«Le meyajaʼ sen nojoch»

PAX ICH

BEJLAʼEʼ u kʼiinil junpʼéel nojoch asamblea tu kaajil Jerusalén, le rey Davidoʼ tsʼoʼok u tʼanik tuláakal le principeʼoboʼ, le máaxoʼob áantik reinaroʼ yéetel le máaxoʼob yaan u páajtaliloʼob teʼ kaajoʼ. Muchʼaʼanoʼob utiaʼal u yaʼalaʼaltiʼob junpʼéel baʼal jach kʼaʼabéet: Jéeobaeʼ tsʼoʼok u yaʼalikeʼ Salomón, u hijo David, kun beetik junpʼéel nojoch templo kun meyaj utiaʼal u adorartaʼal Jéeoba, le juntúuliliʼ jaajil Diosoʼ. Yéetel u yáantaj Jéeobaeʼ le rey Davidoʼ tu beetaj u planosil le templooʼ ka tu kʼubaj tiʼ Salomón. Davideʼ tu yaʼalaj: «Le meyajaʼ sen nojoch, tumen lelaʼ maʼ chéen u jalaʼach naj juntúul wíinikiʼ, lelaʼ u [templo] Yuumtsil» (1 Cró. 28:1, 2, 6, 11, 12; 29:1).

David túuneʼ ku kʼáatik tiʼ le máaxoʼob yanoʼob teʼeloʼ: «¿Máax [...] ku síijil tu puksiʼikʼal u tsʼáaik tiʼ Yuumtsil junpʼéel siibal?» (1 Cró. 29:5). Wa tiaʼanech kaʼach teʼeloʼ, ¿baʼax jeʼel a beetkeʼ? ¿Jeʼel wa a wáantaj kaʼacheʼ? Le israelitaʼoboʼ tu séebaʼanil joʼopʼ u taaskoʼob baʼaxoʼob yaantiʼoboʼ. Le Bibliaoʼ ku yaʼalik: «Le máakoʼoboʼ, kiʼimakchaj u yóoloʼob yéetel le baʼax tu beetoʼoboʼ, tumen tu beetoʼob utiaʼal Yuumtsil yéetel u jaajil yóoloʼob» (1 Cró. 29:9).

Ka máan yaʼab kʼiineʼ Jéeobaeʼ tu beetaj u yantal junpʼéel baʼal maas nojoch tiʼ le templooʼ: lelaʼ letiʼe templo espiritualoʼ wa le baʼaxoʼob u tsʼaamaj Jéeoba utiaʼal ka béeyak u adorartaʼal tu yoʼolal u kuxtal Jesús tu kʼuboʼ (Heb. 9:11, 12). ¿Baʼax ku meyaj tiʼ Jéeoba utiaʼal u natsʼik le máakoʼob tu yiknaloʼ? Letiʼe kʼaʼaytaj yéetel u kaʼansaʼal le máakoʼoboʼ (Mat. 28:19, 20). Cada añoeʼ u millonesil máakoʼob ku kaʼansaʼal, u milesil ku yokjaʼobiʼ yéetel u cientosil múuchʼuliloʼob ku yantal.

Le bix u bin u nojochtal u kaajal Jéeobaoʼ ku beetik u kʼaʼabéettal u imprimirtaʼal maas yaʼab publicacionoʼob, u beetaʼal yéetel u yutskíintaʼal u Najiloʼob Reino yéetel u maʼanal wa u rentartaʼal tuʼux ku beetaʼal asambleaʼob. ¿Máasaʼ le kʼaʼaytajoʼ junpʼéel nojoch meyaj ku taasik yaʼab utsiloʼob? (Mat. 24:14.)

Le yaabilaj k-uʼuyik tu yoʼolal Dios, tu yoʼolal k-éet máakil yéetel u kʼaʼanaʼanil k-kʼaʼaytajoʼ ku péeksikoʼon k-tsʼáa «tiʼ Yuumtsil junpʼéel siibal», wa k-donacionoʼob. Ku kiʼimaktal k-óol ken ‹k-tsʼáa tsiikil tiʼ Yuumtsil yéetel k-ayikʼaliloʼob› bey xan ken k-il táan u meyaj maʼalob le baʼaxoʼob k-tsʼáaikoʼ tumen táan u beetaʼal junpʼéel nojoch meyaj mix juntéen ilaʼak (Pro. 3:9).

