¿Ta xokaj wa u tsʼook revistailoʼob U Pʼíich Tulumil Kanan? Wa beyoʼ, ilawil wa jeʼel a núukik le kʼáatchiʼobaʼ:

¿Tiʼ baʼax kʼebaniloʼob ku tʼaan Jesús ka tu tsʼáaj le tsolnuʼuk yaan Mateo 18:15 tak 17?

Tiʼ problemaʼob ku yantal ich kaʼatúul máaxoʼob meyajtik Dios yéetel maases unaj u yilik u yutskíintikoʼob chéen letiʼob, chéen baʼaleʼ wa le máax kʼebanchaj maʼ tu arrepentiroʼ unaj u jóoʼsaʼal teʼ múuchʼuliloʼ. Ichil le kʼebanoʼoboʼ táakaʼan u yúuchul tuus utiaʼal u beetaʼal baʼax maʼ unajiʼ yéetel u yaʼalaʼal baʼax maʼ jaaj tu contra uláakʼ máakiʼ (w16.05, táan juʼun 7).

¿Bix jeʼel k-jóoʼsik u yutsil u xookil le Bibliaoʼ?

Unaj k-beetik yéetel u tuukulil k-kanik túumben baʼaloʼob, k-kʼaʼajsik de ke yaʼab baʼax jeʼel u páajtal k-kanik tiʼ junpʼéel chan jaatseʼ. Ken k-xookeʼ unaj xan k-tuukul tiʼ jujunpʼéel kʼáatchiʼob jeʼex: «¿Bix jeʼel u meyajten utiaʼal in wáantik uláakʼ máakoʼobeʼ?», yéetel unaj k-ilik u meyajtoʼon le publicacionoʼob utiaʼal k-maas naʼatik le baʼax k-xokikoʼ (w16.05, táan juʼun 24 tak 26).

¿Kʼaas wa ka okʼolnak juntúul cristiano ken kíimik máax u yaabiltmaj kex u yojel yaan u kaʼa kuxkíintaʼal?

U creertik máak yaan u kaʼa kuxkíintaʼal le kimenoʼoboʼ maʼ tu beetik u xuʼulul u yaatal u yóol máak ken kíimik máax u yaabiltmaj. Abrahaneʼ okʼolnaj ka kíim Sara, u yatan (Gén. 23:2). Ken máanak kʼiineʼ ku xuʼulul u sen muʼyaj máak (wp16.3, táan juʼun 4).

Tiʼ le baʼax tsʼaʼab u yil Ezequieloʼ, ¿máax ku chíikbesik le máak u chʼaʼamaj u nuʼukulil tsʼíiboʼ bey xan le uláakʼ seis máakoʼob u machmoʼob u nuʼukulil xuʼulsajoʼ?

Ku chíikbesik le angeloʼob táakpajoʼob le ka xuʼulsaʼab Jerusalenoʼ. Letiʼob xan kun táakpajloʼob ken xuʼulsaʼak tiʼ u kʼasaʼan yóokʼol kaab Satanás teʼ Armagedonoʼ. Teʼ kʼiinoʼobaʼ le máak u chʼaʼamaj u nuʼukulil tsʼíiboʼ ku chíikbesik Jesucristo, le máax kun tsʼáaik le marca tiʼ le máaxoʼob ken u salvartubaʼoboʼ (w16.06, táan juʼun 16 yéetel 17).

¿Baʼaxoʼob tsʼoʼok u yúuchul tiʼ le Bibliaoʼ?

Yáaxeʼ kex kʼaschaj le papiro yéetel le pergamino tuʼux tsʼíibtaʼaboʼ yéetel kex óotaʼab xuʼulsbileʼ tak bejlaʼa tsʼakaʼaneʼ. U kaʼapʼéeleʼ yaʼab politicoʼob yéetel religiosoʼobeʼ tu tsʼáajubaʼob tu contra baʼax ku yaʼalik. U yóoxpʼéeleʼ óotaʼab kʼexbil baʼax ku yaʼalik (wp16.4, táan juʼun 4 tak 7).

