Bix jeʼel u bin utsil tiʼ le máaxoʼob tsʼokaʼan u beeloʼoboʼ
«Cada juntúul tiʼ teʼexeʼ u yaabilt u yatan jeʼex u yaabiltmilubaeʼ; le atantsil xanoʼ unaj u yeʼesik nojoch tsiikil tiʼ u yíicham.» (EFE. 5:33)
1. Kex kiʼimak u yóol máak ken tsʼoʼokok u beeleʼ, ¿baʼax jeʼel u yúuchleʼ? (Ilawil le foto yaan tu káajbal le xookaʼ.)
TU KʼIINIL le tsʼoʼokol beeloʼ ken u yiluba le noviotsiloʼoboʼ, jach ku sen kiʼimaktal u yóoloʼob. Le táan u biskubaʼoboʼ kʼuch u jach yaabiltubaʼob, le oʼolal taakchaj u tsʼoʼokol u beeloʼob. Lelaʼ le beet u comprometertikubaʼob utiaʼal maʼ u tusik u núupoʼob yéetel yaanal. Chéen pʼel u tsʼoʼokol u beeloʼobeʼ ku káajal junpʼéel túumben kuxtal tiʼob yéetel ku kʼaʼabéettal u kʼexikoʼob yaʼab baʼaloʼob suuk u beetkoʼob kaʼach ichil u kuxtaloʼob, lelaʼ le kun áantkoʼob utiaʼal u bin utsiltiʼob. Jéeoba, le Máax káajs le tsʼoʼokol beeloʼ u kʼáat ka kiʼimakchajak u yóol yéetel ka xiʼik utsil tiʼ le máaxoʼob tsʼokaʼan u beeloʼoboʼ, le oʼolaleʼ tu tsʼáaj maʼalob tsolnuʼukoʼob tiʼob teʼ Bibliaoʼ (Pro. 18:22). Chéen baʼaleʼ le Bibliaoʼ ku yaʼalik xaneʼ yoʼolal le kʼebanoʼ le máaxoʼob ku tsʼoʼokol u beeloʼoboʼ yaan u yantaltiʼob problemaʼob wa «muʼyajiloʼob ichil u kuxtaloʼob» (1 Cor. 7:28). ¿Baʼax jeʼel u páajtal u beetaʼal utiaʼal maʼ u sen antaltiʼob problemaʼobeʼ? ¿Bix jeʼel u bin utsil tiʼ le máaxoʼob tsʼokaʼan u beeloʼob ku meyajtikoʼob Diosoʼ?
2. Le máaxoʼob tsʼokaʼan u beeloʼoboʼ, ¿baʼax clasesil yaabilaj unaj u yeʼeskoʼob?
2 Le Bibliaoʼ ku yaʼalik jach kʼaʼanaʼan u yeʼesaʼal yaabilaj. Chéen baʼaleʼ le máaxoʼob tsʼokaʼan u beeloʼoboʼ u jejeláas clasesil yaabilaj unaj u yeʼeskoʼob. Yáaxeʼ unaj u yeʼeskoʼob le yaabilaj ku yuʼubik máak ken enamorarnakoʼ. Tsʼoʼoleʼ ken yanak u paalaloʼobeʼ unaj u yeʼeskoʼob xan le yaabilaj ku yuʼubik máak tu yoʼolal u láakʼtsiloʼoboʼ. Chéen baʼaleʼ le yaabilaj ken u beet u bin utsil tiʼoboʼ letiʼe nuʼuktaʼan tumen baʼax ku yaʼalik le Bibliaoʼ. Ka tʼaanaj le apóstol Pablo tiʼ le yaabilajaʼ, tu yaʼalaj: «Cada juntúul tiʼ teʼexeʼ u yaabilt u yatan jeʼex u yaabiltmilubaeʼ; le atantsil xanoʼ unaj u yeʼesik nojoch tsiikil tiʼ u yíicham» (Efe. 5:33).
BAʼAX MEYAJ TSʼAʼAN TIʼ CADA JUNTÚUL
3. ¿Bukaʼaj yaabilaj unaj u yantal ichil le máaxoʼob tsʼokaʼan u beeloʼoboʼ?
