1. ¿Baʼax utsiloʼob ken k-kʼam yoʼolal u kuxtal Jesús tu kʼuboʼ?

CADA año ken k-kʼiimbes úuchik u kíimil Cristoeʼ k-kʼaʼajsik yaan u kʼuchul u kʼiinil u kʼamkoʼon Dios bey u paalaloʼoneʼ. Tsʼoʼoleʼ yaan xan k-kuxtal ich kiʼimak óolal utiaʼal mantatsʼ. Chéen baʼaleʼ yoʼolal u kuxtal Jesús tu kʼuboʼ yaʼab uláakʼ baʼaloʼob kun béeytal u beetik le máaxoʼob kun binoʼob kaʼanoʼ bey xan le kun pʼáatloʼob kuxtal way Luʼumoʼ (Heb. 1:8, 9).

2. 1) ¿Máakalmáak le baʼaloʼob jach kʼaʼanaʼantak teʼ kaʼan bey xan way Luʼum tu táakbesaj Jesús ichil u oracionoʼ? (Ilawil le dibujo yaan tu káajbal le xookaʼ.) 2) ¿Baʼax kun ilbil teʼ xookaʼ?

² Dos años u bin u kíimil Jesuseʼ tu kaʼansaj tiʼ u disipuloʼob ka orarnakoʼob beyaʼ: «K-Taata yanech teʼ kaʼanoʼ, kiliʼichkúuntaʼak a kʼaabaʼ. Taalak a Reino, beetaʼak baʼax a kʼáat teʼ kaʼanoʼ bey xan way Luʼumeʼ» (Mat 6:9, 10). Teʼ xookaʼ yaan k-ilik baʼax yaan u yil u kuxtal Jesús yéetel u kiliʼichkúuntaʼal u kʼaabaʼ Jéeoba, u Reino Dios yéetel bix kun áantaj utiaʼal u béeytal baʼax u tukultmaj Dios.

3. 1) ¿Baʼax ku chíikbesik u kʼaabaʼ Jéeoba? 2) ¿Bix pʼaʼatik kʼaasil u kʼaabaʼ Jéeoba tumen Satanás?

³ Ka orarnaj Jesuseʼ yáax baʼax tu yaʼaleʼ ka kiliʼichkúuntaʼak u kʼaabaʼ Jéeoba. U kʼaabaʼ Jéeobaeʼ ku chíikbesik jach Máax letiʼ yéetel bix u modos. Mix máak uláakʼ yaan u poder jeʼex letiʼeʼ yéetel chéen letiʼ beetik baʼax toj. Tak Jesuseʼ suuk u yaʼaliktiʼ «Kiliʼich Yuum» (Juan 17:11). Jéeobaeʼ kiliʼich le oʼolal tuláakal baʼax ku beetkeʼ toj, yéetel maʼalobtak le leyoʼob u tsʼaamoʼ. Chéen baʼaxeʼ tu jardinil Edeneʼ, Satanaseʼ tu tsʼáaj naʼatbil minaʼan u derechoil tiʼ Jéeoba u tsʼáaik leyoʼob utiaʼal u nuʼuktik u kuxtal wíinik. Satanaseʼ tuusnaji, tu pʼataj kʼaasil u kʼaabaʼ Jéeoba yéetel tu tsʼáaj naʼatbileʼ maʼ maʼalob baʼax ku beetkiʼ (Gén. 3:1-5).

4. ¿Bix úuchik u kiliʼichkúuntaʼal u kʼaabaʼ Jéeoba tumen Jesús?

