1, 2. 1) ¿Baʼaxten jach kʼaj óolaʼan le tʼaanoʼob yaan teʼ Deuteronomio 6:4? 2) ¿Baʼaxten tu chʼaʼchiʼitaj Moisés le tʼaanoʼoboʼ?

LE JUDÍOʼOBOʼ tsʼoʼok u máan u cientosil años joʼopʼok u chʼaʼchiʼitkoʼob baʼax ku yaʼalik Deuteronomio 6:4 ken orarnakoʼob. Le oracionaʼ ku kʼaabaʼtik Shemá, le tʼaan Shemaoʼ letiʼe yáax tʼaan ku chíikpajal teʼ versículo 4 ich hebreooʼ. Le judíoʼoboʼ sáamsamal ku beetkoʼob kaʼach le oración ken sáasakoʼ bey xan ken áakʼabchajak. Lelaʼ ku beetkoʼob utiaʼal u yeʼeskoʼob chéen Dios ku adorartikoʼob.

² Le tʼaanoʼobaʼ táakaʼan xan ichil le baʼax tu yaʼalaj Moisés tiʼ u kaajil Israeloʼ. Lelaʼ tu yaʼalaj tu añoil 1473 táanil tiʼ u taal Jesús, teʼ kʼiinoʼoboʼ u kaajil Israeleʼ tiaʼan kaʼach tu táax luʼumil Moabeʼ yéetel jach taʼaytak u kʼáatmáanskoʼob le río Jordán utiaʼal u chʼaʼikoʼob le Luʼum Aʼalaʼan u Tsʼaʼabaltiʼoboʼ (Deu. 6:1). Moiseseʼ tsʼokaʼaniliʼ u máan cuarenta años joʼopʼok u nuʼuktik u kaajil Israeleʼ yéetel táan kaʼach u líiʼsik u yóol utiaʼal u aktáantik le baʼax ku taal u kʼiinil u yúuchloʼ. Le israelitaʼoboʼ kʼaʼabéet kaʼach u kʼubik u yóoloʼob tiʼ Jéeoba yéetel u meyajtikoʼob chéen letiʼ. Le oʼolaleʼ le tʼaanoʼob tu yaʼalaj Moisesoʼ jach tu yáantoʼob. Ka tsʼoʼok u tsʼáaik le Diez  Mandamientos yéetel uláakʼ leyoʼob tiʼ le israelitaʼoboʼ, Moiseseʼ tu yaʼalajtiʼob le tʼaanoʼob ku chíikpajal teʼ Deuteronomio 6:4, 5 (xoke).

3. ¿Baʼax ken k-il teʼ xookaʼ?

³ Le israelitaʼoboʼ u yojloʼob kaʼach minaʼan uláakʼ Dios jeʼex Jéeobaeʼ. Le oʼolaleʼ ku adorartikoʼob Jéeoba Dios jeʼex úuchik u beetik xan u yúuchben chʼiʼibaloʼobeʼ. ¿Baʼaxten túun tu yaʼalajtiʼob Moisés de ke «Jéeoba k-Dioseʼ chéen juntúul»? ¿Baʼax yaan yil yéetel k-yaabiltik Dios yéetel tuláakal k-puksiʼikʼal, k-kuxtal yéetel k-muukʼ? ¿Bix jeʼel u yáantkoʼon le baʼax ku yaʼalik Deuteronomio 6:4 yéetel 5?

4, 5. 1) ¿Baʼax u kʼáat u yaʼal le tʼaan «Jéeoba k-Dioseʼ chéen juntúul»? 2) ¿Baʼaxten Jéeobaeʼ jelaʼan tiʼ u maasil diosoʼob?

