1, 2. Maʼ xaaneʼ, ¿baʼax jeʼel u taaktal u yojéeltik le táankelem paalaloʼoboʼ, yéetel baʼax ku yaʼalik le Bibliaoʼ?

 TU LUʼUMIL Gran Bretañaeʼ juntúul u yéet xook juntúul kiikeʼ, tu yaʼalaj: «Si techeʼ jach yaan a naʼat, ¿bix túun yanil ka creertik yaan Dios?». Juntúul sukuʼun kajaʼan Alemaniaeʼ, tu yaʼalaj: «In maestroʼobeʼ ku tuklikoʼobeʼ u yaʼalaʼal yaan Máax beetoʼoneʼ maʼ jaajiʼ, chéen tuus. Ku tuklikoʼob xaneʼ tuláakal le j-xoknáaloʼob creertik le evolucionoʼ». Juntúul kiik x-lóoʼbayan kajaʼan Franciaeʼ, tu yaʼalaj: «In maestroʼobeʼ ku jaʼakʼal u yóoloʼob ken u yojéeltoʼob tak bejlaʼa yaan paalaloʼob creertik baʼax ku yaʼalik le Bibliaoʼ».

² Bejlaʼeʼ yaʼab máak maʼatech u creertik wa Dios beetoʼon. Wa teech juntúul táankelem paalech táan a meyajtik Jéeoba, bey xan wa táan u káajal a kaanbal tiʼeʼ maʼ xaaneʼ taak a wojéeltik bix jeʼel a weʼesik letiʼ beetoʼoneʼ. Le Bibliaoʼ jeʼel u yáantkech tuukul tiʼ baʼax ka wuʼuyik wa tiʼ baʼax ka xokik. Jeʼel u yáantkech xan a wil ta juunal baʼaxten ka creertik wa baʼaxeʼ. Le Bibliaoʼ ku yaʼalik: ‹Le naʼatoʼ bíin u kanáantech mantatsʼ› ¿Bix ken u kanáantech? Yaan u yáantkech utiaʼal maʼ a creertik baʼaloʼob maʼ jaajtakiʼ yéetel utiaʼal ka muʼukʼaʼanchajak a fe tiʼ Jéeoba (xok Proverbios 2:10-12).

3. ¿Baʼax ken k-il teʼ xookaʼ?

³ Utiaʼal u muʼukʼaʼantal k-fe tiʼ Jéeobaeʼ unaj k-kʼaj óoltik maʼalob  (1 Tim. 2:4). Le oʼolaleʼ ken a xok le Biblia yéetel le publicacionoʼoboʼ unaj a jeʼelel a tukult baʼax ka xokik. Ilawil a naʼatik tubeel le baʼax ka xokikoʼ (Mat. 13:23). Teʼ xookaʼ yaan a kanikeʼ wa ka xook beyaʼ yaan a tsʼáaik cuentaeʼ yaʼab baʼaloʼob eʼesik Jéeoba beetmiloʼon yéetel letiʼ beet u tsʼíibtaʼal le Bibliaoʼ (Heb. 11:1).

4. 1) Le máaxoʼob creertik le evolucionoʼ, ¿baʼaxten láayliʼ ku creertikoʼob junpʼéel baʼal mix máak ilmileʼ? 2) ¿Baʼax unaj k-beetik tuláakloʼon?

⁴ Maʼ xaaneʼ yaan máax jeʼel u yaʼalikeʼ: «Teneʼ kin creertik le evolucionoʼ tumen letiʼe cientificoʼob aʼalik de ke jaajoʼ. Techeʼ, ¿bix a creertik yaan Dios?, si mix máak ilmil». Yaʼab máak bey u tuukulaʼ. U jaajileʼ mix máak u yil Dios yéetel mix máak ilmil xan bix tu beetil wa baʼax (Juan 1:18). Chéen baʼaleʼ le máaxoʼob creertik le evolucionoʼ, láayliʼ táan u creertikoʼob junpʼéel baʼal mix máak ilmileʼ. Mix juntúul científico wa uláakʼ máak u yil bix u jáan suut juntúul baʼalcheʼ yaanal baʼalcheʼil. Por ejemploeʼ mix máak u yil u suut elefanteil wa león juntúul kaan wa juntúul x-tʼaraʼach (Job 38:1, 4). Le oʼolaleʼ tuláakloʼon unaj k-ilik wa yaan baʼaxoʼob eʼesik jaaj junpʼéel baʼal yéetel k-tuukul tiʼ; beyoʼ yaan k-ilik wa k-creertik wa maʼ. Yaʼab máakeʼ ken u yil le jatsʼuts baʼaxoʼob yaan way yóokʼol kaabaʼ ku tsʼáaikoʼob cuenta jach tu jaajil yaan juntúul Dios. Jeʼex u yaʼalik le Bibliaoʼ ‹chíikaʼan u yilkoʼob› Dios beetmiloʼon, jach yaan u páajtalil yéetel yaʼab jatsʼuts modos yaantiʼ (Rom. 1:20).

