1, 2. 1) ¿Baʼax ku yaʼalik jujuntúul máakoʼob yoʼolal bix unaj u adorartaʼal Dios? 2) ¿Baʼax ken k-il teʼ xookaʼ?

YAAN máakoʼobeʼ ken tʼaanakoʼob tiʼ bix unaj u adorartaʼal Dioseʼ, ku yaʼalikoʼob: «Maʼ kʼaʼabéet a wokol ichil junpʼéel religioniʼ, chéen kʼaʼabéet a natsʼkaba tiʼ Dios». Chéen baʼaleʼ, ¿jach jaaj wa le baʼax ku yaʼalikoʼobaʼ? ¿Baʼax tsʼoʼok u yilaʼal?

² Teʼ xookaʼ yaan k-ilkeʼ Jéeobaeʼ juntúul Dios ku beetik tuláakal baʼal tu tsoolol yéetel ku nuʼuktik xan maʼalob u kaajal. Yaan k-ilik xan baʼax unaj k-beetik ken u yaʼaltoʼon u kaajal Jéeoba ka k-beet wa baʼax (1 Cor. 14:33, 40). Teʼ yáax siglooʼ u kaajal Jéeobaeʼ tu chaʼaj u nuʼuktaʼal yéetel le baʼax ku yaʼalik le Kiliʼich Tsʼíiboʼoboʼ le oʼolal béeychaj u kʼaʼaytajoʼob jejeláas tuʼuxoʼob. Jeʼex letiʼobeʼ toʼon xaneʼ k-chaʼik u nuʼuktikoʼon le baʼax ku yaʼalik le Bibliaoʼ yéetel k-beetik le baʼax ku yaʼaliktoʼon u kaajal Diosoʼ. Ikil k-beetik beyoʼ ku béeytal k-kʼaʼaytaj tiʼ tuláakal yóokʼol kaab, k-áantaj utiaʼal ka pʼáatak limpioil le múuchʼuliloʼ, ka yanak jeetsʼeliliʼ yéetel ka u bisuba maʼalob tuláakal le sukuʼunoʼoboʼ.

3. Techeʼ, ¿baʼaxten ka waʼalik Jéeobaeʼ juntúul Dios ku beetik tuláakal baʼal tu tsoolol?

³ Le baʼaxoʼob u beetmaj Jéeobaoʼ ku yeʼeskoʼobeʼ letiʼeʼ juntúul Dios ku beetik tuláakal baʼal tu tsoolol. Le Bibliaoʼ ku yaʼalik: «Yéetel  ojéelajil bey xan yéetel kʼaj óolaleʼ, Yuumtsileʼ tu yetsʼkúuntaj le kaʼanoʼoboʼ bey xan le luʼumaʼ» (Pro. 3:19). Ku yaʼalik xaneʼ toʼoneʼ ‹chéen junpʼíit baʼaloʼob tsʼoʼok k-uʼuyik› wa tsʼoʼok k-ojéeltik tiʼ tuláakal le baʼaxoʼob u beetmaj Diosoʼ (Job 26:14). Chéen baʼaleʼ kex junpʼíit baʼal k-ojel tiʼ le baʼaxoʼob yanoʼ jeʼel u páajtal k-ilkeʼ jach tu tsoolol wa tu nuʼuk beetaʼanil (Sal. 8:3, 4). U millonesil estrellaʼobeʼ tu tsoolol bix u péekoʼob teʼ kaʼanoʼ. Máans xan ta tuukul bix jatsʼutsil u péek yéetel tu tsoolol tuláakal le planetaʼob tu baʼpach le Kʼiinoʼ. Lelaʼ chéen ku béeytal tumen bey tu tsʼáajiloʼob Jéeobaoʼ. Ken tuukulnakoʼon tiʼ bix jatsʼutsil tu beetil Jéeoba le kaʼanoʼob yéetel le Luʼumaʼ, ku taaktal k-alabartik, k-meyajtik yéetel k-eʼesik chúukaʼan k-óol tiʼ (Sal. 136:1, 5-9).

4. ¿Baʼaxten le cientificoʼoboʼ maʼ béeyak u tsolkoʼob jujunpʼéel baʼaloʼob yaan yil yéetel le kuxtaloʼ?

