¿Ku yuʼubik wa Dios le oraciónoʼoboʼ?
Yaan máakoʼobeʼ taak u yojéeltikoʼob wa ku yuʼubaʼaloʼob tumen Dios kéen orarnakoʼob. Techeʼ, ¿bey wa xan a wuʼuyikabaoʼ? Yaʼab máakoʼobeʼ le táan u muʼyajoʼoboʼ tsʼoʼok u kʼáatkoʼob u yáantaj Dios. Chéen baʼaleʼ kex tu kʼáatoʼobeʼ maʼ xuʼuluk u muʼyajoʼobiʼ. ¿Leloʼ u kʼáat wa u yaʼal maʼatech u yuʼubik Dios k-oración? Maʼatech. Le Bibliaoʼ ku yaʼalikeʼ wa k-orar jeʼex u kʼáat Dioseʼ yaan u yuʼubikoʼon. Koʼox ilik bix u yaʼalik.
DIOSEʼ KU YUʼUBIKOʼON
«Teech uʼuyik le oraciónoʼoboʼ, le oʼolal tuláakal máak ken u natsʼuba ta wiknal» (Salmo 65:2).
Yaan máakoʼobeʼ kex ku tuklikoʼob mix máak uʼuyikoʼobeʼ ku oraroʼob tumen leloʼ ku beetik u yuʼubikubaʼob maʼalob. Chéen baʼaleʼ le oraciónoʼ maʼ chéen junpʼéel baʼal ku meyaj utiaʼal u yantaltoʼon jeetsʼeliliʼ. Le Bibliaoʼ ku yaʼalikeʼ «Jéeobaeʼ * tiaʼan naatsʼ tiʼ tuláakal le máaxoʼob chʼaʼchiʼitik u kʼaabaʼoʼ, le máaxoʼob yéetel u jaajil u yóoloʼob ku beetkoʼoboʼ [...], ku salvarkoʼob le kéen u yuʼub táan u kʼáatkoʼob áantaj» (Salmo 145:18, 19).
Jeʼex k-ilkoʼ Jéeobaeʼ ku yuʼubik u oración le máaxoʼob adorarkoʼ. Letiʼeʼ yéetel yaabilaj ku yaʼaliktoʼon: «Teʼexeʼ yaan a tʼankeneʼex, yaan a náatsʼleʼex tin wiknal yéetel yaan a orareʼex tiʼ teen, teen túuneʼ yaan in chʼenxikintikeʼex» (Jeremías 29:12).
DIOSEʼ U KʼÁAT KA ORARNAKECH TIʼ LETIʼ
«Maʼ u xuʼulul a orareʼex» (Romanos 12:12).
Le Bibliaoʼ ku yaʼaliktoʼon ka orarnakoʼon mantatsʼ tiʼ Dios. Lelaʼ ku yeʼesikeʼ Jéeoba Dioseʼ u kʼáat ka orarnakoʼon tiʼ letiʼ (Mateo 26:41; Efesios 6:18).
¿Baʼaxten u kʼáat Dios ka orarnakoʼon? Tuukulnen tiʼ lelaʼ: ¿Máasaʼ tuláakal taatatsil uts tu tʼaan ka kʼáataʼak áantaj tiʼ tumen u chan hijo? Maʼ xaaneʼ le taatatsiloʼ u yojel baʼax kʼaʼabéet tiʼ u chan hijo chéen baʼaleʼ kéen u yuʼub u kʼáataʼal áantaj tiʼeʼ ku kiʼimaktal u yóol tumen u yojel ku confiar u chan hijo tiʼ letiʼ yéetel yaabiltaʼan. Jeʼex le taatatsilaʼ kéen orarnakoʼon tiʼ Dioseʼ k-eʼesik confiar tiʼ letiʼ yéetel k-kʼáat náatsʼal tu yiknal (Proverbios 15:8; Santiago 4:8).
DIOSEʼ JACH U KʼÁAT U YÁANTECH
«Pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:7).
Dioseʼ u kʼáat ka orarnakoʼon tiʼ letiʼ tumen u yaabiltmoʼon. Letiʼeʼ u yojel baʼax k-muʼyajtik yéetel u kʼáat u yáantoʼon.
Úuchjeakileʼ le rey Davidoʼ tu kʼáataj u yáantaj Dios yéetel tu tsikbaltajtiʼ bix u yuʼubikuba (Salmo 23:1-6). ¿Bix ilaʼabik le baʼax tu beetaj David tumen Diosoʼ? Le Bibliaoʼ ku yaʼalikeʼ jach yaabiltaʼabi yéetel uʼuyaʼab u oraciónoʼob (Hechos 13:22). Jeʼex k-ilkoʼ Dioseʼ jeʼel xan u yuʼubikoʼoneʼ tumen u yaabiltmoʼon.
