¿Baʼaxten kʼaʼabéet u Reino Dios?
Tu káajbaleʼ chéen Jéeoba, le máax beetmiloʼon, ku gobernar yéetel yaabilajoʼ. Letiʼeʼ tu beetaj junpʼéel jatsʼuts lugar ku kʼaabaʼtik u jardínil Edén utiaʼal u kajtal wíinikoʼob yéetel tu tsʼáaj baʼal u jaantoʼobiʼ. Tsʼoʼoleʼ tu tsʼáaj junpʼéel jatsʼuts meyaj u beetoʼob (Génesis 1:28, 29; 2:8, 15). Wa ka seguernak u gobernarkoʼon Dios kaʼacheʼ bejlaʼa yaan kiʼimak óolal tiʼ tuláakal máakeʼ.
Adán yéetel Evaeʼ tu tsʼáajubaʼob tu contra u gobernación Dios
Le Bibliaoʼ ku yaʼalikeʼ Satanás, juntúul ángel tu tsʼáajuba tu contra Dioseʼ, tu yaʼaleʼ maʼ maʼalob bix u gobernar Diosiʼ. Tu tsʼáaj naʼatbileʼ maas jeʼel u yantal kiʼimak óolal tiʼ wíinik wa maʼ u gobernartaʼal tumen Dioseʼ. Adán yéetel Evaeʼ tu yuʼuboʼob u tʼaan Satanás (Génesis 3:1-6; Apocalipsis 12:9).
Letiʼobeʼ tu tsʼáajubaʼob tu contra Dios le oʼolal jóoʼsaʼaboʼob teʼ Paraísooʼ yéetel aʼalaʼabtiʼob yaan u kíimloʼob (Génesis 3:17-19). Le baʼax úuchaʼ tu beetaj u muʼyaj tak le paalaloʼob anchajtiʼoboʼ. Le Bibliaoʼ ku yaʼalikeʼ tu yoʼolal Adáneʼ ‹ook le kʼeban way yóokʼol kaabeʼ, yéetel tu yoʼolal le kʼebanoʼ ook le kíimiloʼ› (Romanos 5:12). Tsʼoʼoleʼ úuchik u kʼebantaloʼobeʼ káaj u yúuchul le baʼax ku yaʼalik le Bibliaaʼ: «Máakeʼ mantatsʼ ku pechʼ óoltik u yéet máakil utiaʼal u beetik kʼaas tiʼ» (Eclesiastés 8:9). Lelaʼ u kʼáat u yaʼaleʼ yaʼab problemaʼob ku taasik u gobernarkuba máak tu juunal.
KU KÁAJAL U GOBERNARKUBAʼOB TU JUUNALOʼOB
Nemrodeʼ tu tsʼáajuba tu contra Jéeoba
Le Bibliaoʼ ku yaʼalikeʼ Nemrod, le yáax máak gobernarnajoʼ, tu tsʼáajuba tu contra u gobernación Dios. Desde leloʼ u maas yaʼabil le máakoʼob ku gobernaroʼoboʼ ku píitmáan u autoridadoʼob. Yoʼolal leloʼ Rey Salomón, kuxlaj walajki tres mil añosaʼ, tu yaʼalaj: «Tin wilaj bix u yáalal u jaʼil u yich le máaxoʼob ku pechʼ óoltaʼaloʼoboʼ, pero minaʼan kaʼach mix máak líiʼsik u yóoloʼoboʼ. Tin wilaj bix u pechʼ óoltaʼaloʼob tumen le máaxoʼob yaan páajtalil tiʼoboʼ» (Eclesiastés 4:1).
Teʼ kʼiinoʼobaʼ láayliʼ bey u gobernar le máakoʼoboʼ. Tu añoil 2009, le Naciones Unidasoʼ tu yaʼaleʼ sáamsamaleʼ táan u maas yaʼabtal máaxoʼob tuklik le bix u gobernar le máakoʼoboʼ «letiʼe baʼax taasik problemaʼob tiʼ wíinikoʼ».
KʼAʼABÉET JUNPʼÉEL MAʼALOB GOBIERNO
Bejlaʼeʼ tuláakal máak ku tsʼáaik cuenta kʼaʼabéet junpʼéel maʼalob gobierno. Lelaʼ letiʼe baʼax ku yaʼalik u tsʼáaik Diosoʼ.
Le gobiernoʼoboʼ maʼ béeychajak u yutskíintikoʼob le problemaʼoboʼ
Letiʼeʼ tsʼoʼok u tsʼáaik junpʼéel Reino wa gobierno utiaʼal u jeelintik u gobierno wíinik tsʼoʼoleʼ «chéen letiʼ kun pʼáatal utiaʼal mantatsʼ» (Daniel 2:44). Lelaʼ letiʼe Reino táan u kʼáataʼal tumen yaʼab máakoʼob tu oraciónil le Padrenuestrooʼ (Mateo 6:9, 10). Baʼaleʼ maʼ Dios ken u beet u Reyiliʼ, baʼaxeʼ tsʼoʼok u yéeyik juntúul máax kuxlaj bey wíinik way Luʼumeʼ. ¿Máax ta tʼaaniʼ?
Maʼ xaaneʼ jeʼel u yutstal xan ta wicheʼ
BAʼALOʼOB KU NÚUKAʼAL TEʼ BIBLIAOʼ
¿Bix kun antal jeetsʼelil way Luʼumeʼ?
Le Bibliaoʼ ku yaʼalikeʼ u Reino Dioseʼ yaan u taasik jeetsʼelil way Luʼumeʼ.
BAʼALOʼOB KU NÚUKAʼAL TEʼ BIBLIAOʼ
¿Tu puksiʼikʼal máak wa yaan u Reino Dios?
¿Baʼaxten yaan bibliaʼobeʼ bey u traducirkoʼob le baʼax ku yaʼalik Lucas 17:21: «U Reino Dioseʼ tiaʼan ichileʼexeʼ»?