⁴ Le baʼaxoʼob tsʼoʼok u kanik le cientificoʼob tu yoʼolal bix beetaʼanil le kaʼan yéetel le Luʼumoʼ, yaʼab bix tsʼoʼok u yáantaj ichil k-kuxtal. Chéen baʼaleʼ yaʼab tiʼ le baʼaxoʼob taak u yojéeltaʼal tumen le máakoʼoboʼ maʼ béeyak u tsolkoʼobiʼ. Le astronomoʼoboʼ maʼ béeyak u tsolkoʼob jach bix káajik tuláakal baʼaliʼ wa baʼaxten yaan kuxtal way Luʼumeʼ. Yaʼab máakoʼob xaneʼ maʼ tu páajtal u naʼatkoʼob baʼaxten yaantoʼon u tsʼíibolalil k-kuxtal minaʼan u xuul (Ecl. 3:11). ¿Baʼaxten maʼ tu páajtal u naʼatkoʼob? Tumen le cientificoʼob yéetel uláakʼ máakoʼobeʼ ku yaʼalikoʼobeʼ minaʼan Dios yéetel ku yaʼalikoʼobeʼ chéen bey anchajik le kuxtaloʼ. Chéen baʼaleʼ Dioseʼ u tsʼaamaj le Biblia utiaʼal k-ojéeltik tuláakal le baʼaloʼobaʼ.

5. ¿Baʼax eʼesik le máakoʼoboʼ ku confiaroʼob tiʼ le leyoʼob u tsʼaamaj Diosoʼ?

⁵ Tuláakal baʼax beetaʼan tumen Dioseʼ yaan leyoʼob nuʼuktik. Le leyoʼobaʼ maʼatech u kʼexpajloʼob. Le electricistaʼob, plomeroʼob, ingenieroʼob, pilotoʼob, le doctoroʼob ku operaroʼob yéetel uláakʼ máakoʼobeʼ ku confiaroʼob tiʼ le leyoʼob utiaʼal u beetik u meyajoʼoboʼ. Por ejemploeʼ tuláakal máak u yojel tiʼ baʼax parteil tiʼ u wíinklil maases yaan u puksiʼikʼal, le oʼolal juntúul doctoreʼ u yojel tuʼux yaan u puksiʼikʼal le máax ken u operartoʼ. Tuláakal máak u yojel xaneʼ wa juntúul máak ku pulkuba desde tu kaʼanlil junkúul cheʼ tumen ku tuklik jeʼel u xikʼnal jeʼex juntúul chʼíichʼeʼ yaan u lúubul yéetel jeʼel tak u kíimileʼ. Le oʼolaleʼ wa k-kʼáat kuxtaleʼ kʼaʼabéet k-chʼaʼik en cuenta le leyoʼob u tsʼaamaj Diosoʼ.

6. ¿Bix k-ojéeltik Jéeobaeʼ u kʼáat ka k-adorart jeʼex u nuʼuktikoʼ?

⁶ Jeʼex tsʼoʼok k-ilkoʼ tuláakal le baʼax u beetmaj Jéeobaoʼ tu tsoolol u tsʼaamil. ¿Baʼax ku yeʼesik lelaʼ? Ku yeʼesikeʼ letiʼeʼ maʼ u kʼáat ka k-adorart chéen jeʼel bixakeʼ, baʼaxeʼ u kʼáat ka k-beet jeʼex u nuʼuktikoʼ. Le oʼolal u tsʼaamajtoʼon le Biblia utiaʼal u kaʼansiktoʼon bix unaj k-adorartikoʼ. Wa toʼon k-chaʼik u nuʼuktikoʼon le Biblia yéetel k-beetik baʼax ku yaʼalik u kaajaloʼ yaan u yantaltoʼon kiʼimak óolal yéetel yaan u yantal u biilal k-kuxtal.

7. ¿Baʼax eʼesik Dios nuʼukt u tsʼíibtaʼal le Bibliaoʼ?

