1. ¿Bix u yáantkoʼon le baʼaxoʼob k-aʼalik ken kʼaaynakoʼonoʼ?

JUNTÚUL máax jach kʼaj óolaʼan ku tsʼíibtik kʼaayoʼobeʼ ku yaʼalikeʼ le tʼaanoʼoboʼ ku beetik u tuukul máak, le paaxoʼ ku kʼujsik t-puksiʼikʼal baʼax ku yaʼalaʼal, baʼaleʼ le kʼaayoʼ ku beetik k-uʼuyik le baʼax k-tuklikoʼ. Minaʼan uláakʼ baʼax maas maʼalob ka «k-uʼuy» le baʼax k-tuklik yoʼolal Jéeoba, k-Taata yaan teʼ kaʼanoʼ, jeʼex le tʼaanoʼob ku meyaj tiʼ le kʼaayoʼob utiaʼal k-tsʼáaik nojbeʼenil tiʼ yéetel aʼaliktiʼ bukaʼaj k-yaabiltmiloʼ. Toʼoneʼ k-ojel le kʼaayoʼ táakaʼan ichil le adoración k-tsʼáaik tiʼ Jéeobaoʼ, kex ka kʼaaynakoʼon t-juunal wa teʼ múuchʼuliloʼ.

2, 3. 1) ¿Bix u yuʼubikuba jujuntúul sukuʼunoʼob tu yorail le kʼaay teʼ múuchʼuliloʼ? 2) ¿Baʼax kʼáatchiʼiloʼob ken k-xakʼalt teʼ xookaʼ?

² ¿Jatsʼuts wa k-ilik k-kʼaay kʼaʼam teʼ múuchʼuliloʼ wa k-suʼlaktal? Yaan tuʼuxeʼ le xiiboʼoboʼ suʼlakoʼob kʼaay tuʼux yaan yaʼab máak. Lelaʼ maʼ tu yáantik le sukuʼunoʼob teʼ múuchʼuliloʼ, maases wa le ancianoʼob chéen x-mukul kʼaay ku beetkoʼoboʼ bey xan wa yaanal baʼax ku beetkoʼob tu yorail le kʼaayoʼ (Sal. 30:12).

³ Wa jach tu jaajil k-naʼatik táakaʼan le kʼaay ichil le adoración k-tsʼáaik tiʼ Diosoʼ, maʼ ken k-jóokʼol tu yorail le kʼaay teʼ muchʼtáambaloʼ. Maʼalob ka k-tukle: «¿Bix in wilik le kʼaayoʼob teʼ  muchʼtáambaloʼ? ¿Baʼax jeʼel u yáantken utiaʼal maʼ in sajaktal kʼaay yéetel kiʼimak óolaleʼ? ¿Baʼax jeʼel u páajtal in beetik utiaʼal in kʼaay tu jaajil in wóoleʼ?».

4, 5. ¿Baʼaxten k-aʼalik le israelitaʼoboʼ kʼaaynajoʼob utiaʼal u adorartikoʼob Jéeoba?

⁴ Le máaxoʼob meyajtik Diosoʼ úuch joʼopʼok u meyajtiʼob kʼaayoʼob utiaʼal u tsʼáaikoʼob nojbeʼenil tiʼ Jéeoba. Jeʼex le israelitaʼoboʼ, le táan u beetkoʼob baʼax ku yaʼalik Diosoʼ, tu táakbesoʼob le kʼaayoʼob ichil u adoracionoʼoboʼ. Le ka jaʼats le meyajoʼob kun beetbil teʼ templo tumen rey Davidoʼ, tu tsʼáaj cuatro mil levitaʼob paax. Ichiloʼobeʼ 288 u túulaloʼobeʼ «kaʼansaʼanoʼob kʼaay utiaʼal Yuumtsil» (1 Cró. 23:5; 25:7).

⁵ Le ka kʼuʼub le templo xanoʼ táakbesaʼab paax yéetel kʼaayoʼobiʼ. Le Bibliaoʼ ku yaʼalik: «Ka joʼopʼ u paaxoʼob yéetel u kʼaʼamkach kʼaayoʼob táan u tsʼáaikoʼob nib óolal tiʼ Yuumtsil, tu paxajoʼob mejen campanaob, platilloʼob yéetel tuláakal u jejeláasil paaxoʼob kaʼalikil táan u kʼaʼayal: [...] le templooʼ, chuʼup tu yéetel u nojbeʼenil Yuumtsil». Bukaʼaj wal muʼukʼaʼanchajik u fe le israelitaʼob teʼ kʼiin jeʼeloʼ (2 Cró. 5:13, 14; 7:6).

