ tʼaanaj tiʼ u tsikbalil u bolsasil le taakʼinoʼ. Teʼ tsikbalaʼ Jesúseʼ tu yeʼesaj u kʼaʼanaʼanil u tsʼáaik u yóol meyaj máak.

U BOLSASIL LE TAAKʼINOʼ

10. Le yáax kaʼatúul esclavoʼoboʼ, ¿bix úuchik u yeʼeskoʼob chúukaʼan u yóoloʼob tiʼ le tsʼuuloʼ? (Mateo 25:​19-23).

¹⁰ Teʼ tsikbalaʼ Jesúseʼ tʼaanaj tiʼ óoxtúul  esclavoʼob: kaʼatúuleʼ chúukpaj u yóoloʼob tiʼ u tsʼuulil yéetel juntúuleʼ maʼ (Mat. 25:​14-18). Antes u bin táanxel luʼumileʼ le tsʼuuloʼ tu tsʼáaj u bolsasil taakʼin tiʼ le esclavoʼoboʼ. Le yáax kaʼatúuloʼ tu yeʼesoʼob chúukaʼan u yóoloʼob tiʼ u tsʼuuliloʼob tumen tu tsʼáaj u yóoloʼob meyaj yéetel u ganarkoʼob u maasil taakʼin. Le ka suunaj u tsʼuuliloʼobeʼ le kaʼatúul esclavoʼoboʼ tsʼoʼok kaʼach u ganarkoʼob u dobleil tiʼ le taakʼin tsʼaʼabtiʼoboʼ. Le oʼolal le tsʼuuloʼ tu felicitartoʼobeʼ ka tu yaʼalajtiʼob: «Kiʼimakchajak a wóol[eʼex] jeʼex kiʼimakil in wóoleʼ» (xok Mateo 25:​19-23). Chéen baʼaleʼ, kux túun le u yóoxtúul esclavooʼ, ¿baʼax tu beetaj yéetel le taakʼin tsʼaʼabtiʼoʼ?

11. ¿Baʼax úuch tiʼ le maʼakʼóol esclavooʼ yéetel baʼaxten?

¹¹ Tiʼ le u yóoxtúul esclavooʼ le tsʼuuloʼ tu tsʼáaj junpʼéel bolsa taakʼin utiaʼal u náajaltik u maasil. Chéen baʼaleʼ le esclavoaʼ como «maʼakʼóol máak[eʼ]», chéen tu páanaj junpʼéel jooleʼ ka túun tu mukaj le taakʼinoʼ. Le ka suunaj le tsʼuuloʼ le esclavoaʼ chéen tu sutajtiʼ le taakʼin kʼuʼubtiʼoʼ. Tsʼoʼoleʼ tu lugar u kʼáatik perdón tumen maʼ tu náajaltaj u maasileʼ tu yaʼalaj tiʼ le tsʼuuloʼ ‹jach yaʼab baʼax ku kʼáatik tiʼ u esclavoʼob›. Yoʼolal leloʼ kʼeʼey tumen le tsʼuuloʼ, luʼsaʼab le taakʼin tsʼaʼabtiʼoʼ ka tojolchʼintaʼabi (Mat. 25:​24, 26-30).

12. ¿Máaxoʼob ku chíikbesik le kaʼatúul esclavoʼob chúukpaj u yóoloʼoboʼ?

¹² Le kaʼatúul esclavoʼob chúukpaj u yóol u meyajtoʼob le tsʼuuloʼ ku chíikbeskoʼob le sukuʼunoʼob yéeyaʼanoʼoboʼ. Jesús, le tsʼuuloʼ, ku yaʼalik tiʼ letiʼob: «Kiʼimakchajak a wóol jeʼex kiʼimakil in wóoleʼ». Lelaʼ u kʼáat u yaʼaleʼ Jesúseʼ ku tsʼáaiktiʼob le baʼax táan u páaʼtkoʼoboʼ, u páajtalil u binoʼob teʼ kaʼanoʼ. Letiʼob le yáax máakoʼob kaʼa kuxkíintaʼaboʼoboʼ (Mat. 25:​21, 23; Apo. 20:5a). U ejemplo le esclavo maʼakʼóoloʼ meyajnaj tiʼ Jesús utiaʼal u kaʼansik junpʼéel baʼal jach importante tiʼ le yéeyaʼanoʼoboʼ. Koʼoneʼex ilik baʼaxiʼ.