⁷ Le Bibliaoʼ junpʼéel nojoch siibal u tsʼaamajtoʼon Dios. Jujuntúul máaxoʼob ku xakʼalxoktikoʼob le Bibliaoʼ ku yaʼalikoʼobeʼ lelaʼ chéen jun jaats libroʼob tsʼíibtaʼab tumen le judíoʼob yéetel le cristianoʼoboʼ, tsʼoʼoleʼ ka máan kʼiineʼ nuʼupeʼ ka tu yaʼaloʼobeʼ letiʼe Biblia binoʼ. Chéen baʼaleʼ maʼ bey úuchikoʼ, baʼaxeʼ Dios nuʼukt u tsʼíibtaʼal le Bibliaoʼ, letiʼ yéey máaxoʼob kun tsʼíibtik, baʼax kʼiin ken u tsʼíibtoʼob yéetel letiʼ xan aʼaltiʼob baʼaxoʼob ken u tsʼíibtoʼobiʼ. Le oʼolal k-séeb naʼatik jach tiʼ baʼax ku tʼaan tuláakal le Bibliaoʼ. Desde Génesis tak Apocalipsiseʼ le Bibliaoʼ ku tʼaan tiʼ junpʼéel «chʼiʼibal» kun kaʼa sutik le Luʼum Paraísoiloʼ. Tsʼoʼok k-naʼatik xaneʼ le chʼiʼibaloʼ Jesucristo yéetel le Reino ku nuʼuktikoʼ, yaan u yeʼesik chéen tiʼ Jéeoba yaan u derechoil u gobernar (xok Génesis 3:15, Mateo 6:10 yéetel Apocalipsis 11:15).

8. ¿Baʼaxten k-aʼalik tu tsoolol tsʼaʼanil bix u meyaj le israelitaʼoboʼ?

⁸ Le israelitaʼoboʼ tu chaʼaj u nuʼuktaʼaloʼob  tumen le Ley tsʼaʼabtiʼob tumen Diosoʼ yéetel jach tu tsoolol tsʼaʼanil bix kun meyajoʼob. Le Leyoʼ ku yaʼalik kaʼacheʼ jeʼel u páajtal u yantal koʼoleloʼob utiaʼal u meyajoʼob tu yookbal le tabernaculooʼ (Éxo. 38:8). Aʼalaʼan xan tiʼob bix unaj u biskoʼob le tabernaculooʼ yéetel aʼalaʼantiʼobeʼ tu tsoolol unaj u jóokʼloʼob utiaʼal u viajaroʼob. Ka máan kʼiineʼ le rey David xanoʼ tu tʼoxláantaj u meyaj le sacerdoteʼob yéetel le levitaʼob teʼ templooʼ (1 Cró. 23:1-6; 24:1-3). Le israelitaʼoboʼ ken u meyajtoʼob Jéeoba jeʼex u nuʼuktikoʼ ku bin utsil tiʼob, ku yantal jeetsʼelil tiʼob yéetel ku múul meyajoʼob (Deu. 11:26, 27; 28:1-14).

9. Teʼ yáax siglooʼ, ¿bix u nuʼuktaʼal kaʼach le múuchʼuliloʼoboʼ?

⁹ Teʼ yáax siglooʼ le múuchʼuliloʼoboʼ tu tsoolol xan úuchik u meyajoʼob. Teʼ kʼiinoʼoboʼ yaan kaʼach junpʼéel cuerpo gobernante, lelaʼ junmúuchʼ xiiboʼob ku tsʼáaikoʼob nuʼuktaj tiʼ le múuchʼuliloʼoboʼ. Tu káajbaleʼ chéen apostoloʼob yanoʼobiʼ, chéen baʼaleʼ ka máan kʼiineʼ táakpaj uláakʼ ancianoʼobiʼ (Bax. 6:1-6; 15:6). Jéeobaeʼ tu nuʼuktaj le Cuerpo Gobernante bey xan le sukuʼunoʼob áantoʼob utiaʼal ka u tsʼíibtoʼob cartaʼob tuʼux ku tsʼáaikoʼob nuʼuktaj tiʼ le múuchʼuliloʼoboʼ (1 Tim. 3:1-13; Tito 1:5-9). Le múuchʼuliloʼoboʼ, ¿baʼax utsil tu jóoʼsoʼob úuchik u beetkoʼob le baʼax tu nuʼuktaj le Cuerpo Gobernanteoʼ?

10. Le múuchʼuliloʼob tu beetoʼob baʼax tu yaʼalaj le Cuerpo Gobernanteoʼ, ¿baʼax utsil tu kʼamoʼob? (Ilawil le dibujo yaan tu káajbal le xookaʼ.)

