Paalaleʼex, ¿bix jeʼel a prepararkabaʼex utiaʼal a wokjaʼexeʼ?
«Teneʼ uts tin tʼan in beetik le baʼax a kʼáateʼ, in Jajal Dios.» (SAL. 40:8, Los Salmos en Maya, LSM)
1, 2. 1) ¿Baʼaxten unaj a tuklik tubeel wa yaan a wokjaʼ? 2) ¿Baʼax unaj a wilik antes tiʼ a wokjaʼ?
WA TEECH táankelmech wa x-lóoʼbayanech yéetel a kʼáat okjaʼeʼ, jach maʼalob le baʼax taak a beetkoʼ tumen lelaʼ junpʼéel nojoch privilegio. Jeʼex t-ilaj teʼ xook máanikoʼ le okjaʼoʼ junpʼéel baʼal jach unaj u tuklaʼal tubeel, maʼ chéen báaxaliʼ. Ken okjaʼanakecheʼ táan a weʼesik tiʼ u maasil tsʼoʼok a kʼubik a kuxtal tiʼ Jéeoba yéetel táan a prometertiktiʼ a tsʼáaik táanil ichil a kuxtal a meyajtik chéen letiʼ. Lelaʼ junpʼéel nojoch promesa ka beetik tiʼ Dios, le oʼolaleʼ antes a wokjaʼeʼ unaj a wilik wa tsʼoʼok u yiijtal a tuukul, wa ka wuʼuyik letiʼe baʼax taak a beetkoʼ bey xan wa tsʼoʼok a naʼatik baʼax u kʼáat u yaʼal u kʼubik u kuxtal máak tiʼ Dios.
2 Maʼ xaaneʼ techeʼ ka tuklikeʼ maʼ preparadoech utiaʼal a wokjaʼiʼ. Maʼ xaan xaneʼ techeʼ ka tuklikeʼ preparadoech pero a papaʼobeʼ ku yaʼalikoʼobeʼ maas maʼalob ka a páaʼt a maas chan nojochtal tumen beyoʼ tsʼoʼok u maas yiijtal a tuukul. Wa ku yúuchultech lelaʼ, maʼ u lúubul a wóol. Baʼaxeʼ tsʼáa a wóol a beet baʼax kʼaʼanaʼan beyoʼ maʼ kun xáantal ken okjaʼanakech. Koʼox ilik óoxpʼéel baʼaloʼob jeʼel u yáantkech a preparartabaeʼ: a maas creertik baʼax ku yaʼalik le Bibliaoʼ, a kuxtal jeʼex u kʼáat Dioseʼ yéetel a tsʼáaik gracias tiʼ yoʼolal baʼaxoʼob ku tsʼáaiktech.
A MAAS CREERTIK BAʼAX KU YAʼALIK LE BIBLIAOʼ
3, 4. ¿Baʼax jeʼel u páajtal u kanik le paalal tiʼ u ejemplo Timoteooʼ?
3 Maʼalob ka tuukulnakech tiʼ le kʼáatchiʼobaʼ: ¿Kin creertik wa jach tu jaajil yaan Dios? ¿Kin creertik wa tiʼ Dios u taal le Bibliaoʼ? ¿Kin naʼatik wa baʼaxten maas unaj in beetik baʼax ku yaʼalik Dios tu lugar in beetik baʼax ku yaʼalik u maasil? Le kʼáatchiʼobaʼ jeʼel u yáantkech a wil wa táan a beetik le baʼax ku yaʼalik le apóstol Pabloaʼ: «Ta juunaleʼex ken a wileʼexeʼ, le baʼax u kʼáat Diosoʼ uts, kʼambeʼen yéetel jach chúukaʼan» (Rom. 12:2). ¿Baʼaxten unaj a wilik wa táan a beetik lelaʼ?
