Tu añoil 1949, in papaeʼ lukʼ Alemaniaeʼ ka bin kajtal Australia utiaʼal u kaxtik u meyajil minas yéetel electricidad, le oʼolal pʼáat tiʼ junpʼéel chan kaaj yaan tu estadoil Victoria. Teʼeloʼ tiʼ tsʼoʼok u beeliʼ yéetel teʼ síijen tu añoil 1953.

Ka máan kʼiineʼ in maamaeʼ káaj u xokik le Biblia yéetel u j-jaajkunajoʼob Jéeobaoʼ, le oʼolal desde tin chichnil tin wuʼuyaj baʼax ku kaʼansik le Bibliaoʼ. Chéen baʼaleʼ in papaeʼ mix junpʼéel religión uts tu tʼaan yéetel jach kʼasaʼan. In maamaeʼ sajak kaʼach tiʼ, kex beyoʼ taʼakumbail u xokik le Bibliaoʼ yéetel jach utschaj tu tʼaan baʼax ku kanik. Wa maʼ kulaʼan in papaeʼ, ku kaʼansik tiʼ in wíitsʼin yéetel tiʼ teen baʼax ku yaʼalik le Bibliaoʼ. Tu kaʼansajtoʼoneʼ le yóokʼol kaaboʼ yaan u suʼutul Paraísoil yéetel jeʼel u yantaltoʼon kiʼimak óolal wa k-beetik baʼax ku kaʼansik le Bibliaoʼ (Salmo 37:10, 29; Isaías 48:17).

Tumen jach kʼaas u modos in papaeʼ ka tu tsʼáajten 18 añoseʼ tin pʼataj in wotoch. Kex kin creertik le baʼaxoʼob tu kaʼansajten in maama yoʼolal le Bibliaoʼ, maʼ tin tsʼáaj ichil in kuxtaliʼ. Káaj in meyaj bey electricista tiʼ junpʼéel u minail chúukeʼ, yéetel ka tin cumplirtaj 20 añoseʼ tsʼoʼok in beel. Ka máan tres añoseʼ síij in yáax hija, ka joʼopʼ in tuklik baʼax maas kʼaʼanaʼan ichil in kuxtal. Teneʼ in wojel jeʼel u yáantaj ichil in familia le baʼax ku kaʼansik le Bibliaoʼ, le oʼolal tin káajsaj in kaʼa xook yéetel le j-Jaajkunajoʼoboʼ. Pero in wataneʼ jach u pʼeek kaʼachi. Ka binen tiʼ junpʼéel muchʼtáambaleʼ tu yaʼalajteneʼ wa maʼ tin xulik in xokik le Bibliaoʼ ku pʼatken. Ka tin wuʼuyaj leloʼ xuʼul in kʼamik le j-Jaajkunajoʼoboʼ. Ka tsʼoʼokeʼ arrepentirnajen úuchik u xuʼulul in beetik baʼax maʼalob.

Junpʼéel kʼiineʼ in wéet meyajoʼobeʼ tu invitartenoʼob in chaʼant pornografía. Ku tsʼíiboltik máak u chaʼantik pero jach kʼaas. Ken tsʼoʼokok in chaʼantikeʼ táaj kʼaas in wuʼuyikinba. Ku kʼaʼajalteneʼ le Bibliaoʼ ku yaʼalikeʼ maʼ maʼalob ka u chaʼant máak baʼaloʼob beyaʼ, le oʼolal kin tuklik kaʼach yaan u castigartiken Dios. Chéen baʼaleʼ seguernaj in chaʼantik baʼaloʼob maas kʼaastakeʼ, ka suunajten vicioil le pornografíaoʼ.

Ichil le veinte años seguernajoʼ joʼopʼ in tuʼubsik le baʼaloʼob maʼalobtak u kaʼansmajten in maamaoʼ. Le bix in kuxtaloʼ ku  yeʼesik kaʼach baʼax in woksmaj tin tuukul. Uts tin tʼaan kaʼach in tsikbal yoʼolal u yantal máak yéetel koʼolel. Tak ken in waʼal chisteʼobeʼ chéen tiʼ le jeʼel kin tʼaanoʼ. Kʼaschaj in tuukul tiʼ bix unaj u yilaʼal le núupchitaloʼ. Kex yaan in wataneʼ anchaj baʼal in wil yéetel uláakʼ koʼoleloʼob. Junpʼéel kʼiineʼ tin paktinba teʼ néenoʼ ka tin waʼalaj: «Tsʼoʼok in jach kʼastal». Tu lugar in yaabiltkinbaeʼ káaj in pʼektikinba.

Tin pʼataj in watan yéetel maas kʼaschaj in kuxtal. Ka túun orarnajen tiʼ Jéeoba yéetel tuláakal in puksiʼikʼal. Kex tsʼoʼok veinte años xuʼuluk in xokik le Biblia kaʼachoʼ káaj in kaʼa xokik. Teʼ kʼiinoʼoboʼ in papaeʼ tsʼokaʼaniliʼ u kíimileʼ yéetel in maamaeʼ u j-jaajkunaj Jéeoba.