⁴ Chéen juntúul. Le tʼaanaʼ u kʼáat u yaʼaleʼ minaʼan uláakʼ Dios, chéen Jéeoba. ¿Baʼaxten meyajnaj tiʼ Moisés le tʼaanaʼ? Teʼelaʼ Moiseseʼ maʼ táan u tsolik kaʼach tiʼ le israelitaʼob maʼ junpʼéel Trinidad Jéeobaiʼ. Jéeobaeʼ letiʼe máax beetmil le kaʼan yéetel le Luʼumoʼ. Tsʼoʼoleʼ chéen letiʼ u maas nojchil tiʼ tuláakal baʼax yaan. Minaʼan uláakʼ u jaajil Dios yéetel minaʼan mix juntúul dios chíikaʼan tiʼ letiʼ (2 Sam. 7:22). Le tʼaanoʼobaʼ tu yaʼalaj Moisés tiʼ le kaajoʼ utiaʼal u kʼaʼajsiktiʼob chéen Jéeoba unaj u adorartikoʼob. Le israelitaʼoboʼ maʼ unaj u adorartikoʼob uláakʼ diosoʼob jeʼex u beetik le kaajoʼob yanoʼob tu baʼpachoʼ. Le máakoʼobaʼ ku tuklikoʼob kaʼacheʼ u diosoʼobeʼ yaantiʼob poder tu yóokʼol jujunpʼéel baʼaloʼob yaan teʼ yóokʼol kaabaʼ.

⁵ Le egipcioʼob kaʼachoʼ ku adorartikoʼob Ra, u diosil le kʼiinoʼ; Nut, u diosil le kaʼanoʼ; Gueb, u diosil le luʼumoʼ; Hapi, u diosil le Nilooʼ yéetel ku adorartikoʼob xan uláakʼ baʼalcheʼob. Le ka tu taasaj le diez plagasoʼ Jéeobaeʼ tu yeʼesaj maas nojoch tiʼ tuláakal le diosoʼobaʼ. Le cananitaʼob xanoʼ ku adorartikoʼob Baal, letiʼobeʼ ku creertikoʼobeʼ Baal u yuumil le kuxtaloʼ. Ku yaʼalikoʼob xaneʼ letiʼ u diosil le kaʼanoʼ, u kʼáaxal jaʼ yéetel le cháakoʼ. Yaʼab tuʼuxoʼob kaʼacheʼ le máakoʼoboʼ ku kʼáatkoʼob tiʼ Baal ka kanáantaʼakoʼob (Núm. 25:3). Bey túunoʼ, le israelitaʼoboʼ mantatsʼ unaj u kʼaʼajaltiʼobeʼ Jéeobaeʼ «u jaajil Dios» yéetel «chéen juntúul», minaʼan uláakʼ jeʼex letiʼeʼ (Deu. 4:35, 39).

6, 7. ¿Baʼax uláakʼ u kʼáat u yaʼal le tʼaan «Jéeoba k-Dioseʼ chéen juntúul», yéetel bix tu yeʼesil Jéeoba leloʼ?

⁶ Maʼatech u tuus, ku béeykuntik baʼax ku yaʼalik. Le ken u yaʼal le Biblia ‹Jéeoba k-Dios chéen juntúuloʼ› ku tsʼáaik xan naʼatbileʼ jeʼel u páajtal k-creertik yaan u béeytal le baʼax u yaʼalmoʼ. Jéeobaeʼ maʼatech u jáajan kʼeʼekʼexik le baʼax ku yaʼalikoʼ mix le baʼax u chʼaʼtukultmaj u beetkoʼ. Baʼaxeʼ letiʼeʼ ku béeykuntik baʼax ku yaʼalik yéetel maʼatech u tuus. Tiʼ Abrahaneʼ tu yaʼalaj yaan u tsʼáaik tiʼ u chʼiʼibal junpʼéel luʼum jach jatsʼuts yéetel yaʼab milagroʼob tu beetaj utiaʼal u béeykuntik. Jéeobaeʼ u chʼaʼtukultmaj u béeykuntik baʼax u yaʼalmaj kex aʼalaʼab cuatrocientos años antes (Gén. 12:1, 2, 7; Éxo. 12:40, 41).

