1, 2. 1) ¿Baʼax letreroil tsʼoʼok u salvartik yaʼab máakoʼob? (Ilawil le foto yaan tu káajbal le xookaʼ.) 2) ¿Baʼax áantaj tsʼoʼok u tsʼaʼabaltoʼon utiaʼal u salvartaʼal k-kuxtal?

«WAʼALEN, ILE, UʼUYE», lelaʼ letiʼe baʼax ku yaʼalik jujunpʼéel letreroʼob yaan tu kaajil Estados Unidosoʼ. Le letreroʼobaʼ tsʼoʼok maas tiʼ cien años joʼopʼok u tsʼaʼabaloʼob yéetel tsʼaʼan utiaʼal u kanáantkuba le máakoʼob ken cruzarnakoʼob yéetel u cocheʼob teʼ tuʼux ku máan le trenoʼoboʼ. U beetaʼal le baʼax ku yaʼalik le letreroʼobaʼ tsʼoʼok u salvartik u kuxtal yaʼab máak.

² Jéeobaeʼ maʼ chéen ku tsʼáaiktoʼon letreroʼob utiaʼal u salvartik k-kuxtaliʼ. Letiʼeʼ tsʼoʼok u beetik junpʼéel baʼax maas maʼalob, letiʼeʼ táan u nuʼuktik k-kuxtal. Lelaʼ ku beetik utiaʼal ka yanaktoʼon kuxtal minaʼan u xuul yéetel utiaʼal maʼ u yúuchultoʼon loob. Juntúul j-kanan taman jach yaan u yaabilajeʼ ku nuʼuktik yéetel ku kanáantik u taamanoʼob utiaʼal maʼ u yúuchultiʼob mix junpʼéel loob teʼ bejoʼoboʼ, Jéeobaeʼ bey xan u kanáantkoʼonoʼ (xok Isaías 30:21).

3. ¿Baʼaxten ku kíimil máak?

³ Jéeobaeʼ desde ka tu beetaj wíinikeʼ joʼopʼ u nuʼuktiktiʼ baʼax unaj  u beetik. Jeʼex tu jardinil Edeneʼ, letiʼeʼ tu tsʼáaj tsolnuʼukoʼob tiʼ Adán yéetel Eva utiaʼal u páajtal u yantaltiʼob kuxtal minaʼan u xuul yéetel kiʼimak óolal (Gén. 2:15-17). Pero Adán yéetel Evaeʼ maʼ tu yóotoʼob u beetoʼob le baʼax aʼalaʼabtiʼob tumen Jéeoba, le máax jach yaabiltmoʼoboʼ. Evaeʼ tu yuʼubaj baʼax tu yaʼalaj juntúul kaan, tsʼoʼoleʼ tumen maʼ tu tuklaj wa letiʼe Kʼaasilbaʼal ku tʼaanoʼ tu beetaj le baʼax aʼalaʼabtiʼoʼ, Adán xaneʼ tu yuʼubaj u tʼaan u yatan. ¿Baʼax úuch ka tsʼoʼoki? Tu kaʼatúulaloʼob muʼyajnajoʼob yéetel kíimoʼob x-maʼ esperanzail. Yoʼolal le baʼax tu beetoʼobaʼ, tuláakal u paalaloʼob ku kíimloʼob xan.

4. 1) ¿Baʼax tsolnuʼukil tu tsʼáaj Jéeoba ka tsʼoʼok le Búulkabaloʼ? 2) Le túumben tsolnuʼuk tu tsʼáaj Diosoʼ, ¿baʼax ku yeʼesik yoʼolal bix u yilik le kuxtaloʼ?

