Jéeobaeʼ u kʼáat ka k-aʼal tiʼ letiʼ tuláakal le baʼax preocuparkoʼonoʼ (Salmo 55:22). Maʼ xaaneʼ tu táan u maasileʼ maʼ jach nojoch le baʼax táan u yúuchultoʼonoʼ. Pero wa junpʼéel baʼal táan u preocuparkoʼoneʼ utiaʼal Jéeobaeʼ junpʼéel baʼal jach importante. Le oʼolaleʼ maʼalob ka orarnakoʼon tiʼ letiʼ (Filipenses 4:6, 7).

Wa yaantoʼon junpʼéel kʼojaʼanil jeʼex le depresión wa le ansiedadoʼ, maʼ xaneʼ jeʼel k-uʼuyik t-juunal yanoʼoneʼ. Yaan horaeʼ u maasil máakoʼobeʼ maʼ tu naʼatkoʼob bix k-uʼuyikba (Proverbios 14:10). Chéen baʼaleʼ kéen k-aʼal tiʼ Jéeoba yéetel tuláakal puksiʼikʼal le baʼaxoʼob ku yúuchultoʼonoʼ letiʼeʼ ku yuʼubikoʼon yéetel ku naʼatik bix k-uʼuyikba. Jéeobaeʼ u kʼaj óoloʼon yéetel u kʼáat ka orarnakoʼon tiʼ tu yoʼolal jeʼel baʼaxak ka u preocupartoʼoneʼ (2 Crónicas 6:29, 30).

Wa mantatsʼ k-orar tiʼ Jéeobaeʼ maas yaan confiar de ke letiʼeʼ jeʼel u yáantkoʼoneʼ. Juntúul tiʼ le máaxoʼob tsʼíibt le salmooʼ bey tu yuʼubilubaoʼ, letiʼeʼ tu yaʼalaj: «Tsʼoʼok a wilik baʼax ku yúuchulten, jach a wojel baʼax kin muʼyajtik» (Salmo 31:7). Tak chéen yéetel k-ojéeltik de ke táan u yilik Jéeoba baʼax ku yúuchultoʼoneʼ jeʼel u yáantkoʼon wa yaantoʼon junpʼéel tiʼ le kʼojaʼaniloʼobaʼ. Tsʼoʼoleʼ Jéeobaeʼ maʼ chéen táan u yilik le baʼax ku yúuchultoʼonoʼ baʼaxeʼ ku yáantkoʼon yéetel ku líiʼsik k-óol yéetel u yáantaj le Bibliaoʼ.