Le astrologíaoʼ ku kaʼansikeʼ le estrellaʼob, le Luna yéetel le planetaʼoboʼ yaan baʼax u yil yéetel u kuxtal máak. Le astrólogoʼoboʼ ku yaʼalikoʼobeʼ le bix yanik le estrellaʼob, le Luna yéetel le planetaʼob kéen síijik juntúul chaambaloʼ yaan baʼax yil yéetel u modos bey xan tiʼ bix kun bin tiʼ.

Kex le astrología káaj tu kʼiinil le babilonioʼoboʼ, teʼ kʼiinoʼobaʼ láayliʼ yaʼab máax creerkeʼ. Tu añoil 2012, beetaʼab junpʼéel encuesta tu luʼumil Estados Unidos. Teʼeloʼ ilaʼabeʼ juntúul tiʼ cada óoxtúul máakeʼ ku creerkeʼ le astrologíaoʼ wéej comprobado yéetel uláakʼoʼobeʼ ku yaʼalikoʼob jach comprobado. Baʼaleʼ ¿jach jaaj wa le baʼax ku yaʼalikoʼobaʼ? Maʼatech. Koʼox ilik baʼaxten.

• Le estrellaʼob yéetel le planetaʼoboʼ minaʼan mix baʼal u yiloʼob yéetel u kuxtal máak jeʼex u tuklik le astrólogoʼoboʼ.

• Le baʼaxoʼob ku yaʼalikoʼob kun úuchloʼ jeʼel u yúuchul tiʼ jeʼel máaxeʼ.

• Utiaʼal u yaʼalikoʼob baʼax kun úuchleʼ, le astrólogoʼoboʼ ku chʼaʼikoʼob en cuenta junpʼéel úuchben kaʼansaj ku yaʼalikeʼ le planetaʼoboʼ tu paach le Luʼum ku suutoʼoboʼ. Chéen baʼaleʼ tsʼoʼok u yilaʼal maʼ beyiʼiʼ.

• Cada astrólogoeʼ jejeláas baʼax ku yaʼalik kun úuchul tiʼ juntúuliliʼ máak.

• Le astrólogoʼoboʼ ku yaʼalikoʼobeʼ yaan 12 símboloʼob. Según bin baʼax mes ku síijil máakeʼ yaan junpʼéel u símbolo jeʼex u chíikpajal teʼ horóscopooʼ (signo del Zodiaco). Baʼaleʼ le bix u péek le Luʼumaʼ tsʼoʼok u kʼexpajal le oʼolaleʼ le fechaʼob tsʼaʼan tiʼ le 12 símboloʼobaʼ tsʼoʼok u pʼáatal maʼ igual yanik jeʼex ka tsʼaʼab le kʼaabaʼ tiʼoboʼ.

Ku yaʼalaʼaleʼ cada signo tiʼ le Zodiacooʼ ku yeʼesik bix juntúul máak. Baʼaleʼ kex tiʼ junpʼéeliliʼ kʼiin ku síijil yaʼab máakoʼobeʼ, maʼ junpʼéeliliʼ bix u modosoʼobiʼ. Le kʼiin ku síijil máakoʼ mix baʼal yaan yil yéetel le modos ken u yeʼes kéen nojochchajkoʼ. Tu lugar u yilkoʼob bix u modos juntúul máakeʼ, le astrólogoʼoboʼ chéen ku juzgarkoʼob máak yoʼolal le kʼiin síijoʼ. ¿Máasaʼ kʼaas u juzgarkoʼob máak sin ke u kʼaj óoltikoʼob?

Desde úuchjeakil ku bin le máakoʼob utiaʼal ka jóoʼsaʼak u suerteʼoboʼ. Le máaxoʼob beetik kaʼach le meyajaʼ yaan horaeʼ ku kíimskoʼob máakoʼob wa baʼalcheʼob utiaʼal u xokikoʼob u choochel, beyoʼ ku yilkoʼob bin baʼax ku taal u kʼiin. Yaan hora xaneʼ utiaʼal u yaʼalikoʼob lelaʼ chéen ku yilkoʼob bix u luukʼ juntúul tʼeel. Yanoʼob xaneʼ ku yilkoʼob baʼax ku taal u kʼiin chéen ikil u yilkoʼob baʼax dibujoil ku formartik le xiix ku pʼáatal kéen u yukʼoʼob té wa caféoʼ. Bejlaʼeʼ ku meyaj uláakʼ baʼaloʼob jeʼex barajas, bola de cristal bey xan le dadosoʼ. ¿Jeʼel wa u páajtal u confiar máak tiʼ le baʼaloʼobaʼ? Maʼ. Koʼox ilik baʼaxten.

