Le kʼaʼaytaj ka beetkoʼ, ¿bey wa jeʼex le serenooʼ?
LE KʼAʼAYTAJ k-beetkoʼ junpʼéel meyaj jach kʼaʼanaʼan, chéen baʼaleʼ maʼ tuláakal máak bey u yilkiʼ. Kex yaan máaxoʼob jatsʼuts u yuʼubikoʼob le baʼax ku kaʼansik le Bibliaoʼ, maʼatech u yilkoʼob u kʼaʼanaʼanil u xookoʼob t-éetel.
Lelaʼ letiʼe baʼax úuch tiʼ Gavinoʼ, letiʼeʼ ku bin kaʼach teʼ muchʼtáambaloʼoboʼ, chéen baʼaleʼ maʼ u kʼáat u kʼam kaʼach junpʼéel xook tiʼ le Bibliaoʼ. Letiʼeʼ tu yaʼalaj: «Teneʼ maʼ yaʼab baʼal in wojel tiʼ le Bibliaoʼ, le oʼolaleʼ suʼlaken ka tsʼaʼabak cuenta. Maʼ in kʼáat ka tuʼuskeniʼ mix in kʼáat in comprometertinba yéetel junpʼéel religioniʼ». Wa teech ka a kʼaj óolt kaʼach Gavineʼ, ¿jeʼel wa a tuklik chéen kunel u bin muchʼtáambaleʼ? U jaajileʼ maʼ chéen kuneliʼ. Tukult bukaʼaj utsil jeʼel u taasik tiʼ máak le baʼax ku kaʼansik le Bibliaoʼ. Ka tu chʼaʼchiʼitaj u Tʼaaneʼ, Jéeobaeʼ tu yaʼalaj tiʼ u kaajal: «In tʼaanoʼobeʼ bin kʼáaxak jeʼex le serenooʼ, bey tóosaʼ yóokʼol xíiweʼ» (Deu. 31:19, 30; 32:2, Traducción del Nuevo Mundo). Koʼox ilik jujunpʼéel baʼaxoʼob ku beetik le serenooʼ, lelaʼ yaan u yeʼesiktoʼon bix jeʼel k-kʼaʼaytaj tiʼ jeʼel máaxakeʼ (1 Tim. 2:3, 4).
¿TIʼ BAʼAX CHÍIKAʼAN LE KʼAʼAYTAJ TIʼ LE SERENOOʼ?
Le serenooʼ jach fino u kʼáaxal. U gotasil le serenooʼ jujunpʼíitil bix u formar, jach chichantak u mejen gotasiloʼob yéetel maʼ u puul u kʼáaxaliʼ. Le baʼaxoʼob tu yaʼalaj Jéeoba tiʼ u kaajaloʼ jeʼel u páajtal u yaʼalaʼaleʼ bey jeʼex le serenooʼ tumen maʼ u puul yéetel maʼ tu chʼinchʼin aʼalaj tiʼ le kaaj baʼax unaj u beetkoʼ. Baʼaxeʼ ka tʼaanajeʼ tu beetaj yéetel yaabilaj, utsil yéetel tu chʼaʼaj en cuenta bix u tuukuloʼob. Jeʼex Jéeobaeʼ ken kaʼansajnakoʼoneʼ unaj k-chʼaʼik en cuenta bix u tuukul u maasil yéetel maʼ unaj k-obligartik u creertoʼob baʼax k-kaʼansikiʼ, baʼaxeʼ tu juunal unaj u tsʼáaikoʼob cuenta. Beyoʼ yaan u kʼamkoʼob baʼax k-aʼalik yéetel yaan k-kʼuchul tu puksiʼikʼaloʼob.
Le serenooʼ síis óol. Wa k-tuukul tiʼ baʼax uts tu tʼaan u yuʼubik le máakoʼoboʼ jeʼel u páajtal k-aʼalikeʼ le baʼax k-kʼaʼaytikoʼ yaan u síiskuntik u yóoloʼob. Chris, le sukuʼun áant Gavinoʼ, maʼ tu obligartaj xookiʼ, baʼaxeʼ tu beetaj jejeláas baʼaxoʼob utiaʼal u taaktal u xokik le Bibliaoʼ. Tu tsolajtiʼeʼ ichil tuláakal le Bibliaoʼ ku yúuchul tʼaan tiʼ junpʼéeliliʼ baʼal yéetel wa ka u xakʼalxokteʼ yaan u maas naʼatik le baʼaxoʼob ku kaʼansaʼal teʼ muchʼtáambaloʼ. Chris xaneʼ tu yaʼalajtiʼeʼ u xakʼalxoktik le profecíaʼoboʼ le áant u tsʼáa cuenta jach jaaj baʼax ku yaʼalik le Bibliaoʼ. Leloʼ tu beetaj u taaktal u maas kaanbal Gavin. Kex yaʼab u téenel anchaj u tsikbaloʼob yoʼolal lelaʼ, ka máan kʼiineʼ Gavineʼ tu yóotaj ka tsʼaʼabak xook tiʼ yéetel le Bibliaoʼ.
