1. Jéeoba, Jesús yéetel uláakʼ máakoʼob kuxlajoʼob úuchjeakileʼ, ¿bix úuchik u meyajoʼob?

DESDE antes u yantal le yóokʼol kaabaʼ, Jéeoba yéetel Jesuseʼ junmúuchʼ u meyajoʼob. Jéeobaeʼ tu beetaj Jesús táanil tiʼ u beetik tuláakal baʼal. Ka tsʼoʼokeʼ Jesuseʼ múul meyajnaj tu yéetel utiaʼal u beetik tuláakal u maasil baʼaloʼoboʼ (Pro. 8:30). Le máaxoʼob meyajt Jéeoba úuchjeakiloʼ múuchʼ meyajnajoʼob xan utiaʼal u beetkoʼob jujunpʼéel baʼaloʼob. Jeʼex Noé yéetel u paalaloʼobeʼ múuchʼ meyajnajoʼob utiaʼal u beetkoʼob le arcaoʼ. Tsʼoʼoleʼ le israelitaʼoboʼ jeʼel tuʼuxak ka xiʼikoʼobeʼ junmúuchʼ u desarmarkoʼob, u biskoʼob yéetel u kaʼa armarkoʼob le tabernaculooʼ. Ka beetaʼab xan le templooʼ, junmúuchʼ kaʼach u kʼaayoʼob yéetel u paaxoʼob utiaʼal u alabartikoʼob Jéeoba. Letiʼobeʼ béeychaj u beetkoʼob tuláakal lelaʼ tumen tu kanoʼob múuchʼ meyaj (Gén. 6:14-16, 22; Núm. 4:4-32; 1 Cró. 25:1-8).

2. 1) ¿Bix úuchik u meyaj le cristianoʼob teʼ yáax siglooʼ? 2) ¿Baʼax kʼáatchiʼil ken k-núuk teʼ xookaʼ?

² Le cristianoʼob teʼ yáax siglooʼ junmúuchʼ xan úuchik u meyajoʼob. Le apóstol Pablooʼ tu yaʼaleʼ kex jejeláas baʼaloʼob u yojel u  beetoʼob yéetel jejeláas meyaj tsʼaʼantiʼobeʼ, junmúuchʼ úuchik u meyajoʼob. Lelaʼ béeychaj u beetkoʼob tumen tu chaʼaj u nuʼuktaʼaloʼob tumen juntúuliliʼ máak, Jesucristo. Pabloeʼ tu yaʼaleʼ letiʼobeʼ beyoʼob junpʼéel wíinklileʼ tumen kex jejeláas u xéexetʼaleʼ junmúuchʼ u meyajoʼob (xok 1 Corintoiloʼob 12:4-6, 12). Kux túun teʼ kʼiinoʼobaʼ, ¿bix jeʼel u páajtal k-múuchʼ meyaj teʼ kʼaʼaytaj, teʼ múuchʼulil yéetel ichil k-familiaoʼ?

3. ¿Baʼax tu yilaj le apóstol Juan tiʼ junpʼéel náayoʼ?

³ Teʼ yáax siglooʼ tiʼ le apóstol Juanoʼ anchaj junpʼéel náay. Letiʼeʼ tu yilaj siete angeloʼob táan u yustikoʼob u trompetaʼob. Le ka tu yustaj u trompeta le u cinco angeloʼ, Juaneʼ tu yilaj u lúubul Luʼum «junpʼéel u estrellail kaʼan». Le estrellaaʼ tu chʼaʼaj junpʼéel llaveeʼ ka tu jeʼekʼabtaj u jool le taamkach chʼeʼenoʼ. Ka túun líikʼ junpʼéel buutsʼ, tsʼoʼoleʼ tiʼ le buutsʼaʼ jóokʼ yaʼabkach sáakʼoʼobiʼ. Chéen baʼaleʼ tu lugar u kʼaskúuntikoʼob u kʼáaxiloʼob le Luʼumoʼ tu loobiltoʼob «le máaxoʼob minaʼan u sello Dios tu táanpoolaloʼoboʼ» (Apo. 9:1-4). Juaneʼ u yojleʼ le sáakʼoʼobaʼ yaʼab loob jeʼel u beetkoʼobeʼ, tumen yaʼab loob tu beetoʼob tu luʼumil Egipto tu kʼiiniloʼob Moisés (Éxo. 10:12-15). Le sáakʼoʼob tu yilaj Juanoʼ ku chíikbesik le máaxoʼob yéeyaʼanoʼoboʼ, letiʼobeʼ táan u kʼaʼaytikoʼob yaan u xuʼulsaʼal le religionoʼob maʼatech u kaʼanskoʼob u jaajiloʼ. Chéen baʼaleʼ yaan uláakʼ u millonesil máakoʼob tsʼoʼok u muchʼkubaʼob tu yéeteloʼob utiaʼal u kʼaʼaytajoʼob, le máakoʼobaʼ táan u páaʼtkoʼob u kuxtaloʼob way Luʼumeʼ. Le kʼaʼaytajaʼ tsʼoʼok u yáantaj utiaʼal ka jóokʼok yaʼab máak tiʼ le maʼ jaajil religionoʼ yéetel utiaʼal ka náachchajkoʼob tiʼ Satanás.

