Ka tu yilaj juntúul chan x-chʼúupal táan u jóokʼol buutsʼ tu techoil junpʼéel fabricaeʼ, tu tukleʼ teʼ ku beetaʼal le múuyaloʼoboʼ. Maʼ xaaneʼ chéen ku beetik k-cheʼej le baʼax úuch tiʼ le chan paalaʼ. Pero yaan horaeʼ wa maʼ t-jach naʼatik tubeel junpʼéel baʼaleʼ, jach jeʼel u bintoʼon kʼaasileʼ. Por ejemploeʼ wa maʼ t-naʼatik tubeel baʼax ku yaʼalik u frascoil junpʼéel tsʼaak yéetel k-ukʼik chéen jeʼex k-kʼáatoʼ jeʼel tak u kíimskoʼoneʼ.

Tsʼoʼoleʼ wa maʼ t-jach naʼatik tubeel le baʼaxoʼob yaan yil yéetel Diosoʼ maas jeʼel u bintoʼon kʼaasileʼ. Juntéenjeakileʼ bey úuchik tiʼ jujuntúul máakoʼob maʼ tu naʼatoʼob tubeel baʼax tu kaʼansaj Jesusoʼ (Juan 6:48-68). Tu lugar u yilik u kankoʼob u maasileʼ xuʼul u kʼamkoʼob baʼax ku kaʼansik.

Techeʼ ¿ka xokik wa le Biblia utiaʼal a nuʼuktik a kuxtaloʼ? Wa beyoʼ jach maʼalob. Chéen baʼaleʼ, ¿a wojel wa yaan máakoʼob jelaʼan bix u naʼatkoʼob jujunpʼéel baʼaxoʼob ku yaʼalik le Bibliaoʼ? Koʼox ilik óoxpʼéel baʼal suuk u naʼataʼal yaanal bixi.

• Tiʼ jejeláas Bibliaʼobeʼ ku yaʼalik kʼaʼabéet u chʼaʼabal saajkil tiʼ Dios, chéen baʼaleʼ yaan máakoʼobeʼ yaanal bix u naʼatkoʼob (Eclesiastés 12:13, TNM). Ku tuklikoʼobeʼ unaj k-sajaktal tiʼ Dios bey yaan u beetiktoʼon loobeʼ. Pero Dioseʼ maʼ u kʼáat ka k-uʼuyba beyoʼ. Ku yaʼaliktoʼon: «Maʼ a chʼaʼik saajkil, tumen teneʼ tiʼ yanen ta wéeteleʼ; maʼ u péek a wóol tumen teneʼ a [Diosen]. Teen tsʼáaik a muukʼ, teen áantkech, teen latʼabkʼabtikech yéetel in kʼab yaan páajtalil tiʼ» (Isaías 41:10). U chʼaʼabal saajkil tiʼ Dioseʼ chéen u kʼáat u yaʼal k-eʼesik tsiikil tiʼ wa k-respetartik yéetel k-kʼaʼajsik minaʼan uláakʼ jeʼex letiʼeʼ.

• Uláakʼ máakoʼobeʼ jelaʼan bix u naʼatkoʼob le tekstoaʼ: «Yaan junsúutuk utiaʼal síijil, yaan junsúutuk utiaʼal kíimil» (Eclesiastés 3:1, 2). Ku tuklikoʼobeʼ Dios tsʼaamil u yorail u kíimil cada máak. Le beetkeʼ ken kíimik wa máaxeʼ ku yaʼalikoʼob: «Kʼuch hora tiʼ». Pero u jaajileʼ le tekstooʼ chéen u kʼáat u yaʼaleʼ wíinikeʼ ku síijil yéetel ku kíimil. U Tʼaan Dioseʼ ku yaʼalik xaneʼ le baʼaxoʼob ku chʼaʼtuklik u beetik máakoʼ jeʼel u beetik u kóomtal wa u chowaktal u kuxtaleʼ. Wa ku yeʼesik máak tsiikil tiʼ Dioseʼ maas yaan u xáantal u kuxtal (Proverbios 10:27; Salmo 90:10; Isaías 55:3). ¿Baʼaxten ku yaʼalik leloʼ? Tumen wa ku yeʼesik máak tsiikil tiʼ Dioseʼ maʼ ten u beet baʼaloʼob jeʼel u kʼaskúuntik u kuxtaleʼ, jeʼex u káaltal wa u núupkʼebantal (1 Corintoiloʼob 6:9, 10).