5. ¿Baʼax jeʼel u yáantkoʼon kan u maasil tiʼ le baʼaxoʼob u beetmaj Dios way yóokʼol kaabaʼ?

⁵ Ken k-il tuláakal le baʼaxoʼob yaan way yóokʼol kaab yéetel ken tuukulnakoʼon tiʼobeʼ k-tsʼáaik cuenta jach jatsʼuts bix beetaʼanil. «Tu yoʼolal fejeʼ, k-tsʼáaik cuentaeʼ» yaan juntúul Máax beetmiloʼon kex maʼatech k-ilik. K-tsʼáaik cuenta xaneʼ le Máax beetmiloʼonoʼ jatsʼuts u modos yéetel jach yaan u naʼat (Heb. 11:3, 27). Wa k-xokik le baʼaxoʼob tsʼoʼok u yilik le cientificoʼoboʼ yaan k-maas kaanbal tiʼ le baʼaxoʼob u beetmaj Dios teʼ yóokʼol kaabaʼ. Jujunpʼéel baʼaxoʼob tsʼoʼok u tsolik le cientificoʼoboʼ tiaʼan teʼ publicacioʼonoʼob jeʼex le video Las maravillas de la creación revelan la gloria de Dios, le folletoʼob ¿Es la vida obra de un Creador?, El origen de la vida. Cinco cuestiones dignas de análisis yéetel le folleto U núukil 10 preguntaʼob ku beetik le paalaloʼoboʼ (pregunta 9). Teʼ revista ¡Despertad! ich españoloʼ ku jóoʼsaʼal xan jujunpʼéel entrevistaʼob beetaʼan tiʼ cientificoʼob yéetel tiʼ uláakʼ máakoʼob ku tsolkoʼob baʼax beet u  creertikoʼob yaan Dios. Le revistaoʼ ku taasik xan le jaats «¿Casualidad o diseño?», le jaatsaʼ ku tʼaan tiʼ jujuntúul baʼalcheʼob yéetel uláakʼ baʼaloʼob yaan teʼ yóokʼol kaabaʼ. Ku yeʼesikeʼ le cientificoʼoboʼ maʼ béeyak u copiartikoʼob bix beetaʼaniloʼobiʼ.

6. ¿Bix jeʼel u yáantkech le publicacioʼonoʼoboʼ?

⁶ Tu luʼumil Estados Unidoseʼ juntúul sukuʼun yaan 19 años tiʼeʼ, tʼaanaj tiʼ kaʼapʼéel tiʼ le folletoʼob tsʼoʼok k-aʼalikoʼ, tu yaʼalaj: «Le folletoʼobaʼ jach tsʼoʼok u yáantkenoʼob, yaʼab u téenel tsʼoʼok in xokikoʼob». Tu luʼumil Franciaeʼ juntúul kiikeʼ, tu yaʼalaj: «Le jaats ‹¿Casualidad o diseñooʼ?› cada ken jóokʼkeʼ jach jatsʼuts in wilik baʼax ku tsolik. Ku yeʼesikeʼ yaʼab máaxoʼob ku yilik u copiarkoʼob le baʼaxoʼob beetaʼan teʼ yóokʼol kaabaʼ, chéen baʼaleʼ mix bikʼin kun béeytal u jóoʼskoʼob junpʼéel baʼal ka meyajnak jach jeʼex le beetaʼanoʼoboʼ». Tu luʼumil Sudáfricaeʼ u taataʼob juntúul x-chʼúupal 15 años yaantiʼeʼ, tu yaʼaloʼob: «Le yáax jaats ku xokik k-hija teʼ revista ¡Despertadoʼ! letiʼeʼ ku kʼaabaʼtik, ‹Entrevista›». Le publicacionoʼobaʼ jeʼel u yáantkech a wil jach tu jaajil yaan Máax beetmiloʼon yéetel maʼ a chaʼik a tuʼusul tumen u maasil yéetel baʼaloʼob maʼ jaajtakiʼ. Wa ka beetik lelaʼ a fejeʼ yaan u muʼukʼaʼantal jeʼex junkúul cheʼ taamchajaʼan u moots maʼ tu lúubul kex kʼaʼam iikʼeʼ (Jer. 17:5-8).

