1-3. 1) Maʼ xaaneʼ, ¿baʼax problema anchaj tiʼ Evodia yéetel Síntique? (Ilawil le dibujo yaan tu káajbal le xookaʼ.) 2) ¿Baʼax jeʼel u yáantaj utiaʼal maʼ u yantal kʼuuxiloʼobeʼ?

TOʼONEʼ nojoch baʼal k-ilik le Bibliaoʼ tumen k-ojel u Tʼaan Dios. Le Bibliaoʼ jeʼel u yáantkoʼon k-utskíint le problemaʼoboʼ bey xan le baʼaloʼob maʼ maʼalobtak k-beetkoʼ. ¿K-kʼamik wa le tsolnuʼukoʼob ku tsʼáaikoʼ? Koʼox ilik baʼax úuch teʼ yáax siglo tiʼ Evodia yéetel Síntique, kaʼatúul kiikoʼob yéeyaʼanoʼob utiaʼal u binoʼob kaʼanoʼ. Le Bibliaoʼ ku yaʼalikeʼ baʼateltʼaanajoʼob chéen baʼaleʼ maʼatech u yaʼalik baʼax oʼolal. Koʼox k-máansik t-tuukul bey baʼax úucheʼ.

² Maʼ xaaneʼ Evodiaeʼ tu invitartaj janal tu yotoch jujuntúul sukuʼunoʼob yéetel kiikoʼob pero maʼ tu invitartaj Síntiqueiʼ. Ka joʼopʼ u tsikbaltaʼal jach kiʼichaj le jaanloʼ Síntiqueeʼ kʼuuxilnaji yéetel maʼ xaaneʼ tu tuklaj: «¡Maʼ tu páajtal in creertik maʼ tu invitarteniʼ, tin tuklaj jach in amigaeʼ!». Síntiqueeʼ joʼopʼ u tuklikeʼ maʼ yaabiltaʼan tumen Evodiaiʼ yéetel maʼ u kʼáat u seguer u biskuba tu yéeteliʼ. Letiʼ túuneʼ tu beetaj junpʼéel janaleʼ ka tu invitartaj le sukuʼunoʼob binoʼob tu yotoch Evodiaoʼ pero letiʼeʼ maʼ tu  invitartiʼ. Le baʼax úuchaʼ maʼ xaaneʼ tu beetaj u káajal u jatskuba le sukuʼunoʼob teʼ múuchʼuliloʼ. Le Bibliaoʼ ku yaʼalikeʼ Pabloeʼ tu tsolnuʼuktaj le kaʼatúul kiikoʼobaʼ yéetel tu yaʼalajtiʼob ka u kaʼa bisubaʼob maʼalob. Letiʼobeʼ tu beetoʼob le baʼax aʼalaʼabtiʼob tumen Pablooʼ ka seguernaj u meyajtikoʼob Jéeoba yéetel kiʼimak óolal (Fili. 4:2, 3).

³ Bejlaʼa xaneʼ teʼ múuchʼuliloʼ yaan kʼiineʼ jeʼel u yantaltoʼon wa baʼax kʼuuxilil yéetel wa máaxeʼ. Chéen baʼaleʼ wa k-chaʼik k-nuʼuktaʼal tumen le Bibliaoʼ, jeʼel k-utskíintik le problemaʼobaʼ wa jeʼel u beetik maʼ u yantaltoʼon mix junpʼéel kʼuuxilileʼ. Le ken k-beet xan baʼax ku yaʼalik le Bibliaoʼ k-eʼesik nojoch baʼal k-ilik le baʼax ku yaʼaliktoʼon Diosoʼ (Sal. 27:11).

4, 5. ¿Baʼax tsolnuʼukil ku tsʼáaik le Biblia jeʼel u yáantkoʼon k-controlart bix k-uʼuyikbaeʼ?