• Yaan máaxoʼob creertikeʼ ken u yaʼal le Biblia ‹tsʼaʼan junpáayil le Luʼum utiaʼal kʼáakoʼ›, u kʼáat bin u yaʼal jach yaan u tóokaʼal le yóokʼol kaabaʼ (2 Pedro 3:7). Chéen baʼaleʼ Dioseʼ u yaʼalmeʼ mix bikʼin u xuʼulsik yóokʼol kaab, le Luʼum tuʼux kajaʼanoʼonaʼ. «Le luʼumaʼ [tsʼaʼab] yóokʼol u chuunpakʼiloʼob utiaʼal mix bikʼin ka péeknak tu kúuchil» (Salmo 104:5; Isaías 45:18). Le yóokʼol kaabaʼ maʼ tun xuʼulsbil, letiʼe baʼaxoʼob kʼaskúuntik kun xuʼulsbiloʼ. Jeʼel u páajtal u yaʼalaʼaleʼ tóokbil kun beetbiloʼob tumen junpuliʼ kun xuʼulsbiloʼob. ¿Kux túun le kaʼanoʼ? Wa táan k-tʼaan tiʼ le kaʼan ku páajtal k-ilik, le tuʼux yaan le estrellaʼob yéetel le planetaʼob, wa tiʼ le kúuchil tuʼux kajaʼan Diosoʼ, leloʼobaʼ mix bikʼin kun xuʼulsbiloʼob.

Jeʼex k-ilkoʼ yaan máakoʼobeʼ yaanal bix u naʼatkoʼob jujunpʼéel baʼaxoʼob ku yaʼalik le Bibliaoʼ. ¿Baʼaxten túun ku chaʼik Dios u yúuchul leloʼ? Yaan máax jeʼel u tuklikeʼ: «Wa Dios u yojel tuláakal baʼal yéetel jach táaj yaan u naʼateʼ, ¿baʼaxten maʼ tu beetaj u tsʼíibtaʼal le Biblia utiaʼal ka séeb naʼataʼakoʼ?». Yáaxeʼ koʼox ilik baʼaxten yaan máakoʼobeʼ yaanal bix u naʼatkoʼob le Bibliaoʼ.

1. Le Bibliaoʼ beetaʼan utiaʼal máakoʼob kabal u yóoloʼob taak u kaanbaloʼob». Jesucristoeʼ tu yaʼalaj tiʼ Dios: «In Taata, teech u Yuumil kaʼan yéetel  Luʼum. Kin kiʼikiʼtʼantkech tu táan le máakoʼoboʼ, tumen ta weʼesaj tiʼ le mejen paalaloʼoboʼ le kaʼansajoʼob ta taʼakaj tubeel tiʼ le máaxoʼob jach kaanbalnajaʼanoʼob yéetel yaan u naʼatoʼoboʼ» (Lucas 10:21). Le Bibliaoʼ tsʼíibtaʼan utiaʼal u naʼataʼal chéen tumen le máaxoʼob maʼalob u tuukuloʼoboʼ. U suukileʼ «le máaxoʼob jach kaanbalnajaʼanoʼob yéetel yaan u naʼatoʼoboʼ» yaanal bix u naʼatkoʼob tumen jach ku creertikubaʼob. Baʼaleʼ le máaxoʼob beyoʼob «mejen paalal» yéetel kabal u yóoloʼoboʼ, ku naʼatkoʼob tubeel baʼax ku yaʼalik Dios. Jeʼex k-ilkoʼ jach maʼalob bix tu beetil Dios u tsʼíibtaʼal le Bibliaoʼ.

2. Le Bibliaoʼ utiaʼal máaxoʼob u kʼáatoʼob ka áantaʼakoʼob tumen Dios u naʼatoʼob u Tʼaan. Jesuseʼ tu yaʼaleʼ kʼaʼabéet u yáantaʼal máak u naʼat baʼaxoʼob tu kaʼansaj. Baʼaleʼ ¿bix kun áantbiloʼob? Jesuseʼ tu yaʼalaj: «Le kiliʼich muukʼ ken u túuxt le Taata tin kʼaabaʼoʼ, letiʼ kun kaʼansikteʼex tuláakal baʼal yéetel letiʼ kun beetik u kʼaʼajalteʼex tuláakal le baʼaxoʼob tsʼoʼok in waʼalikteʼexoʼ» (Juan 14:26). Bey túunoʼ Dios tsʼáaik u kiliʼich muukʼ utiaʼal ka u naʼat máak baʼax ku yaʼalik le Bibliaoʼ. Chéen baʼaleʼ le máaxoʼob maʼ tu creertikoʼob wa jeʼel u yáantaʼaloʼob tumen Dioseʼ, maʼ tu kʼamkoʼob le kiliʼich muukʼoʼ, le oʼolal ku talamtal u naʼatkoʼob le Bibliaoʼ. Le kiliʼich muukʼoʼ jeʼel u péeksik xan le máakoʼob tsʼoʼok u naʼatkoʼob le Biblia utiaʼal ka xiʼik u yáantoʼob le máaxoʼob taak u maas kaanbaloʼoboʼ (Baʼaxoʼob [Hechos] 8:26-35).

