Le baʼaxoʼob ken u beet u Reino Diosoʼ táan u kaʼansaʼal tuláakal tuʼux jeʼex u yaʼalmil Jesús kun beetbiloʼ (Mateo 24:14). U libroil Danieleʼ ku yaʼalikeʼ le Reinoaʼ, u gobierno Dios. Le capítulo 2, ku tʼaan tiʼ jejeláas reinoʼob tsʼoʼok u yantal desde le úuchben Babiloniaoʼ tak teʼ kʼiinoʼobaʼ. Le versículo 44, ku yaʼalik baʼax kun úuchul kéen tsʼoʼokok:

«U Diosil le kaʼanoʼ yaan u tsʼáaik junpʼéel reino mix bikʼin kun xuʼulsbiltiʼ. Le reinoaʼ mix bikʼin kun máan tu kʼab uláakʼ kaaj. Baʼaxeʼ yaan u xiixkúuntik yéetel yaan u xuʼulsik tiʼ tuláakal le reinoʼobaʼ».

Jeʼex le profecíaaʼ yaan uláakʼoʼob ku yaʼalikoʼobeʼ u Reino Dios kun xuʼulsik u gobierno wíinik yéetel yaan u beetik u bin maʼalobil tiʼ. ¿Bix kun kuxtal máak yáanal le Reinoaʼ? Koʼox ilik jujunpʼéel tiʼ le baʼaloʼob jatsʼutstak ken u beetoʼ.

• MAʼ KUN ANTAL GUERRAʼOB

  Salmo 46:9: «[Dioseʼ] ku beetik u xuʼulul u yantal baʼateʼel tiʼ tuláakal yóokʼol kaab. Ku kaʼakachik le arcooʼ bey xan le lanzaoʼ, yéetel ku tóokik u carroiloʼob baʼateʼel».

  Wa ka meyajnak le taakʼin yéetel le naʼat yaan tiʼ le máakoʼob utiaʼal u yáantkoʼob u maasil tu lugar u beetkoʼob tsʼoonoʼoboʼ, ¿bix jeʼel u pʼáatal le yóokʼol kaabaʼ? Dioseʼ u yaʼalmeʼ yáanal u Reinoeʼ yaan u xuʼulul le guerraʼoboʼ.

• MIX MÁAK KUN KʼOJAʼANTAL

  Isaías 33:24: «Mix juntúul u kajnáalil le luʼum ken u yaʼal: ‹Kʼojaʼanen›».

  Tukult bix jeʼel u pʼáatal máak wa ka xuʼuluk le kʼojaʼaniloʼob ku yantal tu puksiʼikʼal máakoʼ, le cánceroʼ, le diabetesoʼ yéetel uláakʼ kʼojaʼaniloʼob. Wa ka xuʼulsaʼakoʼobeʼ maʼ kun antal hospitaloʼob mix tsʼaakoʼob. Dioseʼ yaan u xuʼulsik le kʼojaʼaniloʼoboʼ.

• MIX MÁAK KEN U MUʼYAJT WIʼIJIL

  Salmo 72:16: «Yaan u sen tsʼáaik u yich le luʼumoʼ, tak tu maas kaʼanlil le montañaʼoboʼ, yaan u pʼáatal jeʼex u luʼumil Líbanoeʼ. U kajnáaliloʼob le kaajoʼoboʼ yaan u yaʼabtaloʼob jeʼex u yaʼabtal le xíiwoʼob teʼ luʼumoʼ».

  Le luʼumaʼ yaan u tsʼáaik u yich yéetel yaan u yantal janal. Mix máak ken u muʼyajt wiʼijil, mix kun kʼojaʼantal tumen maʼ chúukaʼan u janaliʼ.

• MIX MÁAK KUN MUʼYAJ MIX KUN KÍIMIL

  Apocalipsis 21:4: «[Dioseʼ] yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj. Le baʼaloʼob suuk u yúuchul kaʼachoʼ tsʼoʼok u máanoʼob».

   Le máakoʼoboʼ yaan u pʼáatal minaʼan u kʼebanoʼob yéetel yaan u kuxtaloʼob mantatsʼ tiʼ junpʼéel Paraíso way Luʼumeʼ. Lelaʼ letiʼe baʼax u prometermaj Jéeoba, le Máax beetmiloʼon yéetel u yaabiltmoʼonoʼ.

¿Jach wa tu jaajil yaan u béeytal le baʼaloʼobaʼ? Kex yaʼab máakoʼob jatsʼuts u yuʼubikoʼob bix le kuxtal ku yaʼalik Dios u tsʼáaikoʼ, yaʼabeʼ maʼatech u creerkoʼob wa yaan u kuxtal máak utiaʼal mantatsʼ tumen mix máak kuxlak beyaʼ.

Toʼoneʼ úuch pʼáatak kʼebanoʼon yéetel tsʼoʼok u suuktal k-ilik u kíimil máak le oʼolal yaʼab máak tuklikeʼ deporsi yaan k-muʼyaj. Baʼaleʼ maʼ letiʼe baʼax u kʼáat kaʼach Dios ka úuchkoʼ.

Utiaʼal u béeytal k-creertik le baʼax ku prometerkoʼ, Dioseʼ ku yaʼalik: «Le tʼaan ku jóokʼol tin chiʼoʼ, maʼ kun kaʼa suut tin wiknal sin ke u béeytal. Tuláakal baʼaleʼ yaan u yúuchul jach jeʼex in waʼalmiloʼ, le baʼaxoʼob kin waʼalikoʼ seguro yaan u béeytaloʼob» (Isaías 55:11).

Le Bibliaoʼ ku yaʼalikeʼ Jéeobaeʼ juntúul Dios «maʼ tu páajtal u tuus» (Tito 1:2). Tuláakal le jatsʼuts promesaʼob tsʼoʼok k-ilkaʼ letiʼ aʼalmil, le oʼolal maʼalob ka k-tukle: «¿Jach wa tu jaajil jeʼel u páajtal k-kuxtal minaʼan u xuul tiʼ junpʼéel Paraíso way Luʼumeʼ? ¿Baʼax unaj k-beetik utiaʼal k-ilik le baʼax ku yaʼalik Diosaʼ?». Le xookoʼob ku segueroʼoboʼ ku tsolkoʼob lelaʼ.