1. Le tsʼoʼokol beeloʼ

Maʼ tuláakal maʼak igual u yilik le tsʼoʼokol beeloʼ. Jejeláas baʼaxoʼob ku tuklaʼal jeʼel u taasik kiʼimak óolal tiʼ le tsʼokaʼan u beeloʼoboʼ.

BAʼAX U KʼÁAT U YAʼALEʼ: Dios tsʼáa le tsʼoʼokol beeloʼ. Le oʼolal u yojel baʼax jeʼel u taasik kiʼimak oʼolal tiʼ le máaxoʼob tsʼokaʼan u beeloʼoboʼ (Marcos 10:​6-9). Le íichamtsil yéetel le atantsiloʼ maas jeʼel u kiʼimaktal u yóoloʼob wa ku tsʼáaikoʼob táanil baʼax kʼaʼabéet tiʼ u núup ke u kaxtik chéen u yutsiloʼobeʼ. Le íichamtsil u yaabiltmaj u yatanoʼ u tratartik tubeel yéetel ku kanáantik. Le atantsil ku respetartik u yíichamoʼ ku apoyartik yéetel ku tʼanik yéetel yaabilaj.

LE CONSEJOʼOB KU TSʼÁAIK LE BIBLIAOʼ KU YÁANTAJ: Quang yéetel Thi, u yataneʼ, kajaʼanoʼob Vietnam. Letiʼobeʼ maʼ maʼalob u bintiʼobiʼ, le oʼolal maʼ kiʼimak u yóoloʼobiʼ. Quang kaʼacheʼ jach kʼasaʼan yéetel ku maltratartik u yatan. Letiʼeʼ ku yaʼalik: «Maʼatech in tuukul kaʼach tiʼ bix u yuʼubikuba in watan, hasta yaʼab u téenel tin humillartaj». In wataneʼ u kʼáat ka k-divorciartbaʼ. Letiʼeʼ ku yaʼalik: «Kin wuʼuyik kaʼach maʼ tu páajtal in confiar tiʼ in wíicham mix in respetartik».

Ka máan kʼiineʼ, Quang yéetel u yataneʼ káaj u xokikoʼob le Bibliaoʼ yéetel tu tsʼáajoʼob ichil u kuxtaloʼob baʼax ku yaʼalik Efesios 5:33. ¿Bix túun biniktiʼob? Letiʼeʼ ku yaʼalik: «Leʼ tekstoaʼ tu yáanten in wileʼ kʼaʼabéet in yaabiltik in watan, in tratartik maʼalob, in kanáantik yéetel in tsʼáaik baʼax kʼaʼabéettiʼ. Úuchik in beetik beyaʼ in wataneʼ tu maas yaabilten yéetel ku respetarken». Thieʼ ku yaʼalik: «Jeʼex u yaʼalik Efesios 5:​33, kin wilik in maas respetartik in wíicham, beoraeʼ kin wuʼuyik u yaabiltmen yéetel ku kanáantken».

 2. U biskuba máak yéetel u maasil

Yaʼab tuʼuxoʼobeʼ maʼ maʼalob bix u tratartaʼal u maasil yoʼolal u raza, u religión wa tumen homosexualoʼob.

BAʼAX U KʼÁAT U YAʼALE: Le Bibliaoʼ ku kaʼansikeʼ maʼ unaj k-pʼektik máak yoʼolal u raza, tuʼux u taal wa tumen homosexualiʼ. Baʼaxeʼ ku kaʼansik ka k-respetart tuláakal máak (Hechos 10:34). Kex maʼ igual le baʼaxoʼob k-creertik wa maʼ de acuerdoʼon yéetel le baʼax ku beetik uláakʼ máakoʼoboʼ, unaj k-respetarkoʼob yéetel k-tratarkoʼob maʼalob (Mateo 7:12).

LE CONSEJOʼOB KU TSʼÁAIK LE BIBLIAOʼ KU YÁANTAJ: Tiʼ Danieleʼ kaʼansaʼabeʼ le máaxoʼob asiailoʼoboʼ kʼasaʼan máakoʼob, le oʼolal tu pʼektaj tuláakal le máaxoʼob ku taaloʼob teʼeloʼ. Hasta yaan horaeʼ ku pochʼkoʼob tu táan u maasil. Letiʼeʼ ku yaʼalik: «Maʼ kʼaas in wilik kaʼach le baʼax kin beetkoʼ, kin tuklik kaʼacheʼ táan in kanáantik in kaajal».

Ka máan kʼiineʼ Danieleʼ tu kanaj baʼax ku yaʼalik le Bibliaoʼ. Letiʼeʼ ku yaʼalik: «Anchaj in kʼexik in tuukul tumen tin kaneʼ tu táan Dioseʼ tuláakal máak igual kex jejeláas tuʼux u taal. Bejlaʼeʼ bey xan in tuukuloʼ». Beoraaʼ ¿bix u yilik Daniel juntúul máak maʼ u yéet kaajaliʼ? Letiʼeʼ ku yaʼalik: «Bejlaʼeʼ in yaabiltmaj tuláakal máak, yaan tak in amigoʼob jejeláas tuʼux u taaloʼob. Maʼatech in pʼektik mix máak yóolal tuʼux u taal».

