¿MÁAKALMÁAK le kʼiin maas kiʼimakchaj a wóol ichil a kuxtaloʼ? ¿Le kʼiin ka tsʼoʼok a beeloʼ? ¿Le kʼiin ka síij a yáax paaloʼ? ¿Wa le kʼiin ka okjaʼanajechoʼ? U jaajileʼ junpʼéel tiʼ le kʼiinoʼob jach kiʼimakchaj a wóoloʼ letiʼe kʼiin ka okjaʼanajechoʼ. Tsʼoʼoleʼ jach kiʼimakchaj xan u yóol le máaxoʼob tu yiloʼob a weʼesik tiʼ Jéeoba a yaabiltmaj yéetel tuláakal a puksiʼikʼal, a kuxtal, a tuukul yéetel tuláakal a muukʼ (Mar. 12:30).

Maʼ xaaneʼ jach kiʼimak a wóol ikil a meyajtik Jéeoba. Chéen baʼaleʼ yaan jujuntúul sukuʼunoʼobeʼ ken máanak kʼiineʼ ku xuʼulul u meyajtikoʼob Jéeoba yéetel kiʼimak óolal. ¿Baʼaxten ku yúuchul lelaʼ? ¿Baʼaxten kʼaʼabéet k-meyajtik Jéeoba yéetel kiʼimak óolal?

Le baʼax ku yaʼalik le Biblia yoʼolal u Reino Diosoʼ ku beetik u kiʼimaktal k-óol, tumen ku yeʼesiktoʼoneʼ maʼ kun xáantaleʼ Jéeobaeʼ yaan u xuʼulsik le kʼasaʼan yóokʼol kaabaʼ yéetel yaan k-kuxtal tiʼ junpʼéel paraíso. Toʼoneʼ k-ojel maʼ kun xáantal ken úuchuk lelaʼ, tumen Sofonías 1:14, ku yaʼalik: «¡Tsʼoʼok u náatsʼal u noj kʼiinil Yuumtsil!». Chéen baʼaleʼ wa ku xáantal táan k-páaʼtik u yúuchul junpʼéel baʼaleʼ jeʼel u beetik u xuʼulul u yantaltoʼon kiʼimak óolaleʼ, tsʼoʼoleʼ jeʼel u beetik xan u xuʼulul k-tsʼáaik k-óol k-meyajt Dios jeʼex ka káajoʼoneʼ (Pro. 13:12, Traducción del Nuevo Mundo).

Toʼoneʼ kiʼimak k-óol xan tumen tiaʼanoʼon ichil le máaxoʼob beetik baʼaloʼob maʼalobtakoʼ. Maʼ xaaneʼ hasta káaj k-meyajtik Dios yoʼolal le jatsʼuts modos ku yeʼesik le máaxoʼob meyajtikoʼ (1 Ped. 2:12). Pero ¿bix jeʼel k-uʼuyikba wa ku kʼebantal juntúul sukuʼun yéetel ku expulsartaʼaleʼ? Ken úuchuk lelaʼ yaan horaeʼ jeʼel u lúubul k-óoleʼ yéetel jeʼel u xuʼulul k-meyajtik Dios yéetel kiʼimak óolaleʼ.

Le ayikʼaliloʼob ku tsʼáaik u yóol kaab Satanasoʼ jeʼel u beetik xan u xuʼulul k-meyajtik Jéeoba yéetel kiʼimak óolaleʼ, tumen jeʼel u beetik k-tsʼíiboltik baʼaloʼob maʼ kʼaʼabéettoʼoneʼ. Le beetik unaj k-tuukul tiʼ le baʼax tu yaʼalaj Jesusaʼ: «Mix máak jeʼel u páajtal u beetkuba palitsil tiʼ kaʼatúul tsʼuuloʼobeʼ, tumen yaan u pʼektik juntúuliʼ yéetel yaan u yaabiltik uláakʼoʼ, wa yaan u biskuba yéetel juntúuliʼ yéetel yaan u náachtal tiʼ uláakʼoʼ. Maʼ tu páajtal a beetkabaʼex palitsil tiʼ Dios yéetel tiʼ le Ayikʼaliloʼoboʼ» (Mat. 6:24). Jeʼex túun k-ilkoʼ utiaʼal k-meyajtik  Jéeoba yéetel kiʼimak óolaleʼ, maʼ unaj k-bin tu paach le ayikʼaliloʼob ku tsʼáaik le yóokʼol kaabaʼ.