7. ¿Baʼaxten Dioseʼ u kʼáat ka meyajnaktech u ‹páajtalil a tuukul›?

⁷ ¿Kʼaas wa ka taakak a wojéeltik wa jach jaaj baʼax ku yaʼalik le Bibliaoʼ? Maʼatech, maʼ kʼaasiʼ. Jéeobaeʼ maʼ u kʼáat ka a creert junpʼéel baʼal chéen tumen bey u beetik u maasiloʼ. Letiʼeʼ u kʼáat ka meyajnaktech u ‹páajtalil a tuukul› utiaʼal ka a kʼaj óolt maʼalob baʼax ku yaʼalik le Bibliaoʼ yéetel utiaʼal a comprobartik de ke letiʼ beet u tsʼíibtaʼal. Wa ka tsʼáaik a wóol a kʼaj óolt maʼalob baʼax ku yaʼalik le Bibliaoʼ yaan u maas muʼukʼaʼantal a fe (xok Romailoʼob 12:1, 2 yéetel 1 Timoteo 2:4). Junpʼéel bix jeʼel a maas kʼaj óoltik le Bibliaoʼ letiʼe a investigartik junpʼéel baʼax maas taak a naʼatikoʼ.

8, 9. 1) ¿Baʼax uts tu tʼaan u investigartik jujuntúul máakoʼob? 2) ¿Baʼax utsil tsʼoʼok u taasik tiʼ jujuntúul sukuʼunoʼob u tuukuloʼob tiʼ baʼax ku xokikoʼob?

⁸ Yaʼab máakeʼ uts tu tʼaan u investigartik le profecíaʼob yanoʼob teʼ Bibliaoʼ. Uláakʼoʼobeʼ ku ketikoʼob baʼax ku yaʼalik le Biblia yéetel le baʼaxoʼob uchaʼantakoʼ, le baʼaxoʼob ku yaʼalik le cientificoʼoboʼ wa yéetel le baʼaxoʼob tsʼoʼok u kaxtik le arqueologoʼoboʼ. Por ejemploeʼ tuukulnen tiʼ Génesis 3:15, teʼelaʼ Jéeobaeʼ tu tsʼáaj junpʼéel profecía le jach táant u tsʼáaikuba Adán yéetel Eva tu contra letiʼ yéetel tu contra u gobernación. Lelaʼ letiʼe yáax profecía ku yáantkoʼon k-naʼat baʼaxten u Reino Dioseʼ maas maʼalob tiʼ jeʼel baʼaxak gobiernoeʼ yéetel ku yáantkoʼon k-il bix ken u xuʼulsil le muʼyajiloʼ. ¿Baʼax jeʼel u yáantkech a maas naʼat u profecíail Génesis 3:15? Yáaxeʼ jeʼel u páajtal a beetik junpʼéel lista tiʼ uláakʼ tekstoʼob ku yeʼeskoʼob bix u béeychajal le profecíaaʼ. Tsʼoʼoleʼ jeʼel u páajtal a kaxtik baʼax kʼiin ka tsʼíibtaʼaboʼob yéetel a tsʼáaikoʼob jeʼex úuchik u bin u yúuchleʼ. Ken a beet lelaʼ yaan a wilkeʼ le máaxoʼob tsʼíibt le Bibliaoʼ kex kuxlajoʼob tiʼ jejeláas añoʼobeʼ tuláakloʼob áantajnajoʼob utiaʼal ka maas naʼataʼak le profecíaoʼ. Tsʼoʼoleʼ yaan u yáantkech a tsʼáa cuentaeʼ Jéeoba nuʼuktoʼob yéetel u kiliʼich muukʼ utiaʼal ka u tsʼíibtoʼob le Bibliaoʼ (2 Ped. 1:21).