⁴ Le nuʼuktaj tu tsʼáaj Jéeoba tiʼ Noeoʼ tu salvartaj u kuxtaloʼob. Ka tsʼoʼok le Búulkabaloʼ, Jéeobaeʼ tu yaʼalaj tiʼ Noé maʼ unaj u jaantkoʼob mix u yukʼikoʼob kʼiʼikʼiʼ. ¿Baʼaxten tu tsʼáajtiʼob le túumben tsolnuʼukaʼ? Tumen ka tsʼoʼok le Búulkabaloʼ Jéeobaeʼ tu yaʼalajtiʼob jeʼel u páajtal u káajal u jaantkoʼob u bakʼel baʼalcheʼeʼ. Dios túuneʼ tu yaʼalajtiʼob: «Yaan junpʼéel baʼax maʼ u náajmal a jaantkeʼexiʼ: Bakʼ paʼteʼ yéetel u kʼiʼikʼel, tumen teʼ kʼiʼikʼ yaan le kuxtaloʼ» (Gén. 9:1-4). Le túumben tsolnuʼukaʼ ku yeʼesik bix u yilik Dios le kuxtaloʼ. Tumen letiʼ tsʼaamil le kuxtaloʼ chéen tiʼ letiʼ yaan u derechoil u yaʼalik bix unaj u kanáantaʼal. Junpʼéel baʼax tu yaʼalaj maʼ unaj k-beetik utiaʼal k-kanáantik le kuxtaloʼ, letiʼe maʼ k-kíimsik k-éet máakiloʼ. Jéeobaeʼ kiliʼich u yilik le kuxtaloʼ bey xan le kʼiʼikʼoʼ, yéetel yaan u castigartik le máaxoʼob maʼ tu beetkoʼob le baʼax ku yaʼalikoʼ (Gén. 9:5, 6).

5. ¿Baʼax ken k-il teʼ xookaʼ yéetel bix ken u yáantiloʼon?

⁵ Ka tsʼoʼok u kíimil Noeeʼ, Jéeobaeʼ seguernaj u nuʼuktik u kaajal. Teʼ xookaʼ yaan k-ilik jujunpʼéel ejemploʼob tiʼ bix tu nuʼuktil Jéeoba u kaajal. Lelaʼ yaan u yáantkoʼon utiaʼal ka seguernak k-beetik le baʼaxoʼob ku yaʼaliktoʼon Jéeoba teʼ kʼiinoʼobaʼ bey xan ken yanakoʼon teʼ túumben luʼumoʼ.

6. 1) ¿Baʼaxten kʼaʼabéetchaj u tsʼaʼabal túumben leyoʼob tiʼ le israelitaʼoboʼ? 2) ¿Baʼax unaj kaʼach u beetik le israelitaʼoboʼ?

⁶ Tu kʼiiniloʼob Moiseseʼ, Jéeobaeʼ tu tsʼáaj tiʼ u kaajal túumben tsolnuʼukoʼob utiaʼal u yilkoʼob bix unaj u kuxtaloʼob yéetel bix unaj u adorartikoʼob Jéeoba. ¿Baʼaxten? Tumen kʼexpaj tu kaʼatéen bix u kuxtal le israelitaʼoboʼ. Letiʼobeʼ maas tiʼ doscientos años kajlajoʼob kaʼach Egipto, teʼeloʼ tuláakal le máakoʼoboʼ jejeláas u diosoʼob, ku adorartikoʼob xan le kimenoʼoboʼ yéetel ku beetkoʼob uláakʼ baʼaxoʼob kʼaastak tu táan Dios. Chéen baʼaleʼ ka jóoʼsaʼaboʼob tu luʼumil Egiptoeʼ kʼaʼabéetchaj u tsʼaʼabaltiʼob túumben leyoʼob utiaʼal u nuʼuktikubaʼob. Beoraaʼ chéen u leyoʼob Jéeoba unaj u seguertikoʼob tumen tsʼoʼok u yéeyikoʼob bey u kaajaleʼ. Jujunpʼéel diccionarioʼobeʼ ku yaʼalikoʼobeʼ le tʼaan ich hebreo «leyoʼ» u kʼáat u yaʼal xan «nuʼuktaj, tsolnuʼuk, kaʼansaj». Le Leyoʼ tu kanáantaj le israelitaʼob utiaʼal maʼ u núupkʼebantaloʼob yéetel utiaʼal maʼ u adorartikoʼob yaanal diosoʼob jeʼex u beetik u maasil kaajoʼoboʼ. Le israelitaʼoboʼ unaj u beetkoʼob kaʼach le baʼax ku yaʼalik Diosoʼ, tumen beyoʼ yaan u bendecirtaʼaloʼob. Chéen baʼaleʼ wa maʼ tu beetkoʼob kaʼacheʼ ku bin kʼaasil tiʼob (xok Deuteronomio 28:1, 2, 15).