⁴ U jaajileʼ maʼ chéen chʼaʼabil k-controlartik bix k-uʼuyikbaiʼ. Maʼ xaaneʼ yaan máax jeʼel u yaʼaliktoʼon baʼal tu yoʼolal tuʼux k-taal, u color k-ootʼel wa yoʼolal bixoʼon, lelaʼ jeʼel u beetik k-jach pʼuʼujul wa u yaatal k-óoleʼ. Tsʼoʼoleʼ maas jeʼel u yaatal k-óol wa juntúul sukuʼun wa kiik aʼaliktoʼoneʼ. ¿Baʼax tsolnuʼukil ku tsʼáaik le Biblia jeʼel u yáantkoʼonoʼ?

⁵ Jéeobaeʼ u yojel baʼax jeʼel u yúuchul wa maʼ t-controlartik bix k-uʼuyikbaeʼ. Wa k-séeb pʼuʼujuleʼ maʼ xaaneʼ jeʼel k-beetik wa k-aʼalik junpʼéel baʼal jeʼel u beetik u yaatal k-óol ken tsʼoʼokkeʼ. Teʼ Bibliaoʼ Jéeobaeʼ ku yaʼaliktoʼon: «Maʼ a chaʼik a jíiltaʼal tumen a pʼuʼujul». Wa k-beetik le baʼax ku yaʼalik le tekstoaʼ maʼ kun jach antaltoʼon problemaʼob yéetel u maasil (xok Proverbios 16:32 yéetel Eclesiastés 7:9). Le Bibliaoʼ ku yaʼalik xaneʼ unaj k-perdonartik u maasil. Tak Jesuseʼ tu yaʼaleʼ wa maʼ t-perdonartik k-éet máakileʼ Jéeobaeʼ maʼ ken u perdonartoʼon (Mat. 6:14, 15). Le oʼolaleʼ ken beetaʼaktoʼon wa baʼaxeʼ, ¿k-ilik wa k-séeb perdonar?

6. ¿Baʼax jeʼel u yúuchul wa maʼ t-kanik controlart bix k-uʼuyikbaeʼ?

⁶ Wa maʼ t-controlartik bix k-uʼuyikbaeʼ jeʼel k-pʼuʼujuleʼ yéetel jeʼel u káajal k-pʼektik wa máaxeʼ. Juntúul máax ku chʼaʼkʼuxtik u maasileʼ jeʼel u beetik u kʼastal bix u tuukul le sukuʼunoʼoboʼ. Tak wa maʼ t-jach eʼesik wa kʼuuxoʼon bey xan wa k-pʼekmaj wa máaxeʼ yaan u kʼuchul u kʼiinil u yilaʼal bix k-uʼuyikba. Lelaʼ jeʼel u beetik u náachtal le sukuʼunoʼob tiʼ toʼonoʼ (Pro. 26:24-26). Wa yaan máax teʼ múuchʼulil bey u yuʼubikubaoʼ le ancianoʼoboʼ jeʼel u páajtal u yáantkoʼob utiaʼal u tsʼáa cuentaeʼ ichil le múuchʼuliloʼ maʼ maʼalob ka yanak máax ku pʼektik u sukuʼuniʼ mix ka u chʼaʼkʼuxtiʼ (Lev. 19:17, 18; Rom. 3:11-18). Wa k-beetik le baʼax ku yaʼalik le ancianoʼoboʼ yaan k-eʼesik k-kʼáat ka u nuʼuktoʼon baʼax ku yaʼalik le Bibliaoʼ.

7, 8. 1) ¿Bix u nuʼuktik Jéeoba le máaxoʼob meyajtik way Luʼumoʼ? 2) ¿Máakalmáak jujunpʼéel nuʼuktajoʼob ku tsʼáaiktoʼon le Bibliaoʼ, yéetel baʼaxten unaj k-beetik?

