Le Bibliaoʼ maʼatech u yaʼalik wa tsʼaʼan juntúul ángel kanáantik cada máak. Juntéenjeakileʼ Jesuseʼ tu yaʼalaj: «Ilawil maʼ a taaskeʼex mix baʼalil mix juntúul tiʼ le máaxoʼob beyoʼob mejen paalaloʼobaʼ [wa u disipuloʼob Cristo], tumen kex bey mix baʼal u yilaʼaloʼobeʼ, kin waʼalikteʼexeʼ teʼ kaʼanoʼ u angeloʼobeʼ mantatsʼ ku yilkoʼob u táan u yich in Taata yaan teʼ kaʼanoʼ» (Mateo 18:10). Teʼelaʼ Jesuseʼ maʼ táan kaʼach u yaʼalik wa yaan juntúul ángel kun kanáantkoʼoniʼ, baʼaxeʼ tu yeʼeseʼ le angeloʼoboʼ jach ku tuukuloʼob tiʼ le máaxoʼob meyajtik Diosoʼ. Le máaxoʼob meyajtik Diosoʼ maʼatech u tsʼáaik u kuxtaloʼob tu táan kíimil chéen tumen ku tuklikoʼob juntúul ángel kun kanáantkoʼob.

¿U kʼáat wa tun u yaʼal maʼatech u yáantaʼal máak tumen le angeloʼoboʼ? Maʼatech (Salmo 91:11). Jeʼex Kenneth, le máax t-chʼaʼchiʼitaj teʼ yáax xookeʼ, yaan máaxoʼob creertikeʼ tsʼoʼok u yáantaʼaloʼob wa tsʼoʼok u nuʼuktaʼaloʼob tumen u ángel Dios. Toʼoneʼ maʼ tu páajtal k-aʼalik wa maʼ jaaj le baʼax tu yaʼalaj Kennethoʼ. Yaan jujuntúul u j-jaajkunajoʼob Jéeobaeʼ tsʼoʼok u tsʼáaikoʼob cuenta bix áantaʼabikoʼob tumen juntúul ángel teʼ kʼaʼaytajoʼ. Chéen baʼaleʼ tumen maʼ tu páajtal k-ilik le angeloʼoboʼ maʼ tu béeytal k-aʼalik jach bix u meyajoʼob tiʼ Dios utiaʼal u yáantkoʼob máak. Kex beyoʼ maʼ kʼaas k-tsʼáaik u graciasil tiʼ Dios tu yoʼolal wa baʼax áantajil ku tsʼáaik le angeloʼoboʼ (Colosasiloʼob 3:15; Santiago 1:17, 18).