4. ¿Baʼax meyaj tsʼaʼantoʼon, yéetel baʼax jeʼel u yáantkoʼon k-beeteʼ?

⁴ Tiʼ toʼoneʼ aʼalaʼan ka k-kʼaʼayt le «maʼalob péektsil» tiʼ tuláakal máak antes tiʼ u taal le xuʼulsajiloʼ. ¡Lelaʼ junpʼéel nojoch meyaj! (Mat. 24:14; 28:19, 20.) Toʼoneʼ táan k-aʼalik tiʼ tuláakal le máaxoʼob ‹ukʼajoʼoboʼ› ka u yukʼoʼob «u jaʼil le kuxtaloʼ». Lelaʼ u kʼáat u yaʼaleʼ unaj k-kaʼansik le baʼaxoʼob ku yaʼalik le Biblia tiʼ tuláakal le máaxoʼob u kʼáatoʼob kaanbaloʼ (Apo. 22:17). Chéen baʼaleʼ lelaʼ chéen jeʼel u páajtal k-beetik wa ‹k-múuchʼ meyaj› yéetel wa k-bisikba maʼalob yéetel le sukuʼunoʼob teʼ múuchʼuliloʼ (Efe. 4:16).

5, 6. ¿Tiʼ baʼaxoʼob k-múuchʼ meyaj yéetel le sukuʼunoʼoboʼ?

⁵ Utiaʼal u béeytal k-beetik maʼalob le meyaj tsʼaʼantoʼonaʼ kʼaʼabéet u nuʼuktaʼal maʼalob le bix k-kʼaʼaytajoʼ. Le oʼolal teʼ múuchʼuliloʼ ku kaʼansaʼaltoʼon bix unaj k-beetik. Táanil tiʼ k-jóokʼol kʼaʼaytajeʼ k-muchʼikba utiaʼal ka aʼalaʼaktoʼon bix ken k-beetil. Tsʼoʼoleʼ yaʼab xan publicacionoʼob tsʼaʼantoʼon utiaʼal k-kʼaʼaytik le Reino tiʼ tuláakal máakoʼ. Yaan kʼiineʼ k-invitartaʼal utiaʼal ka xiʼikoʼon kʼaʼaytaj táanxel tuʼuxoʼob. Ken táakpajkech teʼ kʼaʼaytajaʼ táan a múuchʼ meyaj yéetel u millonesil sukuʼunoʼob yaan tiʼ tuláakal yóokʼol kaaboʼ tumen láayliʼ táan u beetkoʼob le meyajaʼ. Tsʼoʼoleʼ táan xan a múuchʼ meyaj yéetel le angeloʼoboʼ tumen tak letiʼob táan u yáantajoʼob utiaʼal ka tsʼaʼabak ojéeltbil le baʼaxoʼob ken u beet Diosoʼ (Apo. 14:6).