⁷ Teʼ kʼiinoʼobaʼ Jéeobaeʼ ku nuʼuktik yéetel ku kaʼansik u kaajal yaan way Luʼumeʼ, ¿bix u beetik? Tiʼ letiʼeʼ ku meyaj «le palitsil chúukaʼan u yóol yéetel yaan u naʼat» yáanal u nuʼuktaj «Cristo u poolil le múuchʼuliloʼ» (Mat. 24:45-47; Efe. 5:23). Jeʼex úuchik u beetik le Cuerpo Gobernante teʼ yáax siglooʼ bejlaʼa xaneʼ le «palitsiloʼ» nojoch baʼal u yilik u Tʼaan Dios, le Bibliaoʼ (xok 1 Tesalonicailoʼob 2:13). Koʼox ilik jujunpʼéel nuʼuktajoʼob ku tsʼáaik le Bibliaoʼ.

⁸ Le Bibliaoʼ ku yaʼaliktoʼon maʼ u xuʼulul k-bin muchʼtáambal (Heb. 10:24, 25). Ku yaʼalik xan toʼon ka junpʼéeliliʼchajak baʼax  k-creertik (1 Cor. 1:10). Bey xan ka k-tsʼáa táanil le Reino ichil k-kuxtaloʼ (Mat. 6:33). Le Biblia xanoʼ ku yaʼalik kʼaʼabéet k-kʼaʼaytaj joonaj joonajil, tuʼux yaʼab u máan máak yéetel jeʼel tuʼuxak ka k-il yaan máakeʼ (Mat. 28:19, 20; Bax. 5:42; 17:17; 20:20). Tiʼ le ancianoʼob xanoʼ ku yaʼalik ka u yiloʼob u pʼáatal limpioil le múuchʼuliloʼ (1 Cor. 5:1-5, 13; 1 Tim. 5:19-21). Jéeobaeʼ ku yaʼalik xan tiʼ tuláakal le máaxoʼob meyajtikoʼ ka yanaktiʼob junpʼéel kuxtal limpio yéetel ka u adorartoʼob jeʼex uts tu tʼaaneʼ (2 Cor. 7:1).

9. ¿Baʼax ku meyaj tiʼ Jesús utiaʼal k-naʼatik baʼax ku yaʼalik le Bibliaoʼ?

⁹ Jujuntúul máakoʼobeʼ ku tuklikoʼobeʼ jeʼel u naʼatkoʼob tubeel le Biblia kex ka u xokoʼob tu juunaloʼoboʼ. Chéen baʼaleʼ desde 1919, tiʼ Jesuseʼ táan u meyaj le «palitsil chúukaʼan u yóol» utiaʼal u yáantik u kaajal Dios u naʼat baʼax ku kaʼansik le Bibliaoʼ. Wa k-beetik baʼax ku yaʼalik le Bibliaoʼ, le múuchʼuliloʼ yaan u pʼáatal limpioil, yaan u yantal jeetsʼeliliʼ yéetel yaan k-bisikba yéetel u maasil. Le oʼolaleʼ unaj k-tuklik: «¿Kin weʼesik wa chúukaʼan in wóol tiʼ Jesús ikil in beetik le baʼax ku yaʼalik le ‹palitsil chúukaʼan u yóoloʼ›?».

10. U libroil Ezequieleʼ, ¿bix u ketik le u jaats u kaajal Jéeoba yaan teʼ kaʼanoʼ?

¹⁰ Le Bibliaoʼ ku yaʼalikeʼ le angeloʼob yéetel tuláakal le máaxoʼob meyajtik Jéeoba teʼ kaʼanoʼ tu tsoolol u meyajoʼob xan. Tiʼ Ezequieleʼ tsʼaʼab u yil junpʼéel carro nuʼuktaʼan tumen Jéeoba, lelaʼ séeb u bin jeʼel tuʼuxak ka nuʼuktaʼak tumen Jéeobaeʼ (Eze. 1:4-28). Le carroaʼ letiʼe u jaats u kaajal Jéeoba yaan teʼ kaʼanoʼ yéetel séeb u beetik le baʼax ku nuʼuktaʼal tiʼ tumen Jéeobaoʼ, tsʼoʼoleʼ letiʼobeʼ ku nuʼuktikoʼob xan le u jaats u kaajal Jéeoba yaan way Luʼumeʼ. Tuukulnakoʼon tiʼ le yaʼab baʼaloʼob tsʼoʼok u kʼexpajal ichil u kaajal Jéeoba ichil le diez añosaʼ. Maʼ unaj k-tuʼubsikeʼ tiʼ Jéeoba u taal le kʼeexoʼobaʼ. Maʼ tun xáantaleʼ Jesucristo yéetel le angeloʼoboʼ yaan u xuʼulskoʼob le kʼasaʼan yóokʼol kaabaʼ, ken tsʼoʼokkeʼ mix máak kun tʼaan kʼaas tiʼ u kʼaabaʼ Jéeoba mix tiʼ le bix u gobernaroʼ.

