Le baʼax táan u taal u yaʼalik le apóstol Pablo teʼ versiculoʼobaʼ ku yáantkoʼon k-naʼateʼ le u tʼaan Dios ku yaʼalikoʼ letiʼe baʼax u kʼáat Dios ka ojéeltaʼak tumen tuláakal máakoʼ.

Teʼ publicacionoʼoboʼ yaʼab u téenel ku chʼaʼchiʼitaʼal Hebreoʼob 4:12 utiaʼal u tsoʼololeʼ le Bibliaoʼ yaan u páajtalil u kʼexik u kuxtal máak. Le bix tsʼoʼok u tsoʼololaʼ jach maʼalob. Chéen baʼaleʼ maʼalob xan ka k-il tiʼ baʼax táan kaʼach u yúuchul tʼaan ka aʼalaʼab le baʼax ku chíikpajal teʼ Hebreoʼob 4:12. Pabloeʼ táan kaʼach u yaʼalik tiʼ le sukuʼunoʼob hebreoʼob ka u chʼaʼob en cuenta baʼax u tukultmaj Dios utiaʼal le Luʼum tiʼ tuláakal baʼax ku beetkoʼob ichil u kuxtaloʼoboʼ. Le baʼax u tukultmaj Dios utiaʼal le Luʼumaʼ tiaʼanoʼob kaʼach ichil le Kiliʼich Tsʼíiboʼoboʼ. Pabloeʼ tʼaanaj tiʼ le ka jáalkʼabtaʼab le israelitaʼob tu luʼumil Egiptooʼ. Tiʼ letiʼobeʼ aʼalaʼab yaan u tiaʼalintikoʼob le Luʼum Aʼalaʼan u Tsʼaʼabaltiʼoboʼ, junpʼéel «luʼum tuʼux ku yáalkab leche yéetel kaab». Lelaʼ letiʼe lugar tuʼux kun jeʼeleloʼob kaʼachoʼ (Éxo. 3:8; Deu. 12:9, 10).

Lelaʼ letiʼe baʼax u tukultmaj kaʼach Dios utiaʼaloʼoboʼ. Chéen baʼaleʼ ka máan kʼiineʼ le israelitaʼoboʼ chichchaj u puksiʼikʼaloʼob yéetel pʼáat minaʼan u fejoʼob. Le oʼolaleʼ u maas yaʼabil tiʼ letiʼobeʼ maʼ ookoʼob teʼ lugar tuʼux tu yaʼalaj Dios kun jeʼeleloʼoboʼ (Núm. 14:30; Jos. 14:6-10). Chéen baʼaleʼ Pabloeʼ tu yaʼaleʼ láayliʼ «yaan k-okol tu kúuchil u jeʼelel Dioseʼ» (Heb. 3:16-19; 4:1). Le baʼax tu yaʼalaʼ táakaʼan ichil le baʼaxoʼob tsʼoʼok u yaʼalik Dios u tsʼáaik tiʼ wíinikoʼ. Jeʼex le cristianoʼob hebreoʼoboʼ toʼon xaneʼ unaj k-kanik baʼax u tukultmaj Dios utiaʼal le Luʼumaʼ yéetel k-eʼesik ichil k-kuxtal letiʼe baʼax táan k-páaʼtikoʼ. Utiaʼal u yeʼesik Pablo tiaʼan ichil le Biblia le promesaaʼ, tu chʼaʼchiʼitaj Génesis 2:2 yéetel Salmo 95:11.

Le baʼax ku yaʼalik Pabloaʼ jach ku líiʼsik k-óol, letiʼeʼ tu yaʼalaj: «Aʼalaʼantoʼon yaan k-okol tu kúuchil u jeʼelel Dios». Toʼoneʼ k-ojel jeʼel u páajtal k-okol tu kúuchil u jeʼelel Dios ku yaʼalik le Bibliaoʼ tumen táan k-ilik k-beetik le baʼax kʼaʼabéet utiaʼal u béeytal u yokol máakoʼ. Lelaʼ maʼ u kʼáat u yaʼal wa láayliʼ táan k-beetik le baʼax ku yaʼalik le Ley tsʼaʼab tiʼ Moisesoʼ mix xan u kʼáat u yaʼal wa chéen táan k-beetik baʼax maʼalob utiaʼal u kʼamkoʼon Jéeobaiʼ. Baʼaxeʼ u kʼáat u yaʼaleʼ tsʼoʼok u yantaltoʼon fe le oʼolal tiʼ tuláakal baʼax k-beetkeʼ k-chʼaʼik en cuenta le baʼax u tukultmaj Diosoʼ yéetel maʼ kun xuʼulul k-beetik. Tsʼoʼoleʼ jeʼex t-aʼalaj tu káajbaloʼ u milesil máakoʼob tiʼ tuláakal yóokʼol kaabeʼ, tsʼoʼok u káajsik u xokikoʼob le Bibliaoʼ yéetel táan u kaanbaloʼob tiʼ baʼax u tukultmaj u beetik Dios. Yaʼab tiʼ letiʼobeʼ tsʼoʼok u kʼexik u kuxtaloʼob, u yantal u fejoʼob yéetel tsʼoʼok u yokjaʼob. Lelaʼ ku yeʼesikeʼ «u tʼaan Dioseʼ kuxaʼan yéetel yaan u páajtalil». Le baʼax u kʼáat Dios ka ojéeltaʼak tumen tuláakal máak ku chíikpajal teʼ Bibliaoʼ tsʼoʼok u kʼexik k-kuxtal yéetel bey kun seguer u beetkoʼ.