4 U ejemplo Timoteoeʼ jeʼel u yáantkech a wil baʼaxteneʼ. Letiʼeʼ jach u yojel baʼax ku yaʼalik le Bibliaoʼ tumen kaʼansaʼabtiʼ tumen u maama bey xan tumen u abuela. Chéen baʼaleʼ, Pabloeʼ tu yaʼalaj tiʼ Timoteo: «Maʼ u xuʼulul a tsʼáaik a wóol tiʼ le baʼaxoʼob ta kanaj yéetel oksaʼab ta tuukul a creertoʼ» (2 Tim. 3:14, 15). Junpʼéel diccionario ku tsolik u tʼaaniloʼob le Bibliaoʼ, ku yaʼalikeʼ le tʼaan ich griego ‹oksaʼab tu tuukuloʼ› u kʼáat xan u yaʼaleʼ «tu juunal máak ku kʼuchul u creert de ke jaaj wa baʼax yéetel jach seguro de ke beyoʼ». Jeʼex k-ilkoʼ lelaʼ u kʼáat u yaʼaleʼ Timoteoeʼ tu juunal tu tsʼáaj cuenta de ke teʼ Kiliʼich Tsʼíiboʼob yaan u jaajiloʼ, maʼ tumen sen aʼalaʼabtiʼ tumen u maama yéetel u abuelaiʼ (xok Romailoʼob 12:1).
5, 6. ¿Baʼaxten unaj a wilik u meyajtech maʼalob ‹le páajtalil yaantech utiaʼal a tuukul› desde beoraoʼ?
5 ¿Kux túun teech? Maʼ xaaneʼ líikʼech ichil u jaajil. Wa beyoʼ, maʼalob ka a tukult baʼaxten ka creertik le baʼaxoʼob tsʼoʼok a kanik teʼ Bibliaoʼ. Lelaʼ yaan u yáantkech utiaʼal u muʼukʼaʼantal a fe. Yaan xan u yáantkech utiaʼal maʼ a beetik baʼax kʼaas kex táan u sen aʼalaʼaltech tumen a wéet xookoʼob, kex maʼ bey u tuukul u maasiliʼ yéetel kex yaan hora taak a beetik yaanal baʼal.
6 Wa ku meyajtech maʼalob ‹le páajtalil yaantech utiaʼal a tuukul› desde beoraaʼ, yaan a wojéeltik baʼax ken a núuk ken beetaʼaktech tumen uláakʼ paalal le kʼáatchiʼobaʼ: «¿Bix a wojéeltik wa jach tu jaajil yaan Dios? Wa u yaabiltmoʼon Dioseʼ, ¿baʼaxten ku chaʼik u yúuchul baʼaloʼob kʼaastak? Wa Dios beet tuláakal baʼaleʼ, ¿máax túun beet letiʼ?». Wa a wojel baʼax ken a núukeʼ, mix máak ken u beet u xuʼulul u yantal a fe tiʼ baʼaxoʼob ka creertik yéetel yaan a maas tsʼáaik a wóol a xakʼalxokt le Bibliaoʼ.
7-9. Le baʼaxoʼob tsʼaʼan teʼ jw.org ich Internetoʼ, ¿bix jeʼel u yáantkecheʼ?
7 Wa suuk a xakʼalxoktik le Bibliaoʼ, yaan u béeytal a núukik le kʼáatchiʼob ku beetaʼaltechoʼ, yaan a wilik baʼaxten bey u kaʼansik wa baʼax le Bibliaoʼ yéetel yaan u muʼukʼaʼantal a fe (Bax. 17:11). Yaʼab baʼaxoʼob jeʼel u yáantkoʼon utiaʼal k-xakʼalxookeʼ, yaantoʼon libroʼob, videoʼob, revistaʼob yéetel uláakʼ publicacionoʼob jeʼel u páajtal k-ilik teʼ jw.org yaan ich Internetoʼ. Tuláakal le baʼaloʼobaʼ jeʼel u yáantkech a maas naʼat yéetel a creert baʼax ku yaʼalik le Bibliaoʼ.
