Antes tiʼ u káajal k-xookeʼ, maʼalob ka tuukulnakoʼon tiʼ lelaʼ: «¿Baʼax in kʼáat in kane?». Kex maʼalob ka tuukulnakoʼon tiʼ lelaʼ, kʼaʼabéet xan k-chaʼik tiʼ Jéeoba ka u kaʼanstoʼon túumben baʼaloʼob. ¿Bix túun jeʼel k-beetkeʼ?

Kʼáat tiʼ Jéeoba ka u tsʼáatech naʼat. Maʼ a conformar yéetel le baʼax a wojloʼ (Pro. 3:​5, 6). Aʼal tiʼ Jéeoba ka u yáantech a kan le baʼax u kʼáat letiʼ ka a kan beoraaʼ (Sant. 1:5).

Chaʼa u kaʼansikech le Bibliaoʼ. «U tʼaan Dioseʼ kuxaʼan» (Heb. 4:12). Cada ken k-xok le Bibliaoʼ jeʼel k-kanik túumben baʼaloʼobeʼ, yéetel jejeláas xan bix jeʼel u yáantkoʼoneʼ. Pero utiaʼal leloʼ kʼaʼabéet dispuestoʼon utiaʼal k-kanik túumben baʼaloʼob.

Apreciart le janal espiritualoʼ. Le kaʼansaj ku tsʼáaiktoʼon Jéeobaoʼ bey jeʼex le kiʼikiʼ janal ku tsʼaʼabal yóoʼ mesaoʼ (Isa. 25:6). Le oʼolaleʼ ilawil a xokik wa a jaantik tak le baʼaxoʼob ka tuklik maʼ kun utstal ta tʼaanoʼ. ¡Wa ka beetik beyoʼ jach yaan a jóoʼsik u yutsil yéetel yaan a disfrutartik!