¿JACH WA TU JAAJIL TEECH YÉEYIK BIX KUN BINTECH? Yaan máaxeʼ ku tuklikeʼ desde kéen síijik máakeʼ destinartaʼan. Uláakʼoʼobeʼ ku yaʼalikoʼobeʼ Dios controlarkoʼon. Le oʼolal kéen u yiloʼob maʼ tu béeytal u beetkoʼob wa baʼaxeʼ ku yaʼalikoʼob: «Deporsi u destino».

Yanoʼobeʼ ku lúubul u yóoloʼob kéen u yiloʼob bix u beetaʼal baʼax kʼaas wa bix u beetaʼal u muʼyaj u maasil. Maʼ xaaneʼ taak u maas maʼalobkíintik u kuxtaloʼob baʼaleʼ kex ka u tsʼáa u yóoloʼobeʼ maʼ tu páajtal tumen jach yaan guerraʼob, ookolil, kʼojaʼaniloʼob wa nukuch loobiloʼob. Kéen u yiloʼob le baʼaxoʼob ku yúuchloʼ ku yaʼalikoʼob mix baʼal u biilal u yóotik máak u yutskíint baʼax ku yúuchul.

Le baʼaxoʼob ku jáan úuchloʼoboʼ jeʼel u beetkoʼob u kʼexpajal le baʼaxoʼob k-chʼaʼtukultmaj k-beetkoʼ (Eclesiastés 9:11). Baʼaleʼ cada juntúul tiʼ toʼon jeʼel u páajtal u yéeyik baʼax kun úuchul yéetel u kuxtaleʼ. Le Bibliaoʼ ku yaʼalikeʼ toʼon k-chʼaʼtuklik bix kun bintoʼon tu paach kʼiin. ¿Baʼaxten k-aʼalik leloʼ?

Le jach taʼaytak u yokol le israelitaʼob teʼ luʼum aʼalaʼan u tsʼaʼabaltiʼoboʼ, Jéeobaeʼ tu túuxtaj Moisés u yaʼaltiʼob: «Táan in tsʼáaik ta táaneʼex utiaʼal ka a yéeyeʼex le kuxtal wa le kíimiloʼ, a bendecirtaʼaleʼex wa a maldecirtaʼaleʼex. Teʼex túuneʼ unaj a yéeyikeʼex le kuxtal utiaʼal ka kuxlakeʼex bey xan utiaʼal ka kuxlak a paalaleʼexoʼ. Yaabilteʼex Jéeoba a Dioseʼex, uʼuyeʼex u tʼaan, pʼáateneʼex naatsʼ tiʼ letiʼ» (Deuteronomio 30:15, 19, 20).

«Táan in tsʼáaik ta táaneʼex utiaʼal ka a yéeyeʼex le kuxtal wa le kíimiloʼ, a bendecirtaʼaleʼex wa a maldecirtaʼaleʼex. Teʼex túuneʼ unaj a yéeyikeʼex le kuxtal[oʼ]» (Deuteronomio 30:19)

Dioseʼ bey tu beetiloʼ tumen tu jóoʼsaj le israelitaʼob yanoʼob kaʼach Egipto utiaʼal ka kuxlakoʼob ich kiʼimak óolal tiʼ le jatsʼuts luʼum aʼalaʼan u tsʼaʼabaltiʼoboʼ. Chéen baʼaleʼ utiaʼal u tsʼaʼabaltiʼob lelaʼ kʼaʼabéet kaʼach u yéeyikoʼob le kuxtaloʼ, utiaʼal leloʼ unaj u yaabiltikoʼob Dios, u yuʼubikoʼob u tʼaan yéetel maʼ u pʼatkoʼob.