⁴ Jesuseʼ jach u yaabiltmaj u kʼaabaʼ Jéeoba, le beetik mantatsʼ tu yilaj u kiliʼichkúuntik (Juan 17:25, 26). ¿Bix tu beetil? Tu yoʼolal bix kuxlajik yéetel baʼax tu kaʼansaj. Jesuseʼ tu yeʼeseʼ Jéeobaeʼ yaan u derechoil u tsʼáaik leyoʼob yéetel tuláakal baʼax ku yaʼalik ka k-beeteʼ utiaʼal k-utsil (xok Salmo 40:8-10). Kex beetaʼab u sen muʼyaj Jesús tumen Satanás yéetel jach yaj bix kíimikeʼ, chúukpaj u yóol. Tu yeʼeseʼ juntúul máax minaʼan u kʼebaneʼ jeʼel u páajtal u beetik tuláakal baʼax ku yaʼalik Jéeobaeʼ.

5. ¿Bix jeʼel k-kiliʼichkúuntik u kʼaabaʼ Jéeobaeʼ?

⁵ ¿Kux túun toʼon? ¿Bix jeʼel k-eʼesik k-yaabiltmaj u kʼaabaʼ Jéeobaeʼ? Tu yoʼolal bix k-kuxtal. Jéeobaeʼ u kʼáat ka kiliʼichchajkoʼon (xok 1 Pedro 1:15, 16). U kʼáat u yaʼaleʼ kʼaʼabéet k-adorartik chéen letiʼ bey xan k-uʼuyik u tʼaan yéetel tuláakal k-puksiʼikʼal. Kex wa k-chʼaʼpachtaʼaleʼ unaj k-ilik k-beetik tuláakal le ku páajtal utiaʼal k-uʼuyik u tʼaan Jéeoba (Mat. 5:14-16). Ken k-beet beyoʼ k-eʼesik jach maʼalobtak u leyoʼob Jéeoba, yéetel Satanaseʼ chéen táan u tuus. Tuláakloʼon j-kʼebanoʼon, le oʼolal yaan kʼiineʼ k-beetik baʼax maʼ maʼalobiʼ. Wa ku yúuchultoʼon lelaʼ unaj k-arrepentir yéetel unaj k-kanáantik maʼ k-kaʼa lúubul tiʼ baʼax kʼaas, beyoʼ maʼ ken k-pʼat kʼaasil u kʼaabaʼ Jéeoba (Sal. 79:9).

6. ¿Baʼaxten Jéeobaeʼ ku yilik toj k-kuxtal kex j-kʼebanoʼon?

⁶ Kex yéeyaʼanoʼon wa «uláakʼ tamanoʼo[neʼ]» wa k-tsʼáaik k-fe tiʼ u kuxtal Jesús tu kʼuboʼ Jéeobaeʼ ku perdonartikoʼon. Tsʼoʼoleʼ ku kʼamik ichil u familia tuláakal máax ku kʼubik u kuxtal tiʼ. Letiʼeʼ ku yilik toj u kuxtal le yéeyaʼanoʼoboʼ yéetel ku kʼamkoʼob bey u paalaloʼobeʼ, le «uláakʼ tamanoʼob» xanoʼ ku yilik toj baʼax ku beetkoʼob yéetel ku kʼamkoʼob bey u amigoʼobeʼ (Juan 10:16; Rom. 5:1, 2; Sant. 2:21-25). Bey túunoʼ yoʼolal u kuxtal Jesús tu kʼuboʼ tak teʼ kʼiinoʼobaʼ jeʼel u páajtal k-bisikba maʼalob yéetel Jéeobaeʼ bey xan k-kiliʼichkúuntik u kʼaabaʼ.

7. ¿Baʼax utsiloʼob ken u taas u kuxtal Jesús tu kʼuboʼ?