3 Pabloeʼ tu yaʼalaj: «Íichamtsileʼex, maʼ u xuʼulul a yaabiltikeʼex a wataneʼex jeʼex tu yaabiltaj Cristo le múuchʼuliloʼ yéetel tu kʼububa tu yoʼolal» (Efe. 5:25). Le máaxoʼob meyajtik Diosoʼ ku paklan yaabiltikubaʼob jeʼex tu yaabiltaj Jesús u disipuloʼobeʼ (xok Juan 13:34, 35; 15:12, 13). Le íichamtsiloʼob yéetel le atantsiloʼob ku meyajtikoʼob Diosoʼ unaj u paklan yaabiltik u núupoʼob, le nojoch yaabilaj ku paklan uʼuyikoʼoboʼ jeʼel tak u beetik u tsʼáaik u kuxtaloʼob tu yoʼolal u núupoʼobeʼ. Chéen baʼaleʼ ken yanak nukuch problemaʼob ichiloʼobeʼ, yanoʼobeʼ ku tsʼáaikoʼob cuenta maʼ jach nojoch le yaabilaj ku yuʼubikoʼoboʼ. ¿Baʼax jeʼel u yáantaj ken úuchuk lelaʼ? Letiʼe u yeʼeskoʼob le yaabilaj nuʼuktaʼan tumen baʼax ku yaʼalik le Bibliaoʼ, tumen le yaabilajaʼ «tuláakal baʼal ku muʼyajtik, tuláakal baʼal ku creertik, tuláakal baʼal ku páaʼtik, tuláakal baʼal ku chúukpajal u yóol u muʼyajte». Tsʼoʼoleʼ ‹le yaabilajaʼ mix bikʼin kun xuʼulul› (1 Cor. 13:7, 8). Le máaxoʼob tsʼokaʼan u beeloʼoboʼ unaj u kʼaʼajskoʼobeʼ tu prometertoʼob u paklan yaabiltikubaʼob yéetel maʼ u tusik u núupoʼob yéetel yaanal. U kʼaʼajsikoʼob le promesaaʼ yaan u beetik u kaxtikoʼob u yáantaj Jéeoba yéetel u beetkoʼob le ku páajtal utiaʼal u yutskíintikoʼob le problemaʼob ku yantaltiʼoboʼ.
4, 5. 1) ¿Baʼax meyaj tsʼaʼan u beet le íichamtsiloʼ? 2) Le atantsiloʼ, ¿bix unaj u yilik le meyaj tsʼaʼan u beetoʼ? 3) ¿Baʼax anchaj u beetik juntúul atantsil bey xan u yíicham?
4 Ka tʼaanaj Pablo tiʼ baʼax unaj u beetik le tsʼokaʼan u beeloʼoboʼ, tu yaʼalaj: «Le atantsiloʼoboʼ ka u tsʼáaubaʼob yáanal u páajtalil u yíichamoʼob jeʼex u tsʼáaikubaʼob yáanal u páajtalil Yuumtsileʼ, tumen le íichamtsiloʼ letiʼ u poolil u yatan» (Efe. 5:22,23). Lelaʼ maʼ u kʼáat u yaʼal wa unaj u mixbaʼalkúuntaʼal le atantsiloʼ. Jéeobaeʼ tu yaʼalaj bix u yáantaj juntúul atantsil: «Maʼ maʼalob ka seguernak u pʼáatal le máak chéen tu juunaloʼ. Yaan in beetik u núup, juntúul máax utiaʼal áantik» (Gén. 2:18, Traducción del Nuevo Mundo). Le atantsiloʼ unaj u yáantik u yíicham u nuʼukt tubeel u familia. Le íichamtsiloʼ unaj u yeʼesik yaabilaj jeʼex Jesús, «u poolil le múuchʼuliloʼ». Wa le íichamtsil ku beetik beyaʼ le atantsiloʼ ku yuʼubik kanáantaʼan yéetel maas chéen chʼaʼabil ken u tsʼáauba yáanal u páajtalil u yíicham yéetel yaan u yáantik.