⁷ Ka máan tiempoeʼ, Jéeobaeʼ tu yaʼalaj tiʼ le israelitaʼoboʼ: «Teneʼ maʼ jelpajkeniʼ. Táanil tiʼ teneʼ maʼ beetaʼab mix juntúul Diosiʼ, yéetel ku tsʼoʼokol tiʼ teneʼ láayliʼ maʼ yanakeʼ». Utiaʼal u yeʼesik jach ku béeykuntik u tʼaaneʼ, tu yaʼalaj: «Tiʼ jaʼaboʼob minaʼan u xuuleʼ, [láayliʼ Teeneʼ, TNM]» (Isa. 43:10, 13; 44:6; 48:12). Tiʼ le israelitaʼoboʼ yaan kaʼach junpʼéel jatsʼuts privilegio: u adorartikoʼob Jéeoba, juntúul Dios maʼatech u tuus yéetel ku béeykuntik baʼax ku yaʼalik. Tiʼ toʼon xaneʼ tsʼaʼantoʼon le jatsʼuts privilegioaʼ (Mal. 3:6; Sant. 1:17).

8, 9. 1) ¿Baʼax ku kʼáatik Jéeoba ka u beet le máaxoʼob adorartikoʼ? 2) ¿Máakalmáak le maas nojoch mandamiento tu yaʼalaj Jesusoʼ?

⁸ Moiseseʼ tu kʼaʼajsaj tiʼ le israelitaʼoboʼ le yaabilaj ku yuʼubik Jéeoba tu yoʼolaloʼoboʼ maʼatech u kʼexpajal yéetel mantatsʼ ku  yeʼesik. Le oʼolal bakáan u kʼáat u adorartoʼob chéen Jéeoba. Unaj u yaabiltikoʼob yéetel tuláakal u puksiʼikʼaloʼob, tuláakal u wíinkliloʼob yéetel tuláakal u muukʼoʼob. Le taatatsiloʼoboʼ unaj u aprovechartikoʼob tuláakal súutukil utiaʼal u kaʼansik tiʼ u paalaloʼob u adorartoʼob Jéeoba. Le paalaloʼoboʼ unaj xan u síijil tu puksiʼikʼaloʼob u adorartikoʼob chéen Jéeoba (Deu. 6:6-9).

⁹ Jéeobaeʼ maʼ u kʼex baʼax ku tuklik u beetkiʼ mix le baʼaxoʼob ku kʼáatik ka u beet le máaxoʼob meyajtikoʼ. Utiaʼal ka kiʼimakchajak u yóol Jéeoba yéetel le adoración k-tsʼáaiktiʼoʼ kʼaʼabéet k-adorartik chéen letiʼ, k-yaabiltik yéetel tuláakal k-puksiʼikʼal, k-tuukul yéetel k-muukʼ. Jesuseʼ tu yaʼaleʼ lelaʼ letiʼe maas nojoch mandamientooʼ (xok Marcos 12:28-31). Koʼox ilik bix jeʼel u seguer k-eʼesik k-creertik de ke «Jéeoba k-Dioseʼ chéen juntúul».

10, 11. 1) ¿Baʼaxten k-aʼalikeʼ chéen Jéeoba k-adorartik? 2) ¿Bix tu yeʼesil le xiʼipalaloʼob hebreoʼob chéen Jéeoba ku adorartikoʼoboʼ?

¹⁰ Chéen Jéeoba unaj k-adorartik tumen chéen letiʼ u juntúuliliʼ k-Dios. Maʼ tu páajtal k-adorartik yaanal diosoʼob, mix k-táakbesik maʼ jaajil kaʼansajoʼob wa baʼaxoʼob chéen suukaʼan u beetaʼal ichil le adoración k-tsʼáaik tiʼ Jéeobaoʼ. Jéeobaeʼ maʼ chéen juntúul dios yaan tu yóokʼol u maasil diosoʼobiʼ yéetel maʼ chéen esaj yaan u poderiʼ, baʼaxeʼ letiʼ u jaajil Dios. Le oʼolal chéen Jéeoba unaj k-adorartik (xok Apocalipsis 4:11).