8 ¿Suuk wa u meyajtech le Bibliaoʼ? Wa beyoʼ maʼ kun talamtaltech a núukik jeʼel baʼaxak ka kʼáataʼaktecheʼ. Chéen baʼaleʼ, ¿jach wa ka creertik le baʼax ka núukikoʼ? Tuláakal le baʼaxoʼob tsʼaʼan teʼ jw.org ich Internetoʼ, ku yáantkech utiaʼal a naʼatik le baʼax ka xokik teʼ Bibliaoʼ yéetel ku yáantkech utiaʼal a wilik bix jeʼel a tsolik le baʼax ka creertikoʼ. Wa ku páajtal a wokol Interneteʼ, ilawil u meyajtech tuláakal le baʼax tsʼaʼan teʼ jw.org cada ken xakʼalxooknakechoʼ.
9 Jeʼex tsʼoʼok k-ilkoʼ junpʼéel baʼal jeʼel u yáantkech a preparartaba utiaʼal a wokjaʼeʼ, letiʼe a tsʼáaik cuenta ta juunal de ke jach jaaj le baʼax ku yaʼalik le Bibliaoʼ. Juntúul x-chʼúupaleʼ ku yaʼalik: «Antes in chʼaʼtuklik in wokjaʼeʼ, tin xakʼalxoktaj le Bibliaoʼ yéetel tin tsʼáaj cuenta jach tiaʼanen ichil u jaajil religioneʼ. Cada kʼiin ku máaneʼ kin maas creertik tiaʼanen ichil u jaajileʼ».
A KUXTAL JEʼEX U KʼÁAT DIOSEʼ
10. Juntúul máax okjaʼanajaʼaneʼ, ¿baʼaxten maʼ chéen unaj u creertik baʼax ku yaʼalik le Bibliaoʼ?
10 Le Bibliaoʼ ku yaʼalik: «Le fe minaʼan utsil meyajoʼob tiʼoʼ kimen yanil» (Sant. 2:17). Wa ka creertik baʼax ku yaʼalik le Bibliaoʼ yaan a weʼesik yéetel baʼaxoʼob ka beetik. Yaan u yantaltech ‹junpʼéel kiliʼich kuxtal yéetel yaan a tsʼáaik a wóol a meyajt Dios› (xok 2 Pedro 3:11).
11. ¿Baʼax u kʼáat u yaʼal u yantal tiʼ máak «junpʼéel kiliʼich kuxtal»?
11 ¿Baʼax u kʼáat u yaʼal u yantal tiʼ máak «junpʼéel kiliʼich kuxtal»? Letiʼe u beetik máak baʼax maʼalob tu táan Diosoʼ. Tuukulnen tiʼ baʼax tsʼoʼok a beetik ichil le u tsʼook seis mesesoʼ. Yéetel le baʼaxoʼob ta beetoʼ, ¿ta weʼesaj wa tsʼoʼok a naʼatik baʼax maʼalob yéetel baʼax maʼ maʼalobiʼ? (Heb. 5:14). ¿Anchaj wa máax aʼaliktech ka a beet junpʼéel baʼax maʼ maʼalobiʼ? Wa beyoʼ, ¿ta beetaj wa baʼax uts tu tʼaan Dios? ¿Ka tsʼáaik wa junpʼéel maʼalob ejemplo teʼ escuelaoʼ? ¿Chúukpaj wa a wóol tiʼ Jéeoba wa ta beetaj baʼax aʼalaʼabtech tumen a wéet xookoʼob utiaʼal maʼ a pʼaʼastaʼal? (1 Ped. 4:3, 4.) U jaajileʼ tuláakloʼon kʼebanoʼon, yaan kʼiineʼ tak le máaxoʼob úuch joʼopʼok u meyajtikoʼob Jéeoba suʼlak u yaʼaloʼob j-Jaajkunajoʼob yéetel sajak u kʼaʼaytajoʼob. Chéen baʼaleʼ juntúul máax tsʼoʼok u kʼubik u kuxtal tiʼ Dioseʼ junpʼéel nojoch privilegio u yilik u kʼaj óoltaʼal bey j-Jaajkunajeʼ, lelaʼ ku yeʼesik yoʼolal baʼaxoʼob ku beetik ichil u kuxtal.
12. ¿Baʼax táakaʼan ichil ‹a tsʼáaik a wóol a meyajt Dios›, yéetel bix unaj a wilik?