Le bix in kuxtal kaʼachoʼ jach jelaʼan tiʼ baʼax ku kaʼansik le Bibliaoʼ. Pero tin chʼaʼtuklaj in kuxtal jeʼex u yaʼalik le Biblia utiaʼal ka yanakten kiʼimak óolaloʼ. Káaj in wilik maʼ in sen pʼuʼujul yéetel maʼ in waʼalik kʼaakʼas tʼaanoʼob. Tin pʼataj le kʼaakʼas kuxtal yaanten kaʼachoʼ, in buul, in sen káaltal, ka tin xulaj xan in wookol teʼ empresa tuʼux kin meyajoʼ.

In wéet meyajoʼobeʼ maʼ tu naʼatkoʼob kaʼach baʼaxten táan in kʼexik in kuxtal. Ich tres añoseʼ yaʼab u téenel tu yaʼaloʼobten ka in kaʼa beet baʼaloʼob kʼaastak. Yaan horaeʼ wa kin beetik baʼax maʼ maʼalob, jeʼex in pʼuʼujul yéetel in poochʼileʼ, ku yaʼalikoʼobten: «¡Jeʼeloʼ! ¿Maʼ ta waʼaleʼ maʼ ta suut a beete?». Lelaʼ jach ku lúuʼsik in wóol, ku beetik in wuʼuyik mix baʼal in biilal.

Teʼ tuʼux kin meyajoʼ yaʼab u chaʼantaʼal pornografíaiʼ. In wéet meyajoʼobeʼ láaj hora táan u máansikoʼob tu baatsiloʼob tiʼ computadora wa tiʼ juʼun. Teneʼ in chʼaʼtukultmaj in xulik in chaʼantik, pero in wéet meyajoʼobeʼ taak kaʼach u yilkoʼob in kaʼa lúubul teʼ vicioaʼ. Ka tin kʼáataj áantaj tiʼ le máax tsʼáaikten xook yéetel le Bibliaoʼ tu chʼenxikinten, ka tin tsikbaltajtiʼ bix in wuʼuyikinba. Tu xokajten jujunpʼéel tekstoʼob jach jeʼel u yáantken utiaʼal in pʼatik le vicioaʼ, yéetel tu yaʼalajten ka sen orarnaken tiʼ Jéeoba (Salmo 119:37).

Junpʼéel kʼiineʼ tin muchʼaj tuláakal in wéet meyajoʼobeʼ, ka tin waʼalajtiʼob ka u tsʼáaʼob cerveza tiʼ kaʼatúul k-éet meyajoʼob táan u pʼatik u káaltaloʼob. Pʼuʼujoʼobeʼ ka tu yaʼaloʼobten: «¡¿Bix ken k-tsʼáatiʼob?! ¿Maʼ wa ta wilik táan u yilik u pʼatkoʼob le viciooʼ?». Ka túun tin núukajtiʼob: «¡Jeʼeloʼ! ¡Si teneʼ junpʼéel vicio xan le in kʼáat in pʼatoʼ!». Desde teʼ kʼiin jeʼeloʼ maʼ suunaj u yaʼaloʼobten mix baʼaliʼ.

Ka máan kʼiineʼ yéetel u yáantaj Jéeobaeʼ xuʼul in chaʼantik pornografía. Tu añoil 1999, okjaʼanajen. Kiʼimak in wóol tumen Jéeobaeʼ tu tsʼáajten u páajtalil u yantalten junpʼéel maʼalob kuxtal.

Bejlaʼeʼ kin naʼatik baʼaxten Jéeobaeʼ jach u pʼekmaj le baʼaxoʼob uts tin tʼaan in beetik kaʼachoʼ. Jeʼex juntúul taatatsil jach u yaabiltmaj u paalaleʼ, Jéeobaeʼ u kʼáat u kanáanten kaʼach tiʼ le problemaʼob ku taasik u chaʼantaʼal le pornografíaoʼ. Jach jaaj le baʼax ku yaʼalik Proverbios 3:5, 6: «Kʼub a wóol tiʼ Jéeoba yéetel tuláakal a puksiʼikʼal, maʼ a confiar chéen tiʼ le naʼat yaantechoʼ. Chʼaʼ en cuenta tiʼ tuláakal baʼax ka beetik, letiʼ túuneʼ yaan u beetik u bintech utsil ichil a kuxtal». Le tsolnuʼukoʼob ku tsʼáaik le Bibliaoʼ ku kanáantik máak yéetel ku yáantik utiaʼal ka xiʼik utsil tiʼ (Salmo 1:1-3).

Úuch kaʼacheʼ maʼ in yaabiltminbaiʼ, pero bejlaʼeʼ in yaabiltminba yéetel kiʼimak in wóol. Maʼalob yanilen tu táan Jéeoba, kin wilik bix u yáantken yéetel kin wuʼuyik tsʼoʼok u perdonartiken. Teʼ año 2000, tsʼoʼok in beel yéetel Karolin, juntúul kiik jach u yaabiltmaj xan Jéeoba. Toʼoneʼ junpʼéel nojoch privilegio k-ilik k-antal ichil le máaxoʼob eʼesik yaabilaj yéetel bisik junpʼéel toj kuxtaloʼ.