Jéeobaeʼ ‹u tsʼaamaj u yóol u yáantech›
¿BAʼAXTEN k-creertik jach u tsʼaamaj u yóol u yáantoʼon Jéeoba? Junpʼéel baʼax beetik k-creertikeʼ letiʼe baʼax ku yaʼalik le Bibliaoʼ. Yáax tiʼ Pedro 5:7, ku yaʼalik: «Pʼateʼex tu kʼab tuláakal le kuuch chiʼichnakkúuntikeʼexoʼ, tumen letiʼeʼ jach u tsʼaamaj u yóol u yáanteʼex». ¿Baʼax eʼesik jach u tsʼaamaj u yóol Dios u yáantoʼon?
DIOSEʼ KU TSʼÁAIK BAʼAX K-JAANTE
Jéeobaeʼ ku tsʼáaiktoʼon junpʼéel maʼalob ejemplo: letiʼeʼ jach uts yéetel ku tsʼáaik baʼax kʼaʼabéettoʼon
Le jatsʼuts modos yaan tiʼ Jéeobaoʼ, letiʼe modos k-kʼáat ka yanak tiʼ juntúul k-amigooʼ. Le amigoʼob ku maas yaabiltik máakoʼ letiʼe ku yeʼeskoʼob u yutsiloʼoboʼ yéetel maʼ tsʼuʼutoʼobiʼ. Jéeobaeʼ sáamsamal ku yeʼesik le jatsʼuts modosoʼob tiʼ toʼonaʼ. Le Bibliaoʼ ku tʼaan tiʼ junpʼéel bix u yeʼesiktoʼon u yutsil: «Ku beetik u jóokʼol Kʼiin tu yóokʼol le kʼasaʼanoʼoboʼ bey xan yóokʼol le utsoʼoboʼ yéetel ku beetik u kʼáaxal jaʼ yóokʼol le utsoʼoboʼ bey xan yóokʼol le kʼasaʼanoʼoboʼ» (Mat. 5:45). ¿Baʼax utsil ku taasik u kʼáaxal le jaʼ yéetel u jóokʼol le Kʼiinoʼ? Yéetel le kaʼapʼéel baʼaloʼobaʼ Dioseʼ ku beetik u yantal baʼal jaantbil, lelaʼ ku beetik u jach yantaltoʼon kiʼimak óolal (Bax. 14:17). Jeʼex k-ilkoʼ Jéeoba beetik u yantal jejeláas baʼal jaantbil way Luʼumeʼ. Tsʼoʼoleʼ, ¿máasaʼ jach ku kiʼimaktal k-óol wa yaan baʼal k-jaante?
Chéen baʼaleʼ, ¿baʼaxten teʼ kʼiinoʼobaʼ yaʼab máakeʼ minaʼan baʼal u jaante? Tumen le gobiernoʼoboʼ tu lugar u yáantkoʼob máakeʼ, chéen ku tsʼíiboltkoʼob u yantaltiʼob yaʼab taakʼin yéetel u maas yantaltiʼob poder. Pero Jéeobaeʼ maʼ kun xáantal ken u xuʼuls le baʼaxoʼob maʼ maʼalobtak ku beetik le gobiernoʼoboʼ. Yaan u luʼsik u gobierno wíinik utiaʼal u pʼáatal chéen u Reino letiʼ, u Reyil le Reinoaʼ Jesucristo. Teʼ kʼiinoʼob jeʼeloʼ mix máak ken u muʼyajt Sal. 37:25). ¿Máasaʼ lelaʼ ku yeʼesiktoʼon jach u tsʼaamaj u yóol u yáantoʼon Jéeoba?