⁷ Tu oracionil le Padrenuestrooʼ, Jesuseʼ tu yaʼalaj: «Taalak a Reino». ¿Baʼax yaan u yil u kuxtal Jesús tu kʼubaj yéetel u Reino Diosoʼ? Ichil u Reino Dioseʼ táakaʼan Jesús yéetel le 144,000 máakoʼob yéeyaʼanoʼob tiʼ le yóokʼol kaabaʼ. Yoʼolal u kuxtal Jesús tu kʼuboʼ le yéeyaʼanoʼoboʼ yaan u béeytal u binoʼob kaʼan (Apo. 5:9, 10; 14:1). Letiʼobeʼ yaan u beetik u reyiloʼob, u sacerdoteiloʼob yéetel  junmúuchʼ yéetel Jesuseʼ mil años ken u gobernartoʼob le yóokʼol kaabaʼ. Ichil le bukaʼaj tiempooʼ tiʼ Jéeobaeʼ yaan u meyaj u Reino utiaʼal u sutik Paraísoil le Luʼumaʼ yéetel yaan u pʼáatal minaʼan u kʼeban máak. Le máaxoʼob túun kun binoʼob kaʼan yéetel le kun pʼáatloʼob way Luʼumoʼ yaan u suutoʼob junpʼéeliliʼ familia (Apo. 5:13; 20:6). Jesuseʼ yaan u xuʼulsik Satanás bey xan tuláakal le baʼaloʼob kʼaastak tu beetaj u yantaloʼ (Gén. 3:15).

8. 1) ¿Bix tu yáantil Jesús u naʼat u disipuloʼob jach kʼaʼanaʼan u Reino Dios? 2) ¿Bix k-eʼesik k-kʼáat antal yáanal u Reino Dios?

⁸ Jesuseʼ tu yáantaj u disipuloʼob u naʼatoʼob jach kʼaʼanaʼan u Reino Dios. ¿Bix úuchik u beetik? Jach chéen pʼelak tsʼoʼokik u yokjaʼeʼ tu káajsaj u kʼaʼaytik «u maʼalob péektsilil u Reino Dios» (Luc. 4:43). Tu yaʼalaj xan tiʼ u disipuloʼob ka kʼaʼaytajnakoʼob «tak tu maas náachil le Luʼumaʼ» (Bax. 1:6-8). Tu yoʼolal lelaʼ bejlaʼeʼ yaʼab máak jeʼel u yojéeltik baʼax utsiloʼob ku taasik u kuxtal Jesús tu kʼuboʼ yéetel jeʼel u yantaloʼob yáanal u Reino Dioseʼ. Toʼoneʼ k-eʼesik k-kʼáat antal yáanal le Reino ken k-áant le yéeyaʼanoʼob u tsikbaltoʼob u tʼaan Dios tuláakal yóokʼol kaaboʼ (Mat. 24:14; 25:40).

9. ¿Baʼaxten k-creertik yaan u béeykuntik Jéeoba baʼax u kʼáat utiaʼal wíinik?

⁹ «Beetaʼak baʼax a kʼáat.» ¿Baʼax tu yóotaj u yaʼal Jesús yéetel lelaʼ? U kʼáat u yaʼaleʼ Jéeobaeʼ jach tu jaajil ku béeykuntik baʼax ku yaʼalik (Isa. 55:11). Jéeobaeʼ yaan u béeykuntik ‹baʼax u kʼáat› kex tu tsʼáajuba Satanás tu contra. ¿‹Baʼax u kʼáat› Jéeoba utiaʼal le Luʼumaʼ? Desde tu káajbaleʼ u kʼáat ka chuʼupuk kaʼach tumen u paalal Adán yéetel Eva minaʼan u kʼebanoʼoboʼ (Gén. 1:28). Wa maʼ u yantal kaʼach u paalaloʼobeʼ bejlaʼa maʼ tun chuʼupul le Luʼumaʼ, mix tun béeytal baʼax u kʼáat Dios. Chéen baʼaleʼ Jéeobaeʼ tu chaʼaj u yantal u paalaloʼob. Wa ku tsʼáaik u fejoʼob tiʼ u kuxtal Jesús tu kʼuboʼ yaan u pʼáatal minaʼan u kʼebanoʼob yéetel yaan u kuxtaloʼob utiaʼal mantatsʼ. Jéeobaeʼ u yaabiltmaj wíinik yéetel u kʼáat ka yanaktiʼob le jatsʼuts kuxtal u yaʼalmoʼ.