⁶ ¿Máasaʼ jach ku kiʼimaktal k-óol ken k-xok teʼ Anuario le bukaʼaj kʼaʼaytaj táan u beetaʼal tiʼ tuláakal yóokʼol kaaboʼ? Toʼoneʼ k-múuchʼ meyaj xan yéetel tuláakal le sukuʼunoʼob ken k-invitart le máakoʼob utiaʼal ka xiʼikoʼob teʼ asambleaʼoboʼ. Teʼ asambleaʼoboʼ junpʼéeliliʼ kaʼansaj k-kʼamkiʼ. Le tsoltʼaanoʼob, dramaʼob yéetel le demostracionoʼoboʼ ku yáantkoʼonoʼob utiaʼal k-tsʼáaik táanil ichil k-kuxtal k-meyajtik Jéeoba. Ken xiʼikoʼon xan teʼ Kʼaʼajsajil cada añooʼ k-eʼesik junmúuchʼ k-meyaj yéetel le sukuʼunoʼob tiʼ tuláakal yóokʼol kaaboʼ (1 Cor. 11:23-26).  Tuláakloʼon k-muchʼikba tu kʼiinil 14 tiʼ Nisán yéetel tuláakloʼon k-kʼiinbesik ken tsʼoʼokok u tʼúubul Kʼiin, beyoʼ k-eʼesik k-tsʼáaik u graciasil tiʼ Jéeoba yéetel táan k-beetik le baʼax tu yaʼalaj Jesusoʼ. Jujunpʼéel semanaʼob antes tiʼ le Kʼaʼajsajiloʼ k-eʼesik xan k-múuchʼ meyaj yéetel le sukuʼunoʼoboʼ tumen k-ilik k-invitartik tuláakal máak utiaʼal ka u láakʼintoʼonoʼob teʼ kʼiinaʼ.

7. ¿Baʼax ku béeytal ken múuchʼ meyajnakoʼon yéetel u kaajal Dios?

⁷ Juntúul sáakʼeʼ wa chéen tu juunaleʼ maʼ tu páajtal u beetik yaʼab baʼaloʼob. Toʼon xaneʼ wa t-juunaleʼ maʼ tu páajtal k-kʼaʼaytaj tiʼ tuláakal yóokʼol kaab. Chéen baʼaleʼ ikil k-múuchʼ meyaj yéetel u kaajal Dioseʼ ku béeytal k-kʼaʼaytaj tiʼ u millonesil máakoʼob, beyoʼ k-áantkoʼob u kʼaj óoltoʼob yéetel u alabartoʼob Jéeoba.

8, 9. 1) ¿Bix tu ketil Pablo u kʼaʼabéetil k-múuchʼ meyaj? 2) ¿Bix jeʼel k-múuchʼ meyaj teʼ múuchʼuliloʼ?

⁸ Pabloeʼ tu yaʼalaj tiʼ le sukuʼunoʼob yanoʼob Éfeso bix unaj u meyaj junpʼéel múuchʼuliloʼ, yéetel tu yaʼalajtiʼobeʼ cada juntúuleʼ unaj u tsʼáaik u yóol meyaj tiʼ tuláakal baʼal (xok Efesoiloʼob 4:15, 16). Utiaʼal u yeʼesik tiʼ le sukuʼunoʼob tuláakloʼob unaj u múuchʼ meyajoʼob yéetel u tsʼáaikubaʼob yáanal u nuʼuktaj Jesusoʼ, Pabloeʼ tu ketaj le múuchʼulil yéetel bix u meyaj junpʼéel wíinklil. Letiʼeʼ tu yaʼaleʼ wa maʼalob u meyaj ‹le tuʼuxoʼob ku núupul le baakeloʼoboʼ›, maʼalob xan kun meyaj tuláakal u xéexetʼal le wíinkliloʼ. Le oʼolaleʼ kex táankelmoʼon wa kex tsʼoʼok u yantal k-edad bey xan wa kʼojaʼanoʼon wa maʼeʼ, ¿bix jeʼel k-áantaj utiaʼal ka múul meyajnak le múuchʼuliloʼ?

⁹ Jesuseʼ u tsʼaamaj ancianoʼob utiaʼal u nuʼuktikoʼob le múuchʼuliloʼ yéetel u kʼáat ka k-respetartoʼob yéetel ka k-beet le baʼaxoʼob ku chʼaʼtuklikoʼoboʼ (Heb. 13:7, 17). Lelaʼ yaan horaeʼ maʼ chéen chʼaʼabil u beetaʼaliʼ, chéen baʼaleʼ jeʼel u páajtal k-kʼáatik u yáantaj Jéeobaeʼ. U kiliʼich muukʼeʼ jeʼel u yáantkoʼon utiaʼal k-beetik le baʼax ku yaʼalik le ancianoʼob teʼ múuchʼuliloʼ. Wa kabal k-óol yéetel k-múuchʼ meyaj yéetel le ancianoʼoboʼ jach jeʼel k-áantaj teʼ múuchʼuliloʼ. Tsʼoʼoleʼ tuláakloʼon ken k-bisba maʼalob yéetel yaan k-maas yaabiltik le sukuʼunoʼoboʼ.