12 ¿Baʼax táakaʼan ichil ‹a tsʼáaik a wóol a meyajt Dios›? Ichileʼ táakaʼan le meyajoʼob ka beetik ichil le múuchʼuliloʼ, jeʼex a bin teʼ muchʼtáambaloʼoboʼ yéetel a jóokʼol kʼaʼaytaj. Chéen baʼaleʼ táakaʼan xan uláakʼ baʼaloʼob maʼ tu yilaʼal tumen u maasil, jeʼex a orar tiʼ Jéeoba yéetel a xook chéen ta juunal. Le máax tsʼoʼok u kʼubik u kuxtal tiʼ Jéeobaoʼ maʼ tu yilik bey junpʼéel kuuch u beetik tuláakal lelaʼ. Letiʼeʼ ku yuʼubikuba jeʼex David, ka tu yaʼalaj: «Teneʼ uts tin tʼaan in beetik le baʼax a kʼáateʼ, in Jajal Dios; kin bisik tin puksiʼikʼal a kaʼanbesaj» (Sal. 40:8, LSM).
13, 14. ¿Baʼax jeʼel u yáantkech a wil wa táan ‹a tsʼáaik a wóol a meyajt Dioseʼ›, yéetel baʼax áant jujuntúul táankelem paalaloʼob?
13 Uláakʼ baʼax jeʼel u yáantkech a wil wa táan ‹a tsʼáaik a wóol a meyajt Dioseʼ›, letiʼe ka tuukulnakech xan tiʼ le kʼáatchiʼobaʼ: «¿Bix le oracionoʼob kin beetkoʼ? ¿Ku yeʼeskoʼob wa jach tu jaajil in yaabiltmaj Jéeoba? ¿Baʼaxoʼob kin táakbesik ichil le xakʼalxook kin beetkoʼ? ¿Kin jóokʼol wa kʼaʼaytaj kex maʼ tu jóokʼol in papaʼob?». [1] Ken tuukulnakech tiʼ le kʼáatchiʼobaʼ ilawil a tsʼíibtik u núukiloʼob, tumen lelaʼ jeʼel u yáantkech a maʼalobkíint bix a orareʼ, bix a xakʼalxook yéetel bix a kʼaʼaytaj.
14 A tsʼíibtik u núukil le kʼáatchiʼoboʼ jeʼel u yáantkech wa táan a prepararkaba utiaʼal a wokjaʼeʼ. Juntúul x-chʼúupal ku kʼaabaʼtik Tildaeʼ ku yaʼalikeʼ u tsʼíibtik u núukil le kʼáatchiʼoboʼ le áant utiaʼal u béeykuntik le metas yaantiʼoʼ. Jujunpʼéelil úuchik u bin u beetik baʼax tu chʼaʼtuklaj yéetel ka máan óoliʼ junpʼéel añoeʼ, okjaʼanaji. Juntúul xiʼipal ku kʼaabaʼtik Patrickeʼ láayliʼ bin utsil tiʼeʼ. Letiʼeʼ tu yaʼalaj: «Teneʼ in wojel baʼax metas yaanten, chéen baʼaleʼ in tsʼíibtikeʼ jach tu yáanten utiaʼal in maas tsʼáaik in wóol in beetoʼob».
Wa a papaʼob ku xuʼulul u meyajtikoʼob Dioseʼ, ¿jeʼel wa u seguer a meyajtik techeʼ? (Ilawil xóotʼol 15)
