Tuláakloʼon k-taal tiʼ Adán, leloʼ u kʼáat u yaʼaleʼ taaloʼon tiʼ junpʼéeliliʼ familiaeʼ. Kex ku páaʼtaʼal ka k-eʼes yaabilaj tiʼ k-familiaeʼ, u jaajileʼ maʼ bey u yúuchul teʼ yóokʼol kaabaʼ. Chéen baʼaleʼ tu táan Dioseʼ maʼ maʼalob le baʼax ku beetaʼalaʼ.

«Unaj a yaabiltik a wéet máakil jeʼex a yaabiltikabaeʼ» (LEVÍTICO 19:18).

«Maʼ u xuʼulul a yaabiltikeʼex a enemigoʼex» (MATEO 5:44).

Teʼ Yáax tiʼ Corintios 13:4 tak 7, Dioseʼ ku yaʼalik bix u yeʼesik yaabilaj máak.

«Le máax yaan u yaabilajeʼ yaan u paciencia yéetel ku yeʼesik u yutsil».

Tukulte: ¿Bix a wuʼuyikaba kéen yanakech yéetel máax yaan u paciencia, uts yéetel maʼ tu tsʼíikil wa ka beetik baʼax maʼ maʼalobiʼ?

«Le máax yaan u yaabilajeʼ maʼ tu yaatal u yóol yoʼolal baʼax yaan tiʼ u maasil».

Tukulte: ¿Bix a wuʼuyikaba wa yaan máax ku pʼektikech yoʼolal baʼax yaantech?

Le máax yaan u yaabilajeʼ «maʼ tu kaxtik chéen u yutsil».

Tukulte: ¿Bix a wuʼuyikaba wa yaan máax ku respetartik baʼax ka tuklik yéetel maʼatech u pechkuba chéen tiʼ baʼax u kʼáat?

Le máax yaan u yaabilajeʼ «maʼ tu kʼaʼajsik le baʼax kʼaas ku beetaʼaltiʼoʼ».

Tukulte: Dioseʼ ku perdonartik le máax ku arrepentiroʼ. Salmo 103:9, ku yaʼalik: «Maʼ mantatsʼ ken u yaʼal tiʼ máak baʼax maʼ maʼalob u beetmiʼ, maʼ mantatsʼ pʼujaʼan tu contra máakiʼ». Toʼoneʼ ku kiʼimaktal k-óol kéen perdonartaʼakoʼon tumen wa máax yoʼolal baʼax maʼ maʼalob t-beetiʼ. Le oʼolaleʼ toʼon xaneʼ kʼaʼabéet k-perdonartik le baʼaxoʼob ku beetaʼaltoʼonoʼ (Salmo 86:5).

Le máax yaan u yaabilajeʼ «maʼ tu kiʼimaktal u yóol yéetel le baʼaloʼob kʼaastakoʼ».

Tukulte: Toʼoneʼ maʼ maʼalob k-uʼuyikba wa yaan máax ku kiʼimaktal u yóol kéen úuchuktoʼon wa baʼaxiʼ. Le oʼolaleʼ maʼ unaj xan u kiʼimaktal k-óol kéen k-il u muʼyaj le máax tu beetajtoʼon wa baʼaxoʼ.

Wa k-kʼáat ka u bendecirtoʼon Dioseʼ unaj k-yaabiltik u maasil kex chichan wa nojoch, kex tiʼ yaanal luʼumil u taal wa kex yaanal u religión. Toʼoneʼ k-eʼesik yaabilaj kéen k-áant le máaxoʼob kʼaʼabéet wa baʼax tiʼoboʼ.