Le bix jeʼel a wáantaj utiaʼal u yúuchul kʼaʼaytajoʼ

Bejlaʼeʼ yaʼab máax ku «jóoʼs[ik] junpáayil» le bukaʼaj ku páajtal utiaʼal u tsʼáaik teʼ caja ku kʼaabaʼtik «Utiaʼal le meeyjil kʼaʼaytajoʼ» (Obra mundial) (1 Cor. 16:2). Cada meseʼ le múuchʼuliloʼoboʼ ku túuxtikoʼob tu najil Betel le taakʼin ku siʼibiloʼ. Wa a kʼáateʼ jeʼel u páajtal xan a túuxtik u taatsʼ tiʼ u j-jaajkunajoʼob Jéeobaeʼ. Wa a kʼáat a wojéelt bix u kʼaabaʼ le tuʼux unaj a túuxtikoʼ, tʼaanen tu najil Betel ilik le kʼaʼaytaj ku beetaʼal tuʼux kajaʼanechoʼ. Jeʼel u páajtal xan a wilik u direccionil teʼ www.pr418.com/yua. Le siibaloʼob ken k-il beoraaʼ u taatsʼ jeʼel u páajtal u túuxtaʼaleʼ:

BAʼALOʼOB KU SIʼIBIL

U depositartaʼal taakʼin tiʼ u najil Betel tiʼ junpʼéel banco yéetel u tarjetail débito wa yéetel u tarjetail crédito, lelaʼ jeʼel u páajtal xan u beetaʼal tiʼ junpʼéel celular wa tableteʼ. Tiʼ jujunpʼéel luʼumiloʼobeʼ jeʼel u páajtal u meyaj le sitio jw.org utiaʼal u depositartaʼaloʼ wa uláakʼ sitio tsʼaʼan tumen u najil Beteloʼ.
U síik máak taakʼin, alhajaʼob wa uláakʼ baʼaloʼob yaan u tojol. Unaj u túuxtik máak junpʼéel carta tuʼux ku yaʼalik siibil u beetik.

TAAKʼIN MAJÁANTAʼAN

U tsʼáaik máak taakʼin, baʼaleʼ jeʼel u páajtal a kaʼa chʼaʼik wa ku kʼaʼabéettaleʼ.
Unaj u túuxtik máak junpʼéel carta tuʼux ku yaʼalik chéen táan u tsʼáaik majáantbil.

SIIBALOʼOB KU CHʼAʼTUKLAʼAL BIX KUN TSʼAABIL

Beoraaʼ koʼoneʼex ilik uláakʼ bix jeʼel u tsʼáaik u siibal máak utiaʼal u maas kʼaʼaytaʼal le maʼalob péektsiloʼ. Wa a kʼáat a tsʼáa a siibal jeʼex ken k-il teʼ kabalaʼ, táanil unaj a tʼaan tu najil Betel utiaʼal a wojéeltik wa jeʼel u páajtaleʼ. Tiʼ cada luʼumileʼ jejeláas leyoʼob u tsʼaamaj le gobiernoʼoboʼ le oʼolaleʼ jach unaj a kʼáatik u yáantaj juntúul máax u yojel tiʼ baʼaloʼob beyaʼ, tumen beyoʼ jeʼel u páajtal a yéeyik bix maas maʼalob a tsʼáaik a siibaleʼ.

Seguroʼob: Jeʼel u páajtal u yaʼalaʼal ka cobrartaʼak junpʼéel seguro de vida wa junpʼéel pensión tumen u j-jaajkunajoʼob Jéeobaeʼ.

Taakʼin oksaʼan banco: Le taakʼin ku tsʼaʼabal tiʼ máak ken jubilartaʼakoʼ jeʼel u páajtal u yoksaʼal banco utiaʼal ka cobrartaʼak u interesil tumen u j-jaajkunajoʼob Jéeobaeʼ. Jeʼel u páajtal xan u beetaʼal yéetel u reciboil le taakʼin oksaʼan banco (certificado de depósito) utiaʼal ka cobrartaʼak u interesil. Tsʼoʼoleʼ jeʼel xan u páajtal u cobrartaʼal le taakʼin tumen u j-jaajkunajoʼob Jéeoba wa ku kíimil u yuumiloʼ, baʼaleʼ unaj u beetaʼal jeʼex u yaʼalik le bancooʼ.

