Ku chíikbesik le angeloʼob táakpajoʼob le ka xuʼulsaʼab Jerusalenoʼ. Letiʼob xan kun táakpajloʼob ken xuʼulsaʼak tiʼ u kʼasaʼan yóokʼol kaab Satanás teʼ Armagedonoʼ. ¿Baʼaxten tsʼoʼok u kʼexpajal bix u naʼataʼal le baʼax tsʼaʼab u yil Ezequieloʼ?

Antes tiʼ u xuʼulsaʼal Jerusalén teʼ año 607 táanil tiʼ u taal Jesusoʼ, tiʼ Ezequieleʼ tsʼaʼab u yil le baʼaloʼob kʼaastak ku beetaʼal Jerusalén tumen le israelitaʼob tu beetubaʼob apostataʼoboʼ. Tsʼoʼoleʼ tsʼaʼab u yil xan tumen Jéeoba le baʼaxoʼob kun úuchul antes tiʼ u xuʼulsaʼal le kaajoʼ. Ezequieleʼ tu yilaj seis u túulal máakoʼob u machmoʼob u nuʼukulil xuʼulsaj. Chúumuk tiʼ letiʼobeʼ tiaʼan juntúul máak u búukíintmaj u nookʼ de lino yéetel u chʼaʼamaj «u nuʼukuloʼob u yúuchul tsʼíib» (Eze. 8:6-12; 9:2, 3). Tiʼ le máakaʼ aʼalaʼab: «Xíimbalt [le kaajoʼ] ku tsʼoʼokoleʼ tsʼáa junpʼéel chíikul tu táan poolal le máaxoʼob ku yaj óoltikoʼob tuláakal le pʼekbeʼen baʼaloʼob ku yúuchuloʼob ichiloʼ». Ku tsʼoʼokoleʼ tiʼ le máakoʼob u machmoʼob u nuʼukulil xuʼulsajoʼ aʼalaʼabtiʼob ka u kíimsoʼob tuláakal u kajnáaliloʼob le kaaj minaʼan tiʼob le chíikulal wa le marcaoʼ (Eze. 9:4-7). ¿Baʼax ku kaʼansiktoʼon le baʼax tu yilaj Ezequieloʼ? ¿Máax ku chíikbesik le máak u chʼaʼamaj u nuʼukulil tsʼíiboʼ?

Le profecíaaʼ aʼalaʼab tu añoil 612 táanil tiʼ u taal Jesús yéetel máan cinco años ka yáax béeychaji. Lelaʼ úuch le ka xuʼulsaʼab u kaajil Jerusalén tu añoil 607 tumen le babilonioʼoboʼ. Utiaʼal u béeychajal le baʼax u yaʼalmoʼ Jéeobaeʼ tu chaʼaj u xuʼulsaʼal le kaaj tumen le babilonioʼoboʼ (Jer. 25:9, 15-18). Bey túunoʼ Dioseʼ tu xuʼulsaj u kaajil Jerusalén tumen tu beetuba apostatail. Pero chéen tu xuʼulsaj le máaxoʼob beetik baʼax kʼaasoʼ, le máaxoʼob beetik baʼax utsoʼ tu salvartoʼob. Jéeobaeʼ u yaabiltmaj le judíoʼob u pʼekmoʼob le baʼaloʼob kʼaastak ku sen beetaʼal teʼ kaajoʼ, le oʼolal tu yilaj baʼax ken u beet utiaʼal u salvartikoʼob.

Ezequieleʼ maʼ máan u tsʼáa junpʼéel marca tu táan u pool cada máakiʼ mix táakpaj utiaʼal u xuʼulsaʼaloʼobiʼ. Le máaxoʼob táakpajoʼob utiaʼal le xuʼulsajilaʼ letiʼe angeloʼoboʼ. Le profecíaaʼ ku yáantkoʼon k-ojéelt le baʼaxoʼob úuch teʼ kaʼanoʼ. Jéeobaeʼ maʼ chéen tu yaʼalaj tiʼ le angeloʼob ka u xuʼulsoʼob tiʼ le kʼasaʼan máakoʼoboʼ, baʼaxeʼ tu yaʼalaj xan tiʼob ka u yéeyoʼob le máaxoʼob utsoʼob utiaʼal ka salvartaʼakoʼoboʼ. *

U profecíail Ezequieleʼ yaan baʼax ku chíikbesik teʼ kʼiinoʼobaʼ. Kaʼacheʼ k-aʼalikeʼ le máak u chʼaʼamaj u nuʼukulil tsʼíiboʼ letiʼe yéeyaʼanoʼob pʼáatloʼob way luʼumoʼ. K-aʼalik xaneʼ le máaxoʼob kʼamik u maʼalob péektsilil le Reinooʼ ku kʼamkoʼob junpʼéel marca utiaʼal maʼ u xuʼulsaʼaloʼob. Chéen baʼaleʼ teʼ tu tsʼook añosaʼ t-tsʼáaj cuenta tsʼoʼok u maas naʼataʼal le baʼax ku chíikbesik le profecíaaʼ. Jeʼex u yaʼalik Mateo 25:31 tak 33, Jesús juzgartik le máakoʼoboʼ. Letiʼ kun beetik le u tsʼook juicio kun antal tu kʼiiniloʼob le nojoch muʼyajiloʼ. Letiʼeʼ yaan xan u jatsik le máaxoʼob beyoʼob tamanoʼob utiaʼal ka u salvartubaʼoboʼ yéetel le máaxoʼob beyoʼob chivoʼoboʼ yaan u xuʼulsaʼaltiʼob.

