Diana, le máax tsʼoʼok k-yáax tʼaan tiʼeʼ, joʼopʼ u maas ukʼik ikil u tuukul tiʼ u problemaʼob. Le Bibliaoʼ maʼ tu yaʼalik wa kʼaas u yukʼik máak junpʼíit cerveza wa uláakʼ baʼax beyoʼ. Baʼaleʼ ku yaʼalik: «Maʼ a nupikaba yéetel le kalaʼanoʼoboʼ» (Proverbios 23:20). U káaltal máakeʼ jeʼel u beetik u kʼojaʼantaleʼ, u pʼatik u núup, tsʼoʼoleʼ cada añoeʼ u millonesil máakoʼob ku kíimloʼob yoʼolal lelaʼ. Wa le máakoʼob ka u beetoʼob kaʼach le baʼax ku yaʼalik le Bibliaoʼ, bejlaʼa maʼ tu sen muʼyajoʼobeʼ.

Lelaʼ bey tu beetil Diana. Letiʼeʼ ku yaʼalik: «Tin tsʼáaj cuentaeʼ le in sen ukʼikoʼ maʼ tu yáantken utiaʼal u xuʼulul in tuukul. Teneʼ tin beetaj baʼax ku yaʼalik Filiposiloʼob 4:6 yéetel 7, teʼeloʼ ku yaʼalik: ‹Maʼ a sen chiʼichnaktaleʼex tu yoʼolal mix baʼal, baʼaxeʼ [...] aʼaleʼex tiʼ Dios baʼax a kʼáateʼex›. Cada áakʼabeʼ, le táan in sen tuukuloʼ, kin orar tiʼ Jéeoba yéetel kin waʼaliktiʼ bix in wuʼuyikinba utiaʼal u yáantken maʼ in jach kʼuuxil, in muʼyaj yéetel maʼ in chiʼichnaktal. Kin kʼáatik xan tiʼ ka u tsʼáaten u tuukulil in beetik baʼax maʼalob. Kéen sáasakeʼ kin wilik maʼ in tuukul tiʼ le baʼaxoʼob maʼ maʼalob ku yúuchultenoʼ. In orar tiʼ Jéeobaeʼ tu yáanten tuukul tiʼ baʼax yaanten, maʼ tiʼ le baʼaxoʼob ku bineltiktenoʼ. Tin chʼaʼtuklaj u xuʼulul in káaltal. Bejlaʼeʼ maas kiʼimak in wóol yéetel bix in kuxtal tsʼoʼoleʼ in kʼáat ka seguernak beyoʼ».

Le núupkʼebanoʼ jach ku beetik u muʼyaj máak. Le Bibliaoʼ jeʼel u yáantkoʼon utiaʼal maʼ k-lúubul tiʼ le baʼax jach kʼaasaʼ. Ku yaʼalikeʼ maʼ maʼalob ka coquetearnak máakiʼ mix ka u chaʼant pornografíaiʼ. Juntúul xiʼipal ku kʼaabaʼtik Samueleʼ, ku yaʼalik: «Jach chéen chʼaʼabil u coquetear máak... yaan kʼiineʼ kex maʼ uts tin wich wa máaxeʼ, wa kin wilik jatsʼuts u yilkeneʼ, kin coquetear tu yéetel, kin wilik chéen bey junpʼéel báaxaleʼ». Ka máan kʼiineʼ joʼopʼ u yaʼalaʼaleʼ Samueleʼ jach coqueto, kex yaan kʼiineʼ maʼ le ku beetkiʼ. Yoʼolal lelaʼ tu chʼaʼtuklaj u beetik túun jach tu jaajil. Chéen baʼaleʼ lelaʼ ku beetik kaʼach u chiʼichnaktal. Bejlaʼeʼ ku yaʼalik: «Jach maʼ uts u coquetear máakiʼ tumen ku pʼáatal chéen u yutsil máak ku kaxtik».

Samueleʼ tu xakʼaltaj junpʼéel xook ku tʼaan tiʼ le táankelmoʼob yaan teʼ sitio jw.org. Tuukulnaj xan tiʼ Proverbios 20:11, tuʼux ku yaʼalik: «Yéetel baʼaxoʼob ku beetik juntúul táankelem wíinikeʼ ku yojéeltaʼal wa toj u kuxtal». ¿Bix áantaʼabik tumen lelaʼ? Samueleʼ tu tsʼáaj cuenta maʼ uts u coqueteariʼ. Letiʼeʼ ku yaʼalik: «Tin tsʼáaj cuentaeʼ juntúul máax beetik lelaʼ maʼ ken u beetuba juntúul maʼalob íichamtsil. Tin tuklaj xaneʼ wa bejlaʼa tsʼokaʼan in beeleʼ, baʼax ken u tukult in watan wa ka u yil táan in coquetear yéetel uláakʼ koʼolel. Leloʼ tu beetaj in wilik maʼ maʼalob le baʼax kin beetkoʼ. Maʼ tumen tuláakal máax beetkeʼ, u kʼáat u yaʼal maʼ kʼaasiʼ». Samueleʼ xuʼul u coquetear, lelaʼ le áant utiaʼal maʼ u núupkʼebantal.

Antonioeʼ, jach suuk u chaʼantik kaʼach pornografía. Kex jach u yaabiltmaj u yataneʼ cada táan u lúubul kaʼach tiʼ le kʼaakʼas vicioaʼ. Letiʼeʼ ku yaʼalikeʼ jach áantaʼab tumen 1 Pedro 5:8, tuʼux ku yaʼalik: «Ilawileʼex maʼ u náayal a wóoleʼex yéetel pʼil a wicheʼex. A enemigoʼex le Kʼaasilbaʼaloʼ, táan u máan ta baʼpacheʼex bey jeʼex juntúul león ku yáakam táan u kaxtik máax u lukʼeʼ». Antonioeʼ ku yaʼalik:«Tuláakal tuʼux jeʼel u yilaʼal pornografíaeʼ, le baʼaloʼob beyaʼ jeʼel u pʼáatal tu tuukul máakeʼ. Le tekstooʼ tu yáanten in wil máax beetik in tsʼíiboltik le baʼaloʼob beyoʼ. Anchaj in kanik in tsʼáa tin tuukul tiʼ Satanás u taal le baʼaloʼobaʼ. Bejlaʼeʼ in wojel chéen Jéeoba jeʼel u yáantken utiaʼal in beetik baʼax maʼalobeʼ, in kanáant baʼax kin tuklik, in kanáant in puksiʼikʼal yéetel maʼ in beetik u muʼyaj in watan». Antonioeʼ anchaj u yáantaʼal utiaʼal u pʼatik le baʼax suuk u beetkaʼ. Lelaʼ le áant náachtal tiʼ uláakʼ problemaʼob.

Jeʼex tsʼoʼok k-ilkoʼ le Bibliaoʼ ku tsʼáaik maʼalob tsolnuʼukoʼob utiaʼal maʼ k-oksikba tiʼ uláakʼ problemaʼob. Baʼaleʼ, ¿kux túun wa ku káajal u maas nojochtal junpʼéel problema yéetel maʼ t-kaxtik bix jeʼel k-utskíintikeʼ? Koʼox ilik bix jeʼel u yáantkoʼon u Tʼaan Dios wa ka úuchuk lelaʼ.