10. Le siervo ministerialoʼoboʼ, ¿bix u yáantajoʼob utiaʼal ka múuchʼ meyajnak le múuchʼuliloʼ? (Ilawil le foto yaan tu káajbal le xookaʼ.)

¹⁰ Le siervo ministerialoʼoboʼ ku yáantajoʼob xan utiaʼal u múul meyaj le múuchʼuliloʼ. Letiʼobeʼ jach ku yáantkoʼob le ancianoʼoboʼ, le oʼolal toʼoneʼ jach k-tsʼáaik u graciasil tiʼob. Le siervo ministerialoʼoboʼ ku yilik ka yanak publicacionoʼob utiaʼal u kʼaʼaytaj le múuchʼuliloʼ yéetel ku yilik u kʼamkoʼob tuláakal le máaxoʼob ku kʼuchloʼob teʼ muchʼtáambaloʼ. Tsʼoʼoleʼ jach ku tsʼáaik u yóoloʼob meyaj utiaʼal u pʼatkoʼob limpioil yéetel utiaʼal u yutskíintikoʼob le baʼaxoʼob kʼaʼabéet teʼ Najil Reinooʼ. Ken múul meyajnakoʼon tu yéetel le sukuʼunoʼobaʼ, ku maas antal yaabilaj ichil le múuchʼuliloʼ yéetel k-meyajtik Jéeoba jeʼex u nuʼuktik u kaajaloʼ (ket yéetel Baʼaxoʼob 6:3-6).

11. ¿Bix u yáantaj le táankelmoʼob utiaʼal ka múul meyajnak le múuchʼuliloʼ?

¹¹ Yaʼab ancianoʼobeʼ úuch joʼopʼok u meyajtikoʼob Jéeoba yéetel u yáantajoʼob teʼ múuchʼuliloʼ. Chéen baʼaleʼ maʼ xaaneʼ yaan tiʼ letiʼobeʼ tsʼoʼok u pʼáatal maʼ tu páajtal u beetkoʼob yaʼab meyajoʼob tumen tsʼoʼok u yantal u jaʼabiloʼob. Le sukuʼunoʼob maas táankelmoʼoboʼ jeʼel u páajtal u yáantajoʼobeʼ. Wa ku kaʼansaʼaloʼob maʼalob yéetel wa letiʼob ku tsʼáaik u yóoloʼobeʼ, jeʼel u páajtal u tsʼaʼabaltiʼob u maasil meyajoʼob teʼ múuchʼuliloʼ. Ken máanak kʼiineʼ hasta jeʼel u kʼuchul u beetubaʼob ancianoʼobeʼ (1 Tim. 3:1, 10). Jujuntúul ancianoʼob táankelmoʼobeʼ tsʼoʼok u maas áantajoʼob ichil u kaajal Jéeoba. Yanoʼobeʼ táan u beetik u superintendenteiloʼob tiʼ circuito yéetel táan  u yáantkoʼob yaʼab sukuʼunoʼob yéetel kiikoʼob tiʼ jejeláas múuchʼuliloʼob. ¿Máasaʼ jach k-tsʼáaik u graciasil tiʼ le sukuʼunoʼob táan u xupkubaʼob utiaʼal u meyajtikoʼob u maasiloʼ? (Xok Salmo 110:3 yéetel Eclesiastés 12:1.)

12, 13. ¿Baʼax jeʼel u yáantaj utiaʼal ka múuchʼ meyajnak le familiaoʼ?

¹² ¿Bix jeʼel k-áantaj utiaʼal ka múuchʼ meyajnak le máaxoʼob yanoʼob ichil k-familiaoʼ? Letiʼe ken k-beet cada semana le Adoración ich Familiaoʼ. Ken múul kaanbalnak le taatatsiloʼob yéetel u paalaloʼob tu yoʼolal Jéeobaoʼ ku maas nojochtal le yaabilaj yaan ichiloʼoboʼ. Teʼ súutukiloʼobaʼ letiʼobeʼ jeʼel u páajtal u kankoʼob le baʼax ken u yaʼaloʼob teʼ kʼaʼaytajoʼ, lelaʼ yaan u yáantkoʼob utiaʼal u maas maʼalobkíintikoʼob bix u kʼaʼaytajoʼob. Le máaxoʼob yanoʼob ichil le familiaoʼ ken u yuʼuboʼob u yaʼalik u maasil jach u yaabiltmoʼob Jéeoba yéetel u kʼáat u beetoʼob baʼax ku yaʼalikeʼ ku maas jatsʼutstal bix u biskubaʼob.