13, 14. ¿Baʼax ku kaʼansik tiʼ le yéeyaʼanoʼob u tsikbalil u bolsasil le taakʼinoʼ? (Ilawil xan le fotoʼoboʼ).

¹³ Eʼes meeyjilech. Tu tsikbalil u bolsasil le taakʼinoʼ Jesúseʼ maʼ táan kaʼach u yaʼalik wa yaan u maʼakʼóoltal le sukuʼunoʼob  yéeyaʼanoʼoboʼ. Baʼaxeʼ jeʼex tu tsikbalil le diez x-chʼúupalaloʼoboʼ letiʼeʼ chéen taak kaʼach u kaʼansik tiʼ le yéeyaʼanoʼob junpʼéel baʼal jach importanteoʼ. Le tsikbaloʼobaʼ meyajnaj tiʼ Jesús utiaʼal u yeʼesik tiʼ le yéeyaʼanoʼob baʼax jeʼel u yúuchultiʼob wa ku xuʼulul u tsʼáaik u yóoloʼob meyajoʼ. Wa ku beetkoʼob leloʼ yaan u xuʼulul u kʼaʼamloʼob yéetel maʼ kun yéeybiloʼob tumen Dios. Bey túunoʼ maʼ kun páajtal u yookloʼob tu Reinoil kaʼan (2 Ped. 1:10).

¹⁴ Yéetel u tsikbalil le diez x-chʼúupalaloʼob bey xan yéetel u tsikbalil u bolsasil le taakʼinoʼ, Jesúseʼ táan kaʼach u kaʼansik tiʼ le yéeyaʼanoʼoboʼ kʼaʼabéet u líiʼskubaʼob tubeel, u kanáantkoʼob maʼ u náayal u yóoloʼob yéetel u tsʼáaik u yóoloʼob meyaj. Chéen baʼaleʼ Jesúseʼ yaan uláakʼ baʼax tu kaʼansaj tiʼ le yéeyaʼanoʼoboʼ. Koʼoneʼex ilik teʼ Mateo 24:​40, 41.

MÁAX «KUN BISBIL»

15, 16. Jeʼex u yeʼesik Mateo 24:​40, 41, ¿baʼaxten le sukuʼunoʼob yéeyaʼanoʼoboʼ kʼaʼabéet u kanáantik maʼ u náayal u yóoloʼob?

¹⁵ Táanil tiʼ u tsikbaltik Jesús le óoxpʼéel tsikbaloʼobaʼ tʼaanaj tiʼ le tsʼook juicio kun beetbil tiʼ le yéeyaʼanoʼob utiaʼal u yilaʼal máaxoʼob jach tu jaajil kʼamaʼanoʼob tumen Diosoʼ. Letiʼeʼ tʼaanaj tiʼ kaʼatúul máakoʼob bijaʼanoʼob ich kool bey xan tiʼ kaʼatúul koʼoleloʼob táan u juuchʼoʼob yéetel junpʼéel molino de mano. Maʼ xaaneʼ le máakoʼobaʼ letiʼe mismo meyaj táan u beetkoʼoboʼ. Chéen baʼaleʼ Jesúseʼ tu yaʼaleʼ «juntúul kun bisbiliʼ yéetel juntúul kun pʼatbiliʼ» (xok Mateo 24:​40, 41). Teʼ tuláakʼ versículooʼ Jesúseʼ tu yaʼalaj tiʼ u discípuloʼob: «Maʼ u náayal a wóoleʼex, tumen maʼ a wojleʼex baʼax kʼiin ken taalak a Yuumtsileʼexiʼ» (Mat. 24:42). Lelaʼ jach chíikaʼan tiʼ baʼax tu yaʼalaj Jesús tu tsʼoʼokbal u tsikbalil le diez x-chʼúupalaloʼoboʼ (Mat. 25:13). Le oʼolal jeʼel u páajtal k-aʼalikeʼ maʼ xaaneʼ Jesúseʼ táan u tʼaan tiʼ junpʼéeliliʼ baʼal. Chéen le yéeyaʼanoʼob kun chúukpajal u yóoloʼob yaan u binoʼob gobernar yéetel Jesús teʼ kaʼanoʼ (Juan 14:3).