¿Bix jeʼel u kuxtal juntúul cristiano chéen yéetel baʼaxoʼob kʼaʼabéettiʼeʼ?

Unaj u tukultik baʼaxoʼob kʼaʼabéettiʼ yéetel maʼ u manik baʼaloʼob maʼ kʼaʼabéettiʼiʼ, cada mes wa cada semanaeʼ unaj u yilik baʼax kʼaʼabéet u manik yéetel bukaʼaj jeʼel u páajtal u xupkeʼ, le baʼaxoʼob maʼ kun kʼaʼabéettaltiʼoʼ unaj u konik, u síik wa u pulik, yéetel unaj u boʼotik u pʼaaxoʼob chéen pʼel u yantaltiʼ u tojol, bey xan u tukultik baʼax jeʼel u beetik utiaʼal maʼ u sen máansik tiempo táan u meyajeʼ yéetel u yilik bix jeʼel u maas meyajtik Jéeobaeʼ (w16.07, táan juʼun 10).

¿Baʼax ku yaʼalik le Biblia maas koʼoj tiʼ le oro yéetel tiʼ le plataoʼ?

Job 28:12 yéetel 15, ku yaʼalikeʼ le naʼat ku taal tiʼ Diosoʼ maʼ tu páajtal u keʼetel yéetel oro mix plata. Utiaʼal k-kaxtikeʼ unaj u seguer k-eʼesik kabal óolal yéetel k-ilik u muʼukʼaʼantal xan k-fe (w16.08, táan juʼun 18 yéetel 19).

Le sukuʼunoʼoboʼ, ¿maʼalob wa ka u chaʼob u nuuktal u meʼexoʼob tu pʼuʼukoʼob wa tak tu noʼochoʼob?

Yaan tiʼ luʼumiloʼobeʼ maʼ kʼaas u yilaʼal u chaʼik u nuuktal u meʼex tu pʼuʼuk wa tak tu noʼoch le sukuʼunoʼoboʼ. Chéen baʼaleʼ ku yilik u arreglarkoʼob yéetel u kʼosikoʼob tubeel. Tsʼoʼoleʼ lelaʼ maʼ tu beetik u yúuchul tʼaan kʼaas tiʼ le baʼax ku kaʼanskoʼoboʼ. Chéen baʼaleʼ yanoʼobeʼ ku chʼaʼtuklik u luʼskoʼob (1 Cor. 8:9). Tiʼ uláakʼ luʼumiloʼobeʼ maʼ maʼalob u yilaʼal ka u chaʼa u nuuktal u meʼex tu pʼuʼuk wa tak tu noʼoch juntúul j-Jaajkunajiʼ (w16.09, táan juʼun 21).

¿Jach wa tu jaajil anchaj David yéetel Goliat?

Goliateʼ 20 centímetros u maas kaʼanlil tiʼ le máax maas kaʼanal anchajaʼan teʼ kʼiinoʼobaʼ. Davideʼ tu jaajil kuxlaji, le arqueologoʼoboʼ tu kaxtoʼob junpʼéel úuchben tsʼíib ku tʼaan tiʼ «u yotoch David». Tak Jesucristo tu tsʼáaj naʼatbil anchaj David. Le lugaroʼob ku chʼaʼchiʼitaʼaloʼoboʼ jach tu jaajil anchajoʼob (wp16.5, táan juʼun 13).

¿Baʼax u kʼáat u yaʼal le kʼaj óolaloʼ, le ojéelajoʼ yéetel le naʼatoʼ?

Le kʼaj óolaloʼ letiʼe u kʼaj óoltik wa u kanik máak yaʼab baʼaloʼ. Le ojéelajoʼ letiʼe u yojéeltik máak baʼax jelaʼankúuntik cada baʼal tiʼ uláakʼoʼ. Chéen baʼaleʼ máax yaan u naʼateʼ jeʼel u páajtal u meyajtiʼ u kʼaj óolal yéetel u ojéelaj utiaʼal u beetik baʼaloʼob jeʼel u taasik utsil tiʼeʼ (w16.10, táan juʼun 18).