¹⁰ (Xok Baʼaxoʼob 16:4, 5.) Teʼ yáax siglooʼ jujuntúul sukuʼunoʼobeʼ ku xíimbaltikoʼob le múuchʼuliloʼob utiaʼal u yaʼalikoʼob tiʼ le sukuʼunoʼob «le baʼaxoʼob chʼaʼtuklaʼab tumen le apostoloʼob yéetel le ancianoʼob yanoʼob Jerusalenoʼ» wa tumen le Cuerpo Gobernanteoʼ. Le múuchʼuliloʼoboʼ tu beetoʼob le baʼax aʼalaʼabtiʼoboʼ, le oʼolaleʼ «seguernaj u muʼukʼaʼantal u fejoʼob, yéetel cada kʼiin ku máaneʼ seguernaj u maas yaʼabtaloʼob». Wa k-beetik jeʼex letiʼobeʼ, ¿baʼax utsil jeʼel k-kʼamik t-múuchʼulileʼ?

11. Le ancianoʼob yéetel le siervo ministerialoʼoboʼ, ¿baʼax unaj u beetkoʼob ken u tsʼáa wa baʼax tsolnuʼukil u kaajal Jéeoba?

¹¹ Le sukuʼunoʼob yanoʼob teʼ Comité tiʼ Sucursal, Comité tiʼ País, le superintendenteʼob tiʼ circuito, le ancianoʼob yéetel le siervo ministerialoʼoboʼ unaj u beetkoʼob baʼax ku nuʼuktik tiʼob u kaajal Jéeobaoʼ. Le Bibliaoʼ ku yaʼalikeʼ tuláakloʼon unaj k-beetik le baʼax ku yaʼalik le máaxoʼob nuʼuktik k-beeloʼ (Deu. 30:16; Heb. 13:7, 17). Le máaxoʼob meyajtik Dios jeʼex u kʼáateʼ maʼatech u quejarkubaʼob ken tsʼaʼabak wa baʼax nuʼuktajil tiʼob tumen u kaajal Jéeoba. Toʼoneʼ maʼ k-kʼáat beet jeʼex Diótrefeseʼ letiʼeʼ maʼ tu kʼamaj le tsolnuʼuk ku tsʼaʼabal tumen le máaxoʼob nuʼuktik le múuchʼuliloʼ (xok 3 Juan 9, 10). Wa k-beetik le baʼax ku yaʼalaʼaltoʼon teʼ múuchʼuliloʼ yaan k-áantaj utiaʼal u yantal jeetsʼelil yéetel utiaʼal ka u bisuba maʼalob le sukuʼunoʼoboʼ. Le oʼolaleʼ maʼalob ka k-tukle: «¿Kin wáantik wa le sukuʼunoʼob utiaʼal u chúukpajal u yóoloʼob tiʼ Jéeobaoʼ? ¿Kin beetik wa tu séebaʼanil le baʼax ku yaʼalik u kaajaloʼ?».

12. ¿Bix u yéeyaʼal bejlaʼa le ancianoʼob yéetel le siervo ministerialoʼoboʼ?

¹² Maʼ sen úucheʼ le Cuerpo Gobernanteoʼ tu kʼexaj bix kun yéeybil le máaxoʼob ken u beet u ancianoiloʼob wa u siervo ministerialiloʼoboʼ. Le revista U Pʼíich Tulumil Kanan 15 tiʼ noviembre tiʼ 2014, teʼ jaats «Kʼáatchiʼob ku beetaʼal», tu tsoleʼ teʼ yáax siglooʼ, le Cuerpo Gobernanteoʼ tu tsʼáaj autoridad tiʼ le superintendenteʼob tiʼ circuito utiaʼal u yéeyikoʼob máaxoʼob jeʼel u páajtal u beetik u ancianoiloʼob wa u siervo ministerialiloʼoboʼ. Desde tu mesil septiembre tiʼ 2014, letiʼe superintendenteʼob tiʼ circuito beetik le nombramientoʼoboʼ. Ken u yaʼal le ancianoʼob yaan máax jeʼel u páajtal u beetik u ancianoil wa u siervo ministerialileʼ le superintendente tiʼ circuitooʼ yaan u yilik wa u tsʼaamaj u yóol le sukuʼun u meyajt Diosoʼ bey xan u familia. Utiaʼal lelaʼ le superintendente tiʼ circuitooʼ jeʼel u páajtal u múul jóokʼol kʼaʼaytaj yéetel  le sukuʼunoʼ (1 Tim. 3:4, 5). Le superintendente tiʼ circuitooʼ ku muchʼkuba xan yéetel le ancianoʼob utiaʼal u xakʼaltikoʼob le baʼaxoʼob ku yaʼalik le Biblia unaj u beetik juntúul anciano wa siervo ministerialoʼ (1 Tim. 3:1-10, 12, 13; 1 Ped. 5:1-3).