Wa k-yaabiltmaj Jéeobaeʼ maʼ kun talamtaltoʼon k-beetik baʼax uts tu tʼaan (1 Juan 5:3). Kʼaʼajaktoʼoneʼ Jesuseʼ tu yaʼaleʼ wa k-beetik le baʼaxoʼob tu kaʼansoʼ yaan u yantaltoʼon kiʼimak óolal. Letiʼeʼ tu yaʼalaj: «Koʼoteneʼex tin wiknal, tuláakleʼex máaxeʼex yaʼab a meyajeʼex yéetel aal a kuucheʼex, teen ken in beet a jeʼelsikabaʼex. Biseʼex ta wóokʼoleʼex u cheʼil in kuuch yéetel kaanbalneneʼex tiʼ teen, tumen teneʼ maʼ séeb in kʼuuxiliʼ yéetel kabal u yóol in puksiʼikʼal, beyoʼ jeʼel a kaxtikeʼex jeʼelel a tiaʼaleʼexeʼ. Tumen u cheʼil in kuucheʼ maʼ talam u bisaʼaliʼ, yéetel in kuucheʼ jach sáal» (Mat. 11:28-30). ¿Baʼaxten túun k-aʼalik ku taasiktoʼon kiʼimak óolal k-meyajtik Jéeoba? Yaan óoxpʼéel baʼax eʼesik lelaʼ, koʼox ilik (Hab. 3:18).

Jéeoba, le Dios kiʼimak u yóoloʼ, letiʼ tsʼaamil k-kuxtal (Bax. 17:28; 1 Tim. 1:11). Kex tsʼoʼok u máan yaʼab años okjaʼanakoʼoneʼ, láayliʼ táan k-meyajtik Jéeoba yéetel kiʼimak óolaleʼ tumen k-ojleʼ chéen yoʼolal letiʼeʼ kuxaʼanoʼon.

Koʼox ilik bix u yuʼubikuba Héctor, letiʼeʼ tu beetaj u superintendenteil cuarenta años. Kex tsʼoʼok u chʼíijil yéetel kʼojaʼan u yataneʼ, láayliʼ táan u meyajtik Jéeoba yéetel kiʼimak óolaleʼ (Sal. 92:12-14). Letiʼeʼ ku yaʼalik: «Kex yaj tin wóol in wilik bix u bin u maas kʼojaʼantal in watan yéetel jach kin kaʼanal ikil in kanáantikeʼ, láayliʼ táan in wilik in meyajtik Dios yéetel kiʼimak óolaleʼ. Ken in tukult Jéeoba tsʼaamil in kuxtal yéetel yaan baʼax oʼolal tu beetaj wíinikeʼ, ku beetik in maas yaabiltik yéetel in meyajtik tu jaajil in wóol. Utiaʼal maʼ u xuʼulul u yantalten kiʼimak óolaleʼ, kin tsʼáaik in wóol kʼaʼaytaj yéetel kin tuukul tiʼ le baʼaxoʼob ken u beet u Reino Dios t-oʼolaloʼ».

Jéeobaeʼ tsʼoʼok u jáalkʼabtikoʼon tiʼ le kʼeban yéetel tiʼ le kíimiloʼ. Le Bibliaoʼ ku yaʼalik: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16). Jeʼex u yaʼalik le tekstoaʼ wa k-tsʼáaik fe tiʼ u kuxtal Jesús tu kʼubaj t-oʼolaloʼ, yaan u perdonartaʼal k-kʼebanoʼob yéetel yaan u yantaltoʼon kuxtal minaʼan u xuul. Ken tuukulnakoʼon tiʼ lelaʼ, ¿máasaʼ jach k-tsʼáaik u graciasil tiʼ Dios yéetel k-meyajtik yéetel kiʼimak óolal?

Jesús, juntúul sukuʼun yaan Mexicoeʼ, ku yaʼalikeʼ jach chʼiikil meyaj kaʼachi. Letiʼeʼ ku yaʼalik: «Como taak in náajaltik maas yaʼab taakʼineʼ, yaan horaeʼ ichil junpʼéel kʼiineʼ kin meyajtik kaʼach cinco turnos. Chéen baʼaleʼ ka máan kʼiineʼ kaanbalnajen tiʼ  Jéeoba, tsʼoʼoleʼ tin kaneʼ letiʼeʼ tu kʼubaj u Hijo tu yoʼolal tuláakal máak. Leloʼ tu beetaj in tsʼíiboltik in meyajtik Jéeoba yéetel tin kʼubaj in kuxtal tiʼ letiʼ. Veintiocho años káajak kaʼach in meyaj tiʼ junpʼéel empresa, chéen baʼaleʼ tin chʼaʼtuklaj in pʼatik utiaʼal in maas tsʼáaik in wóol teʼ kʼaʼaytajoʼ». Bey úuchik u káajal u yuʼubik le sukuʼun bukaʼaj kiʼimak óolal ku taasik u meyajtaʼal Diosoʼ.