5 Cathy, [1] tsʼokaʼan u beel yéetel Fredeʼ, ku yaʼalik: «Kaʼach maʼ tsʼokaʼan in beeleʼ tin juunal kin chʼaʼtuklik baʼax ken in beete yéetel tin juunal kin kanáantkinba. Pero ka tsʼoʼok in beeleʼ anchaj in kanik in chʼaʼ en cuenta baʼax ku yaʼalik in wíicham. U jaajileʼ maʼ chéen chʼaʼabiliʼ, chéen baʼaleʼ k-beetik tuláakal baʼal jeʼex u yaʼalik Jéeobaeʼ tsʼoʼok u yáantkoʼon k-maas bisikba maʼalob». Fredeʼ ku yaʼalik xan: «Teneʼ deporsi maʼ chéen chʼaʼabil in chʼaʼtuklik baʼax ken in beetiʼ. Ken tsʼoʼokok u beel máakeʼ kʼaʼabéet u chʼaʼik en cuenta baʼax ku tuklik u núup, lelaʼ yaan horaeʼ talam u beetaʼal. Pero cada kʼiin ku máaneʼ maas chéen chʼaʼabil in wilik tumen kin kʼáatik u yáantaj Jéeoba yéetel kin chʼenxikintik baʼax ku yaʼalik in watan. Kin wilik jach maʼalob bix k-paklan áantikba».
6. Le yaabilajoʼ, ¿bix u «nupik» le máaxoʼob tsʼokaʼan u beeloʼob ken yanak problemaʼob tiʼoboʼ?
6 Le máaxoʼob tsʼokaʼan u beeloʼoboʼ jeʼel u bin utsil tiʼob wa ku beetkoʼob le baʼax ku yaʼalik le tekstoaʼ: «Seguernak a muʼyajtikabaʼex ta baatsileʼex yéetel a perdonarkabaʼex ta baatsileʼex». Tumen kʼebanoʼobeʼ u yojloʼob yaan u beetkoʼob baʼaloʼob maʼ jach maʼalobtakiʼ. Chéen baʼaleʼ ken úuchuk lelaʼ ku yilkoʼob u kaanbaloʼob tiʼ le baʼax úuchoʼ, ku paklan perdonarkubaʼob yéetel ku yeʼeskoʼob le yaabilaj nuʼuktaʼan tumen baʼax ku yaʼalik le Bibliaoʼ. Le yaabilaj beyaʼ «ku nupik tubeel tuláakal máak» (Col. 3:13, 14). Le tsʼokaʼan u beeloʼoboʼ ku yeʼeskoʼob u yaabiltmoʼob u núupoʼob ken yanaktiʼob paciencia yéetel ken u tuʼubsoʼob le baʼax maʼ jach tu nuʼuk ku beetik u núupoʼoboʼ (1 Cor. 13:4, 5). Ken yanak wa baʼax problemail tiʼobeʼ unaj u yilkoʼob u séeb utskíintikoʼob (Efe. 4:26, 27). Maʼ chéen chʼaʼabil u yaʼalik máak tiʼ u núup «perdonarten yoʼolal le baʼax tin beetajtechoʼ», tumen utiaʼal u beetik máak lelaʼ kʼaʼabéet valor tiʼ yéetel kabal óolal. Pero lelaʼ ku yáantaj utiaʼal u yutskíintaʼal le problemaʼoboʼ yéetel utiaʼal u biskuba maʼalob le tsʼokaʼan u beeloʼoboʼ.
TRATARTABAʼEX MAʼALOB
7, 8. 1) ¿Baʼax ku yaʼalik le Biblia yoʼolal le relaciones sexuales ichil le máaxoʼob tsʼokaʼan u beeloʼoboʼ? 2) Le tsʼokaʼan u beeloʼoboʼ, ¿baʼaxten unaj u tratarkubaʼob yéetel yaabilaj?