¹³ ¿Bix jeʼel u páajtal u múul meyaj le íichamtsil yéetel le atantsiloʼ? (Mat. 19:6.) Wa tu kaʼatúulaloʼob u yaabiltmoʼob Jéeoba yéetel ku múul meyajtikoʼobeʼ jeʼel u yantal kiʼimak óolal ichiloʼobeʼ. Unaj u paklan eʼeskoʼob u yaabiltmubaʼob jeʼex tu beetil Abrahán yéetel Sara, Isaak yéetel Rebeca bey xan Elcana yéetel Ana (Gén. 26:8; 1 Sam. 1:5, 8; 1 Ped. 3:5, 6). Wa le íichamtsil yéetel le atantsil ku beetkoʼob beyaʼ yaan u múuchʼ meyajoʼob tsʼoʼoleʼ yaan u maas biskubaʼob yéetel Jéeoba (xok Eclesiastés 4:12).

14. ¿Baʼax jeʼel u yáantaj utiaʼal ka yanak kiʼimak óolal ichil le familia kex le íichamtsil wa le atantsil maʼatech u meyajtik Diosoʼ?

¹⁴ Le Bibliaoʼ ku yaʼalikeʼ unaj u tsʼoʼokol u beel máak chéen yéetel máax meyajtik Dios (2 Cor. 6:14). Chéen baʼaleʼ, yaan jujuntúul sukuʼunoʼob yéetel kiikoʼobeʼ tsʼokaʼan u beeloʼob yéetel máaxoʼob maʼ j-Jaajkunajoʼobiʼ. Yanoʼobeʼ tsʼokaʼaniliʼ u beeloʼob ka káaj u meyajtikoʼob Dioseʼ, le oʼolal u núupoʼobeʼ maʼ j-Jaajkunajoʼobiʼ. Uláakʼoʼobeʼ maʼ xaaneʼ tsʼoʼok u beeloʼob yéetel juntúul máax meyajtik Jéeoba, chéen baʼaleʼ ka máan kʼiineʼ xuʼul u meyajtaʼal Dios tumen u núup. Kex a núup maʼ tu meyajtik Dioseʼ unaj a beetik le baʼax ku yaʼalik le Biblia utiaʼal u yantal kiʼimak óolal ichil a familiaoʼ. Yaan horaeʼ lelaʼ maʼ chéen chʼaʼabiliʼ. Lelaʼ bey úuchik tiʼ Mary. Letiʼeʼ tsʼoʼok u beel yéetel David, juntúul máax meyajtik Dios, chéen baʼaleʼ ka máan kʼiineʼ Davideʼ xuʼul u bin teʼ muchʼtáambaloʼoboʼ. Pero Maryeʼ maʼ xuʼul u beetik baʼax ku yaʼalik le Biblia yoʼolal le atantsiloʼoboʼ yéetel seguernaj u yeʼesik jatsʼuts modos. Letiʼeʼ seguernaj u kaʼansik u seis u túulal u paalal yéetel maʼ xuʼul u bin teʼ muchʼtáambaloʼoboʼ mix teʼ asambleaʼoboʼ. Ka nojochchaj le paalaloʼoboʼ cada juntúuleʼ lukʼ tu yotoch, kex Mary pʼáat tu juunaleʼ maʼ xuʼul u meyajtik Jéeobaiʼ. Chéen baʼaleʼ Davideʼ joʼopʼ u xokik le revistaʼob ku pʼaʼataltiʼ kaʼach tumen Maryoʼ. Ka máan kʼiineʼ letiʼeʼ joʼopʼ u kaʼa bin muchʼtáambal. Juntúul u chan áabil seis años yaantiʼeʼ ku jatsik kaʼach u lugar u abuelooʼ, tsʼoʼoleʼ ken pʼáatak maʼatech u bin u abuelo teʼ muchʼtáambaloʼ, ku yaʼaliktiʼ: «Abuelo, jach yaachaj in wóol tumen maʼ binech muchʼtáambal bejlaʼeʼ». Davideʼ 25 años náachchajaʼan tiʼ Jéeoba ka suunaj tu kaʼatéen. Bejlaʼeʼ letiʼ yéetel Maryeʼ kiʼimak u yóoloʼob ikil u múuchʼ meyajtikoʼob Jéeoba.