wiʼijil (JÉEOBAEʼ MAʼ TSʼUʼUT YÉETEL U TIEMPOIʼ
Jéeobaeʼ ku tsʼáaiktoʼon junpʼéel maʼalob ejemplo: maʼ tsʼuʼut yéetel u tiempoiʼ
Kaʼatúul amigoʼobeʼ uts tu tʼaan u múul máanskoʼob tiempo. Hasta jeʼel u máan yaʼab horaʼob táan u tsikbaltikoʼob baʼax uts tu tʼaanoʼobeʼ. Juntúul utsul amigo xaneʼ ku chʼenxikintik u amigo ken u tsikbalt baʼax chiʼichnakkúuntik wa baʼax problema yaantiʼ. ¿Kux túun Jéeoba? ¿Bey wa t-éeteloʼ? Beyoʼ, tumen letiʼeʼ jach taak u yuʼubik le oracionoʼob k-beetkoʼ. Le oʼolal le Bibliaoʼ ku yaʼalik: «Maʼ u xuʼulul a orareʼex» yéetel «maʼ u jáawal a orareʼex» (Rom. 12:12; 1 Tes. 5:17).
¿Bukaʼaj tiempo ku jóoʼsik Jéeoba utiaʼal u yuʼubik k-oracionoʼob? Koʼox ilik junpʼéel ejemplo yaan teʼ Bibliaoʼ. Táanil tiʼ u yéeyik Jesús u apostoloʼobeʼ «máan bul áakʼab táan u orar tiʼ Dios» (Luc. 6:12). Ichil le oración tu beetoʼ tu kʼáataj tiʼ u Taata ka áantaʼak u yil máakalmáak le utsul modos yaan tiʼ u disipuloʼoboʼ yéetel máakalmáak unaj u maas maʼalobkíintikoʼobiʼ. Lelaʼ le áant Jesús u yéey maʼalob máaxoʼob ken u beet u apostoloʼob. Jeʼex k-ilkoʼ Jéeobaeʼ uts tu tʼaan u yuʼubik le oracionoʼoboʼ, maases wa ku beetik máak yéetel u jaajil u yóol (Sal. 65:2). Kex ka máanak yaʼab tiempo táan u tsikbaltik máak tiʼ Jéeoba baʼax chiʼichnakkúuntikeʼ, letiʼeʼ maʼatech u náakal u yóol u yuʼube.
DIOSEʼ U KʼÁAT U PERDONARTOʼON
Jéeobaeʼ ku tsʼáaiktoʼon junpʼéel maʼalob ejemplo: u kʼáat u perdonartoʼon
Yaan kʼiineʼ tak le máaxoʼob jach maʼalob u biskubaʼoboʼ maʼ chéen chʼaʼabil u perdonartkubaʼobiʼ. Yaneʼ kex tsʼoʼok u yúuchtal joʼopʼok u biskubaʼobeʼ ku xuʼulul u biskubaʼob tumen maʼ tu perdonaroʼob. Pero Jéeobaeʼ ku perdonar, le Bibliaoʼ ku yaʼalik tiʼ le máaxoʼob uts u puksiʼikʼaloʼob ka u kʼáatoʼob tiʼ Dios ka perdonartaʼakoʼoboʼ, tumen letiʼeʼ jach «nojoch u saʼatsaj» wa jach ku perdonar (Isa. 55:6, 7). ¿Baʼaxten Jéeobaeʼ ku perdonar yéetel u jaajil u yóol?
Tumen letiʼeʼ jach u yaabiltmoʼon. Yoʼolal u yaabilajeʼ tu tsʼáaj tak u kuxtal u Hijo utiaʼal k-jáalkʼabtaʼal tiʼ le kʼeban yéetel tiʼ le muʼyajiloʼ (Juan 3:16). Chéen baʼaleʼ maʼ chéen letiʼe utsil k-kʼamik úuchik u tsʼáaik u kuxtal Jesusoʼ. Tu yoʼolal u kuxtaleʼ Dioseʼ ku páajtal u perdonartik le máaxoʼob u yaabiltmoʼoboʼ. Le apóstol Juanoʼ, tu yaʼalaj: «Wa k-confesartik k-kʼebanoʼobeʼ, Dioseʼ jeʼel u perdonartikoʼoneʼ [...], tumen letiʼeʼ chúukaʼan u yóol yéetel toj baʼax ku beetik» (1 Juan 1:9). Tumen ku perdonartikoʼon Jéeobaeʼ jeʼel u páajtal u seguer k-bisikba tu yéeteleʼ. ¿Máasaʼ lelaʼ ku beetik u kiʼimaktal k-óol?