¹⁶ Maʼ u náayal a wóol. Wa juntúul máax yéeyaʼan ku náayal u yóol yéetel maʼ tu chúukpajal u yóoleʼ maʼ kun antal ichil «tuláakal le máaxoʼob u yéeymaj» Jéeobaoʼ (Mat. 24:31). Chéen baʼaleʼ tak le máaxoʼob kun pʼáatloʼob kuxtal mantatsʼ way Luʼum kʼaʼabéet u beetkoʼob le baʼax tu yaʼalaj Jesúsoʼ. Letiʼobeʼ kʼaʼabéet xan u kanáantkoʼob maʼ u náayal u yóoloʼob yéetel u chúukpajal u yóoloʼob u meyajtoʼob Jéeoba.

17. ¿Baʼaxten maʼ unaj k-chiʼichnaktal ikil k-ojéeltik láayliʼ táan u yéeyik Jéeoba máakoʼob teʼ kʼiinoʼobaʼ?

¹⁷ Toʼoneʼ k-kʼaj óol tubeel Jéeoba, k-ojleʼ mantatsʼ ku chʼaʼtuklik u beetik baʼax maʼalob. Le oʼolaleʼ wa Jéeoba tsʼoʼok u chʼaʼtuklik u yéeyik jujuntúul máakoʼob teʼ tsʼook añosaʼ, le jeʼeloʼ maʼ unaj u beetik k-chiʼichnaktaliʼ. c Kʼaʼajaktoʼon baʼax tu yaʼalaj Jesús yoʼolal le máakoʼob contratartaʼaboʼob meyaj tiʼ junpʼéel parcela teʼ hora 11 (Mat. 20:​1-16). Letiʼobeʼ igual boʼotaʼabikoʼob yéetel le máakoʼob káaj u meyajoʼob desde tempranooʼ. Bey túun xanoʼ tuláakal le máaxoʼob yéeyaʼanoʼoboʼ kex úuch yéeyaʼakoʼob wa túumben yéeyaʼaniloʼobeʼ wa ku chúukpajal u yóoloʼobeʼ yaan u páajtal u binoʼob gobernar yéetel Jesús teʼ kaʼanoʼ.

KAANBALNEN TIʼ LE BAʼAX TU YAʼALAJ JESÚSOʼ

18, 19. ¿Baʼax k-kanik tiʼ le tsikbaloʼob tu yaʼalaj Jesúsoʼ?

¹⁸ ¿Baʼax tsʼoʼok k-kanik teʼ xookaʼ? U tsikbalil le tamanoʼob yéetel le chivoʼoboʼ ku kaʼansiktoʼoneʼ tuláakal le máaxoʼob yaan u pʼáatloʼob kuxtal mantatsʼ way Luʼumeʼ kʼaʼabéet u chúukpajal u yóoloʼob bejlaʼeʼ bey xan le kéen káajak  le nojoch muʼyajiloʼ. Le kéen kʼuchuk le kʼiin jeʼeloʼ Jesúseʼ yaan u yilik máaxoʼob chúukpaj u yóoloʼob yéetel yaan u tsʼáaiktiʼob «kuxtal minaʼan u xuul» (Mat. 25:46).

