LE CAPÍTULO 22 tiʼ Genesisoʼ, ku yaʼalikeʼ juntéenjeakileʼ Abrahaneʼ bin kaʼach tuʼux náach utiaʼal u kʼubik junpʼéel siibal tiʼ Jéeoba, utiaʼal u páajtal u beetkeʼ «tu chʼaʼaj le siʼ utiaʼal le tóokbil tiʼibil óolaloʼ ka tu tsʼáaj tu keléembal Isaak; ku tsʼoʼokoleʼ tu chʼaʼaj le [cuchillo] yéetel le kʼáakʼoʼ ka binoʼob tu kaʼatúulaloʼob» (Gén. 22:6).

Le Bibliaoʼ maʼatech u yaʼalik bix u tʼaʼabal kaʼach le kʼáakʼoʼ. Le oʼolaleʼ, ¿u tʼabmiloʼob wa le kʼáakʼ utiaʼal u biskoʼob teʼ tuʼux kun binoʼoboʼ? Juntúul máak ku xakʼaltik u tʼaaniloʼob le Bibliaoʼ ku yaʼalikeʼ kex wa tu bisoʼob «le kʼáakʼoʼ» maʼ xáanchaj ka tuʼupiʼ. Le oʼolaleʼ maʼ xaaneʼ letiʼeʼ ku yaʼalikeʼ Abrahán yéetel u hijoeʼ chéen tu bisoʼob le baʼaxoʼob kun kʼaʼabéettal kaʼach utiaʼal u tʼabikoʼob le kʼáakʼ ken kʼuchkoʼoboʼ.

Chéen baʼaleʼ uláakʼ máakoʼob xakʼaltik u tʼaaniloʼob le Bibliaoʼ, ku yaʼalikoʼob xaneʼ u tʼaʼabal kʼáakʼ teʼ kʼiinoʼoboʼ maʼ chéen chʼaʼabiliʼ. Maʼ xaaneʼ maas séeb ka u kʼáatoʼob tiʼ u vecinoʼob junxóotʼ náajcheʼ wa chúuk tu lugar u tʼabkoʼob kʼáakʼ. Le oʼolal yaʼab tiʼ le máaxoʼob xakʼaltik u tʼaaniloʼob le Bibliaoʼ ku tuklikoʼobeʼ le ka bin Abrahán yéetel Isaakoʼ táan kaʼach u bisik junpʼéel nuʼukul u kʼaxmaj yéetel junpʼéel chan cadena, tuʼux u tsʼaamaj chúuk tʼabaʼaniʼ. Maʼ xaaneʼ le chúukaʼ tu chʼaʼajoʼob tiʼ le kʼáakʼ tu tʼaboʼob junpʼéel áakʼab antesoʼ (Isa. 30:14). Úuchik u biskoʼob le chúuk beyaʼ maas chéen chʼaʼabil úuchik u yilkoʼob u tsʼáaikoʼob mejen xóoxotʼal cheʼ utiaʼal maʼ u tuʼupul le kʼáakʼ le táan u binoʼoboʼ.