Teʼ kʼiinoʼobaʼ láayliʼ unaj a yéeyik baʼax ken a beet yéetel a kuxtaleʼ. Utiaʼal a yéeyik a kuxtal minaʼan u xuul tiʼ junpʼéel Paraíso way Luʼumeʼ, unaj a beetik óoxpʼéel baʼal: a yaabiltik Dios, a wuʼuyik u tʼaan yéetel maʼ a kʼexik wa a pʼáatal naatsʼ tiʼ. ¿Baʼax táakaʼan ichil le óoxpʼéel baʼaloʼobaʼ?

Yáanal u nuʼuktaj Dioseʼ, apóstol Juaneʼ tu tsʼíibtaj: «Dioseʼ yaabilaj», lelaʼ letiʼe jatsʼuts modos maas ku yeʼesikoʼ (1 Juan 4:8). Jesúseʼ u yojel kaʼach lelaʼ, le oʼolal ka kʼáataʼabtiʼ máakalmáak le mandamiento maas nojochoʼ, letiʼeʼ tu yaʼalaj: «Kʼaʼabéet a yaabiltik Jéeoba yéetel tuláakal a puksiʼikʼal, yéetel tuláakal a kuxtal bey xan yéetel tuláakal a tuukul» (Mateo 22:37). Bey túunoʼ unaj k-meyajtik Dios tumen k-yaabiltmaj maʼ tumen saajkoʼon u beetiktoʼon wa baʼaxiʼ mix tumen bey kaʼansaʼabiktoʼonoʼ. Baʼaleʼ ¿baʼax péeksikoʼon k-yaabilte?

Le yaabilaj ku yuʼubik Dios yoʼolal wíinikoʼ bey jeʼex le ku yuʼubik le taatatsiloʼob yoʼolal u paalaloʼoboʼ. Letiʼobeʼ kex kʼebanoʼobeʼ ku yilik u kaʼansik u paalal, u líiʼsik u yóoloʼob, u yáantkoʼob yéetel u tsolnuʼuktikoʼob tumen u kʼáatoʼob ka xiʼik maʼalobil tiʼob yéetel ka yanak kiʼimak óolal tiʼob. ¿Baʼax ku páaʼtik le taatatsiloʼob tiʼ u paalaloʼoboʼ? Ka xan yaabiltaʼakoʼob, ka uʼuyaʼak u tʼaanoʼob yéetel ka u naʼatoʼobeʼ tuláakal baʼax ku yaʼalaʼal ka u beetoʼobeʼ utiaʼal u yutsiloʼob. Jéeoba, juntúul máax minaʼan u kʼebaneʼ,  láayliʼ u kʼáat ka k-yaabilt yéetel ka k-tsʼáa u diosboʼotikil le baʼax tsʼoʼok u beetik t-oʼolaloʼ.

Le Bibliaoʼ kéen u yaʼal «uʼuy tʼaan» yéetel «beet baʼax ku yaʼalikeʼ» junpʼéeliliʼ baʼax u kʼáat u yaʼale. Bey túunoʼ kéen aʼalaʼak tiʼ juntúul paal «uʼuy u tʼaan a taataʼobeʼ» u jaajileʼ táan u yaʼalaʼaltiʼ ka u beet baʼax ku yaʼalaʼaltiʼ tumen u taataʼob. U yuʼubaʼal u tʼaan Dioseʼ u kʼáat u yaʼal u kanik yéetel u beetik máak baʼax ku yaʼalik. Kex maʼ tu páajtal k-uʼuyik bix u tʼaan Dioseʼ, jeʼel u páajtal k-ojéeltik baʼax ku yaʼalik kéen k-xok yéetel kéen k-beet baʼax ku yaʼalik teʼ Bibliaoʼ (1 Juan 5:3).