15. Tsol baʼaxten chéen teech unaj a chʼaʼtuklik wa yaan a kʼubik a kuxtal tiʼ Dios.
15 Junpʼéel tiʼ le kʼáatchiʼob jach maʼalob ka a wil a núukikoʼ, letiʼ lelaʼ: «¿Jeʼel wa u seguer in meyajtik Dios kex wa in papaʼob yéetel in amigoʼob ku xuʼulul u meyajtikoʼobeʼ?». Lelaʼ maʼalob ka a tukulte tumen kʼaʼajaktecheʼ ken a kʼub a kuxtal tiʼ Jéeoba yéetel ken okjaʼanakecheʼ, yaan u káajal a biskaba tu yéetel. Lelaʼ u kʼáat u yaʼaleʼ maʼ ken a meyajt Jéeoba chéen tumen ka wilik bey u beetik a papaʼob yéetel a amigoʼoboʼ. Wa yaantech ‹junpʼéel kiliʼich kuxtal yéetel ka tsʼáaik a wóol a meyajt Dioseʼ›, táan a weʼesik ka creertik tiaʼanech ichil u jaajileʼ yéetel a kʼáat a beet baʼax ku yaʼalik Dios. Tsʼoʼoleʼ wa táan a beetik tuláakal le baʼaloʼobaʼ yaan u béeytal a wokjaʼ.
A TSʼÁAIK GRACIAS TIʼ DIOS YOʼOLAL BAʼAXOʼOB KU TSʼÁAIKTECH
16, 17. 1) ¿Baʼax unaj u péeksik máak okjaʼ yéetel u beetkuba disipuloil tiʼ Jesús? 2) ¿Bix jeʼel u yáantkech a tuukul tiʼ u kuxtal Jesús tu kʼuboʼ? Tsʼáa junpʼéel ejemplo.
16 Juntéenjeakileʼ juntúul máak jach u kʼaj óol u Ley Moiseseʼ tu kʼáataj tiʼ Jesús: «Ichil le baʼaxoʼob ku yaʼalik le Leyoʼ, ¿máakalmáak u maas nojchil?». Letiʼeʼ tu núukaj: «Kʼaʼabéet a yaabiltik Jéeoba yéetel tuláakal a puksiʼikʼal, tuláakal a kuxtal yéetel tuláakal a tuukul» (Mat. 22:35-37). Jesuseʼ tu yaʼalajtiʼeʼ le yaabilajoʼ letiʼe baʼax unaj u péeksik máak okjaʼ yéetel u beet u disipuloiloʼ. Junpʼéel baʼax jeʼel u yáantkoʼon k-yaabilt Jéeobaeʼ letiʼe ka tuukulnakoʼon tiʼ le maas nojoch regalo tu tsʼáaj tiʼ wíinikoʼ: le u kuxtal Jesusoʼ (xok 2 Corintoiloʼob 5:14, 15 yéetel 1 Juan 4:9, 19). Ken a beet lelaʼ ka weʼesik jach ka tsʼáaik gracias tiʼ Dios yoʼolal le jatsʼuts regaloaʼ.
17 Utiaʼal a naʼatik bix unaj a wilik le nojoch regaloaʼ, tuukulnen tiʼ lelaʼ: koʼox aʼalikeʼ táan a búulul yéetel ku taal juntúul máax salvartikech. ¿Máasaʼ maʼ chéen ken a tikinkúuntaba yéetel a sutik a paach utiaʼal ka xiʼikechiʼ? ¿Máasaʼ maʼ ten a tuʼubs le baʼax tu beetaj le máak ta woʼolaloʼ? Techeʼ mix bikʼin kun xuʼulul a tsʼáaik u graciasil tiʼ le máax salvartechoʼ. Toʼon xaneʼ unaj k-jach tsʼáaik u graciasil tiʼ Jéeoba yéetel tiʼ Jesús úuchik u salvartikoʼob k-kuxtal. Chéen tu yoʼolaloʼob kuxaʼanoʼon; letiʼob salvartoʼon tiʼ le kʼeban yéetel tiʼ le kíimiloʼ. Tsʼoʼoleʼ tu yoʼolal le yaabilaj tu yeʼesoʼobtoʼonoʼ yaantoʼon u esperanzail k-kuxtal minaʼan u xuul teʼ Paraíso way Luʼumoʼ.
18, 19. 1) ¿Unaj wa a sajaktal a kʼubik a kuxtal tiʼ Dios? 2) ¿Baʼaxten jeʼel u bintech maas maʼalob wa ka chʼaʼtuklik a meyajtik Jéeobaeʼ?