¹¹ Tu libroil Danieleʼ k-xokik tu yoʼolal jujuntúul xiʼipalaloʼob hebreoʼob ku kʼaabaʼtikoʼob Daniel, Ananías, Misael yéetel Azarías. Letiʼobeʼ tu yeʼesoʼob chéen Jéeoba ku adorartikoʼob tumen maʼ tu yóotoʼob u jaantoʼob le janaloʼob ku yaʼalik le Ley maʼ unaj u jaantaʼal tumen máaxoʼob adorartik Jéeobaoʼ. Daniel yéetel le uláakʼ xiʼipalaloʼoboʼ maʼ tu yóotoʼob xan chintal tu táan junpʼéel imagen de oro beetaʼab tumen Nabucodonosoriʼ. Utiaʼal letiʼobeʼ chéen Jéeoba u Diosoʼob, le oʼolal tu yeʼesoʼob chúukaʼan u yóoloʼob tiʼ letiʼ (Dan. 1:1–3:30).

12. Wa k-kʼáat adorart chéen Jéeobaeʼ, ¿tiʼ baʼax unaj k-kanáantikba?

¹² Unaj k-tsʼáaik táanil ichil k-kuxtal k-meyajtik Jéeoba. Wa k-kʼáat adorart chéen letiʼeʼ maʼ unaj k-chaʼik tiʼ uláakʼ baʼaloʼob ka u beet u xuʼulul k-tsʼáaik k-óol meyajtiʼ. ¿Baʼax jeʼel u beetik u xuʼulul k-meyajtikeʼ? Teʼ Diez Mandamientosoʼ, Jéeobaeʼ tu yaʼalaj tiʼ máaxoʼob meyajtik maʼ unaj u adorartikoʼob yaanal diosoʼobiʼ. Tsʼoʼoleʼ letiʼobeʼ maʼ unaj u beetkoʼob mix junpʼéel u imagen wa baʼax utiaʼal u adorartoʼobiʼ (Deu. 5:6-10, TNM). Teʼ kʼiinoʼobaʼ yaʼab baʼaloʼob ku yilaʼaloʼob bey diosoʼob yéetel ku adorartaʼaloʼobeʼ, tsʼoʼoleʼ yaʼab tiʼ letiʼobeʼ maʼ tu jáan tsʼaʼabal cuenta wa beyoʼob diosoʼobeʼ. Pero Jéeobaeʼ maʼ u kʼex u leyoʼobiʼ, letiʼeʼ láayliʼ ‹juntúuliliʼeʼ›. Koʼox ilik bix jeʼel k-kanáantikba tiʼ le baʼaloʼob ku adorartaʼaloʼob teʼ kʼiinoʼobaʼ.

13. ¿Baʼax jeʼel u káajal k-maas yaabiltik ke Jéeobaeʼ?

