Tu tardeil junpʼéel domingoeʼ, Kenneth yéetel Filomena, kajaʼanoʼob Curazaoeʼ, bin u tsʼáaʼob xook tiʼ juntúul koʼolel yéetel u yíicham.

Kennetheʼ ku yaʼalik: «Ka kʼuchoʼoneʼ kʼalaʼan le najoʼ yéetel minaʼan u cocheʼobiʼ. Pero chéen ka jáan taal tin tuukul in tʼanik le señora tu telefonooʼ».

Le señoraoʼ tu yaʼalaj tiʼ Kennetheʼ bijaʼan meyaj u yíicham. Chéen baʼaleʼ le ka tu yojéeltaj le señora tiaʼanoʼob tu jool u yotochoʼ jóokʼ u yaʼaltiʼob ka ookkoʼob.

Tu tsʼáajoʼob cuentaeʼ táan kaʼach u yokʼol le señoraoʼ. Chéen pʼel úuchik u tsʼoʼokol u beetik Kenneth le oración utiaʼal u káajal u xookoʼoboʼ, le ku túupʼul u yokʼol le señoraoʼ. Letiʼob túuneʼ tu kʼáatoʼob baʼax yaantiʼ.

Le koʼoleloʼ tu yaʼaleʼ u tukultmaj u kíimskuba teʼ tardeoʼ yéetel táan kaʼach u tsʼíibtik junpʼéel carta tuʼux ku despedirkuba tiʼ u yíicham. Chéen tumen tʼaʼaneʼ tu pʼataj. Letiʼeʼ tu yaʼaleʼ yaan depresión tiʼ, ka túun líiʼsaʼab u yóol yéetel baʼax ku yaʼalik le Bibliaoʼ. Yoʼolal lelaʼ maʼ tu kíimsubaiʼ.

Kennetheʼ ku yaʼalik xan: «Chéen tu yoʼolal u yáantaj Jéeoba béeychaj k-áantik le óotsil koʼolel ku muʼyajaʼ, maʼ xaaneʼ tu nuʼuktoʼon yéetel u ángel wa yéetel u espíritu santo utiaʼal k-tʼanik». *

¿Maʼalob wa úuchik u tuklik Kenneth yéetel Filomena, Dios nuʼuktoʼob yéetel u ángel wa yéetel u espíritu santo? ¿Chéen wa casualidad úuchik u tʼaʼanal le koʼoleloʼ?

U jaajileʼ maʼ k-jach ojliʼ. Chéen baʼaleʼ k-ojleʼ Dioseʼ ku nuʼuktik u angeloʼob utiaʼal u yáantkoʼob máak náatsʼal tu yiknal. Le Bibliaoʼ ku yaʼalikeʼ yéetel u yáantaj juntúul angeleʼ Dioseʼ tu nuʼuktaj Felipe tu yiknal juntúul máak etiopíail taak u kaanbal tiʼ Dios (Baʼaxoʼob [Hechos] 8:26-31).

Yaʼab religionoʼobeʼ ku kaʼanskoʼobeʼ yaan angeloʼob utstakoʼob ku beetkoʼob baʼax ku yaʼalik Dios yéetel ku kanáantkoʼob bin máak. Yaʼab máaxeʼ maʼ chéen ku creertik yaan angeloʼobiʼ baʼaxeʼ ku yaʼalikoʼobeʼ jach yaʼab bix u yáantajoʼob. Chéen baʼaleʼ yaan máakoʼob xaneʼ maʼatech u creertikoʼob wa yaan angeloʼob.

¿Jach wa yaan le angeloʼoboʼ? ¿Bix úuchik u yantaloʼob? ¿Bix jeʼel k-ojéeltik u jaajil tu yoʼolaloʼobeʼ? ¿Jeʼel wa u yáantkoʼob máakeʼ? Koʼox ilik.