11, 12. ¿Baʼax tsʼoʼok u beetik u kaajal Jéeoba teʼ tu tsʼook kʼiinoʼobaʼ?

¹¹ Tuukulnakoʼon tiʼ le bukaʼaj meyaj tsʼoʼok u beetik u kaajal Jéeoba teʼ kʼiinoʼobaʼ. Ichil lelaʼ tiaʼan le u beetaʼal najoʼob tuʼux ku adorartaʼal Jéeobaoʼ. Tu kaajil Warwickeʼ (Nueva York, Estados Unidos), u cientosil sukuʼunoʼobeʼ tsʼoʼok u jach meyajoʼob utiaʼal u beetaʼal le túumben Betel tuʼux kun nuʼuktbil le meyaj ku beetik u j-jaajkunajoʼob Jéeobaoʼ. Tsʼoʼoleʼ tiʼ tuláakal yóokʼol kaabeʼ u milesil sukuʼunoʼobeʼ táan u yáantajoʼob utiaʼal u beetaʼal u Najiloʼob Reino yéetel u najiloʼob Betel. Le sukuʼunoʼobaʼ nuʼuktaʼanoʼob tumen le Departamento Mundial tiʼ Diseño yéetel Construccionoʼ. ¿Máasaʼ jach k-tsʼáaik u diosboʼotikil tiʼob yoʼolal le meyaj ku beetkoʼoboʼ? Tuláakal  le máaxoʼob meyajtik Jéeobaoʼ ku yáantajoʼob utiaʼal u páajtal u boʼotaʼal le najoʼob ku beetaʼalaʼ. Yoʼolal le kabal óolal yéetel le chúukaʼan óolal ku yeʼeskoʼoboʼ Jéeobaeʼ jach ku bendecirtikoʼob (Luc. 21:1-4).

¹² Kaʼansaj. Jéeobaeʼ jach u kʼáat ka kaanbalnak u kaajal (Isa. 2:2, 3). Tuukulnakoʼon tiʼ le jejeláas escuelaʼob yaan bejlaʼa jeʼex le Escuela utiaʼal Precursoroʼoboʼ, le Escuela utiaʼal Máaxoʼob Kʼaʼaytik le Reinooʼ, le Escuela tiʼ Galaadoʼ, le Escuela utiaʼal Túumben Betelitaʼoboʼ, le Escuela utiaʼal Superintendenteʼob tiʼ Circuito yéetel u yatanoʼoboʼ, le Escuela utiaʼal u Ancianoiloʼob le Múuchʼuliloʼ, le Escuela tiʼ Ministerio tiʼ le Reinooʼ bey xan le Escuela utiaʼal le Máaxoʼob yanoʼob ichil le Comités tiʼ Sucursal yéetel u yatanoʼoboʼ. Tsʼoʼoleʼ teʼ sitio jw.org yaantoʼon Internetoʼ jeʼel u páajtal k-kaxtik le Biblia yéetel uláakʼ publicacionoʼob ich u cientosil idiomaʼoboʼ. Teʼeloʼ yaan jaatsoʼob chéen utiaʼal mejen paalaliʼ, utiaʼal le familiaʼoboʼ bey xan junpʼéel jaats ku tʼaan tiʼ noticiaʼob (lelaʼ ich español yaan). ¿Tsʼoʼok wa u meyajtech le sitio jw.org teʼ kʼaʼaytaj wa ta Adoración ich Familiaoʼ?