10. ¿Baʼax utsil ken u taas tiʼ le kimenoʼob u kuxtal Jesús tu kʼuboʼ?

¹⁰ ¿Kux túun le máakoʼob kíimoʼob jach junpuliʼ maʼ tu yuʼuboʼob mix baʼal tu yoʼolal Jéeobaoʼ? Jéeobaeʼ u yaabiltmoʼob, le oʼolal yaan u kaʼa kuxkíintikoʼob. Lelaʼ chéen jeʼel u béeytal tu yoʼolal u kuxtal Jesús tu kʼuboʼ. Le ken kaʼa kuxlakoʼobeʼ yaan u béeytal u kaanbaloʼob tiʼ Jéeoba yéetel yaan u kuxtaloʼob minaʼan u xuul (Bax. 24:15). Jéeobaeʼ u sayabil le kuxtaloʼ. Tuláakal le máakoʼob kun kaʼa kuxkíintbiloʼob tumen Jéeobaoʼ yaan u kʼuchul u beetuba u paalaloʼob (Sal. 36:9). Le oʼolal tu oracionil le Padrenuestroo’ Jesuseʼ tu kaʼansaj: «K-Taata yanech teʼ kaʼanoʼ» (Mat. 6:9). Jéeobaeʼ u tsʼaamaj junpʼéel nojoch meyaj tiʼ Jesús: u kaʼa kuxkíintik le kimenoʼoboʼ (Juan 6:40, 44). Jesuseʼ tu yaʼalaj: «Teen le kuxtaloʼ, bey xan le kaʼa kuxtaloʼ» (Juan 11:25).

11. ¿Baʼax u kʼáat Jéeoba ka u kʼam le «junmúuchʼ yaʼabkach máakoʼob[oʼ]»?

¹¹ Jéeobaeʼ ku invitartik tuláakal máak utiaʼal ka táakpajak ichil u familia. Jesuseʼ tu yaʼalaj: «Jeʼel máaxak ka u beet le baʼax u kʼáat Dioseʼ, letiʼ in wíitsʼin, in kiik wa in maama» (Mar. 3:35). Jéeobaeʼ u kʼáat ka yanak ichil u familia máakoʼob ku taaloʼob tiʼ jejeláas luʼumiloʼob, chʼiʼibaloʼob yéetel idiomaʼob. Tiʼ letiʼobeʼ ku  yaʼalaʼal «junmúuchʼ yaʼabkach máakoʼob mix máak ku páajtal u xokik jaytúuloʼob». U tsʼaamaj u fejoʼob tiʼ u kuxtal Jesús tu kʼuboʼ yéetel ku beetkoʼob baʼax uts tu tʼaan Dios. Ku yaʼalikoʼob xan tiʼ Dios le jatsʼuts tʼaanoʼobaʼ: «K-salvacioneʼ tiʼ Dios u taal, le máax kulukbal teʼ tronooʼ, bey xan tiʼ le Tamanoʼ» (Apo. 7:9, 10).

12. ¿Baʼax tu yaʼalaj Jesús teʼ Padrenuestro yoʼolal baʼax u tukultmaj u beetik Dios yoʼolal wíinikoʼ?