¹³ Tu tsʼíibil Colosasiloʼob 3:5 (xoke) ku tsʼaʼabal junpʼéel lista tiʼ le baʼaloʼob jeʼel u beetik k-náachtal tiʼ Jéeobaoʼ. Teʼeloʼ ku yaʼalikeʼ u sen tsʼíiboltaʼal wa baʼaxeʼ bey ka adorartaʼak beetbil diosoʼobeʼ, ¿bix u yúuchul lelaʼ? Lelaʼ jeʼel u yúuchul jeʼex wa ka joʼopʼok k-sen tsʼíiboltik k-ganartik maas yaʼab taakʼin wa u yantaltoʼon baʼaloʼob jach koʼojtakeʼ. Wa k-tsʼáaik táanil ichil k-kuxtal le baʼaloʼobaʼ jeʼel u suutoʼob bey k-diosoʼobeʼ. Tuláakal le kʼebanoʼob ku chʼaʼchiʼitaʼal teʼ Colosasiloʼob 3:5, yaan baʼax u yil yéetel u tsʼíibolal máak, lelaʼ ku yilaʼal bey ka adorartaʼak yaanal diosoʼobeʼ. Bey túunoʼ wa k-tsʼíiboltik le baʼaloʼobaʼ jeʼel u káajal k-maas yaabiltikoʼob ke Dioseʼ. Wa ka úuchuktoʼon lelaʼ yaan u xuʼulul k-ilik Jéeoba bey «chéen juntúul» k-Dioseʼ. Toʼoneʼ mix juntéen k-kʼáat ka úuchuk leloʼ.

14. ¿Baʼax tu yaʼalaj apóstol Juan jeʼel u yáantkoʼon utiaʼal maʼ u xuʼulul k-yaabiltik Jéeobaeʼ?

 ¹⁴ Le apóstol Juanoʼ tu yaʼalaj xan ka k-kanáantba tiʼ baʼax jeʼel u náachkuntkoʼon tiʼ Dioseʼ. Letiʼeʼ tu yaʼaleʼ le máax u yaabiltmaj le baʼaloʼob yaan way yóokʼol kaab, jeʼex «u tsʼíibolal le bakʼoʼ, u tsʼíibolal le ichoʼ bey xan u sen kaʼantal u yich máak tu yoʼolal le baʼaxoʼob yaantiʼoʼ», «maʼ u yaabiltmaj le Taataoʼ» (1 Juan 2:15, 16). Le oʼolaleʼ unaj k-ilik wa maʼ joʼopʼok k-yaabiltik le yóokʼol kaabaʼ. Maʼ xaaneʼ jeʼel k-tsʼáaik cuentaeʼ tsʼoʼok u joʼopʼol u yutstal t-ich le náaysaj óoloʼob, le bix u vestirkuba yéetel bix u xáacheʼtik u pool u máakiloʼob le yóokʼol kaabaʼ. Wa maʼ xaaneʼ jeʼel u taaktal u maas kaʼantal k-xook utiaʼal k-bin tu paach «nukuch baʼaloʼob[eʼ]» (Jer. 45:4, 5, TNM). Jach taʼaytak k-antal teʼ túumben luʼumoʼ, le oʼolal maʼ unaj u tuʼubultoʼon le tʼaanoʼob tu yaʼalaj Moisesoʼ. Wa toʼon k-naʼatik yéetel k-creertik de ke ‹Jéeoba k-Dios chéen juntúuleʼ›, chéen letiʼ ken k-adorarte yéetel yaan k-meyajtik jeʼex u kʼáateʼ (Heb. 12:28, 29).

15. ¿Baʼaxten tu kʼaʼajsaj Pablo tiʼ le yáax cristianoʼob yaantiʼob ‹chéen juntúul› Diosoʼ?

¹⁵ Le tʼaan ‹Jéeoba Dios chéen juntúuloʼ› ku tsʼáaik xan naʼatbileʼ Jéeobaeʼ u kʼáat ka k-bisba maʼalob yéetel le sukuʼunoʼoboʼ yéetel ka k-múul meyajt jeʼex uts tu tʼaaneʼ. Teʼ yáax siglooʼ ichil le múuchʼuliloʼ yaan kaʼach sukuʼunoʼob judíoʼob, griegoʼob, romailoʼob yéetel uláakʼ táanxel luʼumiloʼob. Letiʼobeʼ jejeláas kaʼach u religionoʼob, baʼax suuk u beetkoʼob yéetel bix líiʼsaʼaniloʼob. Tu yoʼolal lelaʼ jujuntúuloʼobeʼ maʼ chéen chʼaʼabil úuchik u káajal u adorartikoʼob Jéeoba jeʼex u yaʼalikoʼ bey xan u pʼatkoʼob le baʼaxoʼob suuk kaʼach u beetkoʼoboʼ. Le oʼolaleʼ le apóstol Pablooʼ anchaj u kʼaʼajsiktiʼobeʼ yaantiʼob chéen juntúul Dios, Jéeoba (xok 1 Corintoiloʼob 8:5, 6).