13. ¿Bix jeʼel k-eʼesik k-kʼamik le tsolnuʼukoʼob ku tsʼáaik le ancianoʼoboʼ?

¹³ Le ancianoʼoboʼ ku tsʼáaikoʼob le tsolnuʼukoʼob ku taal tiʼ le Bibliaoʼ tumen u kʼáat u kanáantoʼob le múuchʼuliloʼ. Wa k-kʼáat ka xiʼiktoʼon utsileʼ unaj k-tsʼáaik ichil k-kuxtal le tsolnuʼukoʼob ku tsʼáaikoʼobtoʼonoʼ (1 Tim. 6:3). Teʼ yáax siglooʼ anchaj máaxoʼob «maʼ u kʼáat u yuʼuboʼob tʼaaniʼ». Letiʼobeʼ mix junpʼéel meyaj u kʼáat u beetoʼob teʼ múuchʼuliloʼ, baʼaxeʼ chéen ku yoksikubaʼob ichil u kuxtal u maasil. Tsʼoʼoleʼ kex tsolnuʼuktaʼaboʼob tumen le ancianoʼoboʼ maʼ tu kʼamoʼobiʼ. Le oʼolal le apóstol Pablooʼ tu yaʼalaj tiʼ le múuchʼulil bix unaj u tratartikoʼob le máaxoʼob beyaʼ. Letiʼeʼ tu yaʼalaj tiʼ le cristianoʼoboʼ: «Eʼeseʼex máaxiʼ yéetel xuʼuluk a biskabaʼex tu yéetel». Jeʼex u yaʼalik le Bibliaoʼ letiʼobeʼ maʼ unaj u seguer u jach biskubaʼob tu yéetel jeʼex kaʼacheʼ, tu yaʼalaj xaneʼ maʼ unaj u pʼektaʼaliʼ, jeʼel u páajtal u tsikbaloʼob kaʼach tu yéeteleʼ pero tiʼ baʼaloʼob yaan yil yéetel u meyajtaʼal Jéeoba (2 Tes. 3:11-15). Bejlaʼa xaneʼ le ancianoʼoboʼ ku yilik u yáantkoʼob máax maʼ u kʼáat u beet baʼax ku yaʼalik le Bibliaoʼ, jeʼex le máaxoʼob ku kaxtik u novioʼob wa u noviaʼob ichil le máaxoʼob maʼatech u meyajtikoʼob Jéeobaoʼ (1 Cor. 7:39). Wa le ancianoʼob ku yilkoʼob maʼ tu yóotik u beetoʼob le baʼax ku yaʼalik le Bibliaoʼ jeʼel u páajtal u chʼaʼtuklikoʼob u máansaʼal junpʼéel discurso ku tʼaan tu yoʼolal le baʼax kʼaas táan u yúuchuloʼ, tumen wa maʼ tu yutskíintik baʼax ku beetkeʼ jeʼel u yúuchul tʼaan kʼaas tiʼ le múuchʼuliloʼ. Ken máansaʼak junpʼéel discurso beyaʼ, ¿baʼax ku páaʼtaʼal ka k-beete? Wa k-ojel tiʼ máax ku yúuchul tʼaaneʼ, ¿yaan wa k-ilik maʼ k-jach bisikba tu yéetel? Wa maʼ k-jach bisikba tu yéeteleʼ yaan k-áantik u yil kʼaas baʼax ku beetik yéetel maʼ uts tu tʼaan Jéeobaiʼ. Wa k-beetik beyaʼ maʼ xaaneʼ jeʼel k-áantik u kʼex u tuukuleʼ. ^[1]

14. ¿Bix jeʼel k-áantaj utiaʼal ka pʼáatak limpioil le múuchʼuliloʼ?