7 Le Bibliaoʼ ku tsʼáaik maʼalob tsolnuʼuk tiʼ le máaxoʼob tsʼokaʼan u beeloʼob utiaʼal ka u yiloʼob le relaciones sexuales jeʼex unajoʼ (xok 1 Corintoiloʼob 7:3-5). Le íichamtsil yéetel le atantsiloʼ unaj u chʼaʼikoʼob en cuenta bix u yuʼubikuba yéetel baʼax kʼaʼabéet tiʼ cada juntúul. Utiaʼal u disfrutartik le atantsil le relaciones sexualesoʼ le íichamtsiloʼ unaj u tratartik yéetel yaabilaj yéetel unaj u kanáantik. Le Bibliaoʼ ku yaʼalikeʼ le íichamtsiloʼ unaj u chʼaʼik en cuenta bix u yuʼubikuba u yatan (1 Ped. 3:7). Le tsʼokaʼan u beeloʼoboʼ maʼ unaj u obligartik u núupoʼob utiaʼal u yantaltiʼob relaciones sexualesiʼ tumen lelaʼ kʼaʼabéet tu kaʼatúulal bey u kʼáatoʼoboʼ. Juntúul xiibeʼ maas séeb u yajal u tsʼíibolal ke juntúul koʼolel, le oʼolaleʼ tu kaʼatúulaloʼob unaj u yilkoʼob baʼax súutukil maas maʼalob utiaʼal u múul antaloʼob yéetel kʼaʼabéet tu kaʼatúulaloʼob de acuerdoʼob.
8 Kex le Biblia maʼ tu yaʼalik jach bix kʼaʼabéet u yajsik u tsʼíibolal le máaxoʼob tsʼokaʼan u beeloʼob utiaʼal u yantal relaciones sexuales tiʼoboʼ, ku tʼaan tiʼ jujunpʼéel bix u yeʼesaʼal yaabilaj (Cant. 1:2; 2:6). Bey túunoʼ tiʼ le baʼaloʼob beyaʼ jach unaj u tratarkubaʼob yéetel yaabilaj.
9. ¿Baʼaxten jach junpuliʼ maʼ unaj u kaxtik u jetsʼik u tsʼíibolal máak yéetel máax maʼ u núupiʼ?
9 Wa k-jach yaabiltmaj Jéeoba yéetel k-éet máakileʼ maʼ ken k-chaʼa tiʼ mix máak bey xan tiʼ mix baʼal ka u beet u xuʼulul k-bisikba maʼalob yéetel k-núup. Yaneʼ ikil u chaʼantikoʼob pornografíaeʼ tsʼoʼok u kʼaskúuntikoʼob bix u biskubaʼob yéetel u núupoʼob. Toʼoneʼ kʼaʼabéet k-chʼaʼtuklik maʼ k-chaʼantik jach junpuliʼ pornografía mix ka k-tus k-núup yéetel yaanal utiaʼal k-jetsʼik k-tsʼíibolaloʼobiʼ. Tsʼoʼoleʼ junpuliʼ maʼ unaj k-beetik mix baʼal utiaʼal k-tsʼáaik naʼatbil táan k-coquetear yéetel yaanal máax tumen lelaʼ ku yeʼesik maʼ k-yaabiltmaj k-núupiʼ. Maʼ unaj u tuʼubultoʼoneʼ Dioseʼ u yojel baʼaxoʼob k-tuklik yéetel baʼaxoʼob k-beetik. K-tuukul tiʼ lelaʼ yaan u yáantkoʼon utiaʼal k-beetik mantatsʼ baʼax uts tu tʼaan yéetel maʼ k-traicionartik k-núup (xok Mateo 5:27, 28; Hebreoʼob 4:13).
KEN YANAK PROBLEMAʼOB
10, 11. 1) Bejlaʼeʼ ¿baʼax ku yúuchul ichil le máaxoʼob tsʼokaʼan u beeloʼoboʼ? 2) ¿Baʼax ku yaʼalik le Biblia tu yoʼolal u pʼatik u núup máakoʼ? 3) ¿Baʼax jeʼel u yáantik le tsʼokaʼan u beeloʼob utiaʼal maʼ u jáan chʼaʼtuklik u pʼatkubaʼoboʼ?
10 Ken pʼáatak maʼ tu yutskíintik u problemaʼob le máaxoʼob tsʼokaʼan u beeloʼoboʼ yanoʼobeʼ ku chʼaʼtuklik u pʼatkubaʼob wa u divorciarkubaʼob. Tiʼ jujunpʼéel luʼumiloʼobeʼ óoliʼ u táanchumukil tiʼ le máaxoʼob ku tsʼoʼokol u beeloʼoboʼ ku divorciarkubaʼob. Chéen baʼaleʼ ichil le máaxoʼob meyajtik Diosoʼ maʼ junpʼéel baʼal suuk u yúuchliʼ. Kex beyoʼ cada kʼiin ku máaneʼ táan u yaʼabtal le sukuʼunoʼob tsʼokaʼan u beeloʼob ku yantal problemaʼob tiʼob yéetel u núupoʼoboʼ.
