«QUINCE años yaanten ka okjaʼanajen, ka máan seis meseseʼ káaj in beetik in precursora auxiliaril. Ka máan junpʼéel añoeʼ tin chupaj in solicitud utiaʼal in beetik in precursora regularil. Ka tin tsʼoʼoksaj in secundariaeʼ, tin kʼáataj ka túuxtaʼaken tiʼ junpʼéel territorio tuʼux kʼaʼabéet áantaj. Teʼ kʼiinoʼoboʼ kajaʼanen yiknal in abuela, letiʼeʼ maʼ u j-jaajkunaj Jéeobaiʼ. Teneʼ maʼ in kʼáat kaʼach u seguer in kajtal yiknal in abuelaiʼ yéetel in kʼáat jóokʼol tiʼ le kaaj tuʼux síijenoʼ. Le superintendente tiʼ circuitooʼ tu yaʼalajten maas maʼalob ka pʼáatken teʼ tuʼux kajaʼanenoʼ, lelaʼ tu beetaj u yaatal in wóol chéen baʼaleʼ tin beetaj bey maʼ yaj tin wóoleʼ. Teneʼ chéen tin chinaj in pooleʼ ka binen táanxel tuʼux utiaʼal in tuklik le baʼax tu yaʼalajtenoʼ. Tsʼoʼoleʼ tin waʼalaj tiʼ le precursora suuk u jóokʼol tin wéeteloʼ: ‹Mi táan in beetik jeʼex Jonaseʼ. Chéen baʼaleʼ letiʼeʼ tu tsʼookeʼ bin Nínive, le oʼolal teneʼ yaan in pʼáatal teʼ tuʼux ku yaʼalaʼaltenoʼ›.

»Tsʼoʼok u máan cuatro años táan in beetik in precursorail teʼ tuʼux kajaʼanenoʼ, bejlaʼeʼ kin wilkeʼ yaʼab utsil tsʼoʼok u taasikten in beetik le baʼax aʼalaʼabtenoʼ. Le baʼax maas talamchajtenoʼ letiʼe in tuklik mix junpʼéel utsil ken in kʼam wa kin pʼáatal kaʼachoʼ, pero bejlaʼeʼ jach kiʼimak in wóol. Chéen ich junpʼéel meseʼ tin tsʼáaj xook tiʼ 24 máakoʼob. In abuelaeʼ jach u pʼeek kaʼach u yuʼubik baʼax ku yaʼalik le Bibliaoʼ chéen baʼaleʼ bejlaʼeʼ kin tsʼáaik u graciasil tiʼ Jéeoba tumen tak tiʼ letiʼ kin tsʼáaik xook».

Tu luʼumil Fiyieʼ juntúul j-xoknáal tiʼ le Bibliaoʼ anchaj u yilik baʼax ken u beete: u bin asamblea, wa u bin tu kʼiin kʼaabaʼ juntúul u láakʼtsil u yíicham. U yíichameʼ tu yaʼalaj maʼalob ka xiʼik teʼ asambleaoʼ, letiʼeʼ tu yaʼalaj xan tiʼ u yíichameʼ ken lukʼuk teʼ asambleaoʼ ku bin teʼ kʼiinbesajoʼ. Chéen baʼaleʼ ka tsʼoʼok le asambleaoʼ le koʼolelaʼ tu tukleʼ wa ku bin teʼ kʼiin kʼaabaʼoʼ yaan u táakpajal tiʼ baʼax maʼ uts tu tʼaan Diosiʼ le oʼolal tu chʼaʼtuklaj maʼ u biniʼ.

Le tiaʼan teʼ kʼiinbesajoʼ u yíicham le koʼolelaʼ tu yaʼalaj tiʼ u láakʼtsiloʼoboʼ u yaʼalmaj tiʼ u yatan ka taalak teʼ kʼiinbesajil ken tsʼoʼokok u «asamblea yéetel le j-Jaajkunajoʼoboʼ». U láakʼtsiloʼob le máakaʼ tu yaʼaloʼobtiʼ: «Maʼ tun taal, le j-Jaajkunajoʼoboʼ maʼatech u beetkoʼob kʼiin kʼaabaʼob». *

U yíicham le koʼolelaʼ kiʼimakchaj u yóol úuchik u yilik bix u tsʼáaik u yóol u yatan u beet baʼax ku kanik yéetel maʼ u chaʼik u jáajan kʼeʼexel u tuukul. Le bix u yeʼesik le koʼolel chúukaʼan u yóol tiʼ Diosoʼ, tu tsʼáaj tuʼux u tsikbaltik tiʼ u yíicham yéetel tiʼ uláakʼ máakoʼob baʼax ku kanik. ¿Baʼax utsil tu taasaj? Káaj u tsʼaʼabal xook tiʼ u yíicham yéetel káaj u bin muchʼtáambal.