¹⁴ Le Bibliaoʼ ku yaʼalik bix unaj k-áantaj utiaʼal u pʼáatal limpioil le múuchʼuliloʼ. Koʼoneʼex ilik baʼax úuch tu múuchʼulil Corinto. Pabloeʼ jach u yaabiltmaj kaʼach tuláakal le sukuʼunoʼob yanoʼob teʼeloʼ. Letiʼeʼ tu yáantaj yaʼab tiʼ letiʼob u kʼaj óoltoʼob Jéeobaiʼ (1 Cor. 1:1, 2). Le oʼolaleʼ chéen tukult bix tu yuʼubiluba le ka tu yojéeltaj yaan juntúul tiʼ letiʼobeʼ táan u núupkʼebantal yéetel mix baʼal ku beetik le sukuʼunoʼob utiaʼal u jóoʼskoʼob teʼ múuchʼuliloʼ. Le oʼolaleʼ Pabloeʼ tu yaʼalaj tiʼ le ancianoʼoboʼ: «Unaj a kʼubkeʼex le máak tu kʼab Satanasoʼ». Lelaʼ u kʼáat u yaʼaleʼ le ancianoʼoboʼ unaj u expulsartikoʼob teʼ múuchʼuliloʼ (1 Cor. 5:1, 5-7, 12). Bejlaʼa xaneʼ le ancianoʼoboʼ ken u yiloʼob yaan máax táan u kʼebantal yéetel maʼ tu arrepentireʼ, ku chʼaʼtuklikoʼob u expulsartaʼal. Wa t-múuchʼulil ku yúuchul lelaʼ, ¿yaan wa k-beetik le baʼax ku yaʼalik le Biblia yoʼolal bix unaj k-tratartik le máax expulsartaʼaboʼ? Wa k-beetkeʼ yaan k-áantaj utiaʼal ka pʼáatak limpioil le múuchʼuliloʼ. Tsʼoʼoleʼ yaan xan k-áantik utiaʼal u arrepentir yéetel u kʼáatik ka perdonartaʼak tumen Jéeoba.

15. ¿Bix jeʼel k-áantaj utiaʼal ka yanak jeetsʼelil teʼ múuchʼuliloʼ?

¹⁵ Teʼ múuchʼulil yaan Corintooʼ yaan uláakʼ baʼax kaʼach táan u yúuchliʼ. Yanoʼobeʼ táan kaʼach u bisik le sukuʼunoʼob tu táan autoridadoʼ. Le oʼolal Pabloeʼ tu yaʼalajtiʼob: «¿Baʼaxten túun maʼ táan u chúukpajal a wóoleʼex a muʼyajteʼex le baʼaloʼob kʼaastak ku beetaʼalteʼexoʼ?» (1 Cor. 6:1-8). Bejlaʼa xaneʼ yaan sukuʼunoʼob ku beetkoʼob negocio yéetel uláakʼ sukuʼunoʼob, chéen baʼaleʼ tumen ku bin kʼaasiltiʼobeʼ ku peʼertikoʼob taakʼin le oʼolal ku yuʼubikoʼob bey tuʼusoʼobeʼ wa bey oklaʼaboʼobeʼ. Le oʼolaleʼ ku takikoʼob u pooloʼob tiʼ le autoridadoʼoboʼ. Chéen baʼaleʼ ken úuchuk lelaʼ jeʼel u beetik u yúuchul tʼaan kʼaas tiʼ Jéeoba bey xan  tiʼ u kaajaleʼ. Tsʼoʼoleʼ jeʼel xan u beetik u xuʼulul u yantal jeetsʼelil teʼ múuchʼuliloʼ. Chéen baʼaleʼ u Tʼaan Dioseʼ ku yáantkoʼon k-il maas maʼalob ka k-kaxt jeetsʼelil yéetel le sukuʼunoʼoboʼ kex ka k-peʼert taakʼin. ^[2] Tak Jesús tu yaʼalaj bix unaj u yutskíintaʼal le problemaʼob wa kʼuuxiloʼob ku yantaltoʼon yéetel u maasiloʼ (xok Mateo 5:23, 24; 18:15-17). Ken k-beet baʼax ku yaʼalik le Bibliaoʼ k-áantaj utiaʼal u yantal jeetsʼelil yéetel utiaʼal ka u bisuba maʼalob le sukuʼunoʼoboʼ.

16. ¿Baʼaxten junmúuchʼ u meyaj u kaajal Jéeoba?