¹² U oracionil le Padrenuestrooʼ yaʼab baʼax ku kaʼansiktoʼon yoʼolal Jéeoba bey xan yoʼolal baʼax u tukultmaj u beetik yoʼolal wíinik. Yáaxeʼ ku kaʼansiktoʼoneʼ unaj k-kiliʼichkúuntik u kʼaabaʼ Dios yéetel k-tsʼáaik nojbeʼenil tiʼ (Isa. 8:13). U kuxtal Jesús tu kʼubaj utiaʼal u salvartikoʼonoʼ láayliʼ ku kiliʼichkúuntik u kʼaabaʼ Dioseʼ. Tak u kʼaabaʼ Jesuseʼ u kʼáat u yaʼal «Jéeobaeʼ Salvación». U kaʼapʼéel baʼax ku kaʼansiktoʼoneʼ tiʼ Jéeobaeʼ yaan u meyaj u Reino utiaʼal u tsʼáaik utsiloʼob tiʼ wíinik yoʼolal u kuxtal Jesús tu kʼuboʼ. U yóoxpʼéeleʼ jach k-ojel mix baʼal jeʼel u beetik maʼ u béeytal baʼax u tukultmaj Jéeobaeʼ (Sal. 135:6; Isa. 46:9, 10).

13. ¿Baʼaxten k-okjaʼ?

¹³ Jéeobaeʼ ku invitartikoʼon táakpajal ichil u familia yoʼolal u kuxtal Jesús tu kʼuboʼ. Toʼoneʼ jach kiʼimak k-óol yoʼolal le jatsʼuts invitacionaʼ, le oʼolal k-chʼaʼtuklik k-kʼubik k-kuxtal tiʼ Jéeoba yéetel k-okjaʼ. Ken k-beet lelaʼ k-pʼáatal «u tiaʼaloʼon Jéeoba» (Rom. 14:8). Ken okjaʼanakoʼoneʼ k-kʼáatik tiʼ Jéeoba ka u tsʼáatoʼon «junpʼéel maʼalob conciencia» (1 Ped. 3:21). Tsʼoʼoleʼ k-kʼuchul k-beetba u amigo Jéeoba. Toʼoneʼ k-ojel jach yaan  u tsʼáaiktoʼon tuláakal baʼax u yaʼalmaj (Rom. 8:32).

14. ¿Baʼaxten ku yaʼalik Jéeoba ka k-yaabilt u maasil?

¹⁴ Jéeobaeʼ letiʼe yaabilaj péeksik u beet tuláakal baʼaloʼ. Letiʼeʼ u kʼáat ka yanakoʼon ichil u familia yéetel ka k-beet jeʼex letiʼeʼ (1 Juan 4:8-11). Ken k-yaabilt le máakoʼoboʼ k-eʼesik k-kʼáat ka u yiloʼon Jéeoba bey u paaloʼobeʼ (Mat. 5:43-48). Yaan kaʼapʼéel baʼax ku yaʼalik Jéeoba ka k-beete, yáaxeʼ ka yaabilt letiʼ, yéetel u kaʼapʼéeleʼ ka k-yaabilt k-éet máakil (Mat. 22:37-40). K-eʼesik xan k-yaabiltmaj le máakoʼob ken k-tsikbalttiʼob baʼax ken u beet u Reino Diosoʼ. Wa k-yaabiltik uláakʼ máakoʼob, maases k-sukuʼunoʼobeʼ, yaan u béeytal k-eʼesik ‹chúukaʼan› yaabilaj jeʼex Jéeobaeʼ (1 Juan 4:12, 20).

15. 1) ¿Baʼax utsiloʼob k-kʼamik tiʼ Jéeoba? 2) ¿Baʼax utsiloʼob ken k-kʼam maʼ kun xáantal?