KU YÁANTKOʼON KEN KʼAʼABÉETCHAJAK
Jéeobaeʼ ku tsʼáaiktoʼon junpʼéel maʼalob ejemplo: ku yáantkoʼon ken kʼaʼabéetchajak
Juntúul maʼalob amigoeʼ ku yáantaj ken kʼaʼabéetchajak. ¿Kux túun Jéeoba bey wa xan u beetkoʼ? Le Bibliaoʼ ku yaʼalik: «Kex [ka lúubuk máax meyajtik Dioseʼ], maʼ bíin pʼáatak luubuliʼ, tumen Yuumtsileʼ u machmaj tu kʼab» (Sal. 37:24). Jéeobaeʼ jejeláas bix u yáantik máaxoʼob meyajtik. Koʼox ilik junpʼéel baʼax úuch Santa Cruz, junpʼéel isla yaan teʼ Caribeoʼ.
Juntúul chan x-chʼúupal maʼatech u saludartik le bandera yoʼolal baʼax u kanmaj teʼ Bibliaoʼ, ku sen aʼalaʼal baʼal tiʼ tumen u yéet xookoʼob. Ka tsʼoʼok u sen orar tiʼ Jéeobaeʼ tu yuʼubaj jeʼel u béeytal u tsolik yéetel x-maʼ saajkil baʼax ku creertikeʼ. Ka aʼalaʼabtiʼ ka tʼaanak tiʼ wa baʼax temail tu táan u yéet xookoʼobeʼ, tu aprovechartaj u tʼaan yoʼolal u saludartaʼal le banderaoʼ. Meyajnajtiʼ U libroi tsikbaliloʼob tiʼ le Bibliaoʼ, utiaʼal u tsolik bix áantaʼabik u chúukpajal u yóol u beet baʼax uts tu tʼaan Jéeoba jeʼex tu beetil Sadrac, Mesac yéetel Abednegoeʼ. Letiʼeʼ tu yaʼalaj: «Jéeobaeʼ tu kanáantaj le óoxtúul xiʼipalaloʼobaʼ tumen maʼ tu yóotoʼob chintal tu táan junpʼéel imageniʼ». Ka tsʼoʼokeʼ tu yeʼesaj le libro tiʼ u yéet xookoʼoboʼ, 11 u túulaloʼobeʼ tu chʼaʼajoʼob le librooʼ. Le chan x-chʼúupalaʼ kiʼimakchaj u yóol tumen tu tsʼáaj cuenta Jéeoba áante yéetel tu tsʼáaj naʼat tiʼ utiaʼal maʼ u chʼaʼik saajkil u tsol baʼax ku creertik.
Wa yaan kʼiin ka wuʼuyik bey maʼatech u yáantkech Jéeobaeʼ, tuukulnen tiʼ le tʼaanoʼob ku chíikpajal tiʼ tekstoʼob jeʼex Salmo 34:17 tak 19; 55:22 yéetel 145:18 yéetel 19. Kʼáat xan tiʼ uláakʼ sukuʼunoʼob ka u tsikbaltoʼobtech bix tsʼoʼok u kanáantaʼaloʼob tumen Jéeoba. Ken kʼaʼabéetchajak a wáantaʼal tumen Dioseʼ orarnen tiʼ letiʼ. Beyoʼ yaan a tsʼáaik cuentaeʼ Jéeobaeʼ ‹u tsʼaamaj u yóol u yáantech›.