Le serenooʼ jach kʼaʼabéet utiaʼal u yantal kuxtal. Tu luʼumil Israeleʼ ku yantal kaʼach junpʼéel tiempoeʼ jach ku beetik ooxol yéetel ku máan yaʼab meses maʼatech u kʼáaxal jaʼ. Wa maʼ tu yoʼolal le serenooʼ tuláakal le paakʼaloʼob jeʼel u tijloʼob yéetel u kíimloʼobeʼ. Jéeobaeʼ tu yaʼaleʼ teʼ kʼiinoʼobaʼ jach yaan u beetik yáaxkʼiin, lelaʼ u kʼáat u yaʼaleʼ yaan u yantal wiʼijil yéetel ukʼajil tiʼ u yuʼubaʼal u Tʼaan Dios (Amós 8:11). Chéen baʼaleʼ tu yaʼalaj xaneʼ le yéeyaʼanoʼoboʼ yaan u pʼáatloʼob jeʼex le serenooʼ tumen yaan u tsikbaltikoʼob tiʼ yaʼab máakoʼob le baʼax ken u beet le Reinooʼ, tsʼoʼoleʼ yaan u yáantaʼaloʼob tumen le «uláakʼ tamanoʼob[oʼ]» (Miq. 5:7; Juan 10:16). Jeʼel u páajtal k-aʼalikeʼ le jatsʼuts baʼaxoʼob ken u beet le Reino k-kaʼansikoʼ ku tsʼáaik kuxtal tiʼ máaxoʼob uʼuyik. ¿K-ilik wa bey junpʼéel baʼax kʼaʼanaʼan le baʼax k-kʼaʼaytikoʼ?
Le serenooʼ junpʼéel bendición ku taal tiʼ Jéeoba (Deu. 33:13). Le baʼax k-kʼaʼaytikoʼ junpʼéel bendición utiaʼal le máaxoʼob uʼuyikoʼonoʼ. Le baʼax úuch tiʼ Gavinoʼ bey u yeʼesikoʼ tumen le ka tu xokaj le Bibliaoʼ tu kaxtaj u núukil tuláakal le baʼaxoʼob taak u yojéeltikoʼ. Maʼ úuch tiʼ leloʼ okjaʼanaji, bejlaʼeʼ letiʼ yéetel Joyce, u yataneʼ, ku kʼaʼaytikoʼob xan le baʼaxoʼob ken u beet le Reinooʼ.
U j-jaajkunajoʼob Jéeobaeʼ táan u kʼaʼaytikoʼob le Reino tuláakal tuʼuxoʼ
UNAJ K-ILIK JACH KʼAʼANAʼAN LE KʼAʼAYTAJOʼ
K-tuukul tiʼ le jatsʼuts baʼaxoʼob ku beetik le serenooʼ, ku yáantkoʼon k-il le kʼaʼaytaj bey junpʼéel baʼal jach kʼaʼanaʼanoʼ. ¿Baʼaxten? Junpʼéel chan gotaeʼ maʼ tu páajtal u beetik yaʼab baʼaloʼob, pero u millonesil u mejen gotailoʼob le serenooʼ jeʼel u páajtal u chʼulikoʼob le luʼumoʼ. Maʼ xaaneʼ k-tuklikeʼ le baʼax k-beetik teʼ kʼaʼaytajoʼ jach junpʼíit, chéen baʼaleʼ ken k-nup yéetel le bukaʼaj ku beetik tuláakal le máaxoʼob meyajtik Jéeobaoʼ, ku béeytal u kʼuchul le maʼalob péektsil tiʼ «tuláakal kaajoʼob[oʼ]» (Mat. 24:14). Le oʼolaleʼ utiaʼal u yilaʼal tumen le máakoʼob bey junpʼéel bendición ku taal tiʼ Jéeoba le kʼaʼaytajoʼ, ken kaʼa jóokʼkoʼoneʼ unaj k-tʼaan yéetel yaabilaj, k-tuukul tiʼ baʼax uts tu tʼaan le máakoʼoboʼ yéetel k-ilik le kʼaʼaytaj bey junpʼéel baʼal jach kʼaʼanaʼanoʼ.