Le reciboʼob ku tsʼáaik junpʼéel empresa ken tsʼaʼabak taakʼin u majáantoʼ: Leloʼobaʼ jeʼel u páajtal u siʼibil tiʼ u j-jaajkunajoʼob Jéeobaeʼ. Tsʼoʼoleʼ jeʼel xan u tsʼaʼabal u páajtalil tiʼ u cobrartik le taakʼin ken kíimik u yuumiloʼ.

Terrenoʼob yéetel najoʼob: Jeʼel u páajtal u pʼaʼatal tiʼ u j-jaajkunajoʼob Jéeoba utiaʼal ka meyajnak jeʼel bix kʼaʼabéeteʼ. Baʼaleʼ wa yaan máax kajakbaleʼ jeʼel u páajtal u pʼáatal kajtal tak ken kíimkeʼ.

Donacionoʼob tuʼux ku kʼamik máak jujunpʼéel utsiloʼob: Lelaʼ taakʼin wa u documentosil jujunpʼéel terrenoʼob ku donartaʼal tiʼ u j-jaajkunajoʼob Jéeoba, yoʼolal lelaʼ le máax ku donaroʼ ku kʼamik jujunpʼéel utsiloʼob cada año mientras kuxaʼan. Le máax tsʼáaik le donacionoʼob beyaʼ jeʼel u menoskíintaʼal le impuestoʼob ku boʼotik cada añooʼ.

Testamentoʼob yéetel u cobrartaʼal interés: Jeʼel u páajtal u pʼaʼatal taakʼin yéetel terrenoʼob tiʼ u j-jaajkunajoʼob Jéeobaeʼ, chéen baʼaleʼ unaj u beetaʼal yéetel junpʼéel testamento tu táan juntúul notario. Tsʼoʼoleʼ jeʼel xan u páajtal u yoksaʼal taakʼin teʼ banco utiaʼal ka u cobrart u interesiloʼ (fideicomiso). Le máax tsʼáaik le donacionoʼob beyaʼ ku kʼamik jujunpʼéel utsiloʼob ken u boʼot u impuestoʼob.

Jeʼex u yaʼalik le jaats «siibaloʼob ku chʼaʼtuklaʼal bix kun tsʼaabiloʼ», le siibaloʼob tsʼoʼok k-aʼalikaʼ unaj u chʼaʼtuklaʼal tubeel. Utiaʼal u yáantaʼal le máaxoʼob u kʼáat u tsʼáa u donacionoʼob beyaʼ, u j-jaajkunajoʼob Jéeobaeʼ u beetmoʼob ich inglés yéetel ich español le folleto Donaciones planificadas para favorecer el servicio del Reino en todo el mundo. Le folletoaʼ ku tsolik tubeel jejeláas bix jeʼel u páajtal u donartaʼal taakʼin, terrenoʼob wa uláakʼ baʼaloʼobeʼ. Maʼ xaaneʼ jujunpʼéel tiʼ le baʼaxoʼob ku yaʼalikoʼ maʼ tu meyaj teʼ luʼumil tuʼux yanechoʼ, tumen tiʼ cada luʼumileʼ yaanal ley ku tsʼáaik le gobiernooʼ. Tu yoʼolal le siibaloʼob beyaʼ yaʼab máakeʼ tsʼoʼok u yáantaj utiaʼal u kaʼansaʼal yéetel u yáantaʼal yaʼab máak tiʼ tuláakal yóokʼol kaab, tsʼoʼoleʼ le máaxoʼob ku tsʼáaik u donacionoʼob beyaʼ yaʼab utsiloʼob ku kʼamkoʼob tu táan le autoridadoʼoboʼ. Wa yaan le folleto teʼ luʼumil tuʼux kajaʼanechoʼ jeʼel u páajtal a kʼáatik junpʼéel tiʼ u secretarioil le múuchʼuliloʼ.

Wa a kʼáat a wojéelt u maasileʼ tsʼáankʼabt le tuʼux ku yaʼalik «Taak in síik wa bajux utiaʼal le meyaj ku beetaʼal tuláakal yóokʼol kaaboʼ». Lelaʼ tiaʼan tu kaablil le sitio jw.org. Jeʼel u páajtal xan a tʼaan teʼ najil Betel nuʼuktik le Luʼum tuʼux yanechoʼ.

Maʼ xaaneʼ jeʼel u yutstal xan ta wicheʼ

Donacionoʼob ku beetaʼal ich Internet

LE MÁAX KU KANANOʼ (UTIAʼAL LE MÚUCHʼULILOʼ)