⁹ Juntúul sukuʼun kajaʼan Alemaniaeʼ ku yaʼalikeʼ tu tsʼáaj cuentaeʼ kex cuarenta máakoʼob tsʼíibt le Bibliaoʼ, kex kuxlajoʼob tiʼ jejeláas añoʼob yéetel kex maʼ tu kʼaj óoltubaʼobeʼ, cada junpʼéel tiʼ le libroʼob tu tsʼíibtoʼoboʼ ku tʼaanoʼob tiʼ le Reinooʼ. Juntúul kiik kajaʼan Australiaeʼ, le táan u xokik junpʼéel jaats tiʼ U Pʼíich Tulumil Kananeʼ tu kanaj baʼax yaan yil le Pascua yéetel u profecíail Génesis 3:15, bey xan yéetel le Mesíasoʼ. ^[1] Le kiikaʼ ku yaʼalik: «Le xookaʼ tu yáanten in tsʼáa cuenta bukaʼaj nojchil u naʼat Jéeoba úuchik u yaʼalik tiʼ le israelitaʼob ka u kʼiinbesoʼob le Pascuaoʼ. Jaʼakʼ in wóol ka tin naʼateʼ lelaʼ tu chíikbesaj le baʼax tu beetaj Jesusoʼ. Le táan in xookoʼ anchaj in jeʼelel utiaʼal in tuklik jach baʼax u kʼáat u yaʼal le Pascuaoʼ». ¿Baʼaxten bey tu yuʼubiluba le kiikaʼ? Tumen letiʼeʼ tuukulnaj tiʼ le baʼax  ku xokikoʼ, lelaʼ le áant u naʼate. Úuchik u beetik lelaʼ béeychaj u muʼukʼaʼankúuntik u fe yéetel tu maas natsʼuba tiʼ Jéeoba (Mat. 13:23).

10. ¿Baʼax uláakʼ jeʼel u yáantkech utiaʼal ka muʼukʼaʼanchajak a fe tiʼ le baʼax ku yaʼalik le Bibliaoʼ?

¹⁰ Utiaʼal u maas muʼukʼaʼantal a fejeʼ maʼalob xan ka tuukulnakech tiʼ baʼax tu yaʼalaj le máaxoʼob tsʼíibt le Bibliaoʼ. Letiʼobeʼ mantatsʼ tu yaʼaloʼob u jaajil yéetel maʼ sajakchaj u tsʼíibtoʼob tuláakal baʼal jach jeʼex úuchikoʼ. Teʼ kʼiinoʼoboʼ le máakoʼoboʼ ken u tsʼíibtoʼob wa baʼaxeʼ chéen ku tsʼíibtikoʼob le baʼaloʼob maʼalobtak tu beetaj u yéet kaajaloʼoboʼ wa le máaxoʼob gobernartoʼoboʼ. Chéen baʼaleʼ u profetaʼob Jéeobaeʼ maʼ bey tu beetiloʼobiʼ. Letiʼobeʼ tʼaanajoʼob xan tiʼ le baʼaloʼob maʼ maʼalobtak tu beetaj u kajnáaliloʼob Israel yéetel u reyoʼoboʼ, maʼ chéen tiʼ le baʼaloʼob maʼalobtak tu beetoʼoboʼ (2 Cró. 16:9,10; 24:18-22). Letiʼobeʼ tu tsʼíibtoʼob tak le baʼaloʼob maʼ maʼalobtak tu beetoʼoboʼ bey xan le tu beetaj uláakʼ máaxoʼob meyajt Diosoʼ (2 Sam. 12:1-14; Mar. 14:50). Juntúul xiʼipal kajaʼan Gran Bretañaeʼ, tu yaʼalaj: «Bejlaʼeʼ óoliʼ mix máak aʼalik u jaajil, lelaʼ ku beetik in maas creertik tiʼ Jéeoba u taal le baʼax ku yaʼalik le Bibliaoʼ».

11. ¿Baʼax uláakʼ jeʼel u yáantkoʼon k-tsʼáa cuenta tiʼ Dios u taal le Bibliaoʼ?