13. ¿Baʼax unaj k-beetik utiaʼal k-lúubul utsil tiʼ Dios?

¹³ Minaʼan uláakʼ baʼal jach jatsʼuts jeʼex k-antal ichil u kaajal Jéeobaeʼ yéetel k-ojéeltik baʼax uts tu tʼaan ka k-beete. Toʼoneʼ k-ojel baʼax uts tu tʼaan Dios le oʼolaleʼ unaj k-uʼuyik u tʼaan yéetel k-beetik baʼax maʼalob. Yéetel kex yaʼab máak uts tu tʼaan u beetik baʼax kʼaaseʼ, toʼoneʼ unaj k-pʼektik le baʼax kʼaas jeʼex u beetik Diosoʼ (Sal. 97:10). Maʼ unaj k-tuukul jeʼex le máaxoʼob ku yaʼalikoʼob «uts tiʼ baʼax kʼaas» yéetel «tiʼ baʼax kʼaaseʼ uts» (Isa. 5:20). Toʼoneʼ k-kʼáat lúubul utsil tiʼ Jéeoba le oʼolaleʼ k-ilik k-bisik junpʼéel kuxtal limpio yéetel k-adorartik jeʼex uts tu tʼaaneʼ (1 Cor. 6:9-11). K-yaabiltmaj xan Jéeoba yéetel k-ilik u chúukpajal k-óol tiʼ letiʼ tumen tuláakal le baʼax ku yaʼaliktoʼon teʼ Bibliaoʼ utiaʼal k-utsil. Lelaʼ letiʼe baʼax oʼolal k-chaʼik u nuʼuktikoʼon ichil k-otoch, teʼ múuchʼuliloʼ, teʼ tuʼux k-meyajoʼ, teʼ escuelaoʼ wa jeʼel tuʼuxak ka yanakoʼoneʼ (Pro. 15:3). Koʼoneʼex ilik bix jeʼel k-eʼesik chúukaʼan k-óol tiʼ Dioseʼ.

14. Le taatatsiloʼob u yaabiltmoʼob Jéeobaoʼ, ¿bix u yeʼeskoʼob chúukaʼan u yóoloʼob tiʼ?

¹⁴ U líiʼsaʼal le paalaloʼoboʼ. Le taatatsiloʼoboʼ ku yeʼeskoʼob chúukaʼan u yóoloʼob tiʼ Jéeoba ken u líiʼsoʼob u paalaloʼob jeʼex u tsolnuʼuktiktiʼob Jéeoba teʼ Bibliaoʼ. Le taatatsiloʼoboʼ unaj u kanáantkoʼob maʼ u tuukuloʼob jeʼex u tuukul u máakiloʼob le yóokʼol kaabaʼ (Efe. 2:2). Yaan tuʼuxoʼobeʼ le xiiboʼoboʼ ku yaʼalikoʼob: «Letiʼe koʼoleloʼob unaj u kaʼansik le paalaloʼoboʼ», chéen baʼaleʼ le Bibliaoʼ ku yaʼalikeʼ letiʼe taatatsil unaj u kaʼansik tiʼ u paalaloʼob baʼax ku yaʼalik Jéeobaoʼ (Efe. 6:4). Le oʼolaleʼ le taatatsiloʼob yéetel le maamatsiloʼob u yaabiltmoʼob Jéeobaoʼ ku yilkoʼob u biskuba maʼalob u paalaloʼob yéetel Jéeoba jeʼex úuchik u beetik Samuel tu chichniloʼ (1 Sam. 3:19).

15. ¿Bix jeʼel k-eʼesik chúukaʼan óol ken k-chʼaʼtukult baʼax ken k-beeteʼ?