Utiaʼal u yeʼesik u kʼaʼanaʼanil k-uʼuyik u tʼaan Dioseʼ, Jesúseʼ tu yaʼalaj: «Máakeʼ maʼ chéen yéetel waaj unaj u kuxtaliʼ, baʼaxeʼ unaj u kuxtal yéetel tuláakal baʼax ku yaʼalik Jéeoba» (Mateo 4:4). Kex kʼaʼanaʼan u janal máakeʼ, maas kʼaʼanaʼan u yantal tiʼ máak u naʼat Dios. ¿Baʼaxten? Le rey Salomón, juntúul máax jach anchaj u naʼateʼ, tu yaʼalaj: «Tumen jeʼex le naʼat ku kanáantik máakoʼ le taakʼin xanoʼ ku kanáantik máak» (Eclesiastés 7:12). U kaanbal máak tiʼ Dioseʼ jeʼel u yáantkoʼon bejlaʼeʼ yéetel jeʼel u yáantkoʼon xan k-yéey le bej ku bisik máak teʼ kuxtal minaʼan u xuuloʼ.

Teʼ xook máanoʼ tʼaanajoʼon tiʼ junpʼéel kettʼaan meyajnaj tiʼ Jesús, letiʼeʼ tu yaʼalaj: «U bejil le kuxtaloʼ nuʼutʼ yéetel nuʼutʼ xan u joonajil, le oʼolal maʼ yaʼab máaxoʼob kaxtikiʼ» (Mateo 7:13, 14). Utiaʼal k-xíimbal teʼ bejaʼ, ¿máasaʼ jach jeʼel u yáantkoʼon ka nuʼuktaʼakoʼon tumen juntúul máak jach u kʼaj óol u bejil le kuxtal minaʼan u xuuloʼ? Le oʼolaleʼ unaj k-pʼáatal naatsʼ tiʼ Dios (Salmo 16:8). ¿Bix jeʼel k-beetik lelaʼ?

Sáamsamal yaan baʼaloʼob k-beete yéetel uláakʼoʼobeʼ kex taak k-beetkeʼ maʼ tu béeytal. Yaan horaeʼ ku náayal k-óol tiʼ uláakʼ baʼaloʼob le oʼolal hasta minaʼan tiempo utiaʼal k-tuklik baʼax u kʼáat Dios ka k-beete. Le Bibliaoʼ ku yaʼalik: «Kanáanteʼex maʼ a máaneʼex bey máaxoʼob minaʼan u naʼatoʼobeʼ, baʼaxeʼ bey máaxoʼob yaan u naʼatoʼobeʼ. Ilawil u meyajteʼex tubeel le tiempo yaanteʼexoʼ tumen jach kʼasaʼan le kʼiinoʼobaʼ» (Efesios 5:15, 16). K-pʼáatal naatsʼ tiʼ Dioseʼ u kʼáat u yaʼal k-tsʼáaik yáax ichil k-kuxtal k-bisikba tu yéetel (Mateo 6:33).

Kex maʼ tu páajtal a kʼexik baʼax tsʼoʼok u yúuchul ichil a kuxtaleʼ, yaan baʼax jeʼel u páajtal a beetik utiaʼal u yantaltech junpʼéel jatsʼuts kuxtal yéetel a familiaeʼ. Le Bibliaoʼ ku yaʼalikeʼ Jéeoba, k-Taata yaan teʼ kaʼanoʼ, jach u yaabiltmoʼon le oʼolal ku yaʼaliktoʼon baʼax unaj k-beetik. Ilawil bix u yaʼalik le profeta Miqueasoʼ:

«Wíinik, Yuumtsileʼ tsʼoʼok u yaʼaliktech baʼax maʼalob. ¿Baʼax túun u kʼáat Jéeoba ka a beete? ¡Letiʼeʼ chéen u kʼáat ka a beet baʼax toj, ka a weʼes chúukaʼan óolal yéetel ka a beetaba humildeil tu táan Dios» (Miqueas 6:8).

¿Yaan wa a yéeyik a meyajtik Dios? Wa ka beetkeʼ yaan a kʼamik le jatsʼuts bendiciónoʼob ken u tsʼáa tiʼ tuláakal u amigoʼoboʼ. Bey túunoʼ, ¡ta kʼab yaan a kuxtal!