3. Jujunpʼéel jaatsoʼob tiʼ le Bibliaoʼ chéen jeʼel k-naʼatik ken kʼuchuk u kʼiinileʼ. Jeʼex profeta Danieleʼ aʼalaʼabtiʼ ka u tsʼíibt junpʼéel baʼal utiaʼal le kʼiinoʼob kun taaloʼoboʼ. Juntúul ángel aʼaltiʼ: «Techeʼ Daniel mukult le baʼaloʼobaʼ yéetel tsʼáalkʼabt le juʼunaʼ tak tu tsʼook kʼiin». Desde úuchjeakileʼ yaʼab máakoʼob xok u libroil Daniel, baʼaleʼ maʼ páajchaj u naʼatkoʼobiʼ. U jaajileʼ mix Daniel naʼat tuláakal le baʼax tu tsʼíibtoʼ, le oʼolal tu yaʼalaj yéetel kabal óolal: «Tin wuʼuyaj baʼax tu yaʼalaj baʼaleʼ maʼ tin naʼataj mix baʼaliʼ». Ken máanak kʼiineʼ yaniliʼ u naʼataʼal tubeel le profecíaaʼ, baʼaleʼ Dios kun yéeyik baʼax kʼiin. Bey tu tsolil le angeloʼ: «Xíimbalnen Daniel, tumen le baʼaloʼobaʼ u najmal a taʼakbesikoʼob tak ken kʼuchuk u súutukil». ¿Máaxoʼob kun naʼatik le profecíaaʼ? «Le j-loolob máakoʼoboʼ [...] maʼ tu páajtal u naʼatkoʼob baʼaxoʼob ku yúuchul, baʼaleʼ le aj ojéelajoʼoboʼ bíin u láaj chʼaʼnuʼuktoʼob» (Daniel 12:4, 8-10). Dios túuneʼ maʼ tu yeʼesik tiʼ máak baʼax u kʼáat u yaʼal jujunpʼéel jaatsoʼob tiʼ le Biblia wa maʼ kʼuchuk u kʼiiniloʼ.

U j-jaajkunajoʼob Jéeobaeʼ, ¿yaan wa baʼax jelaʼan bix tu naʼatiloʼob tumen maʼ kʼuchuk u kʼiinil u naʼataʼaliʼ? Yaan. Baʼaleʼ ka kʼuch le kʼiin u yéeymaj Diosoʼ, tu séebaʼanil tu yutskíintoʼob bix u naʼatkoʼob. Beyoʼ tu beetkoʼob jeʼex u apostoloʼob Jesús tu kʼexaj u tuukuloʼob yéetel kabal óolal le ka eʼesaʼabtiʼob maʼ maʼalob baʼax ku creertikoʼoboʼ (Baʼaxoʼob 1:6, 7).

Jeʼex k-ojliloʼ junpuliʼ maʼ jaaj baʼax tu tuklaj le chan x-chʼúupal t-aʼalaj tu káajbal le xookaʼ. Pero le baʼax ku kaʼansik le Bibliaoʼ maʼ chéen jeʼel baʼaxakeʼ, le oʼolaleʼ maas maʼalob maʼ k-xokik t-juunal. Kaxt u yáantaj uláakʼ máakoʼob u kʼaj óoloʼob tubeel le Bibliaoʼ. Kaxt máaxoʼob xokik yéetel junpʼéel maʼalob tuukul, kabal u yóoloʼob yéetel ku kʼáatkoʼob kiliʼich muukʼ utiaʼal u naʼatkoʼob tubeel. Le máakoʼobaʼ u yojloʼob kuxaʼanoʼon teʼ kʼiinoʼob u kʼáat Dios ka k-maas naʼat baʼax u yaʼalmoʼ. Wa uts ta tʼaaneʼ, kaxt u j-jaajkunajoʼob Jéeoba wa xok le baʼaxoʼob u tsʼíibtmoʼob yoʼolal le Bibliaoʼ. Le baʼaloʼobaʼ jeʼel u páajtal a wilik ich Internet teʼ www.pr418.com/yua. Le Bibliaoʼ ku yaʼalik: «Kʼáat yéetel tuláakal a muukʼ naʼat yéetel maʼalob tuukul [...]. [Beyoʼ] ¡bíin a wojéelt xan baʼax u káat u yaʼal u kʼaj óoltaʼal [Dios]!» (Proverbios 2:3-5).