JEʼEL u páajtal u yaʼalaʼaleʼ le máaxoʼob ku xakʼalxoktikoʼob le Biblia yéetel u tuukulil u kankoʼob túumben baʼaloʼoboʼ beyoʼob jeʼex le máaxoʼob ku máan u kaxtoʼob orooʼ. Letiʼobeʼ jach ku tsʼáaik u yóol u kaxtoʼob le naʼat ku taal tiʼ Dios yaan teʼ Bibliaoʼ. Koʼox ilik óoxpʼéel baʼaloʼob ku meyaj utiaʼal u kaxtaʼal le orooʼ yéetel yaan k-ilik baʼaxten chíikaʼan tiʼ le bix k-xakʼalxoktik le Bibliaoʼ.

Tukleʼ táan a xíimbal tu jáal junpʼéel ríoeʼ, chéen ken a wileʼ táan u léembal junpʼéel chan tuunich yoʼolal u juul le kʼiinoʼ. Teech túuneʼ ka chintal a chʼaʼeʼ yéetel ku sen kiʼimaktal a wóol ken a wil tsʼoʼok a kaxtik junpʼéel chan tuunich de oro. Le chan tuunichaʼ maas chichan tiʼ u punta junpʼéel fósforo, chéen baʼaleʼ maas koʼoj tiʼ junpʼéel diamante jach jatsʼuts. Como tsʼoʼok a kaxtik junpʼéeleʼ ku seguer a wilik wa minaʼan uláakʼ naatsʼ teʼ tuʼux ta kaxtoʼ.

Jeʼex úuchik a kaxtik le orooʼ, maʼ xaaneʼ techeʼ xíimbaltaʼabech tumen juntúul j-Jaajkunaj ka tu tsikbaltajtech le jatsʼuts esperanza ku yaʼalik le Biblia kun antaloʼ. Maʼ xaaneʼ kʼajaʼantech le ka ta kaxtaj le yáax «tuunich de oro» wa le ka ta kanaj le yáax baʼal jach jatsʼuts ta wuʼuyil teʼ Bibliaoʼ. Maʼ xaaneʼ ta wojéeltaj bix u kʼaabaʼ Dios yéetel bix jeʼel a amigotikeʼ (Sal. 83:18, Traducción del Nuevo Mundo; Sant. 2:23). Techeʼ ta tsʼáaj cuentaeʼ tsʼoʼok a kaxtik junpʼéel baʼal maas koʼoj tiʼ le orooʼ, le oʼolaleʼ taakchaj a maas kaanbal.

Yaan kʼiineʼ tiʼ jujunpʼéel ríoʼobeʼ ku yantal u xiixel oro ichil u luukʼil le jaʼoʼ. Yaan horaeʼ chéen ichil junpʼéel temporadaeʼ le máaxoʼob ku kaxtikoʼob orooʼ jeʼel u páajtal u jóoʼskoʼob wa jaypʼéel u kilosil u xiixel oroeʼ, lelaʼ u milesil dólares ku tojoltik.

Le ka káaj a xokik le Biblia yéetel u j-jaajkunajoʼob Jéeobaoʼ maʼ xaaneʼ ta wuʼuyaba jeʼex le máak ku kaxan oro ku sen chalik le arena utiaʼal u yilik wa yaan oro ichiloʼ. Junpʼéel baʼax áantech a maas kaanbal yéetel a natsʼkaba tiʼ Dioseʼ letiʼe a tuukul tiʼ le tekstoʼob ka xokikoʼ. Jeʼex úuchik u bin a maas naʼatik le baʼaxoʼob ka xokikoʼ bey úuchik a maas natsʼkaba tiʼ Jéeobaoʼ, a wuʼuyik bix u yaabiltmilech yéetel u yantaltech esperanza utiaʼal a kuxtal minaʼan u xuul (Sant. 4:8; Jud. 20, 21).