11 Le Bibliaoʼ ku tsʼáaik le tsolnuʼukaʼ: «Le atantsiloʼ maʼ unaj u pʼatik u yíichamiʼ; baʼaleʼ wa ku pʼatkeʼ, maʼ unaj u kaʼa tsʼoʼokol u beeliʼ, wa maʼeʼ suunak tu yiknal u yíicham; tsʼoʼoleʼ le íichamtsiloʼ maʼ unaj u pʼatik u yataniʼ» (1 Cor. 7:10, 11). Yaan tiʼ le máaxoʼob tsʼokaʼan u beeloʼoboʼ tumen maʼ tu yutskíintikoʼob le problemaʼob ku yantaltiʼoboʼ, ku tuklikoʼobeʼ maas maʼalob ka u pʼatubaʼob. Chéen baʼaleʼ Jesuseʼ tu tsʼáaj naʼatbileʼ lelaʼ maʼ junpʼéel baʼal unaj u jáan chʼaʼtuklaʼaliʼ. Letiʼeʼ tu chʼaʼchiʼitaj le baʼax u yaʼalmiliʼ Dios yoʼolal le máaxoʼob tsʼokaʼan u beeloʼoboʼ, tsʼoʼoleʼ tu yaʼalaj: «Le baʼax tsʼoʼok u nuʼupul tumen Diosoʼ, mix máak unaj u jatsik» (Mat. 19:3-6; Gén. 2:24). Jeʼex k-ilkoʼ Jéeobaeʼ jach junpuliʼ maʼ u kʼáat ka u jatsuba le máaxoʼob tsʼokaʼan u beeloʼoboʼ (1 Cor. 7:39). Unaj k-kʼaʼajsikeʼ tuláakloʼon yaan k-kʼubik cuentas tiʼ Jéeoba yoʼolal baʼaxoʼob k-beetik. K-tuukul tiʼ lelaʼ yaan u yáantik le tsʼokaʼan u beeloʼob utiaʼal u séeb utskíintikoʼob le problemaʼob antes u maas nojochtaloʼoboʼ.
12. ¿Baʼax jeʼel u beetik u tuklik u pʼatkuba le máaxoʼob tsʼokaʼan u beeloʼoboʼ?
12 ¿Baʼaxten ku yantal nukuch problemaʼob tiʼ jujuntúul máaxoʼob tsʼokaʼan u beeloʼob? Tumen yaan horaeʼ jelaʼan bix tu tukliloʼob ken u máans u kuxtaloʼob yéetel u núupoʼob, wa tu tsʼáajoʼob cuentaeʼ u kuxtal le tsʼokaʼan u beeloʼoboʼ maʼ bey jeʼex tu tukloʼoboʼ. Yaan kʼiineʼ le bix líiʼsaʼanil máak wa le bix u modosoʼ ku beetik u yantal problemaʼob. Yaan hora xaneʼ lelaʼ ku yúuchul tumen ku yantal baʼatelil yéetel le láakʼtsiloʼoboʼ, ku yantal problemaʼob yoʼolal bix u xupikoʼob u taakʼinoʼob wa yoʼolal bix u líiʼsik u paalaloʼob. Pero u maas yaʼabil le sukuʼunoʼob yéetel le kiikoʼob tsʼokaʼan u beeloʼoboʼ ku yilik u yutskíintikoʼob u problemaʼob yéetel u nuʼuktaj Jéeoba, le oʼolaleʼ k-felicitarkoʼob.
13. ¿Chéen yoʼolal baʼax jeʼel u páajtal u pʼatkuba le tsʼokaʼan u beeloʼoboʼ?