6. ¿Bix úuchik u meyaj le paax yéetel le kʼaay tu kʼiiniloʼob táan u gobernar Nehemías Jerusalenoʼ?

⁶ Le ka jel líiʼsaʼab u baʼpakʼiloʼob Jerusaleneʼ, le gobernador Nehemíasoʼ tu tsʼáaj u jaats levitaʼob kʼaay yéetel paax. Le ka tsʼoʼoksaʼab le baʼpakʼoʼoboʼ paaxnajoʼob utiaʼal u maas eʼeskoʼob kiʼimak u yóoloʼob. Tsʼoʼoleʼ jóoʼsaʼab kaʼajaats tiʼ le máaxoʼob ku kʼaayoʼob utiaʼal u tsʼáaikoʼob gracias tiʼ Diosoʼ. Cada jaatseʼ yaanal tséelil xíimbalnaj yóokʼol le pakʼ tak ka nupʼlan ichnajoʼob naatsʼ tiʼ le templooʼ. Tumen jach kʼaʼam úuchik u kʼaayoʼobeʼ uʼuyaʼab tak náachil (Neh. 12:27, 28, 31, 38, 40, 43). Bukaʼaj wal úuchik u kiʼimaktal u yóol Jéeoba ka tu yuʼubaj u kʼaay le israelitaʼob yéetel kiʼimak óolaloʼ.

7. ¿Bix úuchik u yeʼesik Jesús yéetel u disipuloʼob unaj u kʼaay máak utiaʼal u adorartik Dios?

⁷ Tu kʼiiniloʼob Jesuseʼ láayliʼ suukaʼan u yúuchul kʼaay utiaʼal u adorartaʼal Jéeobaeʼ. Le ka tsʼoʼok u káajsik U Ookʼin Janal Yuumtsil, le áakʼab maas jach ku kʼaʼajsaʼaloʼ, Jesuseʼ kʼaaynaj yéetel u disipuloʼob (xok Mateo 26:30).

8. ¿Baʼax tu beetaj le sukuʼunoʼob teʼ yáax siglo unaj k-beetik xanoʼ?

⁸ Le sukuʼunoʼob teʼ yáax siglooʼ múul kʼaaynajoʼob xan utiaʼal u adorartikoʼob Dios. Letiʼobeʼ maʼatech u muchʼkubaʼob teʼ templooʼ, baʼaxeʼ chéen tu yotoch le sukuʼunoʼoboʼ, kex beyoʼ kʼaaynajoʼob yéetel tuláakal u puksiʼikʼaloʼob. Yéetel u nuʼuktaj Dioseʼ, apóstol Pabloeʼ tu yaʼalaj tiʼ le sukuʼunoʼoboʼ: «Maʼ u xuʼulul a paklan kaʼanskabaʼex yéetel a paklan líiʼsik a wóoleʼex ta baatsileʼex táan a kʼaykeʼex salmoʼob, kiʼikiʼtʼaanoʼob utiaʼal Dios yéetel kiliʼich kʼaayoʼob utiaʼal a tsʼáaikeʼex gracias» (Col. 3:16). Bey unaj k-kʼayik le «kiliʼich kʼaayoʼob» ku taasik u libroil le kʼaayoʼoboʼ. Le kʼaayoʼobaʼ táakaʼanoʼob ichil le kaʼansaj ku keʼetel yéetel janal ku tsʼáaik le «palitsil chúukaʼan u yóol yéetel yaan u naʼa[toʼ]» (Mat. 24:45).

9. 1) ¿Baʼaxten yaan sukuʼunoʼobeʼ suʼlakoʼob kʼaay kʼaʼam teʼ muchʼtáambaloʼob wa teʼ asambleaʼoboʼ? 2) ¿Bix unaj k-kʼaay tiʼ Jéeoba, yéetel máaxoʼob unaj u yeʼeskoʼob bix unaj u beetaʼal? (Ilawil le foto yaan tu káajbal le xookaʼ.)