¹¹ Wa ku nuʼuktik u kuxtal máak yéetel baʼax ku yaʼalik le Bibliaoʼ jeʼel u bin maʼalobil tiʼeʼ. Lelaʼ jeʼel u yáantik xan máak u creert tiʼ Dios u taal le Bibliaoʼ (xok Salmo 19:7-11). Juntúul kiik x-lóoʼbayan kajaʼan Japoneʼ, tu yaʼalaj: «U beetik in familia le baʼax ku kaʼansik le Bibliaoʼ tsʼoʼok u taasiktoʼon kiʼimak óolal. Toʼoneʼ maas maʼalob k-bisikba, kiʼimak óol yéetel jach k-yaabiltmakba». Le Bibliaoʼ tsʼoʼok u yáantik yaʼab máak u yil maʼ jaaj jujunpʼéel baʼaloʼob ku creertikoʼob kaʼachiʼ (Sal. 115:3-8). Tsʼoʼok xan u yáantkoʼob confiar tiʼ Jéeoba, le máax jach yaan u páajtaliloʼ, yéetel tiʼ le baʼaxoʼob ken u beet maʼ tun xáantaloʼ. Chéen baʼaleʼ yaan xan máakoʼobeʼ maʼatech u creertikoʼob wa yaan Dios, letiʼobeʼ ku yilkoʼob le baʼaloʼob yaan teʼ yóokʼol kaab bey u diosoʼoboʼ. Uláakʼoʼobeʼ ku tuklikoʼobeʼ le wíinikoʼoboʼ jeʼel u páajtal u beetkoʼob u yantal junpʼéel maʼalob kuxtaleʼ. Chéen baʼaleʼ ken k-il tuláakal le baʼaloʼob tsʼoʼok u beetkoʼob tak bejlaʼoʼ k-tsʼáaik cuenta maʼ tu páajtal u yutskíintikoʼob mix junpʼéel tiʼ le problemaʼob yanoʼob teʼ yóokʼol kaabaʼ (Sal. 146:3, 4).

12, 13. Ken tʼaanakech tiʼ le Biblia wa tiʼ Máax beetoʼoneʼ, ¿baʼax jeʼel u páajtal a waʼalikeʼ?

¹² Ken tsikbalnakech yéetel wa máax yoʼolal le jatsʼuts baʼaxoʼob beetaʼan teʼ yóokʼol kaab wa yoʼolal le Bibliaoʼ, táanileʼ yáax uʼuy baʼax ku creertik tu yoʼolal. Kʼaʼajaktecheʼ yaneʼ ku creertik le evolucionoʼ yéetel ku creertik xan yaan Dios. Letiʼobeʼ ku yaʼalikoʼobeʼ tiʼ Dioseʼ meyajnaj le evolución utiaʼal u beetik u maasil baʼaloʼoboʼ. Uláakʼoʼobeʼ ku creertikoʼob jaaj le evolucionoʼ tumen junpʼéel baʼal ku kaʼansaʼal teʼ escuelaoʼ. Yanoʼobeʼ ku xuʼulul u creertikoʼob yaan Dios tu yoʼolal le baʼaloʼob maʼ maʼalobtak u yilmoʼob tu religionoʼoboʼ. Le oʼolaleʼ yáaxeʼ kʼaʼabéet a kʼáatik tiʼ le máax yéetel ka tsikbal baʼax ku creertikoʼ yéetel baʼaxten bey u creertikoʼ. Tsʼoʼoleʼ chʼenxikint baʼax ken u yaʼaltech. Wa ka beetik beyaʼ, letiʼeʼ maas jeʼel u yuʼubik baʼax ken a waʼaltiʼeʼ (Tito 3:2).