7. 1) Aʼal uláakʼ baʼax oʼolal tu tsʼáaj Jéeoba le túumben leyoʼob tiʼ u kaajaloʼ. 2) ¿Baʼaxten jeʼel u páajtal u yaʼalaʼaleʼ le Leyoʼ bey juntúul máax tu kanáantaj u kaajil Israeleʼ?

⁷ Yaan uláakʼ baʼax oʼolal tu tsʼáaj Jéeoba le túumben leyoʼob tiʼ u kaajaloʼ. Le Leyoʼ tu preparartaj le israelitaʼob utiaʼal u kʼamkoʼob Jesús, le Mesíasoʼ, lelaʼ jach kʼaʼanaʼan kaʼach utiaʼal u béeykuntik Jéeoba baʼax u tukultmaj utiaʼal le Luʼumaʼ. Le Leyoʼ tu kʼaʼajsaj xan tiʼ le  israelitaʼob kʼeban máakoʼoboʼ. Áantajnaj xan utiaʼal u naʼatkoʼobeʼ jach kʼaʼabéettiʼob u kuxtal Jesús ken u kʼuboʼ tumen chéen bey jeʼel u jáalkʼabtaʼaloʼob tiʼ le kʼebanoʼ (Gal. 3:19; Heb. 10:1-10). Le Ley xanoʼ tu kanáantaj maʼ u saʼatal le chʼiʼibal tuʼux kun taal le Mesíasoʼ, yéetel tu yáantaj le israelitaʼob u kʼaj óoltoʼob le ka chíikpajoʼ. Le oʼolaleʼ jeʼel u páajtal u yaʼalaʼaleʼ le Leyoʼ bey juntúul ‹máax tu kanáantaj› u kaajil Israel utiaʼal u biskoʼob tu yiknal Cristoeʼ (Gal. 3:23, 24).

8. ¿Baʼaxten unaj k-tsʼáaik ichil k-kuxtal le principioʼob ku taasik le Ley tsʼaʼab tiʼ Moisesoʼ?

⁸ Teʼ kʼiinoʼobaʼ toʼon xaneʼ jeʼel u páajtal k-jóoʼsik u yutsil le Ley tu tsʼáaj Jéeoba tiʼ u kaajaloʼ. ¿Bix jeʼel k-beetkeʼ? Jeʼex u yaʼalik le letreroʼob tsʼaʼanoʼob tuʼux ku máan le trenoʼoboʼ, toʼoneʼ unaj «k-waʼatal» yéetel «k-ilik» baʼax jeʼel k-kanik tiʼ le Ley tsʼaʼab tiʼ le israelitaʼoboʼ. Kex minaʼanoʼon yáanal le Leyaʼ, jeʼel u páajtal u meyajtoʼon le baʼaxoʼob ku kaʼansik utiaʼal k-ilik bix unaj k-kuxtal yéetel bix unaj k-adorartik Jéeoba. Letiʼeʼ tu beetaj u tsʼíibtaʼal le leyoʼobaʼ utiaʼal k-kaanbal tiʼ letiʼob, utiaʼal k-ilik baʼax principioil jeʼel u páajtal k-jóoʼsik tiʼobeʼ yéetel utiaʼal k-tsʼáaik u graciasil tiʼ Jesús yoʼolal le baʼax tu kaʼansoʼ tumen maas nojochtakoʼob tiʼ le baʼax ku yaʼalik le Leyoʼ. Uláakʼ baʼax jeʼel u páajtal k-beetkeʼ letiʼe «k-uʼuyik» le baʼaxoʼob tu kaʼansaj Jesusoʼ. Junpʼéel tiʼ le baʼaxoʼob tu kaʼansaj unaj «k-uʼuyik» wa k-beetkoʼ, letiʼ lelaʼ: «A wuʼuymeʼex aʼalaʼab úuchjeakil: ‹Maʼ unaj a lúubul tiʼ adulterioiʼ›. Baʼaleʼ teneʼ kin waʼalikteʼexeʼ tuláakal máax ku sen chaʼantik juntúul koʼolel utiaʼal u tsʼíiboltik u núupchital tu yéeteleʼ, tsʼoʼok u lúubul tiʼ adulterio tu yéetel ichil u puksiʼikʼal». Jeʼex k-ilkoʼ maʼ chéen unaj k-kanáantik maʼ k-lúubul tiʼ adulterioiʼ, baʼaxeʼ unaj k-luʼsik t-tuukul tuláakal le kʼaakʼas tsʼíibolaloʼob jeʼel u yantaltoʼonoʼ (Mat. 5:27, 28).