«TENEʼ IN YAABILTMAJ JÉEOBA TUMEN KU YUʼUBIKEN»
Le tʼaanoʼobaʼ ku chíikpajal tiʼ junpʼéel salmo yaan teʼ Bibliaoʼ. Le máax tsʼíibtoʼ u yojel Jéeobaeʼ ku yuʼubik le oraciónoʼoboʼ, lelaʼ letiʼe baʼax áant ichil u kuxtaloʼ. Letiʼeʼ maas naatsʼ u yuʼubikuba kaʼach tiʼ Dios, le oʼolaleʼ kex táan u muʼyajeʼ maʼ lúub u yóoliʼ (Salmo 116:1-9).
Wa k-ojel ku yuʼubikoʼon Dioseʼ maʼ kun xuʼulul k-orar tiʼ. Koʼox ilik baʼax úuch tiʼ Pedro juntúul máak kajakbal tu xamanil España. Le máakaʼ kíim u hijo de 19 años tiʼ junpʼéel accidente. Teʼ súutukoʼob táan u sen muʼyajoʼ Pedroeʼ tu tsikbaltaj tiʼ Dios bix u yuʼubikuba yéetel tu sen kʼáataj tiʼ ka áantaʼak. ¿Baʼax úuch ka tsʼoʼoki? Pedroeʼ ku yaʼalik: «Jéeobaeʼ tu yuʼubaj in oración. Tu péeksaj uláakʼ máaxoʼob meyajtik utiaʼal u líiʼsik in wóol junmúuchʼ yéetel in watan».
Yaan horaeʼ utiaʼal u núukik k-oracióneʼ Dioseʼ ku péeksik u puksiʼikʼal k-amigoʼob utiaʼal u yáantkoʼonoʼob
Kex maʼ kaʼa kuxlaj u hijoeʼ le oraciónoʼ tu yáantaj Pedro yéetel u familia. María del Carmen, u yatan Pedroeʼ, ku yaʼalik: «Le oraciónoʼ jach tu yáanten utiaʼal maʼ u sen lúubul in wóol. Jéeobaeʼ u yojel bix in wuʼuyikinba tumen le kéen orarnakeneʼ kin wuʼuyik jeetsʼel yanil in puksiʼikʼal».
Le Biblia yéetel le baʼax tsʼoʼok u yaʼalik yaʼab máakoʼoboʼ ku yeʼeskoʼobeʼ Dioseʼ ku yuʼubik le oraciónoʼoboʼ. Chéen baʼaleʼ Dioseʼ maʼatech u núukik tuláakal le oraciónoʼoboʼ, ¿baʼaxten?
^ xóot’ol 5 U kʼaabaʼ Dioseʼ Jéeoba (Salmo 83:18).
Maʼ xaaneʼ jeʼel u yutstal xan ta wicheʼ
BAʼALOʼOB KU NÚUKAʼAL TEʼ BIBLIAOʼ
¿Ku núukik wa Dios le oraciónoʼob k-beetkoʼ?
Yaan jujunpʼéel baʼaloʼob unaj k-beetik utiaʼal ka u núuk Dios le oraciónoʼob k-beetkoʼ.
LE MÁAX KU KANANOʼ
¿Unaj wa k-orar?
Dioseʼ maʼ kʼaʼabéet u beetik milagroʼob utiaʼal u núukik k-oracionoʼobiʼ.
BAʼALOʼOB UNAJ A KANIK
¿Ku yuʼubik wa Dios tuláakal le oraciónoʼoboʼ?
¿Ku yuʼubaʼal wa u oración le máaxoʼob ku kʼáatkoʼob chéen taakʼinoʼ? ¿Ku yuʼubik wa Dios u oración juntúul íichamtsil ku maltratartik u yatan?
BAʼALOʼOB KU NÚUKAʼAL TEʼ BIBLIAOʼ
¿Ku yuʼubikoʼon wa Dios kéen k-kʼáat u yáantaj?
¿Jach wa tu jaajil ku yilik Dios le baʼaxoʼob ku yúuchultoʼonoʼ?
U KAʼANSAJ LE BIBLIAOʼ
Kʼáat ka tsʼaʼabaktech xook
Kʼáat ka tsʼaʼabaktech xook yéetel le Bibliaoʼ, ilawil bix jeʼel a beetik le baʼax ka kanikoʼ.