¹³ Wa yaan máax ku yaʼalik jach minaʼan a naʼat ikil a creertik yaan Máax beetoʼoneʼ, ¿baʼax jeʼel a waʼaliktiʼeʼ? Maʼ a tsʼíikil, baʼaxeʼ yéetel respetoeʼ kʼáattiʼ ka u tsoltech bix u tuklik káaj le kuxtaloʼ. Jeʼel u páajtal a waʼaliktiʼeʼ wa jach tu jaajil maʼ anchaj Máax beetoʼoneʼ, leloʼ u kʼáat u yaʼaleʼ le yáax baʼal kuxaʼan anchaj way Luʼumoʼ chéen tu juunal páajchaj u yaʼabkúuntkuba utiaʼal maʼ u chʼéejel. Juntúul profesor tiʼ quimicaeʼ tu yaʼaleʼ utiaʼal u beetik lelaʼ yaʼab baʼax kʼaʼabéetchajtiʼ jeʼex: 1) u yantal u sóol wa junpʼéel ootʼ jáaytsileʼen utiaʼal u pixkuba, 2) u yantal u muukʼ utiaʼal u kuxtal yéetel utiaʼal u meyajtiʼ jeʼex u kʼáateʼ, 3) u yantaltiʼ le información utiaʼal u controlartik u formail u wíinklil yéetel bukaʼaj u nojchil (ADN) yéetel 4) u yantaltiʼ u páajtalil u copiartik xan le informacionaʼ yéetel u máansik tiʼ yaanal. Tu tsʼookeʼ tu yaʼalaj: «Jach ku jaʼakʼal u yóol máak ken u yil bukaʼaj baʼaloʼob ku taasik u wíinklil tak le baʼaloʼob kuxaʼanoʼob maas mejentakoʼoboʼ».

14. ¿Baʼax jeʼel u páajtal u meyajtech le ken tʼaanakech tiʼ le Máax beetoʼonoʼ?

 ¹⁴ Ken tʼaanakech xan tu yoʼolal wa anchaj Máax beetoʼoneʼ jeʼel u páajtal u meyajtech le baʼax tu yaʼalaj apóstol Pablooʼ. Letiʼeʼ tu yaʼalaj: «Tuláakal najeʼ yaan máax beetmil, baʼaleʼ le Máax beet tuláakal le baʼaloʼoboʼ Dios» (Heb. 3:4). Jeʼex u yaʼalikoʼ junpʼéel najeʼ anchaj máax tuklik bix ken u beetil, ka tsʼoʼokeʼ tu beetaj. Lelaʼ ku yeʼesiktoʼoneʼ wa junpʼéel naj maas chéen chʼaʼabil u beetaʼal anchaj máax beetkeʼ, ¿kux túun le baʼaxoʼob kuxaʼanoʼoboʼ? ¿Maʼ wa anchaj xan máax beetkoʼobiʼ? Jeʼel u páajtal xan u meyajtech junpʼéel publicación utiaʼal a tsoliktiʼeʼ. Juntúul kiikeʼ tu yeʼesaj tiʼ juntúul xiʼipal maʼ tu creertik wa yaan Dios kaʼapʼéel tiʼ le folletoʼob tsʼoʼok k-yáax k-aʼalikoʼoboʼ. Ka máan óoliʼ junpʼéel semanaeʼ, le xiʼipaloʼ tu yaʼalaj: «Beoraaʼ kin creertik jach tu jaajil yaan Dios». Le xiʼipaloʼ káaj u xokik le Bibliaoʼ yéetel bejlaʼeʼ juntúul j-Jaajkunaj.

15, 16. Táanil tiʼ a waʼalik wa baʼax tiʼ juntúul máax maʼ tu creertik baʼax ku yaʼalik le Bibliaoʼ, ¿baʼax unaj a wojéeltik?

¹⁵ Wa yaan máax maʼatech u jach creertik baʼax ku yaʼalik le Bibliaoʼ, ¿bix jeʼel a wáantikeʼ? Jeʼex tsʼoʼok k-aʼalikoʼ yáaxeʼ unaj a wojéeltik jach baʼax ku creertik yéetel ilawil bey baʼaxoʼob jeʼel u taaktal u yuʼubikeʼ (Pro. 18:13). Wa uts tu yich u tʼaan tiʼ cienciaeʼ jeʼel u páajtal a tsikbaltiktiʼeʼ le baʼaxoʼob ku yaʼalik le Biblia yaan yil yéetel cienciaoʼ jach jaajtak. Wa jatsʼuts u yilik u xook tiʼ baʼaloʼob uchaʼantakeʼ, eʼestiʼ bix úuchik u béeytal jujunpʼéel tsikbaliloʼob yaan teʼ Bibliaoʼ yéetel aʼaltiʼ úuchiliʼ u yaʼal le Biblia bey kun úuchloʼ. Maʼ xaaneʼ uláakʼ máakoʼobeʼ maas jeʼel u yuʼubikoʼob jujunpʼéel baʼaxoʼob ku yaʼalik le Biblia jeʼel u yáantkoʼob ichil u kuxtaloʼoboʼ, jeʼex le baʼaxoʼob tu yaʼalaj Jesús le ka tu kaʼansaj u disipuloʼob teʼ puʼukoʼ.