9. ¿Baʼaxten kʼaʼabéetchaj u tsʼaʼabal túumben nuʼuktajoʼob?

⁹ Ka tsʼoʼok u chíikpajal le Mesíasoʼ, Jéeobaeʼ tu yilaj u kʼaʼanaʼanil u tsʼáaik túumben nuʼuktajoʼob yéetel tu maas tsʼáaj ojéeltbil bix kun béeytal le baʼaxoʼob u tukultmaj utiaʼal le Luʼumaʼ. ¿Baʼaxten kʼaʼabéetchaji? Tumen tu añoil 33, Jéeobaeʼ xuʼul u kʼamik u kaajil Israel ka tu yéeyaj junpʼéel túumben kaaj, bey túunoʼ kaʼa kʼexpaj u kuxtal u kaajal Dios.

10. 1) Teʼ yáax siglooʼ, ¿baʼaxten kʼaʼabéetchaj u tsʼaʼabal túumben tsolnuʼukoʼob? 2) ¿Baʼaxten jelaʼanoʼob tiʼ le tsʼaʼab tu kʼiiniloʼob Moisesoʼ?

¹⁰ Jeʼex tsʼoʼok k-ilkoʼ tu kʼiiniloʼob Moiseseʼ, Jéeobaeʼ tu tsʼáaj tiʼ u kaajil Israel túumben tsolnuʼukoʼob utiaʼal u yilkoʼob bix unaj u kuxtaloʼob yéetel bix unaj u adorartikoʼob Jéeoba. Chéen baʼaleʼ tu káajbal le yáax siglooʼ Dioseʼ tu yéeyaj junpʼéel túumben kaaj, letiʼobeʼ jejeláas tuʼux u taaloʼob yéetel kʼuch kʼaj óoltbiloʼob bey u Israel Dioseʼ. Le máaxoʼob yanoʼob kaʼach teʼ túumben kaajaʼ unaj u yantaloʼob yáanal u nuʼuktaj junpʼéel túumben pacto. Jéeobaeʼ tu tsʼáajtiʼob túumben tsolnuʼukoʼob wa tu maas tsolajtiʼob bix unaj u kuxtaloʼob yéetel bix unaj u adorartikoʼob. Le túumben kaajaʼ tu chíikbeseʼ «Dioseʼ mix máak jelaʼan u paktik, baʼaxeʼ tiʼ tuláakal kaajeʼ ku kʼamik jeʼel máax u chʼaʼamaj saajkil tiʼ yéetel ku beetik baʼax utseʼ» (Bax. 10:34, 35). Tiʼ letiʼobeʼ tsʼaʼan kaʼach «u ley Cristo», le leyaʼ maʼ tsʼíibtaʼan tiʼ junpʼéel tuunich jeʼex u Ley Moisesoʼ, baʼaxeʼ bey men cuenta tsʼíibtaʼan tu puksiʼikʼal cada juntúul máax meyajtik Dioseʼ yéetel maases chéen kaʼansajoʼob wa principioʼob. Le leyaʼ unaj kaʼach u nuʼuktik yéetel u yáantik tuláakal le máaxoʼob meyajtik Dios jeʼel tuʼuxak ka yanakoʼobeʼ (Gal. 6:2).