 3. Le taakʼinoʼ

Yaʼab máakeʼ ku tuklikeʼ utiaʼal u bin maʼalobil tiʼ yéetel u kiʼimaktal u yóoleʼ kʼaʼabéet u ayikʼaltal.

BAʼAX U KʼÁAT U YAʼALE: Kex kʼaʼabéet le taakʼinoʼ maʼ u kʼáat u yaʼal wa seguro yaan u kiʼimaktal u yóol máak wa ayikʼaliʼ (Proverbios 18:11; 23:​4, 5). Chéen jeʼel u kiʼimaktal u yóol máak yéetel u bin maʼalobil tiʼ wa ku tsʼáaik ichil u kuxtal le consejoʼob yaan teʼ Bibliaoʼ (1 Timoteo 6:​17-19).

LE CONSEJOʼOB KU TSʼÁAIK LE BIBLIAOʼ KU YÁANTAJ: Cardo, juntúul máak kajaʼan Indonesiaeʼ, tu chʼaʼtukultaj u ayikʼaltal yéetel béeychaj tiʼ. Letiʼeʼ ku yaʼalik: «Ku páajtal kaʼach in viajar, in manik koʼokoj baʼaloʼob, cocheʼob yéetel najoʼob. Yaanten kaʼach tuláakal le baʼax ku tsʼíiboltik máakoʼ». Pero chéen junsúutuk ka tu láaj perdertaj. Letiʼeʼ ku yaʼalik: «Tuʼuseneʼ ka oklaʼab tuláakal in taakʼin. Ka tin láaj perdertaj le baʼax yaanten kaʼachoʼ, chéen kunel úuchik in sen meyaj. Jach yaachaj in wóol, pʼáat mix baʼal yaanten yéetel kin wuʼuyik mix baʼal in biilal».

Cardoeʼ tu chʼaʼtuklaj u seguertik le consejo ku tsʼáaik le Biblia yoʼolal le taakʼinoʼ. Beoraaʼ tu lugar u sen kíimskuba meyaj utiaʼal u ayikʼaltaleʼ kiʼimak u yóol u kuxtal chéen yéetel le baʼaxoʼob kʼaʼabéettiʼoʼ. Letiʼeʼ ku yaʼalik: «Tin wileʼ le baʼax maas kʼaʼanaʼanoʼ letiʼe baʼaloʼob espiritualoʼoboʼ. Beoraeʼ kiʼimak in wóol yéetel maas kiʼ in wenel».

 4. Le sexooʼ

Yaʼab baʼaloʼob maʼ kʼaas u yilaʼal tumen le máakoʼob yaan yil yéetel sexo.

BAʼAX U KʼÁAT U YAʼALE: Le Bibliaoʼ ku tsolik jujunpʼéel baʼaloʼob maʼ maʼalobtak yaan yil yéetel le sexooʼ. Ichil le núupkʼebanoʼ táakaʼan u tusik u núup máak, le prostituciónoʼ, le relaciones sexuales ichil máaxoʼob maʼ tsʼokaʼan u beeloʼobiʼ, le homosexualidadoʼ yéetel le relaciones sexuales yéetel baʼalcheʼoboʼ (1 Corintios 6:​9, 10). Le relaciones sexualesoʼ junpʼéel baʼax u siimaj Dios tiʼ le xiib yéetel le koʼolel tsʼokaʼan u beeloʼoboʼ (Proverbios 5:​18, 19).

LE CONSEJOʼOB KU TSʼÁAIK LE BIBLIAOʼ KU YÁANTAJ: Kylie juntúul koʼolel kajaʼan Australia. Letiʼeʼ ku yaʼalik: «Antes u tsʼoʼokol in beeleʼ kin tuklikeʼ le relaciones sexualesoʼ yaan u beetik in wuʼuyik yaabiltaʼanen yéetel kanáantaʼanen. Pero maʼ bey úuchikiʼ, baʼaxeʼ chéen tu taasajten problemas yéetel tu sen beetaj in sufrir».

Ka máan kʼiineʼ Kylieʼ káaj u xokik le Bibliaoʼ yéetel u tsʼáaik ichil u kuxtal le baʼax ku kanikoʼ. Letiʼeʼ ku yaʼalik: «Beoraeʼ kin tsʼáaik cuentaeʼ wa ka in beet kaʼach baʼax ku yaʼalik le Bibliaoʼ bejlaʼa maʼ tin sen sufrireʼ. Ikil in beetik baʼax ku yaʼalik Jéeobaeʼ kin wuʼuyik kanáantaʼanen yéetel yaabiltaʼanen. Le consejoʼob ku tsʼáaik le Bibliaoʼ tsʼoʼok u yáantken utiaʼal maʼ in kaxtik problemas ka u beetoʼob in sufrir».