15. Le máaxoʼob úuch tsʼoʼokok u beeloʼoboʼ, ¿bix jeʼel u yáantkoʼob le máaxoʼob maʼ sen úuch tsʼoʼokok u beeloʼoboʼ?

¹⁵ Satanaseʼ táan u yilik bix u jatsik le familiaʼoboʼ. Yoʼolal lelaʼ le íichamtsiloʼob yéetel le atantsiloʼob ku meyajtikoʼob Jéeobaoʼ kʼaʼabéet u múuchʼ meyajoʼob. Kex tsʼoʼok u yúuchtal tsʼoʼokok u beel máakeʼ unaj u tuklik baʼax jeʼel u yaʼalik wa u beetik utiaʼal u maas muʼukʼaʼantal le yaabilaj yaan  ichiloʼoboʼ. Wa teʼex úuch tsʼoʼokok a beeleʼexeʼ beetabaʼex junpʼéel maʼalob ejemplo tiʼ le máaxoʼob maas maʼ úuch tsʼoʼokok u beeloʼoboʼ. Maʼ xaaneʼ jeʼel u páajtal a invitarkeʼexoʼob ta adoración ich familiaʼexoʼ. Beyoʼ yaan u yilkoʼobeʼ kex tsʼoʼok u máan años tsʼoʼokok u beel máakeʼ láayliʼ unaj u paklan yaabiltikubaʼobeʼ yéetel u biskubaʼob maʼalobeʼ (Tito 2:3-7).

16, 17. ¿Baʼax kun béeytal k-beetik maʼ kun xáantal?

¹⁶ Ken xiʼik kaʼach le israelitaʼob teʼ kʼiinbesajoʼob ku beetaʼal Jerusalenoʼ ku yilik u paklan áantkubaʼob. Letiʼobeʼ ku líiʼskubaʼob yéetel tuláakal le baʼax kun kʼaʼabéettaltiʼob teʼ viajeoʼ yéetel junmúuchʼ u binoʼob utiaʼal u paklan áantkubaʼob. Teʼ templo xanoʼ junmúuchʼ u alabartikoʼob yéetel u adorartikoʼob Jéeoba (Luc. 2:41-44). Teʼ kʼiinoʼobaʼ toʼoneʼ táan k-preparartikba utiaʼal k-kuxtal teʼ túumben luʼumoʼ, le oʼolaleʼ kʼaʼabéet k-múuchʼ meyaj yéetel k-paklan áantikba. Techeʼ, ¿bix jeʼel a wáantaj utiaʼal a múuchʼ meyaj yéetel le sukuʼunoʼoboʼ?

¹⁷ Bejlaʼeʼ le máakoʼoboʼ jach junpuliʼ maʼatech u tsʼáaikubaʼob de acuerdo yéetel chéen baʼateʼel ku beetkoʼob. Chéen baʼaleʼ toʼoneʼ jach k-tsʼáaik u graciasil tiʼ Jéeoba tumen tsʼoʼok u yáantkoʼon utiaʼal k-bisikba maʼalob yéetel utiaʼal k-naʼatik baʼax ku kaʼansik. Kex jejeláas tuʼux kajaʼanoʼoneʼ táan k-adorartik jeʼex u kʼáateʼ. Tumen kuxaʼanoʼon tu tsʼook kʼiinoʼobeʼ toʼoneʼ k-ilik k-múuchʼ meyaj ichil u kaajal Jéeoba. Jeʼex tu yaʼalil le profeta Isaías yéetel Miqueasoʼ, toʼoneʼ táan k-múuchʼ ‹naʼakal tu wits Jéeoba› (Isa. 2:2-4; xok Miqueas 4:2-4). Maʼ kun xáantaleʼ yaan u kiʼimaktal k-óol ken múuchʼ meyajnakoʼon yéetel u kaajal Jéeoba teʼ túumben luʼumoʼ yéetel junmúuchʼ xan ken k-adorartil.