¹⁹ T-ilaj xan kaʼapʼéel tsikbal ku kaʼansik baʼaloʼob jach kʼaʼanaʼantak tiʼ le yéeyaʼanoʼoboʼ. Tu tsikbalil xan le diez x-chʼúupalaloʼoboʼ t-ileʼ cinco u túulal tiʼ letiʼobeʼ tu líiʼsubaʼob tubeel yéetel maʼ náay u yóoloʼobiʼ. Tu yeʼesoʼob yaan u naʼatoʼob tumen chúukpaj u yóoloʼob u páaʼtoʼob u taal le noviotsiloʼ. Le uláakʼ x-chʼúupalaloʼoboʼ maʼ tu yeʼesoʼob naʼatiʼ, le oʼolal le noviotsiloʼ maʼ tu chaʼaj u yookloʼob tu yéetel tu festejoil le tsʼoʼokol beeloʼ. ¿Baʼax ku kaʼansiktoʼon lelaʼ? Ku kaʼansiktoʼoneʼ kʼaʼabéet u chúukpajal k-óol k-páaʼt u taasik Jesús le xuʼulsajiloʼ kex jeʼel bukaʼaj ka xáanakeʼ. Tu tsikbalil u bolsasil le taakʼinoʼ t-ileʼ kaʼatúul esclavoʼobeʼ tu tsʼáaj u yóoloʼob meyaj. Letiʼobeʼ chúukpaj u yóoloʼob yéetel tu náajaltoʼob u maasil taakʼin, le oʼolal lúuboʼob utsil tiʼ le tsʼuuloʼ. Chéen baʼaleʼ le esclavo maʼakʼóolchajoʼ tojolchʼintaʼabi. ¿Baʼax ku kaʼansiktoʼon? Ku kaʼansiktoʼoneʼ unaj k-tsʼáaik k-óol k-meyajt Jéeoba tak tu xuul. Tu tsʼookeʼ t-ileʼ Jesúseʼ tu kaʼansaj tiʼ le yéeyaʼanoʼoboʼ kʼaʼabéet u kanáantik maʼ u náayal u yóoloʼob. Beyoʼ yaan u páajtal u binoʼob gobernar yéetel Jesús teʼ kaʼanoʼ. Le yéeyaʼanoʼoboʼ jach ku tsʼíiboltkoʼob u kʼuchul u súutukil u ‹muchʼkubaʼob› yéetel Jesús teʼ kaʼanoʼ. Letiʼob le noviatsil ku yaʼalaʼal kun «tsʼoʼokol u beel [yéetel] le Taman» wa Jesús kéen tsʼoʼokok u guerrail Armagedónoʼ (2 Tes. 2:1; Apo. 19:9).

20. ¿Baʼax ken u beet Jéeoba wa k-chʼaʼik en cuenta baʼax tu kaʼansaj Jesúsoʼ?

²⁰ Maʼ kun xáantaleʼ Jesúseʼ yaan u juzgartik le máakoʼoboʼ, pero leloʼ maʼ unaj u beetik k-sajaktaliʼ. Wa ku chúukpajal k-óoleʼ, Jéeoba le k-Taata jach u yaabiltmoʼonoʼ, yaan u tsʼáaiktoʼon «le páajtalil ku píitmáan tiʼ u muukʼ wíinikoʼ». Beyoʼ yaan u páajtal ‹k-pʼáatal waʼatal tu táan u Paal máak› (2 Cor. 4:7; Luc. 21:36). Kex táan k-páaʼtik k-bin teʼ kaʼan wa k-pʼáatal kuxtal utiaʼal mantatsʼ way Luʼumeʼ tuláakloʼoneʼ unaj k-chʼaʼik en cuenta le baʼax tu kaʼansaj Jesúsoʼ. Wa k-beetkeʼ yaan k-lúubul utsil tiʼ Jéeoba yéetel yaan u ‹tsʼíibtik k-kʼaabaʼ tu libroil le kuxtaloʼ› (Dan. 12:1; Apo. 3:5).