13 Yaan baʼax oʼolal jeʼel u páajtal u pʼatkuba le máaxoʼob tsʼokaʼan u beeloʼoboʼ. Yaneʼ ku pʼatik u núup tu yoʼolal problemaʼob jach táaj nuuktak jeʼex maʼ u yóotik junpuliʼ u mantenert u paalal, ku sen kíimsaj jatsʼtaʼaloʼob wa ku prohibirtaʼal tiʼob u meyajtikoʼob Dios. [2] Ken úuchuk lelaʼ le máaxoʼob tsʼokaʼan u beeloʼoboʼ unaj u kʼáatkoʼob u yáantaj le ancianoʼoboʼ. Letiʼobeʼ jach yiijchajaʼan u tuukuloʼob le oʼolal jeʼel u páajtal u yáantkoʼob le tsʼokaʼan u beeloʼob utiaʼal ka u tsʼáaʼob ichil u kuxtaloʼob le baʼax ku yaʼalik le Bibliaoʼ. Tsʼoʼoleʼ wa le tsʼokaʼan u beeloʼob ku kʼáatkoʼob u kiliʼich muukʼ Jéeobaeʼ yaan u béeytal u tsʼáaikoʼob ichil u kuxtaloʼob le baʼax ku kaʼansik le Bibliaoʼ yéetel yaan u maas maʼalobtal u modosoʼob (Gal. 5:22, 23).
14. ¿Baʼax ku yaʼalik le Biblia yoʼolal le máaxoʼob maʼ j-Jaajkunaj u núupoʼoboʼ?
14 Le Bibliaoʼ ku yeʼesikeʼ kex wa u núup máak maʼ j-Jaajkunajeʼ maʼalob ka u yil maʼ u pʼatik (xok 1 Corintoiloʼob 7:12-14). Le íichamtsil wa atantsil maʼ j-Jaajkunajoʼ ‹kiliʼichkúuntaʼan› tumen tsʼokaʼan u beel yéetel juntúul máax meyajtik Jéeoba. Tsʼoʼoleʼ u paalaloʼob xaneʼ «kiliʼichoʼob» yéetel ku kanáantaʼaloʼob tumen Dios. Pabloeʼ tu yaʼalaj tiʼ le sukuʼunoʼob úuchjeakiloʼ: «Atantsil, ¿bix a wojéeltik wa maʼ ken a salvart a wíicham? Wa, íichamtsil, ¿bix a wojéeltik wa maʼ ken a salvart a watan?» (1 Cor. 7:16). Yaʼab sukuʼunoʼob yéetel kiikoʼobeʼ tsʼoʼok u yáantkoʼob u núupoʼob utiaʼal ka u beetubaʼob u j-jaajkunajoʼob Jéeoba.
15, 16. 1) ¿Baʼax ku yaʼalik le Biblia tiʼ le atantsiloʼob maʼ j-jaajkunaj u yíichamoʼoboʼ? 2) ¿Baʼax unaj u beetik juntúul máax meyajtik Jéeoba wa taak u pʼaʼatal tumen u núup?
15 Le apóstol Pedrooʼ tu yaʼaleʼ le atantsiloʼob j-Jaajkunajoʼoboʼ unaj u tsʼáaikubaʼob yáanal u páajtalil u yíichamoʼob. ¿Baʼaxten? Letiʼeʼ tu yaʼalaj: «Utiaʼal beyoʼ wa yaan tiʼ letiʼob maʼ tu tsʼoʼokbeskoʼob u tʼaan Dioseʼ, ka káajak u tsʼoʼokbeskoʼob tu yoʼolal bix a kuxtaleʼex kex maʼ a waʼalikeʼex mix baʼal, tumen yaan u yilkoʼob minaʼan a siʼipileʼex yéetel nojoch le tsiikil ka weʼeskeʼexoʼ» (1 Ped. 3:1-4). Juntúul atantsil mantatsʼ u kʼáat u yoks tu pool u yíicham le baʼax ku creertikoʼ maas maʼ kun béeytal u kʼexik u tuukul u yíicham. Tu lugar u beetik lelaʼ letiʼeʼ unaj u yeʼesik kabal óolal yéetel jeetsʼel óolal tumen «lelaʼ letiʼe baʼax jach koʼoj u tojol tu táan Diosoʼ» (1 Ped. 3:1-4).