¹⁶ Maʼ unaj u tuʼubultecheʼ, toʼoneʼ maʼ k-kʼáat baʼateltʼaan yéetel le máakoʼoboʼ. Toʼoneʼ k-kʼáat ka jatsʼutschajak u yuʼubikoʼob baʼax ku yaʼalik le Bibliaoʼ yéetel ka kaanbalnakoʼob. Ilawil a weʼesik jatsʼuts modos ken a kʼáattiʼob wa baʼax yéetel jach chʼenxikintoʼob maʼalob. Le ken a waʼal baʼax ka creertikeʼ eʼes ka respetarkoʼob, maases wa yaan u edaboʼob tiʼ teech. Wa ka beetik beyaʼ letiʼobeʼ yaan u respetarkechoʼob. Maʼ xaaneʼ yaan tak u jaʼakʼal u yóoloʼob tumen kex táankelmecheʼ jach tu jaajil ka creertik baʼax ka waʼalik. Chéen baʼaleʼ wa yaan máax chéen u kʼáat baʼateʼel wa u yaʼaltech baʼaleʼ, maas maʼalob maʼ a waʼalik mix baʼaltiʼ (Pro. 26:4).

17, 18. 1) ¿Baʼax jeʼel u yáantkech a wil le Biblia bey u Tʼaan Jéeobaoʼ? 2) ¿Baʼax ken k-il teʼ tuláakʼ xookoʼ?

¹⁷ Maʼ xaaneʼ techeʼ a wojel le baʼaxoʼob maas maʼ talamtak ku kaʼansik le Bibliaoʼ. Chéen baʼaleʼ unaj a kanik xan le baʼaloʼob maʼ jach séeb u naʼataʼaloʼ tumen beyoʼ yaan u maas muʼukʼaʼantal a fe, lelaʼ unaj a beetik jeʼex a tsʼáaik a wóol a kaxt junpʼéel tesoroeʼ (Pro. 2:3-6). Junpʼéel bix jeʼel a maas muʼukʼaʼankúuntik a fejeʼ letiʼe a xokik le Biblia tu chúukaʼaniloʼ. Maʼ xaaneʼ jeʼel u páajtal a wilik a xokik tu yáamil junpʼéel añoeʼ. Lelaʼ le áant juntúul superintendente tiʼ circuito náatsʼal yiknal Jéeoba tu táankelmiloʼ. Letiʼeʼ tu yaʼalaj: «Junpʼéel baʼax áanten in wil le Biblia bey u Tʼaan Jéeobaoʼ, letiʼe in xokik tu chúukaʼaniloʼ. Ka tin beetaj lelaʼ tin naʼataj tuláakal le baʼaxoʼob suuk u tsikbaltaʼalten tiʼ le Biblia tin chan paaliloʼ». Jeʼel u páajtal u meyaj xan tiʼ teech le baʼaxoʼob u tsʼaamaj u kaajal Jéeoba utiaʼal a maas naʼatik le baʼax ka xokik teʼ Bibliaoʼ. Jeʼex le Watchtower Library tiʼ DVD, le BIBLIOTECA ICH INTERNET tiʼ le Watchtoweroʼ yéetel le Áantaj utiaʼal u xakʼalxook u j-jaajkunajoʼob Jéeobaoʼ.

¹⁸ Taatatsileʼex, maases teʼex unaj a kaʼanskeʼex tiʼ a paalaleʼex baʼax ku yaʼalik Jéeoba desde tu chichniloʼob. ¿Bix jeʼel u páajtal a wáantkeʼex a paalaleʼex utiaʼal ka muʼukʼaʼanchajak u fejoʼobeʼ? Lelaʼ yaan k-ilik teʼ tuláakʼ xookoʼ.