⁹ Maʼ xaaneʼ suʼlakoʼon kʼaay, tumen  maʼ suukbesaʼabtoʼon t-otochiʼ mix teʼ tuʼux líikʼoʼonoʼ. Wa maʼ xaaneʼ ken k-uʼuy bix u kʼaay le máakoʼob teʼ radio wa teʼ televisionoʼ, k-suʼlaktal, tumen maʼ jatsʼuts k-kʼaay jeʼex u beetkoʼoboʼ. Baʼaleʼ lelaʼ maʼ unaj u beetik u pʼáatal maʼ k-kʼaay tiʼ Jéeobaiʼ. Baʼaxeʼ unaj k-tsʼáaik tu pʼiis kaʼanlil u libroil k-kʼaay yéetel maʼ k-chinik k-pool utiaʼal k-kʼaay tu jaajil k-óol (Esd. 3:11; xok Salmo 147:1). Tiʼ yaʼab u Najiloʼob Reino bejlaʼeʼ, tsʼaʼan nukuch televisionoʼob utiaʼal u chíikpajal u letrail le kʼaayoʼoboʼ. Lelaʼ jeʼel u yáantkoʼon utiaʼal k-kʼaay kʼaʼameʼ. Tsʼoʼoleʼ teʼ Escuela tiʼ Ministerio tiʼ le Reinooʼ yaan u yúuchul kʼaayiʼ. Lelaʼ ku yeʼesikeʼ le ancianoʼoboʼ unaj u kʼaayoʼob teʼ muchʼtáambaloʼoboʼ, beyoʼ ku yeʼeskoʼob tiʼ u maasil bix unaj u beetkoʼob.

10. ¿Baʼax unaj k-kʼaʼajsik wa suʼlakoʼon kʼaay kʼaʼam?

¹⁰ Yaan sukuʼunoʼob xaneʼ maʼatech u kʼaayoʼob kʼaʼam, tumen suʼlakoʼob u yuʼubaʼal bix u kʼaayoʼob wa tumen ku tuklikoʼob maʼ jatsʼuts bix u kʼaayoʼobiʼ. Baʼaleʼ maʼalob ka k-tukle: ken tʼaanakoʼoneʼ «k-tʼóochpajal yaʼab u téenel», baʼaleʼ maʼatech u xuʼulul k-tʼaan yoʼolal leloʼ (Sant. 3:2). Bey túun xanoʼ maʼ unaj u xuʼulul k-kʼaay tiʼ Jéeoba chéen tumen k-tuklik maʼ jatsʼuts k-kʼaayiʼ.

11, 12. ¿Baʼax jeʼel u yáantkoʼon utiaʼal k-maʼalobkíintik k-kʼaayeʼ?

¹¹ Maʼ xaaneʼ k-sajaktal kʼaay, tumen maʼ k-ojel bix jeʼel k-beetik tubeeleʼ. Koʼoneʼex ilik jujunpʼéel baʼaxoʼob jeʼel u yáantkoʼon k-maʼalobkíinteʼ. *

¹² Junpʼéel baʼax jeʼel u yáantkoʼon utiaʼal ka kʼaaynakoʼon kʼaʼameʼ letiʼe ka k-chʼaʼ k-iikʼ  tubeeloʼ. Jeʼex le corriente ku beetik u tʼáabal junpʼéel focooʼ, u chʼaʼik u yiikʼ máak tubeeleʼ ku yáantaj utiaʼal u tʼaan yéetel u kʼaay kʼaʼam. Kʼaʼabéet k-kʼaay jeʼex u kʼaʼamil k-tsikbaleʼ (ilawil baʼax ku yaʼalik le libro Jóoʼs u yutsil le Escuela utiaʼal k-Kaʼansik u Tʼaan Diosoʼ, táan juʼun 181 tak 184, teʼ joʼol xook «Kan a chʼaʼ a wiikʼ»). Le Bibliaoʼ ku yaʼalik tiʼ le máaxoʼob meyajtik Dios ka awat kʼaaynakoʼob yéetel kiʼimak óolaloʼ (Sal. 33:1-3).

13. ¿Baʼax jeʼel u yáantkoʼon utiaʼal maʼ k-sajaktal kʼaayeʼ?