11. ¿Tiʼ baʼax ku tʼaan le kaʼapʼéel mandamientoʼob tu tsʼáaj Jesusoʼ?

¹¹ U Israel Dioseʼ jach yaʼab utsil tu kʼamaj yoʼolal le nuʼuktaj tsʼaʼabtiʼob tumen Jéeoba yéetel u yáantaj Jesusoʼ. Táanil tiʼ u beetaʼal tu yéeteloʼob le túumben pactooʼ, Jesuseʼ tu tsʼáajtiʼob kaʼapʼéel nojoch mandamientoʼob. Junpʼéeleʼ yaan yil yéetel le kʼaʼaytajoʼ. Uláakʼeʼ  yaan yil yéetel bix unaj u kuxtal u disipuloʼob Jesús yéetel bix unaj u biskubaʼob. Lelaʼ tsʼaʼab tiʼ tuláakal u disipuloʼob Jesús, le oʼolaleʼ kex wa yaantoʼon u esperanzail k-bin kaʼan wa k-kuxtal way Luʼumeʼ, tak toʼon unaj k-beetik le baʼaxoʼob tu yaʼalaj Jesusoʼ.

12. ¿Baʼax túumben mandamiento tsʼaʼab yaan yil yéetel le kʼaʼaytajoʼ?

¹² Úuchjeakileʼ le j-táanxel luʼumiloʼob u kʼáat u meyajtoʼob Jéeobaoʼ unaj kaʼach u binoʼob tu kaajil Israel (1 Rey. 8:41-43). Chéen baʼaleʼ ka tsʼoʼokeʼ Jesuseʼ tu tsʼáaj le túumben mandamiento ku chíikpajal teʼ Mateo 28:19 yéetel 20 (xoke). Jesuseʼ tu yaʼalaj tiʼ u disipuloʼob: «Xeeneʼex tu yiknal u máakiloʼob tuláakal kaajoʼob». Teʼ Pentecostés tu añoil 33, Jéeobaeʼ tu yeʼesaj jach u kʼáat ka kʼaʼaytaʼak tiʼ tuláakal yóokʼol kaab le baʼaxoʼob ken u beet le Reinooʼ. Teʼ kʼiin jeʼeloʼ kex 120 disipuloʼobeʼ tu kʼamoʼob kiliʼich muukʼ ka káaj u tʼaanoʼob ich jejeláas idiomaʼob ku tʼanik kaʼach le judíoʼoboʼ bey xan tu idiomaʼob le uláakʼ j-táanxel kaajiloʼob tu beetubaʼob judíoʼoboʼ (Bax. 2:4-11). Ka máan kʼiineʼ joʼopʼ u yúuchul kʼaʼaytaj tiʼ le samaritanoʼoboʼ, tsʼoʼoleʼ tu añoil 36, káaj u yúuchul kʼaʼaytaj tiʼ le j-táanxel kaajiloʼob maʼ súutkʼuptaʼanoʼoboʼ. Jeʼex k-ilkoʼ jach nojoch kaʼach le meyaj yaantiʼoboʼ tumen unaj u kʼaʼaytajoʼob tiʼ tuláakal yóokʼol kaab.

13, 14. 1) ¿Baʼax táakaʼan ichil le «túumben mandamiento» tu tsʼáaj Jesusoʼ? 2) ¿Baʼax k-kanik tiʼ bix úuchik u yeʼesik yaabilaj Jesús?