¹⁵ Jéeobaeʼ ku yaʼaliktoʼoneʼ wa k-tsʼáaik k-fe tiʼ u kuxtal Jesús tu kʼuboʼ yaan u ‹perdonartikoʼon› (xok Baʼaxoʼob 3:19-21). Jeʼex tsʼoʼok k-ilik teʼ xookaʼ yoʼolal u kuxtal Jesusoʼ, Jéeobaeʼ yaan u ‹máatik› jujuntúul máakoʼob utiaʼal u kʼuchul u beetubaʼob u paalaloʼob teʼ kaʼanoʼ (Rom. 8:15-17). Tsʼoʼoleʼ ku invitartik xan le «uláakʼ tamanoʼob» utiaʼal ka táakpajkoʼob ichil u familia way Luʼumeʼ. Ken láaj luʼsaʼak u kʼebanoʼobeʼ yaan u tsʼok túuntaʼal u yóoloʼob (Rom. 8:20, 21; Apo. 20:7-9). Wa ku chúukpajal u yóoloʼob tiʼ Jéeobaeʼ yaan xan u kʼuchul u beetubaʼob u paalal. Jéeobaeʼ mix bikʼin kun xuʼulul u yaabiltik u paalal. Le utsiloʼob ken u taas u kuxtal Jesús tu kʼuboʼ mix bikʼin xan u xuʼulul (Heb. 9:12). Jach jatsʼuts le baʼax u siimajtoʼon Jéeobaoʼ yéetel mix máak jeʼel u páajtal u luʼsiktoʼoneʼ.

16. ¿Tiʼ baʼax ku jáalkʼabtikoʼon u kuxtal Jesús tu kʼuboʼ?

¹⁶ Wa k-arrepentir tiʼ k-kʼebanoʼobeʼ Satanaseʼ maʼ tu páajtal u beetik mix baʼal utiaʼal maʼ k-antal ichil u familia Jéeoba. Jesuseʼ «chéen juntéeniliʼ kʼaʼabéetchaj» u kíimil utiaʼal u salvartikoʼon tiʼ le kʼeban yéetel le kíimiloʼ (Heb. 9:24-26). Jeʼex k-ojliloʼ tu yoʼolal Adaneʼ k-kíimil, chéen baʼaleʼ Jesuseʼ ku tsʼáaiktoʼon kuxtal minaʼan u xuul. Tsʼoʼoleʼ yaan u jáalkʼabtikoʼon tiʼ u kʼasaʼan yóokʼol kaab Satanás yéetel tiʼ u saajkilil k-kíimil (Heb. 2:14, 15).

17. ¿Bix a wuʼuyikaba yoʼolal le yaabilaj ku yeʼesiktech Jéeobaoʼ?

¹⁷ Tuláakal baʼax ku yaʼalik Dioseʼ ku béeytal. Le leyoʼob u tsʼaamaj Jéeoba tiʼ le baʼaxoʼob u beetmoʼ maʼatech u kʼexpajloʼob, letiʼ xaneʼ mix bikʼin kun kʼexpajal yéetel mix bikʼin ken u tusoʼon (Mal. 3:6). Jéeobaeʼ yaʼab uláakʼ baʼaloʼob ku síiktoʼon, maʼ chéen u páajtalil k-kuxtaliʼ. Letiʼeʼ ku yeʼesik xan toʼon yaabilaj. «Tsʼoʼok k-ilik bix le yaabilaj ku yuʼubik Dios t-oʼolaloʼ yéetel tsʼoʼok k-creertik. Dioseʼ yaabilaj.» (1 Juan 4:16.) Yaan u béeytal baʼax u yaʼalmaj. Maʼ kun xáantaleʼ le Luʼumaʼ yaan u suut junpʼéel kiʼichkelem Paraíso. Tuláakal le máaxoʼob kun kuxtaloʼoboʼ yaan u beetkoʼob jeʼex Jéeobaeʼ yéetel yaan u paklan yaabiltikubaʼob. Tuláakal túun máaxoʼob meyajtik Dios teʼ kaʼan bey xan way Luʼumeʼ yaan u yaʼalikoʼob: «Le kiʼikiʼtʼaanoʼ, le nojbeʼeniloʼ, le naʼatiloʼ, le u tsʼaʼabal graciasoʼ, le tsiikiloʼ, le páajtaliloʼ yéetel le muukʼoʼ, náajmataʼan tumen k-Dios utiaʼal kʼiinoʼob minaʼan u xuul. Amén» (Apo. 7:12).