¹³ Ken k-beet le adoración ich familia wa ken yanakoʼon t-juunaleʼ maʼalob ka k-yéey junpʼéel tiʼ le kʼaayoʼob uts t-ichoʼ ka k-xok kʼaʼam, ken tsʼoʼokkeʼ k-chʼaʼik k-iikʼeʼ k-xokik juntaatsʼ tuláakal junxóotʼiʼ, ken tsʼoʼokkeʼ k-kʼayik jeʼex kʼaʼamil úuchik k-xokikoʼ (Isa. 24:14). Ken k-beet beyaʼ yaan k-uʼuyik maas kʼaʼam ken k-kʼaay, lelaʼ jach maʼalob. Maʼ k-sajaktal mix k-suʼlaktal kʼaay.

14. 1) ¿Baʼaxten unaj u maas japik u chiʼ máak ken kʼaaynak? (Ilawil le cuadro « Bix jeʼel k-kʼaay tubeeleʼ».) 2) ¿Baʼaxoʼob jeʼel u yáantik máak u maʼalobkíint u kʼaayeʼ?

¹⁴ Utiaʼal u kʼaʼamtal k-tʼaaneʼ kʼaʼabéet k-japik k-chiʼ tubeel. Le oʼolal le ken kʼaaynakoʼoneʼ maʼalob ka k-jap k-chiʼ junpʼíit maas tiʼ le ken tʼaanakoʼonoʼ. ¿Kux túun wa k-uʼuyik láayliʼ maʼ kʼaʼam k-kʼaay bey xan wa jach chʼeʼejeʼ? Wa beyoʼ jeʼel u yáantkoʼon le baʼax ku yaʼalik le táan juʼun 184 tiʼ le libro Jóoʼs u yutsil le Escuela utiaʼal k-Kaʼansik u Tʼaan Diosoʼ, teʼ cuadro «Bix jeʼel u maʼalobtal u tʼaan máakeʼ».

15. 1) ¿Baʼax tsʼaʼab ojéeltbil teʼ muchʼtáambal beetaʼab 2016? 2) ¿Baʼaxten kʼaʼabéetchaj u jóoʼsaʼal u jeel u libroil le kʼaayoʼoboʼ?

¹⁵ Teʼ muchʼtáambal ku beetaʼal cada jaʼab tumen le Watch Tower Bible and Tract Society of Pennsylvania beetaʼab 2016, tsʼaʼab  ojéeltbil junpʼéel baʼal jatsʼuts. Le sukuʼun Stephen Lett, ku meyaj ichil le Cuerpo Gobernanteoʼ, tu yaʼalaj tsʼoʼok u jóoʼsaʼal junpʼéel u túumben libroil kʼaay. U kʼaabaʼeʼ Kʼaaynen yéetel kiʼimak óolal tiʼ Jéeoba. Le sukuʼunoʼ tu yaʼaleʼ kʼaʼabéetchaj u jel jóoʼsaʼal yoʼolal le tʼaanoʼob kʼexpaj teʼ Biblia Traducción del Nuevo Mundo de las Santas Escrituras jóoʼsaʼab ich inglés tu jaʼabil 2013. Lelaʼ áantajnaj utiaʼal u luʼsaʼal wa u kʼeʼexel úuchben tʼaanoʼobiʼ. Tsʼoʼoleʼ beetaʼab uláakʼ kʼaayoʼob ku tʼaanoʼob tiʼ le kʼaʼaytajoʼ yéetel tiʼ le u kuxtal Jesús tu kʼuboʼ. Tsʼoʼoleʼ tumen yaan u sen meyajtoʼon utiaʼal k-adorartik Jéeobaeʼ, le Cuerpo Gobernanteoʼ tu chʼaʼtuklaj u jóoʼsik junpʼéel libro maʼ séeb u kʼastal, jeʼex le túumben Bibliaoʼ.

16, 17. ¿Baʼax kʼeexiloʼob ku taasik u túumben libroil le kʼaayoʼoboʼ?