16, 17. 1) ¿Baʼax profecíail táan u béeytal teʼ kʼiinoʼobaʼ, yéetel baʼax utsil ku yantal teʼ múuchʼuliloʼoboʼ? 2) ¿Baʼax jeʼel u beetik maʼ k-bisikba maʼalob yéetel tuláakal le sukuʼunoʼoboʼ?

 ¹⁶ ¿Kux túun teʼ kʼiinoʼobaʼ baʼax jeʼel u páajtal k-aʼalik yoʼolal le múuchʼuliloʼ? Le profeta Isaíasoʼ tu yaʼaleʼ teʼ tu tsʼook kʼiinoʼoboʼ máakoʼob tiʼ tuláakal luʼumiloʼobeʼ yaan u múul adorartikoʼob Jéeoba, letiʼobeʼ yaan u yaʼalikoʼob: «Naʼakakoʼon tu wits Yuumtsil, tu [templo u Dios] Jacob, utiaʼal ka u yeʼestoʼon u beeloʼob utiaʼal ka k-xíimbalte» (Isa. 2:2, 3). Toʼoneʼ jach kiʼimak k-óol k-ilik táan u béeytal le profecía teʼ kʼiinoʼobaʼ, tsʼoʼoleʼ táan k-ilik le jatsʼuts utsiloʼob ku yantal teʼ múuchʼuliloʼoboʼ. Kex jejeláas tuʼux u taal le sukuʼunoʼoboʼ, kex jejeláas idioma ku tʼankoʼob yéetel kex jejeláas u religionoʼob kaʼacheʼ, teʼ kʼiinoʼobaʼ táan k-múul meyajtik Jéeoba. Chéen baʼaleʼ tumen jejeláas bix líiʼsaʼaniloʼoneʼ yaan kʼiineʼ ku yantaltoʼon problemaʼob yéetel wa máax.

¹⁷ ¿Bix a wilik le sukuʼunoʼob ku taaloʼob tiʼ yaanal luʼumiloʼ? Yaneʼ yaanal idioma ku tʼanik, yaanal bix u vestirkuba yéetel yaanal baʼal suuk u jaantik. Techeʼ, ¿ka biskaba wa yéetel tuláakal le sukuʼunoʼoboʼ? ¿Ka biskaba wa chéen yéetel le máaxoʼob maas ku lúubultech utsiloʼ? Wa yaan ancianoʼob maas táankelmoʼob ta múuchʼulil wa táanxel luʼumil u taaloʼobeʼ, ¿bix a tratartikoʼob? Wa maʼ t-kanáantikbaeʼ jeʼel u xuʼulul k-bisikba maʼalob tu yéeteloʼobeʼ.

18, 19. 1) ¿Baʼax tsolnuʼukil ku yaʼalik Efesoiloʼob 4:1 tak 3 unaj k-beetik? 2) ¿Baʼax unaj k-beetik utiaʼal k-bisikba maʼalob yéetel le sukuʼunoʼoboʼ?