Yáaxeʼ le máaxoʼob ku jóoʼskoʼob suerteoʼ maʼ junpʼéeliliʼ baʼax ku yaʼalikoʼob tiʼ máakiʼ. Kex wa ku meyajtiʼob jejeláas baʼaloʼob utiaʼal u jóoʼskoʼob suerte bey xan wa junpʼéeliliʼeʼ, jejeláas baʼax ku yaʼalikoʼob. Jeʼex wa juntúul máak ku bin u jóoʼs u suerte tu yiknal kaʼatúul j-meenoʼob yéetel ku meyajtiʼob barajaseʼ, ku páaʼtaʼal ka u yaʼaloʼob junpʼéeliliʼ baʼal tu kaʼatúulaloʼob, baʼaleʼ maʼ bey u yúuchliʼ.

Jejeláas baʼaxoʼob ku yaʼalaʼal yoʼolal bix u meyaj le máakoʼobaʼ. Yaan máaxoʼob aʼalikeʼ le máaxoʼob ku jóoʼsaj suerteoʼ chéen yoʼolal baʼax ku yaʼalik máakeʼ ku chuchuk naʼatkoʼob bey baʼax ken u yaʼaloʼobtiʼeʼ, tsʼoʼoleʼ ku yaʼalaʼal xaneʼ le barajas yéetel le bola de cristaloʼ chéen adornoʼob. Jujuntúul tiʼ le máaxoʼob ku jóoʼskoʼob suerte jach kaanbalnajaʼanoʼoboʼ yaʼab baʼaloʼob ku kʼáatkoʼob tiʼ máak. Tsʼoʼoleʼ jach ku chʼenxikintikoʼob baʼax ku núukik yéetel bix u núukik. Sin ke u tsʼáaik cuenta máak túuneʼ chéen ku kaʼa aʼalikoʼob le baʼax tu núukaj máakoʼ yéetel ku beetkoʼob bey letiʼob naʼateʼ. Kéen creertaʼaktiʼobeʼ u kʼáat u yaʼaleʼ yaan u náajaltikoʼob yaʼab taakʼin.

Le astrología yéetel le u jóoʼsik u suerte máakoʼ ku beetaʼal tumen ku creertaʼal tsʼíibtaʼan baʼaxoʼob kun úuchul. Baʼaleʼ ¿jaaj wa lelaʼ? Le Bibliaoʼ ku yaʼalikeʼ cada máak unaj u chʼaʼtuklik baʼax ken u creert yéetel baʼax ken u beete, baʼaleʼ ku yaʼalik xaneʼ le bix kun bin tiʼ máakoʼ yaan yil yéetel baʼax ku yéeyik u beete (Josué 24:15).

Le máaxoʼob u kʼáat u beetoʼob baʼax ku yaʼalik Diosoʼ maʼatech u creerkoʼob le astrologíaoʼ mix le u jóoʼsaʼal suerteoʼ tumen Dioseʼ u pʼekmaj le baʼaloʼobaʼ. Le Bibliaoʼ ku yaʼalik: «Ichileʼexeʼ maʼ unaj u yantal [...] mix juntúul j-meen, mix máak ka u pulyaʼajt máak, mix juntúul máak ku yaʼalik ku tʼaan yéetel le kimenoʼoboʼ, mix máak ka u kaxt u yáantaj juntúul j-meen yéetel mix máak ka u kʼáat u yáantaj le kimenoʼoboʼ. Tumen Jéeobaeʼ a u pʼekmaj jeʼel máaxak ka u beet le baʼaloʼobaʼ» (Deuteronomio 18:10-12).