¹³ Jesús xaneʼ tu tsʼáaj junpʼéel «túumben mandamiento» tiʼ bix unaj k-bisikba yéetel le sukuʼunoʼob bey xan yéetel le kiikoʼoboʼ (xok Juan 13:34, 35). Toʼoneʼ maʼ chéen unaj k-eʼesik yaabilaj tiʼob mantatsʼiʼ baʼaxeʼ wa ku kʼaʼabéettaleʼ unaj k-tsʼáaik tak k-kuxtal tu yoʼolaloʼob. Jeʼex k-ilkoʼ teʼ túumben mandamientoaʼ maas yaʼab baʼaloʼob táakaʼan ke le yaan kaʼach tu Ley Moisesoʼ (Mat. 22:39; 1 Juan 3:16).

¹⁴ Mix máak uláakʼ way Luʼum tsʼoʼok u yeʼesik nojoch yaabilaj jeʼex tu beetil Jesuseʼ. Letiʼeʼ tu yaabiltaj u disipuloʼob yéetel tu tsʼáaj tak u kuxtal tu yoʼolaloʼob. Jesuseʼ u kʼáat xan ka k-paklan eʼes yaabilaj jeʼex tu beetiloʼ, le oʼolaleʼ wa ku kʼaʼabéettaleʼ unaj k-óotik k-tsʼáa k-kuxtal tu yoʼolal le sukuʼunoʼob yéetel le kiikoʼoboʼ (1 Tes. 2:8).

15, 16. 1) ¿Bix u nuʼuktikoʼon Dios bejlaʼeʼ? 2) ¿Bix le kʼiinoʼob kuxlikoʼonaʼ?

¹⁵ Teʼ kʼiinoʼobaʼ Jesuseʼ u tsʼaamaj «le palitsil chúukaʼan u yóol yéetel yaan u naʼat» utiaʼal u tsʼáaiktoʼon le ‹janal jach tu yorailoʼ› (Mat. 24:45-47). Ichil le janalaʼ táakaʼan le nuʼuktajoʼob ku tsʼáaiktoʼon u kaajal Dios jeʼex u bin u kʼexpajal le kuxtal teʼ kʼiinoʼobaʼ. ¿Tiʼ baʼax kʼiiniloʼob kuxaʼanoʼon?

¹⁶ Toʼoneʼ kuxaʼanoʼon tu «tsʼook kʼiinoʼob» yéetel maʼ kun xáantal ken k-il u káajal junpʼéel nojoch muʼyajil jeʼex mix juntéen ilaʼakeʼ (2 Tim. 3:1; Mar. 13:19). Tsʼoʼoleʼ Satanás yéetel u kʼasaʼan angeloʼobeʼ jóoʼsaʼaboʼob teʼ kaʼanoʼ ka puʼuloʼob way Luʼumeʼ, lelaʼ tsʼoʼok u beetik u sen muʼyaj wíinik (Apo. 12:9, 12). Teʼ kʼiinoʼob xanaʼ táan k-béeykuntik le baʼax tu yaʼalaj Jesusoʼ tumen táan k-kʼaʼaytaj tiʼ tuláakal yóokʼol kaab ich jejeláas idiomaʼob. ¡Mix juntéen ilaʼak u jach beetaʼal le meyaj jeʼex teʼ kʼiinoʼobaʼ!

17, 18. ¿Baʼax unaj k-beetik desde bejlaʼeʼ?

¹⁷ U kaajal Dioseʼ yaʼab baʼaloʼob ku tsʼáaiktoʼon utiaʼal u yáantkoʼon k-kʼaʼaytaj. ¿Táan wa k-aprovechartikoʼob? Teʼ muchʼtáambaloʼoboʼ ku kaʼansaʼaltoʼon bix jeʼel u meyajtoʼon maʼalob le áantajoʼob yaantoʼonoʼ. Techeʼ, ¿ka creertik wa tiʼ Jéeoba u taal le baʼaxoʼob ku kaʼansaʼaltoʼonoʼ?