¹⁵ Ken u chʼaʼtukult máak wa baʼax. Táanil tiʼ k-chʼaʼtuklik wa baʼax ichil k-kuxtaleʼ unaj k-ilik baʼax ku tuklik Jéeoba, beyoʼ yaan k-eʼesik chúukaʼan k-óol tiʼ letiʼ. Le Biblia yéetel u kaajal Jéeobaoʼ jach jeʼel u yáantkoʼon utiaʼal k-ilik baʼax unaj k-beetkeʼ. Bejlaʼeʼ jujuntúul taatatsiloʼob tsʼoʼok u binoʼob meyaj táanxel luʼumileʼ ken síijik u mejen paalaloʼobeʼ ku túuxtikoʼob yiknal u láakʼtsiloʼob utiaʼal ka kanáantaʼakoʼob, beyoʼ letiʼobeʼ jeʼel u páajtal u seguer u meyajoʼobeʼ yéetel u juntarkoʼob maas taakʼin. U jaajileʼ  tiʼ le baʼaloʼob beyaʼ cada juntúul unaj u chʼaʼtuklik baʼax ken u beete, chéen baʼaleʼ le máaxoʼob tsʼokaʼan u beeloʼoboʼ maʼalob ka tuukulnakoʼob tiʼ lelaʼ: «¿Baʼax ku tuklik Jéeoba tu yoʼolal le baʼax ken in beetoʼ?» (xok Romailoʼob 14:12). Táanil tiʼ k-chʼaʼtuklik k-beetik wa baʼax yaan yil yéetel k-familia wa yoʼolal k-meyajeʼ, maʼalob ka k-il baʼax ku yaʼalik le Bibliaoʼ, beyoʼ k-eʼesik yaan k-naʼat. Toʼoneʼ maʼ tu páajtal k-nuʼuktik t-juunal k-kuxtal le oʼolaleʼ kʼaʼabéettoʼon u yáantaj Jéeoba (Jer. 10:23).

16. ¿Baʼax anchaj u chʼaʼtuklik juntúul maamatsil, yéetel baʼax áant u beet baʼax maʼalob?

¹⁶ Juntúul koʼolel yéetel u yíichameʼ binoʼob kajtal táanxel luʼumil, tsʼoʼoleʼ ka máan kʼiineʼ anchaj juntúul u chaambaloʼob. Letiʼobeʼ táan kaʼach u tuklikoʼob u túuxtikoʼob le chaambal yiknal u abueloʼob utiaʼal ka kanáantaʼakoʼ. Chéen baʼaleʼ teʼ kʼiinoʼoboʼ le koʼolelaʼ káaj u xokik le Biblia yéetel u j-jaajkunajoʼob Jéeobaoʼ, teʼeloʼ tu kaneʼ letiʼ unaj u kaʼansik tiʼ u hijo baʼax uts tu tʼaan Jéeoba (Sal 127:3; Pro. 22:6). Le koʼolelaʼ orarnaj tiʼ Jéeoba jeʼex u yaʼalik le Biblia ka beetaʼakoʼ ka tu kʼáat óoltaj ka áantaʼak utiaʼal ka beetaʼak baʼax maʼalob (Sal. 62:7, 8). Letiʼeʼ tu tsikbaltaj tiʼ le kiik tsʼáaiktiʼ xook le baʼax ku yúuchultiʼoʼ bey xan tiʼ uláakʼ sukuʼunoʼob teʼ múuchʼuliloʼ, kex u láakʼtsiloʼob yéetel u amigoʼob táan kaʼach u yaʼaliktiʼob ka u túuxtoʼob u chan hijoʼob yiknal u abueloʼoboʼ letiʼeʼ maʼ tu yóotiʼ. U yíichameʼ tu yilaj bix úuchik u yáantaʼal u yatan yéetel u chan hijoʼob tumen le sukuʼunoʼoboʼ, lelaʼ le beet u káajal u xokik le Bibliaoʼ yéetel u bin teʼ muchʼtáambaloʼob yéetel u familiaoʼ. Chéen tukult bukaʼaj kiʼimakchajik u yóol le maamatsil ka tu yilaj bix núukaʼabik u oración tumen Jéeobaoʼ.