¹⁸ ¿Baʼax unaj k-beetik utiaʼal k-bisikba yéetel le sukuʼunoʼoboʼ? Le apóstol Pablooʼ tu tsʼáaj junpʼéel maʼalob tsolnuʼukt tiʼ le cristianoʼob kajaʼanoʼob Éfesooʼ. Le kaajaʼ jach ayikʼal kaʼachi yéetel jejeláas tuʼux u taal le máaxoʼob kajaʼanoʼoboʼ (xok Efesoiloʼob 4:1-3). Pabloeʼ tʼaanaj tiʼ jatsʼuts modosoʼob jeʼex kabal óolal, jetsʼ óolal, chúukaʼan óolal yéetel yaabilaj. Le modosoʼobaʼ bey jeʼex u yokomiloʼob junpʼéel naj ku yáantaj utiaʼal maʼ u júutuleʼ. Chéen baʼaleʼ utiaʼal maʼ u kʼastal junpʼéel najeʼ yaʼab meyaj kʼaʼabéet u beetik máak. Le oʼolaleʼ utiaʼal maʼ u xuʼulul u biskubaʼob maʼalobeʼ, le apóstol Pablooʼ tu yaʼalaj xan tiʼob: «Xachabaʼex utiaʼal ka múuchʼ pʼáatkeʼex jeʼex úuchik a muʼuchʼleʼex tumen le kiliʼich muukʼoʼ».

¹⁹ Tuláakloʼon unaj k-tsʼáaik k-óol utiaʼal k-múul bisikba maʼalob teʼ múuchʼuliloʼ. ¿Bix jeʼel k-beetkeʼ? Yáaxeʼ tuláakloʼon unaj k-eʼesik le jatsʼuts modosoʼob tu yaʼalaj Pablo jeʼex le kabal óolaloʼ, jetsʼ óolal, chúukaʼan óolal yéetel yaabilaj. U kaʼapʼéeleʼ unaj k-tsʼáaik k-óol utiaʼal ‹ka yanak jeetsʼelil t-baatsil›. Le problemaʼob ku yantaltoʼon yaan hora yéetel le sukuʼunoʼoboʼ jeʼel u beetik u xuʼulul k-bisikba tu yéeteloʼobeʼ, le oʼolaleʼ unaj k-ilik utskíintikoʼob. Wa k-beetkeʼ yaan k-áantaj utiaʼal ka yanak jeetsʼelil teʼ múuchʼuliloʼ.

20. ¿Bix jeʼel k-eʼesik de ke «Jéeoba k-Dioseʼ chéen juntúul»?

²⁰ Jeʼex tsʼoʼok k-ilkoʼ le tʼaan ‹Jéeoba k-Dios chéen juntúuloʼ› yaʼab baʼax u kʼáat u yaʼale. Le tʼaanoʼobaʼ tu tsʼáaj muukʼ tiʼ le israelitaʼob utiaʼal u aktáantkoʼob le problemaʼob anchajtiʼob le ka ookoʼob teʼ Luʼum Aʼalaʼan u Tsʼaʼabaltiʼoboʼ. Bejlaʼa xaneʼ láayliʼ ku tsʼáaiktoʼon muukʼ utiaʼal u chúukpajal k-óol ken taalak le nojoch muʼyajiloʼ yéetel utiaʼal ka béeyak k-antal teʼ Paraísooʼ. Jeʼex tsʼoʼok k-kanikoʼ unaj u seguer k-adorartik chéen Jéeoba yéetel tuláakal k-puksiʼikʼal, k-tuukul yéetel k-muukʼ. Unaj xan u seguer k-tsʼáaik k-óol utiaʼal ka yanak jeetsʼelil teʼ múuchʼuliloʼ yéetel k-múul bisikba yéetel le sukuʼunoʼoboʼ. Wa ku seguer k-beetik tuláakal lelaʼ, Jesuseʼ yaan u yilkoʼon bey u tamanoʼobeʼ yéetel yaan u yaʼaliktoʼon: «Koʼoteneʼex, teʼex tsʼoʼok a kiʼikiʼtʼantaʼaleʼex tumen in Taata, tiaʼalinteʼex le Reino beetaʼab a tiaʼaleʼex desde ka káaj u síijil wíinik way yóokʼol kaabeʼ» (Mat. 25:34).