¹⁶ Jéeobaeʼ ku yaʼaliktoʼon: «Ilawileʼex bukaʼaj maʼalobil yéetel jatsʼutsil ka múuchʼ kajlak sukuʼuntsiloʼob bey juntúuliliʼobeʼ» (Sal. 133:1). Le israelitaʼoboʼ ken u beetoʼob baʼax ku yaʼalik Jéeobaeʼ junmúuchʼ yéetel tu tsoolol u meyajoʼob. Dioseʼ tu yaʼalaj tu yoʼolal u kaajal: «Bíin in muchʼkíintoʼob bey u múuchʼul tamanoʼobeʼ» (Miq. 2:12). Jéeoba xaneʼ tu yaʼalaj: «Bíin in wutskíint u tʼaan le kaajoʼoboʼ, utiaʼal ka u chʼaʼchiʼitoʼob in kʼaabaʼ, utiaʼal ka u meyajtenoʼob chéen yéetel junpʼéeliliʼ tuukul» (Sof. 3:9). Jeʼex u yaʼalik le tekstoaʼ u kaajaleʼ yaan u kanik u jaajil yaan teʼ Kiliʼich Tsʼíiboʼoboʼ yéetel junmúuchʼ ken u meyajtiloʼob. ¿Máasaʼ jach kiʼimak k-óol tumen junmúuchʼ k-meyajtik Jéeoba?

17. ¿Baʼax unaj u beetik le ancianoʼob wa yaan máax tsʼoʼok u lúubul tiʼ junpʼéel nojoch kʼebanoʼ?

¹⁷ Wa yaan máax tsʼoʼok u lúubul tiʼ junpʼéel nojoch kʼebaneʼ le ancianoʼoboʼ kʼaʼabéet u yáantkoʼob tu séebaʼanil u yutskíint le baʼax tu beetoʼ, chéen baʼaleʼ unaj u beetkoʼob yéetel yaabilaj. Letiʼobeʼ u yojloʼobeʼ Jéeobaeʼ u kʼáat ka kanáantaʼak le múuchʼulil tiʼ baʼax jeʼel u kʼaskúuntikoʼ, ka pʼáatak limpioil yéetel ka múul meyajnak le sukuʼunoʼoboʼ (Pro. 15:3). Pabloeʼ u yaabiltmaj kaʼach le sukuʼunoʼob yanoʼob Corintooʼ, le oʼolal ka kʼaʼabéetchajeʼ tu tsʼíibtaj u yáax carta utiaʼal u tsolnuʼuktikoʼob. Le ancianoʼob yanoʼob Corintooʼ tu beetoʼob tu séebaʼanil le tsolnuʼuk tu tsʼáaj Pablooʼ. K-aʼalik lelaʼ tumen ka máan wa jaypʼéel mesoʼobeʼ tu felicitartoʼob le ka tu tsʼíibtaj le u kaʼapʼéel carta tiʼoboʼ. Le oʼolaleʼ wa le ancianoʼob ku yilkoʼob juntúul sukuʼun «táan u jóokʼol tiʼ le bej yéetel maʼ u tsʼáa cuentaoʼ» unaj u yáantkoʼob tu séebaʼanil yéetel yaabilaj (Gal. 6:1).

18. 1) Teʼ yáax siglooʼ, ¿bix áantaʼabik le múuchʼuliloʼob tumen le baʼax ku yaʼalik le Bibliaoʼ? 2) ¿Baʼax ken k-il tuláakʼ xookoʼ?

¹⁸ Jeʼex tsʼoʼok k-ilkoʼ le cristianoʼob teʼ yáax siglooʼ ken u chaʼa u nuʼuktaʼaloʼob tumen u Tʼaan Dioseʼ, tu múuchʼuliloʼobeʼ anchaj jeetsʼelil, múul meyajnajoʼob yéetel pʼáat limpioil (1 Cor. 1:10; Efe. 4:11-13; 1 Ped. 3:8). Ikil tu beetiloʼob beyoʼ béeychaj u kʼaʼaytikoʼob le Reino «tiʼ tuláakal le máakoʼob yanoʼob yáanal kaʼanoʼ» (Col. 1:23). Bejlaʼeʼ u kaajal Jéeobaeʼ junmúuchʼ yéetel tu tsoolol u meyaj, le oʼolal ku béeytal u kʼaʼaytajoʼob tiʼ tuláakal yóokʼol kaab. Teʼ tuláakʼ xookoʼ yaan k-ilik uláakʼ baʼaloʼob eʼesikeʼ toʼoneʼ k-kʼáat alabart Jéeoba, le Máax yaan tuláakal páajtalil tiʼoʼ, yéetel k-kʼáat ka u nuʼuktoʼon u Tʼaan (Sal. 71:15, 16).