Yanaktech kiʼimak óolal teʼ kʼiinoʼobaʼ
¡CHÉEN tukult bix kun kuxtal máak kéen xuʼulsaʼak le kʼojaʼaniloʼ, le chʼíijiloʼ yéetel le kíimiloʼ! Techeʼ jeʼel u páajtal a wilik le jatsʼuts kuxtalaʼ. Chéen baʼaleʼ teʼ kʼiinoʼobaʼ láayliʼ yaan baʼaxoʼob beetik k-muʼyajeʼ, le oʼolaleʼ ¿baʼax jeʼel u taasiktoʼon kiʼimak óolaleʼ? Le Bibliaoʼ ku tsʼáaiktoʼon maʼalob tsolnuʼukoʼob. Koʼox ilik bix jeʼel u yáantkoʼon k-aktáant le baʼaxoʼob ku yúuchul teʼ kʼiinoʼobaʼ.
KIʼIMAKCHAJAK A WÓOL YÉETEL BAʼAXOʼOB YAANTECH
Le Bibliaoʼ ku yaʼalik: «Le bix a kuxtaleʼexoʼ ka u yeʼes maʼ a yaabiltmeʼex le taakʼinoʼ, yéetel kiʼimakchajak a wóoleʼex yéetel le baʼaxoʼob yaanteʼexoʼ» (Hebreoʼob 13:5).
Bejlaʼeʼ yaʼab baʼaloʼob ku koʼonol utiaʼal u maas maʼalobtal u kuxtal máak yéetel ku yeʼesaʼal bey jach kʼaʼabéetoʼobeʼ. Chéen baʼaleʼ le Bibliaoʼ ku yaʼaliktoʼon ka kiʼimakchajak k-óol yéetel le baʼaxoʼob yaantoʼonoʼ. ¿Baʼax jeʼel u yáantkoʼoneʼ?
Maʼ a yaabiltikeʼex le taakʼinoʼ. Le máaxoʼob u yaabiltmoʼob le taakʼinoʼ maʼatech u kanáantik u toj óolaloʼob, u láakʼtsiloʼob, máaxoʼob yéetel ku biskubaʼob, tsʼoʼoleʼ ku beetkoʼob baʼaloʼob kʼaastak (1 Timoteo 6:10). ¡Jach túun kʼaas bix kuxlik le máakoʼobaʼ! Tsʼoʼoleʼ le máax u yaabiltmaj le taakʼinoʼ ‹mix bikʼin ken u yaʼal wa tsʼoʼok u sen yantal taakʼin tiʼ› (Eclesiastés 5:10).
Kʼaʼajaktech maas koʼoj u tojol máak. Kex yaʼab baʼaloʼob túumbentak jach ku yáantkoʼob máakeʼ, le baʼaloʼobaʼ maʼ tu páajtal u yeʼeskoʼob yaabilaj mix u yáantkoʼob máak wa lubaʼan u yóol. Chéen le amigoʼob jeʼel u yáantkoʼon utiaʼal ka yanaktoʼon kiʼimak óolaloʼ (Proverbios 17:17).
WA K-BEETIK BAʼAX KU YAʼALIK LE BIBLIAOʼ YAAN U KIʼIMAKTAL K-ÓOL
WA KʼOJAʼANECH
Le Bibliaoʼ ku yaʼalik: ‹Puksiʼikʼal kiʼimak u yóoleʼ, maʼalob tsʼaak› (Proverbios 17:22).
Le kiʼimak óolaloʼ bey junpʼéel tsʼaak jeʼel u yáantik máak u yuʼububa maʼalobileʼ. ¿Baʼax jeʼel u beetik u kiʼimaktal k-óol teʼ súutukoʼob táan k-muʼyajoʼ?
Tuukulnen tiʼ baʼax maʼalob. Le Bibliaoʼ ku yaʼalikeʼ «minaʼan kʼiin uts utiaʼal» le máaxoʼob chéen ku tuukuloʼob tiʼ le baʼaloʼob maʼ maʼalobtak ku yúuchultiʼoboʼ (Proverbios 15:15). Le oʼolaleʼ ku yaʼalik: «Tsʼáaʼex xan u graciasil tuláakal baʼal» (Colosasiloʼob 3:15). Unaj u suuktal k-tsʼáaik u graciasil yoʼolal le baʼaxoʼob maʼalobtak ku yúuchultoʼon sáamsamaloʼ. Tuukulnen tiʼ baʼaloʼob jeʼel u beetkoʼob u kiʼimaktal a wóoleʼ, jeʼex u tʼúubul Kʼiin, u saltikoʼon le iikʼoʼ wa u cheʼej juntúul máax k-yaabiltmaj.
A wáantik u maasil. Kex kʼojaʼanecheʼ maʼ u tuʼubultech «maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Baʼaxoʼob [Hechos] 20:35). Kéen tsʼaʼabaktoʼon u diosboʼotikil yoʼolal wa baʼaxeʼ, ku kiʼimaktal k-óol, ku tuʼubultoʼon baʼax k-muʼyajtik yéetel ku beetik k-uʼuyikba maʼalobil.
MAʼ U XUʼULUL A WEʼESKEʼEX YAABILAJ
Le Bibliaoʼ ku yaʼalik: ‹Ileʼex máakalmáak le baʼaloʼob maas kʼaʼanaʼantakoʼ› (Filiposiloʼob 1:10).
Le máaxoʼob tsʼokaʼan u beeloʼoboʼ unaj u jóoʼskoʼob tiempo utiaʼal u múul tsikbaloʼob, wa maʼ tu beetkoʼobeʼ jeʼel u xuʼulul u biskubaʼob tubeeleʼ. Tsʼoʼoleʼ unaj u yilkoʼob bey junpʼéel baʼal jach kʼaʼanaʼan le tsʼokaʼanil u beeloʼoboʼ.
Ilawil a múul beetkeʼex wa baʼax. Le Bibliaoʼ ku yaʼalikeʼ «kaʼatúuleʼ [maas] maʼalob tiʼ chéen juntúul» (Eclesiastés 4:9). Tu lugar a beetik chéen baʼax uts ta tʼaaneʼ, tukleʼex bey baʼax jeʼel u páajtal a múul beetkeʼexeʼ, jeʼex a múul beetkeʼex janal, a múul bineʼex xíimbal, a wukʼikeʼex café wa uláakʼ baʼax uts ta tʼaaneʼex.
Eʼeseʼex yaabilaj. Le Bibliaoʼ ku yaʼalikeʼ le íichamtsil yéetel le atantsiloʼ unaj u paklan yaabiltikubaʼob yéetel u tratarkubaʼob tubeel (Efesoiloʼob 5:28, 33). Ichil lelaʼ táakaʼan u paktikubaʼob yéetel yaabilaj, u paklan eʼesik u yaabilajoʼob wa u paklan síikoʼob wa baʼax ichiloʼob. Tsʼoʼoleʼ unaj u kʼaʼajskoʼobeʼ maʼ uts u tusik u núup yéetel yaanal máakiʼ (Hebreoʼob 13:4).