Yoʼolal le baʼax tsʼoʼok u maas naʼataʼalaʼ, ¿baʼax jeʼel k-kanik tiʼ le baʼax tsʼaʼab u yil Ezequieloʼ? Koʼox ilik cinco u pʼéeleliʼ:

1.  Táanil tiʼ u xuʼulsaʼal Jerusaleneʼ, Ezequiel yéetel Jeremíaseʼ yaʼab u téenel tu yaʼaloʼob tiʼ le kaaj baʼax ku taal u kʼiinil u yúuchul, jeʼel bix tu beetil xan Isaíasoʼ. Teʼ kʼiinoʼob xanaʼ Jéeobaeʼ u yaʼalmaj tiʼ u chan múuchʼ sukuʼunoʼob yéeyaʼanoʼob ka u tsʼáaʼob le kaʼansaj kʼaʼabéet tiʼ u kaajaloʼ yéetel ka u kʼaʼaytoʼob le xuʼulsajil táanil tiʼ u káajal le nojoch muʼyajiloʼ. Letiʼob yéetel le u maasil máaxoʼob meyajtik Diosoʼ táan u múul meyajoʼob utiaʼal u kʼaʼaytikoʼob le baʼax ku taal u kʼiinil u yúuchloʼ (Mat. 24:45-47).

2.  Ezequieleʼ maʼ máan u tsʼáa junpʼéel marca tu táan u pool cada máakiʼ mix táakpaj utiaʼal u xuʼulsaʼaloʼobiʼ, lelaʼ maʼatech u beetik xan le máaxoʼob meyajtik Dios teʼ kʼiinoʼobaʼ. Letiʼobeʼ chéen ku tsʼáaikoʼob  ojéeltbil baʼax ken u beet Jéeoba pero letiʼe angeloʼob nuʼuktik le kʼaʼaytaj ku beetkoʼoboʼ (Apo. 14:6).

3.  Tu kʼiiniloʼob Ezequieleʼ tiʼ mix máak jach tsʼaʼab junpʼéel marca tu táan u pool, teʼ kʼiinoʼob xanaʼ láayliʼ maʼatech u tsʼaʼabal junpʼéel marca tu táan u pool le máakoʼoboʼ. ¿Baʼax túun unaj u beetkoʼob utiaʼal ka u salvartubaʼob? Kʼaʼabéet u kʼamkoʼob u maʼalob péektsilil le Reinooʼ, u kuxtaloʼob jeʼex Jesuseʼ, u kʼubik u kuxtaloʼob tiʼ Jéeoba yéetel u yáantkoʼob u sukuʼunoʼob Cristo (Mat. 25:35-40). Tuláakal lelaʼ bey men cuenta letiʼe marca kʼaʼabéet u tsʼaʼabaltiʼob tu kʼiiniloʼob le nojoch muʼyajiloʼ.

4.  Teʼ kʼiinoʼobaʼ tsʼoʼok k-maas naʼatikeʼ, le máak u chʼaʼamaj u nuʼukulil tsʼíiboʼ ku chíikbesik Jesucristo, letiʼe máax kun tsʼáaik le marca tiʼ le máaxoʼob ken u salvartubaʼoboʼ. Le yaʼabkach máakoʼob ken u salvartubaʼoboʼ yaan u tsʼaʼabaltiʼob le marca tu kʼiiniloʼob le nojoch muʼyajiloʼ, teʼ tiempo xanaʼ tiʼ ken u yaʼal Jesús máaxoʼob beyoʼob tamaneʼ. Ken úuchuk lelaʼ yaan u yantaltiʼob u páajtalil u kuxtaloʼob utiaʼal minaʼan u xuul way Luʼumeʼ (Mat. 25:34, 46). *

5.  Teʼ kʼiinoʼobaʼ le seis máakoʼob u machmoʼob u nuʼukulil xuʼulsajoʼ ku chíikbesik le angeloʼob kun nuʼuktbiloʼob tumen Jesús utiaʼal le baʼateloʼ. Le angeloʼobaʼ maʼ kun xáantaleʼ yaan u xuʼulskoʼob tiʼ tuláakal le máakoʼob ken u tsʼáaubaʼob tu contra Jéeobaoʼ bey xan tiʼ le baʼaloʼob kʼaastakoʼ (Eze. 9:2, 6, 7; Apo. 19:11-21).

K-naʼatik tubeel le profecíaaʼ ku yáantkoʼon k-kʼub k-óol tiʼ Jéeoba tumen letiʼeʼ maʼ ken u xuʼuls le máaxoʼob utsoʼob ken u xuʼuls le máaxoʼob kʼasaʼanoʼoboʼ (2 Ped. 2:9; 3:9). Ku kaʼansik xan toʼoneʼ jach kʼaʼanaʼan u kʼaʼaytaj máak teʼ kʼiinoʼobaʼ. Jach taʼaytak u taal le xuʼulsajiloʼ, le oʼolal tuláakal máak kʼaʼabéet u yojéeltik baʼax ku taal u kʼiin (Mat. 24:14).