17. ¿Baʼax aʼalaʼantoʼon ka k-beet wa táan k-xokik le Biblia yéetel wa máaxoʼ?

¹⁷ Ken k-beet baʼax ku nuʼuktaʼaltoʼon. Wa chúukaʼan k-óol tiʼ Dioseʼ yaan k-beetik baʼax ku nuʼuktiktoʼon u kaajal. Tuukulnakoʼon tiʼ le bix tsʼoʼok u yaʼalaʼaltoʼon ka k-áant le máaxoʼob ku xookoʼob t-éeteloʼ. Aʼalaʼantoʼoneʼ le ken káajak k-tsʼáaik xook yéetel le libro ¿Baʼax jach tu jaajil ku kaʼansik le Bibliaoʼ?, cada ken tsʼoʼokok k-xookeʼ unaj k-jóoʼsik u chan súutuk utiaʼal k-áantik le j-xoknáal u kʼaj óolt u kaajal Diosoʼ. Utiaʼal lelaʼ jeʼel u meyajtoʼon le video ¿Bix le muchʼtáambaloʼob ku beetaʼal teʼ Najil Reinooʼ? bey xan le folleto ¿Máaxoʼob beetik baʼax u kʼáat Jéeoba bejlaʼeʼ? Tsʼoʼok u yaʼalaʼal xan toʼoneʼ ken tsʼoʼokok k-xokik yéetel le j-xoknáal le libro ¿Baʼax ku kaʼansik le Bibliaoʼ?, unaj k-xokik le libro «Pʼáateneʼex tiʼ u yaakunaj Jajal Dios» tu yéeteloʼ. Lelaʼ unaj k-beetik kex wa tsʼoʼok u yokjaʼ tumen beyoʼ yaan u maas ‹yaʼabtal u fe› (Col. 2:7). ¿Táan wa k-beetik le baʼax ku yaʼalaʼaltoʼonoʼ?

18, 19. ¿Baʼaxten unaj k-tsʼáaik gracias tiʼ Jéeoba?

¹⁸ Yaʼab baʼax oʼolal k-tsʼáaik nib óolal tiʼ Jéeoba, yáaxeʼ «tumen tu yoʼolal letiʼeʼ kuxaʼanoʼon, k-péek yéetel yanoʼon» (Bax. 17:27, 28). Tsʼoʼoleʼ u tsʼaamaj xan toʼon le Bibliaoʼ. Jeʼex le cristianoʼob yanoʼob Tesalónicaoʼ toʼoneʼ nojoch baʼal k-ilik le Bibliaoʼ tumen junpʼéel nojoch siibal ku taal tiʼ Jéeoba (1 Tes. 2:3).

¹⁹ Le Bibliaoʼ ku yáantkoʼon utiaʼal k-natsʼikba tiʼ Dios beyoʼ letiʼ xaneʼ yaan u náatsʼal t-iknal (Sant. 4:8). Toʼoneʼ k-tsʼáaik gracias tiʼ Jéeoba ikil u chaʼik k-antal ichil u kaajal. K-uʼuyikba jeʼex le salmista le ka tu yaʼalaj: «Tsʼáaʼex nib óolal tiʼ Yuumtsil, tumen letiʼeʼ uts, tumen u yaakunajeʼ minaʼan u xuul» (Sal. 136:1). Tiʼ tuláakal le Salmo 136, le salmistaoʼ yaʼab u téenel tu tsʼíibtaj «tumen u yaakunajeʼ minaʼan u xuul». Wa toʼon ku chúukpajal k-óol tiʼ Jéeoba yéetel k-beetik baʼax ku nuʼuktiktoʼon u kaajaleʼ yaan k-kuxtal minaʼan u xuul yéetel letiʼeʼ mantatsʼ ken u yeʼestoʼon u yaabilaj.