16 ¿Kux túun wa le máax maʼ j-Jaajkunaj ku chʼaʼtuklik u pʼatik u núupoʼ? Le Bibliaoʼ ku yaʼalik: «Wa le máax maʼatech u meyajtik Dios ku chʼaʼtuklik u pʼatik u núupeʼ, u pʼate; tiʼ le sukuʼun wa tiʼ le kiikoʼ maʼ tu yaʼalaʼal wa kʼaʼabéet u pʼáatal kajtal yéetel le u núupoʼ. Dioseʼ tsʼoʼok u tʼankeʼex utiaʼal ka kuxlakeʼex ich jeetsʼelil» (1 Cor. 7:15). Maʼ xaaneʼ wa ku pʼatkubaʼobeʼ jeʼel u yantal jeetsʼelil ichiloʼobeʼ, chéen baʼaleʼ le tekstoaʼ maʼ táan u yaʼalik wa ka u pʼatubaʼobeʼ jeʼel u béeytal u kaʼa tsʼoʼokol u beel le máax j-Jaajkunajoʼ. Baʼaxeʼ u kʼáat u yaʼaleʼ maʼ unaj u obligartik u núup utiaʼal u pʼáatal yéeteliʼ. Ken máanak tiempoeʼ maʼ xaaneʼ le u núup binoʼ jeʼel u kaʼa suut tu yéeteleʼ. Tsʼoʼoleʼ maʼ xaaneʼ jeʼel tak u kʼuchul u kʼiinil u meyajtik Jéeobaeʼ.
BAʼAX MAAS KʼAʼANAʼAN ICHIL LE TSʼOʼOKOL BEELOʼ
Le tsʼokaʼan u beeloʼoboʼ wa ku tsʼáaikoʼob táanil u meyajtikoʼob Jéeobaeʼ, jeʼel u maas antal kiʼimak óolal tiʼobeʼ (Ilawil xóotʼol 17)
17. ¿Baʼax unaj u tsʼáaik táanil ichil u kuxtaloʼob le tsʼokaʼan u beeloʼoboʼ?
17 Le Bibliaoʼ ku yaʼalikeʼ «tu tsʼook kʼiinoʼobeʼ yaan u yilaʼal yaayaj kʼiinoʼob yéetel istikyaj ken u máansil u kuxtal máak» (2 Tim. 3:1-5). Yoʼolal lelaʼ toʼoneʼ jach kʼaʼabéet k-ilik k-maas natsʼikba tiʼ Jéeoba. Apóstol Pabloeʼ tu yaʼalaj: «Jach chéen junpʼíit kʼiin pʼaatal. Desde bejlaʼeʼ le máaxoʼob yaan u yatanoʼoboʼ, u beetoʼob bey minaʼan u yatanoʼobeʼ, [...] le máaxoʼob xan ku meyajtiʼob le yóokʼol kaabaʼ u beetubaʼob jeʼex le máaxoʼob maʼatech u meyajtiʼob tu chúukaʼaniloʼ» (1 Cor. 7:29-31). Le baʼax tu yaʼalaj Pabloaʼ maʼ u kʼáat u yaʼal wa le máaxoʼob tsʼokaʼan u beeloʼoboʼ maʼ ken u tsʼáaʼob baʼax kʼaʼabéet tiʼ u núupoʼob. Baʼaxeʼ u kʼáat u yaʼaleʼ tumen kuxaʼanoʼon tu tsʼook kʼiinoʼobeʼ kʼaʼabéet u tsʼáaikoʼob táanil u meyajtikoʼob Jéeoba (Mat. 6:33).
18. ¿Bix jeʼel u páajtal u yantal kiʼimak óolal yéetel u bin utsil tiʼ le máaxoʼob tsʼokaʼan u beeloʼoboʼ?
18 Teʼ kʼiinoʼob talamtakaʼ k-ilkeʼ maʼatech u bin utsil tiʼ yaʼab tiʼ le máaxoʼob tsʼokaʼan u beeloʼoboʼ. Le oʼolaleʼ, ¿jeʼel wa u páajtal u yantal kiʼimak óolal yéetel u bin utsil tiʼ le máaxoʼob tsʼokaʼan u beeloʼoboʼ? Jeʼeleʼ. Chéen baʼaleʼ utiaʼal lelaʼ unaj k-maas natsʼikba tiʼ Jéeoba yéetel tiʼ u kaajal, k-beetik le baʼax ku yaʼalik le Bibliaoʼ yéetel k-chaʼik u nuʼuktikoʼon u kiliʼich muukʼ Jéeoba. Wa k-beetik lelaʼ, mix bikʼin ken k-jats «le baʼax tsʼoʼok u nuʼupul tumen Diosoʼ» (Mar. 10:9).
