¿Baʼax jeʼel u yáantkech utiaʼal maʼ u náakal a wóol a xok le Biblia yéetel utiaʼal a jóoʼsik u yutsiloʼ? Koʼox ilik cinco baʼaloʼob jeʼel u yáantkecheʼ.

Tuʼux unaj a xook. Kaxt junpʼéel lugar tranquilo utiaʼal a xook. Wa mix baʼal náaysik a wóol, sáasil tuʼux ka xook yéetel síis óoleʼ maas yaan a jóoʼsik u yutsil.

Junpʼéel maʼalob tuukul. Le Bibliaoʼ junpʼéel regalo u tsʼaamajtoʼon Dios. Utiaʼal k-jóoʼsik u yutsil ken k-xokeʼ unaj k-tuukul jeʼex juntúul chan paal jach taak u kaanbal tiʼ u papaeʼ. Maʼ a tuukul tiʼ le baʼaxoʼob maʼ maʼalobtak a wuʼuymaj u yaʼalaʼal yoʼolal le Bibliaoʼ, chaʼa u kaʼansikech Dios (Salmo 25:4).

Orarnen táanil. Teʼ Bibliaoʼ u tuukul Dios yaniʼ, le oʼolal kʼaʼabéettoʼon u yáantaj utiaʼal k-naʼatik. Dioseʼ ku yaʼalikeʼ «jeʼel u tsʼáaik espíritu santo tiʼ le máaxoʼob kʼáatiktiʼoʼ» (Lucas 11:13). Le kiliʼich muukʼoʼ jeʼel u yáantkech a naʼat bix u tuukul Dioseʼ. Ken máanak kʼiineʼ yaan a naʼatik «tak le u taamkach naʼat Diosoʼ» (1 Corintios 2:10).

Ilawil a naʼatik. Maʼ chéen jáajan xook ka a beetiʼ. Tuukulnen tiʼ baʼax ka xokik. Tukle: «¿Baʼax jatsʼuts modosil tu yeʼesaj le máax ku chʼaʼchiʼitaʼal teʼ tsikbalaʼ? ¿Bix jeʼel in tsʼáaik tin kuxtal le baʼax kin xokikaʼ?».

Yéey baʼax a kʼáat a kane. Utiaʼal maʼ u náakal a wóol le táan a xokik le Bibliaoʼ, chʼaʼtukult a kanik baʼaloʼob jeʼel u yáantkech ichil a kuxtaleʼ. Jeʼex a maas kʼaj óoltik Dios, a weʼesik jatsʼuts modos, a beetkaba juntúul maʼalob íichamtsil wa atantsil, wa uláakʼ baʼaloʼob. Tsʼoʼoleʼ yéey junpʼéel jaats tiʼ le Biblia jeʼel u yáantkech a beet le baʼax ta chʼaʼtukloʼ. *

Le cinco baʼaloʼobaʼ jeʼel u yáantkech utiaʼal a káajsik a xokik le Bibliaoʼ. Pero ¿baʼax jeʼel u yáantkech utiaʼal ka maas utschajak ta wich a xokikeʼ? Lelaʼ tiʼ ku tsoʼolol teʼ xook ku segueroʼ.