¹⁶ Le túumben librooʼ tsʼaʼab tu tsoolol tiʼ baʼax ku tʼaan utiaʼal maʼ u talamtal u meyaj tiʼ máak. Le yáax 12 u pʼéelaloʼ ku tʼaanoʼob tiʼ Jéeoba, le uláakʼ 8 u pʼéelaloʼ ku tʼaan tiʼ Jesús yéetel tiʼ u kuxtal tu kʼuboʼ, lelaʼ bey beetaʼabik uláakʼ jaatsoʼoboʼ. Tu káajbal le libro xanoʼ ku taasik u kʼaabaʼ tuláakal le kʼaayoʼoboʼ. Lelaʼ maases yaan u meyaj utiaʼal u kaxtaʼal u kʼaayil le tsoltʼaanoʼoboʼ.

¹⁷ Utiaʼal k-kʼaay tu jaajil k-óoleʼ, kʼeʼex u letrail jujunpʼéel kʼaayoʼob utiaʼal u séeb naʼataʼal yéetel u kʼaʼayal. Tsʼoʼoleʼ luʼsaʼab xan tʼaanoʼob maʼ jach suukaʼan u meyaj teʼ kʼiinoʼobaʼ. Kʼeʼex xan u letrail yaʼab tiʼ le kʼaayoʼob utiaʼal u tsʼaʼabal junpʼéel sílaba yáanal junpʼéel u notail le kʼaayoʼ. Tsʼoʼoleʼ le kʼaay «Kanáant a puksiʼikʼal» xanoʼ kʼeʼex u letrail. Beyoʼ teʼ muchʼtáambaloʼob yéetel teʼ asambleaʼoboʼ maʼ tu yuʼubaʼal bey letiʼe táankelmoʼob, le kiikoʼob wa le túumbenoʼob aʼalik tiʼ u maasil baʼax unaj u beetkoʼoboʼ.

18. ¿Baʼaxten kʼaʼabéet k-kʼaj óoltik le kʼaayoʼob ku taasik u libroil kʼaayoʼoboʼ? (Ilawil xan le tsolajiloʼ.)

¹⁸ Yaʼab tiʼ le kʼaayoʼob ku taasik le libro Kʼaaynen yéetel kiʼimak óolal tiʼ Jéeobaoʼ tsʼíibtaʼanoʼob bey junpʼéel oración tiʼ Dioseʼ. Lelaʼ ku yáantaj utiaʼal k-aʼaliktiʼ jach bix k-uʼuyikba. Uláakʼ kʼaayoʼobeʼ ku yáantkoʼon k-líiʼs u yóol le sukuʼunoʼob u yeʼesoʼob yaabilajoʼ yéetel ka u beetoʼob baʼaloʼob maʼalobtak (Heb. 10:24). Le oʼolal maʼalob ka k-kʼaj óolt bix u bin u paaxil, u séebil yéetel baʼax ku yaʼalaʼal ichil le kʼaayoʼoboʼ. Utiaʼal lelaʼ jeʼel u yáantkoʼon k-uʼuyik bix u kʼaʼayal teʼ sitio jw.org ich españoloʼ. Wa k-ensayartik le kʼaayoʼob t-otochoʼ yaan k-kanik k-kʼayoʼob tu jaajil k-óol. *

19. ¿Bix jeʼel k-adorartik Jéeoba tuláakloʼon teʼ múuchʼuliloʼ?

¹⁹ Kʼaʼajaktoʼoneʼ le kʼaayoʼ táakaʼan ichil le adoración k-tsʼáaik tiʼ Jéeobaoʼ. Junpʼéel bix k-eʼesiktiʼ k-yaabiltmaj yéetel k-tsʼáaik u graciasil tiʼ yoʼolal baʼaxoʼob ku beetik t-oʼolal (xok Isaías 12:5). Ken kʼaaynakoʼon kʼaʼam yéetel kiʼimak óolaleʼ, k-líiʼsik u yóol u maasil ka u beetoʼob xan beyoʼ. Le táankelmoʼoboʼ, le tsʼoʼok u yantal u jaʼabiloʼob yéetel le túumbenoʼob teʼ múuchʼuliloʼ, unaj u kʼaayoʼob yéetel kiʼimak óolal utiaʼal u adorartikoʼob Dios. Le oʼolal maʼ k-sajaktal kʼaay tu jaajil k-óol. Unaj k-beetik le baʼax ku yaʼalik le Bibliaaʼ: «Kʼaayneneʼex tiʼ Yuumtsil». ¡Kʼaaynakoʼon yéetel kiʼimak óolal tiʼ Jéeoba! (Sal. 96:1.)