Jeʼex juntúul máak ku tsʼáaik u yóol u kaxt le oro tiʼ junpʼéel ríooʼ, maʼ xaaneʼ techeʼ tsʼoʼok a tsʼáaik a  wóol a maas naʼat le jatsʼuts baʼaxoʼob ku kaʼansik le Bibliaoʼ. Maʼ xaan xaneʼ lelaʼ letiʼe baʼax áantech a kan le baʼaxoʼob maas kʼaʼanaʼantak yaan teʼ Bibliaoʼ yéetel a tsʼáaik a wóol a beet le baʼaxoʼob kʼaʼabéet utiaʼal a kʼubik a kuxtal tiʼ Dios yéetel a wokjaʼoʼ (Mat. 28:19, 20).

Jujuntúul máakoʼobeʼ tsʼoʼok u kaxtikoʼob oro ichil jujunpʼéel tuunichoʼob ku taaloʼob tiʼ le volcanoʼoboʼ (rocas ígneas). Ichil le tuunichoʼobaʼ yaʼab oro yaniʼ, le oʼolal le máakoʼoboʼ ku juchʼkoʼob utiaʼal u jóoʼskoʼob. Maʼ xaaneʼ tu káajbaleʼ hasta maʼ chíikaʼan wa yaan oro ichiliʼ. ¿Baʼaxten? Tumen yaan horaeʼ ichil junpʼéel tonelada tuunich ku juʼuchʼleʼ chéen 10 gramos oro yaniʼ. Kex beyoʼ utiaʼal le máax kaxtikoʼ jach ku valer u penail.

Utiaʼal maʼ u kanik máak chéen «le yáax baʼaloʼob yaan yil yéetel Cristooʼ» unaj u tsʼáaik u yóol maas kaanbal (Heb. 6:1, 2). Ken k-xok le Bibliaoʼ unaj k-ilik k-kaxtik baʼaloʼob túumbentak yéetel k-ilik bix jeʼel u páajtal u meyajtoʼon ichil k-kuxtaleʼ. ¿Baʼax jeʼel u yáantkech a maas jóoʼs u yutsil le Biblia kex úuch joʼopʼok a xokikoʼ?

Seguernak a tsʼáaik a wóol kaanbal yéetel tuukulnen tiʼ baʼax jeʼel a kanik tiʼ uláakʼ tʼaan yaan tiʼ junpʼéel tekstoeʼ. Wa ka beetik beyaʼ yaan a kanik tuukul jeʼex Jéeobaeʼ yéetel yaan u nuʼuktikech ichil a kuxtal (Rom. 11:33). Ilawil xan u meyajtech tuláakal baʼax u tsʼaamaj u kaajal Jéeoba ichil a idioma utiaʼal a maas kaanbal tiʼ le Bibliaoʼ. Kaxt le nuʼuktaj kʼaʼabéet tiʼ techoʼ yéetel le baʼaxoʼob taak a wojéeltikoʼ. Kʼáat tiʼ u maasil baʼax teksto yéetel baʼax revista tsʼoʼok u yáantkoʼob yéetel tsʼoʼok u líiʼsik u yóoloʼob. Tsikbalttiʼob xan le túumben baʼaloʼob tsʼoʼok a kanik ikil a xakʼalxookoʼ.

Toʼoneʼ maʼ k-kʼáat xakʼalxook chéen utiaʼal k-kanik yaʼab baʼaloʼobiʼ. Le apóstol Pablooʼ tu yaʼaleʼ u yojéeltik máak yaʼab baʼaloʼobeʼ jeʼel u beetik u nojbaʼalkúuntkubaeʼ (1 Cor. 8:1). Le oʼolaleʼ eʼes kabal óolal yéetel ilawil u muʼukʼaʼantal xan a fe. Le adoración ich familia bey xan a xakʼalxoktik le Bibliaoʼ yaan u yáantkech kuxtal jeʼex u kʼáat Jéeobaeʼ yéetel yaan u péeksikech a wáant u maasil. U maas maʼalobileʼ yaan u maas kiʼimaktal a wóol tumen yaan a kaxtik junpʼéel baʼal maas koʼoj tiʼ le orooʼ (Pro. 3:13, 14).