Le bix k-kuxtaloʼ ku taasiktoʼon kiʼimak óolal. ¿Kʼajaʼan wa tech bix a kuxtal antes a kʼaj óoltik Jéeoba? Le apóstol Pablooʼ tu yaʼalaj tiʼ le sukuʼunoʼob yanoʼob Romaoʼ ‹palitsiloʼob kaʼach tiʼ le kʼebanoʼ›, chéen baʼaleʼ beoraaʼ ‹palitsiloʼob tiʼ le justiciaoʼ›. ¿Baʼax utsil ku taasik lelaʼ? Yaan u yantaltiʼob kuxtal minaʼan u xuul ikil u kuxtaloʼob maʼalob tu táan Dios (Rom. 6:17-22). Toʼon xaneʼ k-ilik k-kuxtal jeʼex uts tu tʼaan Dioseʼ, leloʼ ku kanáantkoʼon tiʼ le muʼyajil ku taasik le núupkʼeban yéetel le kʼasaʼanil yaan way yóokʼol kaabaʼ. ¿Máasaʼ leloʼ ku taasiktoʼon kiʼimak óolal?

Koʼox ilik bix u yuʼubikuba xan Jaime, letiʼeʼ boxeador kaʼachi. Tsʼoʼoleʼ maʼatech u creertik Dios yéetel ku tuklik kaʼacheʼ tiʼ baʼalcheʼ k-taal. Ka káaj u bin teʼ muchʼtáambaloʼoboʼ jach jatsʼuts tu yilil bix u yeʼesaʼal yaabilaj tumen le sukuʼunoʼoboʼ. Chéen baʼaleʼ tu tsʼáaj cuentaeʼ utiaʼal u kʼexik bix u kuxtaleʼ unaj u creertik Dios, le oʼolal tu kʼataj tiʼ Dios ka áantaʼak utiaʼal ka yanak u fe. Letiʼeʼ ku yaʼalik: «Jujunpʼíitil úuchik in tsʼáaik cuentaeʼ Dioseʼ juntúul Taatatsil jach ku yeʼesik yaabilaj yéetel chʼaʼ óotsilil. Le baʼaxoʼob ku kaʼansikoʼ jach tsʼoʼok u yáantken. Wa maʼ úuchik in kʼexik bix in kuxtaleʼ, bejlaʼa tsʼoʼok in kíimil jeʼex úuchik tiʼ yaʼab tiʼ in amigoʼobeʼ. Le bukaʼaj tiempo tsʼoʼok in meyajtik Jéeobaoʼ jach tsʼoʼok u taasikten kiʼimak óolal».

¿Bix unaj k-uʼuyikba le táan k-páaʼtik u xuʼulsaʼal le kʼasaʼan yokʼol kaabaʼ? Unaj k-kʼaʼajsikeʼ «le máax ku tuukul tiʼ u kiliʼich muukʼ Dios ken paakʼalnakeʼ» yaan u kuxtal minaʼan u xuul. «Bey túunoʼ maʼ u xuʼulul k-beetik baʼax jach maʼalob, tumen wa maʼ t-kaʼanleʼ yaan k-jooch jach tu kʼiinil.» (Gal. 6:8, 9.) Maʼ a chaʼik u lúubul a wóol yoʼolal le baʼaxoʼob ka aktáantik ichil a kuxtaloʼ, Jéeoba kun áantkech. Koʼox ilik u yantaltoʼon jatsʼuts modos utiaʼal ka chúukpajak k-óol ken taalak le nojoch muʼyajiloʼ yéetel koʼox seguertik k-meyajtik Dios yéetel kiʼimak óolal (Apo. 7:9, 13, 14; Sant. 1:2-4).

Kʼaʼajaktoʼoneʼ wa ku chúukpajal k-óol tiʼ Jéeobaeʼ yaan u bendecirkoʼon. Letiʼeʼ ku yilik tuláakal baʼax k-beetik utiaʼal k-meyajtik yéetel ku yilik bukaʼaj k-yaabiltmil. Wa k-meyajtik Dios yéetel kiʼimak óolaleʼ yaan k-uʼuyikba jeʼex Davideʼ. Letiʼeʼ tu yaʼalaj: «Mantatsʼ kʼajaʼan tiʼ teen Yuumtsil; tu yoʼolal tiʼ yaan tin x-noʼoj kʼabeʼ, mix baʼal bíin u beet in lúubul. Le oʼolaleʼ chuup yanil in puksiʼikʼal yéetel kiʼimak óolal» (Sal. 16:8, 9).