¹⁸ Utiaʼal u bendecirkoʼon Jéeobaeʼ kʼaʼabéet k-beetik tuláakal le baʼaxoʼob ku nuʼuktiktoʼon u kaajal teʼ kʼiinoʼobaʼ. Wa desde bejlaʼa k-chaʼik u nuʼuktikoʼon Dioseʼ, maas chéen chʼaʼabil ken k-beetil le baʼaxoʼob ken u nuʼukt tiʼ toʼon tu kʼiiniloʼob le «nojoch muʼyajil» ken xuʼulsaʼak tiʼ u kʼasaʼan yóokʼol kaab Satanasoʼ (Mat. 24:21). Ken tsʼoʼokok lelaʼ yaan u kʼaʼabéettal u tsʼaʼabal  túumben nuʼuktajoʼob tumen yaan k-antal tiʼ junpʼéel luʼum tuʼux maʼ kun antal Satanás utiaʼal u beetik baʼax kʼaasiʼ.

19, 20. 1) ¿Baʼax ken u taas le túumben rolloʼoboʼ? 2) ¿Tiʼ baʼax ken u yáantoʼon le túumben rolloʼobaʼ?

¹⁹ Jeʼex tsʼoʼok k-ilkoʼ tiʼ u kaajil Israeleʼ kʼaʼabéetchaj u tsʼaʼabal túumben nuʼuktajoʼob, le oʼolal tsʼaʼab le Ley tiʼ Moisesoʼ. Teʼ yáax siglooʼ tiʼ le túumben kaaj tu yéeyajoʼ, Dioseʼ tu tsʼáajtiʼob «u ley Cristo» utiaʼal u nuʼuktikubaʼob. Le Bibliaoʼ ku yaʼalikeʼ maʼ kun xáantaleʼ teʼ túumben luʼumoʼ yaan u tsʼaʼabaltoʼon túumben rolloʼob tuʼux kun tsʼaabiltoʼon túumben nuʼuktajoʼob (xok Apocalipsis 20:12). Maʼ xaaneʼ teʼ rolloʼob tsʼíibtaʼan le túumben baʼaloʼob ken u yaʼal Jéeoba ka beetaʼakoʼ. Ken xakʼaltaʼak le túumben rolloʼobaʼ tak le máaxoʼob kun kaʼa kuxkíintbiloʼob ken u yojéeltoʼob baʼax u kʼáat Dios ka beetaʼakoʼ yéetel yaan u yáantik máak u maas naʼat bix u tuukul Jéeoba. Tsʼoʼoleʼ como yaan k-maas naʼatik le baʼax ku yaʼalik le Biblia teʼ Paraísooʼ tuláakloʼon yaan k-paklan yaabiltikba yéetel yaan k-respetartikba (Isa. 26:9). ¡Chéen tukult bukaʼaj baʼaloʼob ken k-kan yéetel ken k-kaʼans tiʼ uláakʼ máakoʼob tu yáanal u nuʼuktaj Jesucristo, le Reyoʼ!

²⁰ Teʼ Paraísooʼ, wa k-beetik le baʼax ku yaʼalik Jéeoba «jeʼex tsʼíibtaʼanil teʼ rolloʼob» yéetel wa ku chúukpajal k-óol teʼ tu tsʼook túuntajiloʼ, Jéeobaeʼ yaan u tsʼíibtik k-kʼaabaʼ tu «rolloil le kuxtaloʼ» yéetel mix bikʼin ken u tupe. Bey kun béeytal k-kuxtal utiaʼal minaʼan u xuuloʼ. Utiaʼal u yantaltoʼon le baʼaloʼobaʼ, kʼaʼabéet K-WAʼATAL wa k-xokik le baʼax ku yaʼalik le Bibliaoʼ, kʼaʼabéet xan K-ILIK wa k-naʼatik baʼax ku kaʼansiktoʼon yéetel kʼaʼabéet K-UʼUYIK wa k-beetik le baʼaxoʼob ku nuʼuktiktoʼon Dios teʼ kʼiinoʼobaʼ. Wa k-beetik le óoxpʼéel baʼaloʼobaʼ yaan k-salvartaʼal ken taalak le nojoch muʼyajiloʼ yéetel mix bikʼin kun xuʼulul k-kaanbal tiʼ Jéeoba, le Dios jach yaan u naʼat yéetel u yaabiltmoʼonoʼ (Ecl. 3:11; Rom. 11:33).