18 Techeʼ, ¿ka tsʼáaik wa u graciasil tiʼ Jéeoba yoʼolal baʼax tsʼoʼok u beetik ta woʼolal? Wa beyoʼ maʼalob ka a kʼub a kuxtal tiʼ Dios yéetel ka okjaʼanakech, minaʼan uláakʼ baʼax maas maʼalob jeʼel a beetkeʼ. Ken a kʼub a kuxtal tiʼ Dioseʼ ka prometertiktiʼ a beetik baʼax u kʼáat tuláakal u kʼiiniloʼob a kuxtal. ¿Unaj wa a sajaktal a beet le promesaaʼ? Maʼatech. Jéeobaeʼ u kʼáat ka xiʼiktech utsil yéetel yaan u bendecirtikech wa ka beetik baʼax u kʼáat (Heb. 11:6). Maʼ tun bintech kʼaasil wa ka kʼubik a kuxtal tiʼ Dios yéetel ka wokjaʼ, baʼaxeʼ maas maʼalob kun bintech yéetel yaan u yantaltech kiʼimak óolal. Juntúul sukuʼun yaan 24 años tiʼ bejlaʼeʼ, okjaʼanaj desde tu chan paalil, letiʼeʼ ku yaʼalik: «Wa ka in páaʼt in maas nojochtal kaʼacheʼ, maʼ xaaneʼ jeʼel in maas naʼatik maʼalob baʼax kin beetkeʼ. Chéen baʼaleʼ in wokjaʼ desde tin chichnileʼ tu kanáanten utiaʼal maʼ in bin tu paach le baʼaxoʼob yaan teʼ yóokʼol kaabaʼ».
19 Jéeobaeʼ u kʼáat ka xiʼiktech utsil, pero Satanaseʼ chéen u yutsil ku kaxtik, tsʼoʼoleʼ maʼ u yaabiltmechiʼ. Mix baʼal uts jeʼel u páajtal a kʼamik tiʼ letiʼ wa ka chʼaʼtuklik a tsʼáaikaba tu tséeleʼ. ¿Bix jeʼel u tsʼáaiktech baʼax maʼalob wa mix tiʼ letiʼ yaan? ¿Bix jeʼel u beetik u bintech utsil wa mix tiʼ letiʼ yaan esperanzaeʼ? Maʼ tu páajtal u prometertiktech baʼax maʼalob tumen letiʼeʼ chéen táan u páaʼtik u xuʼulsaʼal (Apo. 20:10).
20. ¿Baʼax jeʼel u yáantkech utiaʼal a kʼubik a kuxtal tiʼ Dios yéetel a wokjaʼeʼ? (Ilawil le cuadro « Baʼaxoʼob jeʼel u yáantkech a maas bisaba yéetel Dioseʼ».)
20 A kʼubik a kuxtal tiʼ Jéeobaeʼ letiʼe baʼax maas maʼalob jeʼel u páajtal a beetkoʼ. Techeʼ, ¿preparadoech wa utiaʼal a wokjaʼ? Wa beyoʼ, ilawil a beetik, maʼ a sajaktal. Chéen baʼaleʼ wa ka wuʼuyik maʼ preparadoecheʼ, tsʼáa a wóol a beet le baʼaxoʼob tsʼoʼok k-ilik teʼ xookaʼ, beyoʼ maʼ kun xáantal ken okjaʼanakech. Pabloeʼ tu yaʼalaj tiʼ le sukuʼunoʼob yanoʼob Filiposoʼ ka seguernak u kaanbaloʼob (Fili. 3:16). Wa ka beetik le baʼax tu yaʼalaj le apostolaʼ, jeʼel a wilkeʼ, maʼ kun xáantal ken a kʼub a kuxtal tiʼ Dios yéetel a wokjaʼ.
^ [1] (xóotʼol 13) Jujuntúul paalaleʼ tsʼoʼok u jóoʼskoʼob u yutsil u tsʼíibtikoʼob u núukil le kʼáatchiʼob yaan teʼ táan juʼun 308 yéetel 309, tiʼ le libro Lo que los jóvenes preguntan. Respuestas prácticas, u kaʼapʼéel libroil.
